الصيد فى مصر

الصيد فى مصر (http://www.egyhunt.net/index.php)
-   بنادق ضغط الهواء ومتعلقاتها (http://www.egyhunt.net/forumdisplay.php?f=51)
-   -   الموضوع الشامل للمبتدئين (http://www.egyhunt.net/showthread.php?t=5244)

sayed allaa 11-02-28 09:57 PM

الموضوع الشامل للمبتدئين
 
الموضوع الشامل للمبتدئين


الموضوع ده ان شاء الله هيبقى فيه كل حاجة ان شاء الله للمبتدئين من الاول خالص حتى الاحتراف الموضوع ده انا عملته بالذات عشان بشوف ناس بتسأل اسئلة و هية ممكن يكون متجاوب عليها قبل كده و هما مش لقينها فالموضوع ده ان شاء الله هيبقى فيه كل حاجة بأمر الله عشان محدش يتوه و الموضوع ان شاء الله هيشمل كل حاجة في الصيد او اي حاجة بتخطر على بال المبتدئ
يلا نخش في الموضوع
انا دلوقتي مبتدأ ايه اول حاجة هفكر فيها ؟
اكيد طبعا البندقية . احنا كلنا او بلاش كلنا معظمنا لما جينا نبتدي الهواية الجميلة دي بدأنا بحجات خفيفة او حجات رخيصة او متوسطة عشان يتعلم او يجرب الموضوع و لو الواحد معجبهوش الموضوع او زهق منو ميزعلش على المبلغ اللي دفعو او ميخسرش فيه كتير
فدلوقي انا مبتدأ هفكر في ايه ؟؟
هفكر اجيب بندقية رخيصة عشان اجرب الموضوع او اتعلم
فأول حاجة هفكر فيها ايه اكيد طبعا البنادق المصري دي ارخص الانواع
- الرمسيس او المعادي
http://img6.imageshack.us/img6/8093/10947587.jpg


البندقية دي زي كل البنادق بتصطاد و المهم للصياد ان سلاحه يبقى قاتل مش مهم بقى السرعة و غيره و غيره
في الاول بتبقى شغالة و بعد كده الواحد بيكتشف اعطالها الكتير و اشهرها ان الزناد بيضرب لوحدة بعد حوال 5 ثواني و ده عيب خطير جدا ممكن يحصل بسببه كارثه و العيب التاني ان البندقية الرشة مبتخرجش من الماسورة الا بعد لما تضغط على الزناد مرتين او تلاتة
بس هية مش بطالة و بتصطاد و فيه ناس بتستعملها بس طبعا بعد تصليح او تعديل و شغالين بيها زي الفل
دي سعرها كان قبل القلق اللي حصل في مصر و الاسعار دي الاسكندرية و انا اللي سألت على السعر بنفسي الاسعار :
نمرة 1 ب 500 جنيه
نمرة 2 ب 600 جنيه
طبعا عيا 4.5 يعني نمرة 1 و عيار 5.5 يعني نمرة 2
خلصنا الرمسيس
بص يا سيد انت الصراحة خوفتني منها هية سعرها اه مغري بس انت خوفتني اوي من مشاكلها طب متعرفش نوع تاني و يكون مناسب للمبتدئين ؟؟
طبعا المقصود ببندقية مناسبة للمبتدئين
يعني بندقية خفيفة و سعرها رخيص عشان يتعلم عليها عشان اكيد في الاول الواحد مبيبقاش عنده خبرة و بيبهدل البندقية
البندقية التانية اللي المبتدئ بيفكر فيها البندقية الصيني
غالبا كله بيفكر في الشنجهاي
الشنجهاي b3 بالتحديد
البندقية دي المشهورة و اكتر واحدة متواجدة من فئة الشنجهاي
و دي انواعها
b3-1
http://img141.imageshack.us/img141/9656/b31m.jpg
شكلها حلو دي يا سيد طب ايه مواصفتها و سعرها ؟؟

السرعه
عيار 4.5 : 560 قدم : 170 متر
عيار 5.5 : 420 قدم : 128 متر
الطول : 103 سم
الوزن : 3.5 كيلو جرام
و السعر يتراوح بين 600- 700 جنيه
و فيه دي كمان

