الصيد فى مصر

الصيد فى مصر (http://www.egyhunt.net/index.php)
-   الصيد العام (http://www.egyhunt.net/forumdisplay.php?f=1)
-   -   الموضوع الشامل عن صيد اليمام ودجاج الماء ليلا (http://www.egyhunt.net/showthread.php?t=29886)

القبطان المصرى 77 12-06-09 09:07 PM

الموضوع الشامل عن صيد اليمام ودجاج الماء ليلا
 

بسم الله الرحمن الرحيم
السلام عليكم ورحمة الله وبركاته
اخوانى الساده المحترمين
ادارى واعضاء منتدانا الجميل
جميعنا نعلم ان هناك صيدا للاسماك ليلا
ولكن القليل منا هو من يعلم ان ايضا هناك صيدا للطيور ليلا
وهناك من الصيادين من ييعلم ولكن يخاف الخروج للصيد ليلا
برغم انه ليس هناك داعى للخوف اصلا
وهناك من الصيادين من يهوى الصيد نهارا وفقط
وهناك من الصيادين من يهوى الصيد ليلا ونهارا
وانا العبد الفقير الى الله من النوع الاخير
اصيد ليلا ونهارا
ويشرفنى ان اقدم لكم اليوم موضوعا شاملا ومتكاملا عن الصيد ليلا
وهو صيد الطيور طبعا وليس الاسماك
وبالاخص اليمام ودجاج الماء
http://www12.0zz0.com/2012/06/09/18/103289948.jpg
وعلى مأعتقد ان هذا هو اول موضوع ينشر على النت عن صيد الطيور ليلا
وارجو ان ينال الموضوع اعجابكم واعجاب الساده ادارى المنتدى الكرام
واشهد الله ان هذا الموضوع من اعدادى وبمجهود شخصى هديه منى الى منتدانا الغالى
وقد قمت بتصوير كل شىء باستثناء بعض الصور القليله من النت
لتكامل الموضوع لانى لم استطع تصوير كل شىء
وباقى الصور من تصويرى
وعلى بركة الله نبدأ
اولا وقبل كل شىء هناك بعض الصيادين يعتقدون ان الصيد ليلا حرام مستندين فى ذالك الى الحديث اللذى يقول
لاتأتو الطيور فى اوكارها ليلا
فأحب ان اطمن الجميع
فهذا الحديث مكذوب على النبى صلى الله عليه وسلم
وهذا هو الدليل
هذا الحديث مكذوب عن النبي صلي الله عليه وسلم فلا تعتبروا له
فتوي موقع الشيخ بن عثيمين
http://www.ibnothaimeen.com/all/noor/article_7094.shtml
تعالو بقى ندخل فى الجد
اولا
مميزات الصيد الليلى
1-الاستمتاع بالهواء النقى الطلق اثناء الصيد وبالذات فى الصيف
2-ممكن تصطاد بأى بندقيه معاك حتى ولو ضعيفه لأن اكبر مسافه ممكن تضرب عليها على الاشجار بالليل هى 20 متر تقريبا
والافضل يكون صوتها واطى على قد ماتقدر
3-مش هايعطلك عن شغلك. يعنى مش محتاج انك تسيب شغلك او تهمل شغلك عشان تمارس هوايتك
4-مش هاتعانى من حرارة الشمس المفرطه ولهيبها
5-مش هاتجرى ورا اليمامه وتتحايل عليها عشان تتستناك لما تضربها وممكن تدوخك وفى الاخر برده ماتعرفش تجيبها وتطلعلك لسانها وتجرى
واظن ده بيحصل معانا كتير
هههههههههههههههههههه
6-مش هاتمشى كتير لان معظم الصيد هايكون على الواقف
7-هاتنشن براحتك خااااااااااااالص من غير استعجال وخوف ان اليمامه ممكن تطير
8-الصيد الوفير فى اقصر وقت واقل مجهود سعات ربنا بيكرمنا
وبنجيب بالــ 30 الحمد لله انا وصديق ليا فى ساعتين او ثلاثه
ولو فى الغيطان فى موسم القمح ممكن 40 و50