B3-2
http://img684.imageshack.us/img684/6169/b32x.jpg

طيب دي شكلها احلى طب برده قولي مواصفتها و سعرها ؟؟
السرعه
عيار 4.5 : 560 قدم : 170 متر
عيار 5.5 : 420 قدم : 128 متر
الوزن : 3.6 كيلو جرام
الطول : 104 سم
يعني شبه b3-1 تقريبا
و سعرها بين 700-800 جنيه
بعد كده المبتدأ بيبتدي يتحمس اكتر و عايز يعرف انواع اكتر او بيخاف من الصيني عشان سمعته
(الشنجهاي مش وحشة ) بس هوة مبيبقاش عارف عشان لسة في البداية هوة بيفكر على اساس ان الصيني عامتا منتجاته وحشة
طب و بعدين فيه ايه غير دول يا سيد و برده سعره يكون حلو و حلو كبداية يعني ؟؟
في بقى الحجات الحلوة ( الاسباني - التركي )
طب دول اسعارهم عاملة ازاي بس متكونش حاجة قوية اوي انا عايز حاجة حلوة كده عشان البداية و بعد كده هبقى افكر في المدافع ؟؟
يبقى الحجات اللي قوتها متوسطة و سعرها معقول
عندك النوريكا / الجامو / كرال التركي
طيب قولي على كل واحدة فيهم
نبتدي بالنوريكا
النوريكا 56
http://img143.imageshack.us/img143/1250/55759513.jpg

شكلها معقول يا سيد طيب دي ايه مواصفتها و سعرها ؟؟
السرعة 150 م/ث
و السعر ب حوالي 900 جنيه يزيد او يقل
طيب فيه ايه غير ال 56 دي ؟؟
فيه بقى
بص كنصيحة ال 56 و 61 دول انا اخر مرة كلمت الراجل البياع قالي بص يا باشا ال56 و 61 راحت عليهم خلاص و مبقناش بنجيبهم عشان محدش بيطلب اي نوع منهم
المهم نرجع لموضوعنا انا نصيحتي ليك انك تجيب
النوريكا سبورت
http://img576.imageshack.us/img576/4485/56837451.jpg
البندقية دي 100 100
ايوة يا سيد شكلها حلوة و شيك طب دي ايه سرعتها و سعرها وصل كام ؟؟
سرعتها 160م/ث
و السعر حدود 1250 - 1300 جنيه
و البندقية دي بنشنكاه فوسفوري
حلوة اوي دي طب فيه ايه تاني
فاضل بقى الجامو
في جاموياية حلوة كذا واحد بيشكر فيها و قوتها متوسطة و حلوة ليك
طب ايه هية ؟؟
الجامو شادو 640
http://img703.imageshack.us/img703/6039/640q.jpg
اه يا سيد الموضوع بدأ يحلو
طب دي ايه مواصفتها ؟؟
دي سرعتها 168 م/ث
و سعرها 1350 - 1400 جنيه
دي الحجات الاسباني المتوسطة القوى
نيجي بعد كده للتركي
البندقية دي بجد رهيبة و سعرها تحفة
الكرال التركي الفايبر الاسود
http://img842.imageshack.us/img842/8369/14231974.jpg
طب دي ايه سرعتها و سعرها ؟؟
دي سرعتها 240 م /ث
و سعرها 900 -1000 جنيه
ووزنها 2.9 كيلو جرام و ده اللي عاجبني فيها
كمان رد فعلها معقول بالنسبة لقوتها
و فيه بقى الكرال التركي الفايبر باللون البني
http://img51.imageshack.us/img51/1264/31048128.jpg
حلوة دي و شكلها احلى طب دي ايه مواصفتها ؟؟
نفس مواصفات السودة دي بس الوان
بس السعر يختلف
1000-1100 جنيه
الكرال التركي الخشب
http://img87.imageshack.us/img87/239/89680342.jpg
برده نفس المواصفات بس فرق الخامة
دي خشب خشب و انصحك بيها
احسن بكتير دي عندي البندقية دي على فكرة
و سعرها 1200-1400 جنيه
فيه بقى الكرال التركي اللي بعتلة برده نفس المواصفات
دي السودة
http://img823.imageshack.us/img823/5779/24225856.jpg
و دي الخشب
http://img714.imageshack.us/img714/4444/23995348.jpg
و دي سعرها يتراوح بين 1400 - 1600 جنيه
دي الكرال اللي بعتلة و منصحش بيها عشان الصراحة قطع غيارها مش متوفرة و صيانتها اصعب من الكسر
دي البنادق اللي انت تفكر فيها لو انت مبتدئ بعد كده بقى البنادق الهاي بور القوية للمحترفين و اللي منصحكش بيها
اه تمام
طب ممكن كده بس تقولي عليها يعني بداف الفضول
البنادق الهاي بور دي ( الكرال التركي تعتبر بدايات الهاي بور - البام 22 -النوريكا في انواع منها كده معينة هقولهالك بعدين - الجامو في برده انواع منها - الديانا ) طبعا مش دول كلهم بس دي الحجات المنتشرة شوية في مصر
دي اسعارها من 1000 - 8000 تقريبا
و سرعتها طبعا عالية ممكن توصل ل 290 او 300 متر / الثانية و يمكن اكتر كمان
(السرعات دي لنمرة 2 )
يلا مش مشكلة انت مش محتاجها دلوقتي بس هوريك كده مقتطفات سريعة و صور خفيفة كده على السريع
دي الكرال التركي
http://img842.imageshack.us/img842/8369/14231974.jpg
البام 21 و دي تقليد الاير كينج الديانا 52/48 و ممكن بعد كده تتغير سوستتها و الجلبة بجلية و سوستة الديانا
http://img197.imageshack.us/img197/1250/69523392.gif
النوريكا كويك
http://img808.imageshack.us/img808/4341/21873409.jpg
GAMO CFX ROYAL
http://img20.imageshack.us/img20/6802/gamocfxroyal.jpg
الديانا 54
http://img824.imageshack.us/img824/5584/54airking.jpg