ثانيا

عيوب الصيد الليلى
تقريبا مفيش عيوب خالص وعن تجربه
ده من وجهة نظرى طبعا

ثالثا

مواعيد الصيد الليلى او الايام المفضله
1-كللللللل الايام ممكن تخرج فيها للصيد ماعادا طبعا ايام التكاثر اللى بيكون اليمام فيها نايم على صغاره او بيضه
وايضا من الافضل تجنب الايام القمريه ( اللى القمر فيها بيكون مكتمل )وهى ثلاثه ايام
لأن فى الايام القمريه اليمام بيكون قلقان وشايف حركاتك كلها كأنك بالنهار وممكن يطير من قبل ماتدخل على الشجره
2-الايام الممطره وشديدة البروده جيده للصيد الليلى
3-الايام المظلمه جدا وحالكه السواد بيكون الصيد فيها فى منتهى الروعه
لأن اليمام بيكون فى منتهى الهدوء
رابعا
اماكن تواجد اليمام ليلا
جميع اماكن تجمعات الاشجار
او الاشجار الكبيره المنفرده
واليمام تقريبا بينام على كل انواع الاشجار
ولكن الشجر المفضل عند اليمام للنوم
بالترتيب
شجر التوت
شجر الليمون
شجر الفيكس
شجر الجوافه
شجر الصفصاف
شجر الجزورين
وطبعا مش هاننسى جناين الفاكهه
خامسا
نيجى بقى للسلاح
قلنا قبل كده ان اليمام بيكون واقف ليلا على اشجار بارتفاعات 4 متر و6 و8 و10 لغاااااااااية 20 متر فى بعض الاشجار العاليه مثل الجزورين والصفصاف
وطبعا الارتفاعات دى كلها اى بندقيه بتجيبها بسهوله حتى ولو بندقيه ضعيفه بس المهم تكون دقيقه
يعنى حتى لو ظروفك مش ولا بد ومعاك بندقيه صينى من ام 300 جنيه برده هاتعرف تمارس هوايتك وتصطاد
يعنى بأى سلاح هاتصطاد هاتصطاد المهم يكون سلاحك دقيق
انا باصطاد بالاسلحه دى
سواء بندقيه bsa هاى باور سرعه 240 متر فى الثانيه
http://www13.0zz0.com/2012/06/09/18/855756383.jpg
او بندقيه متوسطة القوى نوريكا 61.. سرعه 170 متر فى الثانيه
http://www13.0zz0.com/2012/06/09/18/250683563.jpg
او حتى بندقيه صينى عاديه سرعه 125 متر فى الثانيه
http://www13.0zz0.com/2012/06/09/18/127225121.jpg
او الكرال سرعتها 240
http://www13.0zz0.com/2012/06/09/18/385876906.jpg
سادسا
واحد يقول طيب ازاى ياعم انت هانصطاد بالليل وهانشوف ازاى انت هاتخترع ولا ايه
حاضر ياباشا هاقول لحضرتك بس ماتزعقش كده ومن غير ضرب لو سمحت
هههههههههههههه
بص ياكبير
الشئ المهم جدا جدا فى الصيد اليلى
الكشاااااااااااف
وده طبعا متوفر فى كل محلات الاسلحه
وفيه كشافات شاحن محترمه بتبدأ من 120 جنيه لغااااااية تقريبا 400 وبها بطاريه داخليه للشحن من التيار الكهربى
ده بالنسبه للالى امكانياته الماديه كويسه
ودى بيكون نورها كويس جدا فى الصيد
هايرد عليا واحد ابن حلال غلبان زى حلاتى ويقول
يانهاااااااااااار اسود هادفع 120 او 200 جنيه فى كشاف؟
لا ياعم مش لاعب
ههههههههههههه
هاقولك ياعم هات كشاف عادى من ابو حجاره
بس ده بيكون ضعيف وكل ماتطلع تصطاد هاتجبله بــ10 جنيه حجاره فى كل طلعه صيد
وده طبعا هايكون مكلف جدا زائد ان نوره بيضعف تقريبا بعد ساعه او نص ساعه
هاتقوللى لألألألألألألألألألألألأ سيبك منه الكشاف ده
هاقولك خلاص ياعم ماتزعلش تعالى اقولك على فكره حلوه ورخيصه انا باصطاد بيها
هاتجيب الكشاف الاستانلس ابو 10 جنيه ده اللى هو بياخد حجرين زى اللى فى الصوره ده وياسلااااااام لو لقيت ابو تلاته حجاره اللى هو طويل شويه عشان ده اللمبه بتاعته قويه شويه عن الكشاف ابو حجرين
او اى كشاف من الانواع دى وسعرهم مابين 10 او 20 جنيه
http://www12.0zz0.com/2012/06/09/18/809243962.jpg
او هات اى كشاف عادى يعجبك انت يكون بيشتغل بالحجاره بس المهم يكون بلمبه واحده مش اللى هو متعدد اللبمات

ويكون رفيع عشان لما هاتيجى تضرب هاتمسكه هو والبندقيه فى ايدك الشمال
وتجيب متر سلك كهرباء طرفين
وتفتح الكشاف من الخلف وتلحم طرف سلك من الطرفين فى مؤخرة اللمبه بتاعة الكشاف
والطرف التانى فى جسم الكشاف من الداخل
وهايبقى الكشاف بالشكل ده
http://www12.0zz0.com/2012/06/09/18/805284316.jpg
وهاتشترى بطاريه كاسيت 6 فولت صينى او ماليزى بــ 25 جنيه من عند اى حد بتاع الكترونيات
زى الى فى الصوره دى
http://www12.0zz0.com/2012/06/09/18/580258248.jpg
ودى مش تقيله على فكره هى وزنها تقريبا 1 كيلو ولما تحطها فى جراب وتعلقها فى كتفك مش هاتحس بيها
وهاتروح لأى مهندس بتاع تلفزيونات وتقوله عايزك تعملى دايرة شحن للبطاريه دى وتوريهاله
هاتكلفك 15 او 20 جنيه
زى اللى فى الصوره دى
http://www13.0zz0.com/2012/06/09/18/958992152.jpg
ودايرة الشحن بيكون طالع منها سلكين واحد سالب وواحد موجب
خلى المهندس اللى هايعملك الدايره يعمل سلك الموجب لونه احمر عشان لما تيجى تشحن البطاريه هاتحط سلك الموجب فى الريشه بتاعة البطاريه اللى عليها علامة زائد والسلك التانى فى السالب
وبكده دى هاتعيش معاك كتيييير اوى ونورها بيكون كويس ومش مكلفه
يبقى المجموع كله كاااااام ياباشا؟
50 او 55 جنيه بالكتير
بس هاتعيش معاك كتيييييييير اوى
وكل ماتيجى تخرج للصيد هاتحطها فى الكهربه حوالى اربع او خمس سعات قبل الخروج للشحن
وبتجبلها جراب صغير كده تحطها فيه وتعلقها فى كتفك وبيكون فيها اتنين ريشه من الاعلى بتركب فى كل ريشه طرف سلك من السلكين بتوع الكشاف
ونورها بيكون قوى جدا ومش هاتكلفك حاجه تانى
والاحسن طبعا تركب عليها الكشاف الطويل ابو تلاته حجاره احسن عشان زى ماقلنا اللمبه بتاعته اقوى
بس المشكله انك ممكن متلاقيهوش لكن ابو حجرين بيقضى الغرض برده
والبطاريه دى بقى لما تشحنها ممكن تفضل معاك ونورها كويس لمدة من 5 الى 7 سعات
وده كتيييييير وجميل اوى
ودى صورتها هى والكشاف
http://www12.0zz0.com/2012/06/09/18/874924414.jpg
وفيه دلوقت كشافات شاحن نازله جديد ليزر الكشاف بـ20 جنيه
بس ده مشكلته ان اخره معاك ساعتين وبيخلص
ودى صورته اللى هو الازرق فى وسط الكشافات
http://www12.0zz0.com/2012/06/09/18/809243962.jpg
سابعا
كده احنا جاهزين للصيد
هانعمل ايه بقى
انت كل اللى عليك هاتشحن البطاريه كويس اوى قبل الخروج وتسيبها على الشاحن حوالى 5 سعات
وطبعا لما تيجى تشحنها تفك السلكين بتوع الكشاف من البطاريه وتحط مكانهم السلكين بتوع الشاحن
وبعد ماتشحن ركب الكشاف فيها تانى
انسب الاوقات للصيد
وانسب وقت للخروج بالليل والصيد بيكون من الساعه 8 مساء فى الشتاء لغااااااااااية الصبح لو انت عاوز
وفى الصيف من 10 مساء لغاااااااية الصبح برده لو انت عاوز
والمواعيد دى مش اجباريه
انت ممكن تخرج فى اى وقت يعجبك بالليل
لكن دى احسن مواعيد
وطبعا انت بتكون محدد المكان اللى هاتروحه قبلها وعارف اماكن تواجد الاشجار فين
ولو معاك عربيه اركنها قبل الشجره اللى هاتدخل عليها بخمسين متر مثلا عشان نور العربيه مايهيجش اليمام ويطير
وامشى براحه وماتعملش دوشه وانت داخل على الشجره
واول ماتوصل تحت الشجره هاتقوم رافع الكشاف لفوق على فروع وجزوع الشجره وتشغل النور
بالشكل ده
http://www12.0zz0.com/2012/06/09/18/853579571.jpg
وساعتها لو موجود اى يمامه او اى طائر هاتشوفه بسهوله جدا جدا وساكن ومسلم ومستنيك
وبيقولك اضربنى يامعلم
وكل اللى اليمام هايعملو هو انو هايغمى عليه من الخضه اول مايشوفك
هههههههههههههه
لانك بمجرد مابتضرب الكشاف فى وش اى طائر بيصاب بعمى مؤقت ومش بيشوف ولا بيطير وبيثبت مكانه
زى اللى فى الصوره كده
http://www12.0zz0.com/2012/06/09/18/568700316.jpeg
هى فى الصوره واقفه على مسافه قريبه جدا لكن فى الواقع هاتكون ابعد شويه
يعنى معاك من 4 متر الى 25
على فكره سعات كتير بيكون واقف على الشجره الواحده اكتر من 10 يمامات ممكن تضرب منهم 3 او 4 والباقى بيطير طبعا بعد كذا رشه
وكل مالبندقيه هايكون صوتها واطى كل ماهتنزل من الشجره الواحده عدد اكبر
وبرده انت ورزقك يعنى ممكن تلاقى على الشجره يمامه واحده
ممكن اتنين ممكن تلاته
ممكن متلاقيش على الشجره دى حاجه خالص عادى ساعتها هاتشوف شجره غيرها
ولو مشفتش حاجه اول ماتنور فى الشجره من تحت لف حوالين الشجره من كل اتجاه ودور كويس على حاجه ممكن تكون مستخبيه
وخليك حريص على قد ماتقدر ومتوجهش الكشاف ناحية جسمك او جسم الشخص اللى معاك عشان كده ممكن اليمامه تشوفك بسهوله وتطير
ولو لقيت يمامه هاتمسك الكشاف على كف ايدك الشمال وفوق الكشاف تحط ماسورة البندقيه
وتمسك الاتنين مع بعض بايد واحده
بالشكل ده
http://www12.0zz0.com/2012/06/09/18/991217617.jpg
http://www12.0zz0.com/2012/06/09/18/791769263.jpg
والايد التانيه طبعا على الزناد
وبكده هاتنور بالكشاف على اليمامه وتنشن فى نفس الوقت
واحد محترم هايقوللى طيب هانشوف الناشنكهات ازاى وانا بانشن؟؟
سيادتك احنا اتفقنا انك لما تيجى تنشن هاتمسك الكشاف على ايدك الشمال
وتسند ماسورة البندقيه عليه
يعنى بالعربى هاتكون منشن بالكشاف والبندقيه فى نفس الوقت على اليمامه
وساعتها فى الوضع ده هاتبص من فتحة الشيز هاتشوف نملة الدبانه واليمامه بكل سهوله
وعلى فكره
ممكن تاخد حد معاك يمسكلك الكشاف وينورلك وانت عليك تضرب وبس
والكلام ده ينطبق على دجاج الماء ايضا لكن طبعا مع اختلاف المكان
لان دجاج الماء بيكون فى الترع والمصارف والبحيرات مش على الاشجار
http://www13.0zz0.com/2012/06/09/18/598214708.jpg
ونادرا لما يمامه تطير او دجاجه تغطس وتهرب منك اول ماتضرب الكشاف فى وشها لان زى ماقلنا الطريده بتصاب بعمى بمجرد ماتضرب فى وشها النور
ونشن براحتك خاااااالص
واضرب براحتك خاااااااااااالص وماتقلقش اليمامه مستنياك مستنياك
وعلى فكره فى بعض الاحيان ممكن تضرب طلقه متجيش فى اليمامه وتفضل واقفه مكانها برده لغاية ماتضرب عليها تانى
وده بيحصل كتيييييييير اوى فى الليالى شديدة البروده بالذات
وده فيديو لأحدى طلعاتى الليليه يارب يعجبكو