طيب تمام كده يا سيد
انت كده قولتلي على البنادق و سرعتها و اسعرها و انا قررت هشتري ايه انا هشتري .......... طب دلوقتي اجيبها منين
فين يعني المحلات
بص يا .......... هية دي اماكن و ارقام تيليفونات المحلات
http://www.egypthunt.net/showthread.php?t=2175
تمام يا سيد انا كده شوفت المحلات و كلمتهم و نزلت اجيب ..........
و بالفعل جبتها دلوقتي بقى ايه يا سيد ناقص ايه
- اكيد طبعا ناقص رش ههههههههه
ولا اول لما تيجي تصطاد الحمام هيشوف البندقية و هيموت من الخوف ههههههه
بص بقى على انواع الرش
الرش المصري
http://img543.imageshack.us/img543/5922/19808298.jpg
ده اسمو باين عليه
اسمو رش الرماية
ده تقريبا احسن رش هوة و المارسمان المصري
رش الرماية ب 3-3.5
رش المارسمان 4-5
هوة المارسمان اغلى بس انا بقول الرماية احسن من المارسمان حاليا
في الاول المارسمان كان احسن
يلا مش مشكلة كل واحد يستعمل الرش اللي يريحو
و فيه برده رش عين شمس و ده اسوء رش في السوق
بعد كده نخش على الاسباني
زي الجامو و ده احسن رش في السوق
سعره من 20 - 25 للعلبة اللي فيها 250 رشة
و دي انواعه
الجامو ماجنوم
http://img703.imageshack.us/img703/3931/79274325.jpg
الجامو ماتش
http://img717.imageshack.us/img717/7710/50385572.jpg
الجامو هانتر
http://img843.imageshack.us/img843/1271/55681949.jpg
دول اكتر انواع من الرش عليها اقبال
طبعا في انواع تانية كتير بس دول يعني اللي عليهم اكبر اقبال
طيب تمام يا سيد استعمل انهو واحد
بص يا سيدي لو انت عندك بندقية هاي بور نمرة واحد زي مثلا النوريكا جيت دي سرعتها تعدي 300 متر / الثانية
يبقى تستعمل رش اختراقه قليل زي كده رش الجامو ماتش بص كده على راس الرشة شكلها عامل ازاي
اظن انت فهمت
لو بقى عندك بندقية متوسطة القوى يبقى تستعمل رش اختراقه عالي
زي الجامو ماجنوم بص برده على راسه عاملة ازاي
عاملة زي راس السهم
اظن برده انت كده فهمت
خلاص كده يا سيد انا فهمت دلوقتي انا جبت الرش .......... لبندقيتي ............
فاضل ايه
فاضل بقى شوية اكسسوارت كده
زي الجراب
http://www.airgunsofarizona.com/BSA%...w%20Deluxe.gif
ده سعرو يتراوح بين 70 - 150 جنيه
فاضل بقى السكوبات بس مش هقولك دلوقتي عليهم
انا عايزك تتعلم النشان كده في الاول و تبقى متمكن بعد كده اعملي بقى قناص
انت بتتكلم صح ماشي فاضل ايه تاني
انا كده جبت البندقية و الرش و الجراب هجيب ايه تاني
لا مفاضلش الا حاجتين
1- تتعلم النشان طبعا هههههههه
http://games.graaam.com/files/1293037865sniper.jpg
طبعا انت بتفضل تضرب في النص و تنشن و برده الرشة مبتجيش في الهدف
طب و بعدين هية كده البندقية بايظة ولا ايه
لالالالا
انت لازم الاول تظبط النيشان
طب ده اظبطه ازاي يا سيد
بص هية سهلة اوي و انا هقولك على طريقة شوفتها و جربتها و النشان متعبنيش و اتظبط بسرعة
تمام
تمام
طب قولي ازاي
بص يا سيدي
انت عندك بكرتين فوق النشان الخلف صح
اه
الاولى هتلاقيها طالعة من الجمب و التانية فوق النشان تمام
تمام
دلوقتي انت هترسم في ورقة خط بالطول و في ورقة تانية ترسم خط بالعرض
دلوقتي تضرب على الخط اللي بالطول
و تضرب حوالي 10 رشات ولازم ايدك تكون ثابتة و لو حسيت انها اتهزت في رشة متحسبهاش و تضرب تاني