وفى النهايه

اتمنى الموضوع يكون عجبكم وتستفيدو منه
واى اخ او صديق عاوز يستفسر عن اى شىء تانى انا فى الخدمه وتحت امره
وارجو الدعاء لى ولوالدى بالرحمه والمغفره[/COLOR]

[CENTER][SIZE="5"][COLOR="Red"]

محمد حافظ بك 12-06-09 09:25 PM

رد: الموضوع الشامل عن صيد اليمام ودجاج الماء ليلا
 
ايه يا قبطان الشغل الجامد ده ...استاذ و رئيس قسم ليلي و نهاري و بحري و جوي و سماوي و باطني و انفلونزا ......الله ينور بجد و علي التثبيت فورااااااااااااااا ان شاء الله و ربنا يغفر ليك و للوالد ان شاء الله

darkshaft 12-06-09 09:39 PM

رد: الموضوع الشامل عن صيد اليمام ودجاج الماء ليلا
 
موضوع رائع جدا من راجل ذو خبره عالية و ارجوا من الاداره التثبيت.

القبطان المصرى 77 12-06-09 09:44 PM

رد: الموضوع الشامل عن صيد اليمام ودجاج الماء ليلا
 
اقتباس:

المشاركة الأصلية كتبت بواسطة محمد حافظ بك (المشاركة 383223)
ايه يا قبطان الشغل الجامد ده ...استاذ و رئيس قسم ليلي و نهاري و بحري و جوي و سماوي و باطني و انفلونزا ......الله ينور بجد و علي التثبيت فورااااااااااااااا ان شاء الله و ربنا يغفر ليك و للوالد ان شاء الله

حبيييييييييييبى يامحمد بك والله انت
دايما رافع راسى وعامل معايا احلى جو
هههههههههههههههههه
ربنا يخليك لينا يا اجدع واحلى اسكندرانى فى اليكس

القبطان المصرى 77 12-06-09 09:45 PM

رد: الموضوع الشامل عن صيد اليمام ودجاج الماء ليلا
 
اقتباس:

المشاركة الأصلية كتبت بواسطة darkshaft (المشاركة 383243)
موضوع رائع جدا من راجل ذو خبره عالية و ارجوا من الاداره التثبيت.

والله مرورك هو الاروع يا استاذ ايهاب
شرفنى مرورك وسعيد والله بمعرفتك

عادل عبده 12-06-09 09:51 PM

رد: الموضوع الشامل عن صيد اليمام ودجاج الماء ليلا
 
موضوع اكتر ن رهيب واكبر من ممتاز
تسلم ايدك بجد وتحياتى ليك يا غالى

القبطان المصرى 77 12-06-09 10:02 PM

رد: الموضوع الشامل عن صيد اليمام ودجاج الماء ليلا
 
اقتباس:

المشاركة الأصلية كتبت بواسطة عادل عبده (المشاركة 383260)
موضوع اكتر ن رهيب واكبر من ممتاز
تسلم ايدك بجد وتحياتى ليك يا غالى

ربنا يبارك فيك ياكبيرنا ياااااااارب
بجد والله بيسعدنى دايما مرورك الكريم وكرم اخلاقك

hafez 12-06-09 10:08 PM

رد: الموضوع الشامل عن صيد اليمام ودجاج الماء ليلا
 
موضوع ممتاز جدا......

hesham[MaFya]a 12-06-09 10:12 PM

رد: الموضوع الشامل عن صيد اليمام ودجاج الماء ليلا
 
بجـــــــــــــــــــــــــــــــــد انت استااااااااااااااااذ تسلم ايييييييدك :) .. و دعاوتنا للوالد بالمغفرة و ان يدخله الله فسيح جناته :) ..

القبطان المصرى 77 12-06-09 11:13 PM

رد: الموضوع الشامل عن صيد اليمام ودجاج الماء ليلا
 
اقتباس:

المشاركة الأصلية كتبت بواسطة hafez (المشاركة 383267)
موضوع ممتاز جدا......

اشكرك جدا ياافندم والله

القبطان المصرى 77 12-06-09 11:14 PM

رد: الموضوع الشامل عن صيد اليمام ودجاج الماء ليلا
 
اقتباس:

المشاركة الأصلية كتبت بواسطة hesham[mafya]a (المشاركة 383271)
بجـــــــــــــــــــــــــــــــــد انت استااااااااااااااااذ تسلم ايييييييدك :) .. و دعاوتنا للوالد بالمغفرة و ان يدخله الله فسيح جناته :) ..

وبجد انت زوووووووووووووووق والله بكلامك اللى زى العسل ده
ومشكوووووووور جدا ياغالى على دعواتك الجميله

maheradv 12-06-09 11:21 PM

رد: الموضوع الشامل عن صيد اليمام ودجاج الماء ليلا
 
موضوع راااااائع و رهييب و بصراحه انا هكلم الرجاله و هننزل نصطاد بالليل ان شاء الله
موضوع جميل بارك الله فيك

hafez 12-06-09 11:31 PM

رد: الموضوع الشامل عن صيد اليمام ودجاج الماء ليلا
 
احلي تقيممم.....اح

yasser222 12-06-10 10:55 AM

رد: الموضوع الشامل عن صيد اليمام ودجاج الماء ليلا
 
مجهود اكثر من رااااااااااااااائع ياقبطان انا كنت بصطاد بالليل زمان بالرمسيس نمرة واحد بس كنت بلاقي عصافير بس عمري ما لاقيت يمام كنت هاموت واعرف بيبيت فين كان بيتهيالي انه بيختفي مع غروب الشمس ههههههه
بس ان شاء الله هاعمل بنصيحتك واعمل طالعة بالليل واشوف كدة
مشكوووووووووووووووووووووووووور على المجهود الرائع وفي انتظار المزيد من حضرتك

القبطان المصرى 77 12-06-10 12:46 PM

رد: الموضوع الشامل عن صيد اليمام ودجاج الماء ليلا
 
اقتباس:

المشاركة الأصلية كتبت بواسطة maheradv (المشاركة 383329)
موضوع راااااائع و رهييب و بصراحه انا هكلم الرجاله و هننزل نصطاد بالليل ان شاء الله
موضوع جميل بارك الله فيك

الله يكرمك ياغالى
وكلم الرجاله ياباشا وعاوزين نشوف المذابح بقى والشغل التقيل
هههههههههههههه

القبطان المصرى 77 12-06-10 12:46 PM

رد: الموضوع الشامل عن صيد اليمام ودجاج الماء ليلا
 
اقتباس:

المشاركة الأصلية كتبت بواسطة hafez (المشاركة 383343)
احلي تقيممم.....اح

مشكور ياحافظ بك على تقييمك

القبطان المصرى 77 12-06-10 12:48 PM

رد: الموضوع الشامل عن صيد اليمام ودجاج الماء ليلا
 
اقتباس:

المشاركة الأصلية كتبت بواسطة yasser222 (المشاركة 383576)
مجهود اكثر من رااااااااااااااائع ياقبطان انا كنت بصطاد بالليل زمان بالرمسيس نمرة واحد بس كنت بلاقي عصافير بس عمري ما لاقيت يمام كنت هاموت واعرف بيبيت فين كان بيتهيالي انه بيختفي مع غروب الشمس ههههههه
بس ان شاء الله هاعمل بنصيحتك واعمل طالعة بالليل واشوف كدة
مشكوووووووووووووووووووووووووور على المجهود الرائع وفي انتظار المزيد من حضرتك

ده شىء يشرفنى يا استاذ ياسر ان الموضوع عجبك
وبجد بجد هاتحس بالفرق الكبير فى الصيد بالليل
وان شاء الله هاتلاقى يمام وتصطاد لما تشبع
وكان نفسى اصور اليمام وهو على الشجره واحط الصوره فى الموضوع
بس مع الاسف لما جيت اصور اليمام طار من الفلاش بتاع الكاميرا

حسين ابراهيم حسين 12-06-10 01:27 PM

رد: الموضوع الشامل عن صيد اليمام ودجاج الماء ليلا
 
الله ينور عليك يا ابن بلدى يامشرفنا بجد حاجة جميلة

القبطان المصرى 77 12-06-10 05:30 PM

رد: الموضوع الشامل عن صيد اليمام ودجاج الماء ليلا
 
اقتباس:

المشاركة الأصلية كتبت بواسطة حسين ابراهيم حسين (المشاركة 383640)
الله ينور عليك يا ابن بلدى يامشرفنا بجد حاجة جميلة

ده نورك ياحسين باشا
ربنا يكرمك ياغالى

aymank2 12-06-11 07:38 AM

رد: الموضوع الشامل عن صيد اليمام ودجاج الماء ليلا
 
الله ينور عليك ياقبطان مميز كالعاده تسلم افكارك.

samraghost 12-06-11 10:27 AM

رد: الموضوع الشامل عن صيد اليمام ودجاج الماء ليلا
 
موضوع مميز جدا واحلى تقيم يا باشا

القبطان المصرى 77 12-06-11 10:56 AM

رد: الموضوع الشامل عن صيد اليمام ودجاج الماء ليلا
 
اقتباس:

المشاركة الأصلية كتبت بواسطة aymank2 (المشاركة 384247)
الله ينور عليك ياقبطان مميز كالعاده تسلم افكارك.

تسلم استاذ ايمن ياغالى
يارب تكون بخير وفى احسن حال

القبطان المصرى 77 12-06-11 10:57 AM

رد: الموضوع الشامل عن صيد اليمام ودجاج الماء ليلا
 
اقتباس:

المشاركة الأصلية كتبت بواسطة samraghost (المشاركة 384313)
موضوع مميز جدا واحلى تقيم يا باشا

والله انت اللى دايما مميز بردودك الجميله ياباشا
تسلم على تقييمك

hogan 12-06-11 11:55 AM

رد: الموضوع الشامل عن صيد اليمام ودجاج الماء ليلا
 
تسلم ايدك على الشغل العالى انا حبيت الصيد وهجيب بندقيه علشان حبيته بجد

القبطان المصرى 77 12-06-11 12:01 PM

رد: الموضوع الشامل عن صيد اليمام ودجاج الماء ليلا
 
اقتباس:

المشاركة الأصلية كتبت بواسطة hogan (المشاركة 384348)
تسلم ايدك على الشغل العالى انا حبيت الصيد وهجيب بندقيه علشان حبيته بجد

اكيد ده شرف كبيييييييييير لينا ياباشا انضمامك للصيادين واهتمامك بالهوايه المحترمه الجميله دى
صباحك عسل ياباشا

احمد زكى 12-06-16 04:56 AM

رد: الموضوع الشامل عن صيد اليمام ودجاج الماء ليلا
 
موضوع أكثر من رلئع تسلم

القبطان المصرى 77 12-06-16 09:47 AM

رد: الموضوع الشامل عن صيد اليمام ودجاج الماء ليلا
 
اقتباس:

المشاركة الأصلية كتبت بواسطة احمد زكى (المشاركة 387946)
موضوع أكثر من رلئع تسلم

ربنا يبارك فيك يا استاذ احمد

عبووود 12-06-25 07:06 PM

رد: الموضوع الشامل عن صيد اليمام ودجاج الماء ليلا
 
الصراحه موضوع مميز جدا ... وفعلا يستحق التثبيت :)

القبطان المصرى 77 12-06-25 07:15 PM

رد: الموضوع الشامل عن صيد اليمام ودجاج الماء ليلا
 
اقتباس:

المشاركة الأصلية كتبت بواسطة عبووود (المشاركة 394458)
الصراحه موضوع مميز جدا ... وفعلا يستحق التثبيت :)

تسلم ياعبود باشا على كلامك الجميل
والف الف شكر ياغالى على مرورك الاكتر من رائع

ابو مروان 12-06-26 09:34 PM

رد: الموضوع الشامل عن صيد اليمام ودجاج الماء ليلا
 
موضوع ممتااااااااز يا قبطان بارك الله فيك_فعلا شجر الفيكس دة احلى شجر تلاقى علية اليمام اليمام بيحب يبيت فية جدا جدا لان اوراقة كثيفة وصعب تعتر على اليمام فية وهو على فكرة بيكون على الفروع الضعيفة الخارجية لشجر الفيكس هربا من البوم والقطط_تلاقية مستخبى فى الورق بتاع الشجرة _بس هايروح فين_بارك الله فيك ورحم والداك

القبطان المصرى 77 12-06-27 12:21 PM

رد: الموضوع الشامل عن صيد اليمام ودجاج الماء ليلا
 
اقتباس:

المشاركة الأصلية كتبت بواسطة ابو مروان (المشاركة 395099)
موضوع ممتااااااااز يا قبطان بارك الله فيك_فعلا شجر الفيكس دة احلى شجر تلاقى علية اليمام اليمام بيحب يبيت فية جدا جدا لان اوراقة كثيفة وصعب تعتر على اليمام فية وهو على فكرة بيكون على الفروع الضعيفة الخارجية لشجر الفيكس هربا من البوم والقطط_تلاقية مستخبى فى الورق بتاع الشجرة _بس هايروح فين_بارك الله فيك ورحم والداك

كلامك مظبوووووووووووت جدا يابو مروان
تحياتى لحضرتك
ويارب فعلا تكون استفدت من الموضوع

mohamedkayson 12-07-01 11:15 AM

رد: الموضوع الشامل عن صيد اليمام ودجاج الماء ليلا
 
أنا كل ما اقرا مقال لحضرتك ازداد شوق لمعرفة سعادتك جزاك الله كل الخير عنا

القبطان المصرى 77 12-07-01 11:30 AM

رد: الموضوع الشامل عن صيد اليمام ودجاج الماء ليلا
 
اقتباس:

المشاركة الأصلية كتبت بواسطة mohamedkayson (المشاركة 397135)
أنا كل ما اقرا مقال لحضرتك ازداد شوق لمعرفة سعادتك جزاك الله كل الخير عنا

تسلم يامحمد
ربنا يبارك فيك
وان شاء الله الظروف تسمح و نتقابل قريب
لانى شغال خارج اسكندريه

قناص المنوفيه 12-07-02 05:21 PM

رد: الموضوع الشامل عن صيد اليمام ودجاج الماء ليلا
 
موضوع جامد جداااااااااااااااااااااااااا
انا كنت بعمل كده بس مع الفيران بقى
ايام ما كان الفيران عندنا كتيره اول اما جينا البيت
كنت بطلع بالكشاف والبندقيه وانزل بعشر فيران
اقول لوالدتى سمى واعملى عليهم ملوخيه ههههههههههههههه
تروح شخطه فيا وتقولى جتك القرف روح ارميهم

القبطان المصرى 77 12-07-02 05:58 PM

رد: الموضوع الشامل عن صيد اليمام ودجاج الماء ليلا
 
اقتباس:

المشاركة الأصلية كتبت بواسطة قناص المنوفيه (المشاركة 397836)
موضوع جامد جداااااااااااااااااااااااااا
انا كنت بعمل كده بس مع الفيران بقى
ايام ما كان الفيران عندنا كتيره اول اما جينا البيت
كنت بطلع بالكشاف والبندقيه وانزل بعشر فيران
اقول لوالدتى سمى واعملى عليهم ملوخيه ههههههههههههههه
تروح شخطه فيا وتقولى جتك القرف روح ارميهم

هههههههههههههههههههههههه
ياراجل حرام عليك هو فيه حد بيدخل بفران البيت
وتسلم على مرورك الكريم
واهو الصيد بالليل هاينفع جامد الايام دى فى الحر الرهيب ده

elsayed144771 12-07-04 09:46 PM

رد: الموضوع الشامل عن صيد اليمام ودجاج الماء ليلا
 
والله العظيم استاذ ورئيس قسم ... ربنا يبارك لك فى صحتك ويجعلك زخراً لأهل العلم .