و بعد كده ممكن تلاقي الرش كله جه يمين الخط او شماله او ممكن عليه و تكون مظبوطة هههههههه و يبقى حظ
المهم لو الرش جه يمين الهدف يبقى تلف البكرة الجانبية شمال لفتين و تجرب تاني و تفضل كده لغاية لما تيجي الرشة على الخط بالظبط تمام و العكس لو جت الرشة شمال الهدف يبقى تلف البكرة يمين و تفضل كده لغاية لما تتظبط
و بعد كده تجيب الورقة اللي الخط فيها بالعرض و تضرب فيها 10 رشات لو الرش كان بيجي فوق الخط يبقى تنزل النشان تحت بأنك تربط او تلف البكرة اللي فوق النشان اللي هية الكبيرة تلفها نحية اليمين
تمام لغاية لما تتظبط
و العكس برده صحيح لو انت ضربت و الرش جه تحت الخط يبقى تفك البكرة تلفها شمال
صح كده تمام بس على فكرة انا نسيت اقولك حاجة
مينفعش مثلا تيجي تظبط النشان على مسافة قليلة زي 5 متر مثلا
لو ظبطت النشان على المسافة دي هتلاقي البندقية نشانها مظبوط و بتضرب تمام بس على مسافة 5 متر لغاية 10 متر بعد كده مبتجبش صح
لو عاوز تظبط النشان تظبطه على 10 - 15 متر دي احسن مسافة لو بندقيتك متوسطة
يبقى هتجيب بالظبط ده 10 متر لغاية 40 متر او 30
لكن لو بندقيتك هاي بور هتجيب تمام لغاية 50 متر
بس مين بيشوف بقى
الله يسامحه الكمبيوتر ده على حسب شغلي كله جرافيك ووجع دماغ
اه يا سيد تمام ظبطه و بعدين و خليك في الموضوع جرافيك ايه احنا بنتكلم في الصيد
فاضل ايه تاني !!!!!!!!!!!!!!
طب بتزعق ليه
فاضل انك تصطاد !!!!!!!!!!!!!!!
http://www.syadh.com/vb/imgcache/21147.imgcache.jpg
هههههه
بس كده ممكن اول مرة تنزل تصطاد تلاقي نتايج غير مبشرة او ممكن تلاقي صيد وفير
بس انا بقول اهو
ممنوع ممنوع ممنوع
صيد الطيور التى لا تؤكل
كالصقور والطيور التى لها دور بيئي هام كابو قردان عشان حرام جدا يا جماعة
برده لما تيجي ان شاء الله تصطاد مش تنزل تصطاد ب 60 و 50 حرام ده كده صيد جائر
انت بس تصطاد اللي يكفيك يوم او اتنين ان شاء الله
و كمان احب انوه لنقطة مهمة جدا
لما تيجي ان شاء الله تصطاد
لو الطريدة وقعت حية و انت وصلتلها حية يعني كانت عايشة ساعت لما انت وصلتلها يبقى وجب ذبحها و لم مذبحتهاش يبقى مينفعش تاكلها
لا يجوز
و لو الطريدة وقعت حية و عقبال ما انت وصلتلها كانت ماتت يببقى حلال اكلها
بس لازم قبل ما تضرب تقول ( بسم الله و الله اكبر ) عشان لو الطريدة و قعت بعيد و انت ملحقتهاش و ماتت يبقى اكنك ذكتها
و لو نسيت تسمي يبقى مش مشكلة
و فيه حاجة كمان اسمها نية التسمية
يعني لو انت كان في نيتك تسمي بس نسيت برده حلال اكلها
تمام طيب يا سيد كده الاول هنزل اصطاد فين و هنزل في انهو وقت ؟؟
بص اي مكان فيه حدائق او ارياف ده بتلاقيه مليان طيور
تمام طيب انزل الساعة كام
الساعة 6.30 تكون في الشارع
بس كده عايز حاجة تاني
لالا يا سيد انت كده تمام يلا بقى نزل الموضوع على موقع الصيد في مصر عشان الناس المبتدئين اللي زي حلاتي كده يلاقوا كل اللي هما عايزينه ان شاء الله في الموضوع
خلاص من عنيا الجوز و مناخيري اللوز
بس كده احنا خلصنا
لو الصور مشتغلتش يبقى لازم تسجل في
http://my.imageshack.us/registration/
التسجيل فيه سهل و مجاني
الموضوع غير منقول و خاص بمنتديات الصيد في مصر و غير مسموح بنقله
ارجو التثبيت

jamayka 11-02-28 10:14 PM

رد: الموضوع الشامل للمبتدئين
 
بصــــراحة شديدة ....
مش لاقى تعليق اوصف بيه المــــــــوضوع ولا عارف اوصف الطريقة الجميلة اللى وضحت بيها حاجات كتير يعنى لو واحد مر على الموضوع مرور الكرام كده هيقراه هيقراه ... ربنا يبارك فيك و نورت المنتدى بوجودك و بمواضيعك

sky.line_2010 11-02-28 10:15 PM

رد: الموضوع الشامل للمبتدئين
 
السلام عليكم
بسم الله ما شاء الله موضوع رائع وفى منتهى الجمال واتمنى لك التوفيق وكمان ليا الشرف انى اكون اول واحد يرد على الموضوع وارجو التثبيت

بدر 11-02-28 10:15 PM

رد: الموضوع الشامل للمبتدئين
 
الاخ الكريم
حقيقى اعجز عن اى كلام اعبر بة عن امتنانى وشكر الاعضاء عن هذا المجهود
جزاك الله خيرا

sayed allaa 11-02-28 10:17 PM

رد: الموضوع الشامل للمبتدئين
 
شكرا يا جماعة على المرور و المشاركة
و شكرا على الكلام الجميل ده

jamayka 11-02-28 10:18 PM

رد: الموضوع الشامل للمبتدئين
 
اقتباس:

المشاركة الأصلية كتبت بواسطة sky.line_2010 (المشاركة 50600)
السلام عليكم
بسم الله ما شاء الله موضوع رائع وفى منتهى الجمال واتمنى لك التوفيق وكمان ليا الشرف انى اكون اول واحد يرد على الموضوع وارجو التثبيت