القبطان المصرى 77 12-07-05 10:59 AM

رد: الموضوع الشامل عن صيد اليمام ودجاج الماء ليلا
 
اقتباس:

المشاركة الأصلية كتبت بواسطة elsayed144771 (المشاركة 399000)
والله العظيم استاذ ورئيس قسم ... ربنا يبارك لك فى صحتك ويجعلك زخراً لأهل العلم .

ربنا يخليك يااستاذ سيد
انا عاجز عن الشكر والله
صباحك زى العسل

moorey 12-07-13 07:23 AM

رد: الموضوع الشامل عن صيد اليمام ودجاج الماء ليلا
 
موضوع جااااامد اوي و ان شاء الله هجربه كده في القريب العاجل

بس هو ينفع بدل الكشاف فلاش موبايل هو الموبايل بتاعي فلاشه جامد بس مش عارف ينفع و له لا

القبطان المصرى 77 12-07-13 11:16 AM

رد: الموضوع الشامل عن صيد اليمام ودجاج الماء ليلا
 
اقتباس:

المشاركة الأصلية كتبت بواسطة moorey (المشاركة 403818)
موضوع جااااامد اوي و ان شاء الله هجربه كده في القريب العاجل

بس هو ينفع بدل الكشاف فلاش موبايل هو الموبايل بتاعي فلاشه جامد بس مش عارف ينفع و له لا

تسلم ياغالى والله
ومش هاينفع طبعا فلاش الموبايل
لأن الموبايل عمره ماهينورلك على مسافه 10 و20 متر مثلا
وانا جربته قبل كده ومنفعش

moorey 12-07-13 11:25 AM

رد: الموضوع الشامل عن صيد اليمام ودجاج الماء ليلا
 
اقتباس:

المشاركة الأصلية كتبت بواسطة القبطان المصرى22 (المشاركة 403854)
تسلم ياغالى والله
ومش هاينفع طبعا فلاش الموبايل
لأن الموبايل عمره ماهينورلك على مسافه 10 و20 متر مثلا
وانا جربته قبل كده ومنفعش

شكرا ليك يا قبطان علي الافاده

القناص السيناوى 12-07-15 09:56 PM

رد: الموضوع الشامل عن صيد اليمام ودجاج الماء ليلا
 
السلام عليكم ورحمة الله وبركاته
هذه أول مشاركة لى فى المنتدى
وبصراحة الموضوع جميل جداً
وجزاك الله خير

عبد.الرحمن 12-07-16 04:51 AM

رد: الموضوع الشامل عن صيد اليمام ودجاج الماء ليلا
 
ايه الحلاوة دي ماشاء الله لا قوة الا بالله ... بجد يستحق التثبيت

القبطان المصرى 77 12-07-16 11:52 AM

رد: الموضوع الشامل عن صيد اليمام ودجاج الماء ليلا
 
اقتباس:

المشاركة الأصلية كتبت بواسطة القناص السيناوى (المشاركة 405171)
السلام عليكم ورحمة الله وبركاته
هذه أول مشاركة لى فى المنتدى
وبصراحة الموضوع جميل جداً
وجزاك الله خير

وعليكم السلام ورحمة الله وبركاته
اهلا بيك ياقناص معانا
وتسلم ياكبير على كلامك الجميل

القبطان المصرى 77 12-07-16 11:52 AM

رد: الموضوع الشامل عن صيد اليمام ودجاج الماء ليلا
 
اقتباس:

المشاركة الأصلية كتبت بواسطة عبد.الرحمن (المشاركة 405372)
ايه الحلاوة دي ماشاء الله لا قوة الا بالله ... بجد يستحق التثبيت

الله يكرمك ياعبد الرحمن
اتمنى تكون فى احسن حال
تحياتى ليك

الجينرال 12-07-16 12:00 PM

رد: الموضوع الشامل عن صيد اليمام ودجاج الماء ليلا
 
يابنى المنتدى دة مش مكانك انت المفروض تبقى رئيس قسم صيد ليلى وفراخ مية تحياتى

القبطان المصرى 77 12-07-16 12:12 PM

رد: الموضوع الشامل عن صيد اليمام ودجاج الماء ليلا
 
اقتباس:

المشاركة الأصلية كتبت بواسطة الجينرال (المشاركة 405471)
يابنى المنتدى دة مش مكانك انت المفروض تبقى رئيس قسم صيد ليلى وفراخ مية تحياتى

صباحك زى العسل ياجينرال
والله انت راجل كلك زوق ودايما بتحرجنى بكلامك الحلو
كل سنه وانت طيب ياغالى

خالد القناص 12-08-01 04:49 PM

رد: الموضوع الشامل عن صيد اليمام ودجاج الماء ليلا
 
سيد رائع ليلا

محمد مصطفى جحا 12-08-10 10:39 AM

رد: الموضوع الشامل عن صيد اليمام ودجاج الماء ليلا
 
موضوع رائع من شخص رائع واحلى تقيم

ahmed yasser 12-08-10 04:10 PM

رد: الموضوع الشامل عن صيد اليمام ودجاج الماء ليلا
 
موضوع فااااجر كالعادة مواضيعك كلها مميزة بس هو ايه نظام التلسكوب بالليل بتشوف عادى ولا ايه ؟؟ اصل انا باليل ماباشوفش بيه حاجة خالص

mata dor 12-08-14 01:04 AM

رد: الموضوع الشامل عن صيد اليمام ودجاج الماء ليلا
 
جميع موضيعك جامدة ;)