شوفت بقى سبقتك و طلعت انا اول ماحد يرد عالموضوع

khaledabdelnaby 11-02-28 10:24 PM

رد: الموضوع الشامل للمبتدئين
 
بجد يا أ/ سيد ربنا يباركلك على الموضوع الممتاز ده انا عضو جديد ومكنتش اعرف حاجة عن البنادق بس حسيت انك قاعد معايا فعلا ( وعلى فكرة انت دمك خفيف جدا يا ابو السييييد )

بس سؤال كده فى السريع انا عملت كل اللى انت قلت عليه وعايز اجيب اسكوب عشان انا راجل بنظارة ونظرى على قدى شوية اعمل ايه

memo2224 11-02-28 10:28 PM

رد: الموضوع الشامل للمبتدئين
 
بجد موضوع روعه مشكور مشكور على المجهود الرئع ده

sayed allaa 11-02-28 10:29 PM

رد: الموضوع الشامل للمبتدئين
 
اقتباس:

المشاركة الأصلية كتبت بواسطة khaledabdelnaby (المشاركة 50604)
بجد يا أ/ سيد ربنا يباركلك على الموضوع الممتاز ده انا عضو جديد ومكنتش اعرف حاجة عن البنادق بس حسيت انك قاعد معايا فعلا ( وعلى فكرة انت دمك خفيف جدا يا ابو السييييد )

بس سؤال كده فى السريع انا عملت كل اللى انت قلت عليه وعايز اجيب اسكوب عشان انا راجل بنظارة ونظرى على قدى شوية اعمل ايه

الله يخليك يا استاذ خالد ده بس من زوقك
لو عايز سكوب على حسب البندقية مثلا يعني مثلا كده
لو انت عندك بندقية رمسيس و عايز تجيبلها سكوب
مش هتجبلها سكوب 3-9*50 ده مثلا اللي 700 ولا 800 جنيه
صح
عشان البندقية اساسا ب 500 ولا 600 جنيه
على حسب السكوبات عامتا بتبتدي من 100 جنيه لغاية 800 جنيه لل 3-9-50
و لو عايز تجيب واحد كلم الاستاذ هشام سمير
و هوة هيساعدك تجيب واحد ان شاء الله
بس الاحسن في البداية تتعلم على النشان و تتمرن
عشان التيليسكوب هيتعبك شوية اذا كان في ظبطه ولا في الضرب بيه
فيه ناس جابته و بعد مده فكته و ضربت بالنشان
بس طبعا برده مش اي بنادق اللي بيتركب برده عليها السكوب
يعني البنادق الهاي بور
عشان انت اساسا البنادق المتوسطة مداها قليل و انت عايز تصطاد من بعيد يبقى ازاي ؟؟
فهمتني يبقى الاحسن بندقية هاي بور بس مش قوي يعني زي التركي مثلا دي حلوة ليك كبداية
و عليها سكوب 3-9*40 كده تمام

Consul 11-02-28 10:31 PM

رد: الموضوع الشامل للمبتدئين
 
بارك الله فيك أخي الحبيب الأستاذ سيد لوز...دمك شربات وزي العلاء...آسف حبيب قلبي...أستاذ سيد علاء...دمك شربات وزي اللوز...مشكور على هذا الشرح المبسط والسلس وهذه المعلومات المفيدة الجميلة والرائعة...جزاك الله عنا كل خير...وجعله في ميزان حسناتك...وفي إنتظار المزيد من دروسك الجميلة الشيقة الخاصة المجانية...وأرجو أن يقرأها الأخوة الأعزاء المبتدئين جميعا حتى تعم الفائدة وارجو أن يثنوا عليك ويباركوا مجهودك ويحذوا حذوك في إبتكار مواضيع جديدة تفيدنا جميعا...أكرر شكري وتقديري لروحك الحلوة الجميلة وتفانيك في هذا العمل لخدمة إخوانك في هذا المنتدى...خالص تحياتي وتقديري وإحترامي...


الساعة الآن 09:45 AM

Powered by vBulletin® Copyright ©2000 - 2017, Jelsoft Enterprises Ltd. TranZ By Almuhajir