القبطان المصرى 77 12-08-14 01:32 PM

رد: الموضوع الشامل عن صيد اليمام ودجاج الماء ليلا
 
اقتباس:

المشاركة الأصلية كتبت بواسطة خالد القناص (المشاركة 412457)
سيد رائع ليلا

تسلم ياحبى

اقتباس:

المشاركة الأصلية كتبت بواسطة محمد مصطفى جحا (المشاركة 417147)
موضوع رائع من شخص رائع واحلى تقيم

الله يكرمك يامحمد باشا
اقتباس:

المشاركة الأصلية كتبت بواسطة ahmed yasser (المشاركة 417223)
موضوع فااااجر كالعادة مواضيعك كلها مميزة بس هو ايه نظام التلسكوب بالليل بتشوف عادى ولا ايه ؟؟ اصل انا باليل ماباشوفش بيه حاجة خالص

تسلم يابو حميد
والتلسكوب طبعا مش هاينفع بالليل
الا بقى لو معاك تلسكوب مشعر الوان وفيه خاصية الرؤيه الليليه

اقتباس:

المشاركة الأصلية كتبت بواسطة mata dor (المشاركة 418818)
جميع موضيعك جامدة ;)

تسلم ياكبير ده بس من زوقك

BooGY 12-08-15 10:25 AM

رد: الموضوع الشامل عن صيد اليمام ودجاج الماء ليلا
 
موضوع جميل بس فيه شوية حاجات عايزة تتعدل زى موضوع الكشاف مثلا
ممكن نجيب كشاف رأس اللى بيتركب على الجبهة بحزام زى بتاع عمال المناجم وده نوره قوى جدا وسعره حوالى 35 جنيه وموجود عند كل محلات الاسلحة واحيانا المكتبات

ahmed yasser 12-08-15 05:00 PM

رد: الموضوع الشامل عن صيد اليمام ودجاج الماء ليلا
 
طب والتلسكوب اللى بتتكلم عليه دا موجود فى مصر ويعمل كام لو موجود؟

القبطان المصرى 77 12-08-21 01:11 PM

رد: الموضوع الشامل عن صيد اليمام ودجاج الماء ليلا
 
اقتباس:

المشاركة الأصلية كتبت بواسطة boogy (المشاركة 419448)
موضوع جميل بس فيه شوية حاجات عايزة تتعدل زى موضوع الكشاف مثلا
ممكن نجيب كشاف رأس اللى بيتركب على الجبهة بحزام زى بتاع عمال المناجم وده نوره قوى جدا وسعره حوالى 35 جنيه وموجود عند كل محلات الاسلحة واحيانا المكتبات

تسلم ياجيمل على ردك الجميل
بس الكشاف اللى حضرتك بتقول عليه مش هاينفع

القبطان المصرى 77 12-08-21 01:12 PM

رد: الموضوع الشامل عن صيد اليمام ودجاج الماء ليلا
 
اقتباس:

المشاركة الأصلية كتبت بواسطة ahmed yasser (المشاركة 419576)
طب والتلسكوب اللى بتتكلم عليه دا موجود فى مصر ويعمل كام لو موجود؟

اكيد موجود ياباشا بس والله ماعرف عند مين
ممكن حضرتك تسأل تجار المنتدى هنا

أبو مهند 12-08-30 04:44 PM

رد: الموضوع الشامل عن صيد اليمام ودجاج الماء ليلا
 
بصراحة مواضيعك كلها رائعة

القبطان المصرى 77 12-08-30 07:57 PM

رد: الموضوع الشامل عن صيد اليمام ودجاج الماء ليلا
 
تسلم يابو مهند ياعسل

صياد قديـــــــــــم 12-08-31 06:30 PM

رد: الموضوع الشامل عن صيد اليمام ودجاج الماء ليلا
 
طول عمرها اسكندرية ولادة والله يا قبطان وموضوعك فوق الممتاز وانا دايما والاكتر بطلع ليلى وكفاية بس الهدوء اللى الواحد بيبقى فيه وبطلع لوحدى والله وفى اماكن زى افلام الرعب بتبقى ماشى وبتبص وراك الا يطلعلك حاجة كدا ولا كدا ولكن طبعا اول ما بروح بدعى ربنا وبقرا بعض الايات للحفظ من كل شر .... اما بقى بالنسبة للكشاف فكرته هايلة جدا وانا عندى كشاف مغناطيس بعلقه فى رقبتى واول ما الاقى هدفى علطول بلزقه فى البندقية وبضرب براحتى او الحاجة التانية بيكون معايا كشافين واحد متحرك بنور بيه وبدور على الفرائس والتانى مربوط فى البندقية وده بولعه وقت النيشان على الهدف بس وطبعا طول مانتا قافل الكشاف اللى مربوط بالبندقية وبتشغله وقت التصويب بيقعد وقت طويل لانه بيتفتح وتنشن وتقفله تانى وتمكل بحث بالكشاف المتحرك اللى فى ايدك واللى معلقه فى رقبتك بحزام وبالنسبة لفراخ الميا فانا عاملها ملقاف صنع ايدى وده عامله انى جايب بوصة فايبر 7 متر وشلت اخر وصلتين فيها من فوق اللى هما الضعاف وجبت سلك متين وعملته على هيئة ملقاف بشبكة عشان الفراخ اغلبها بتبقى فى الميا واستحالة طبعا حتنزل تجيبها والنبى لو قعدت تغيظك وتقولك تعالى انزل امسكنى بلاش تضرب انا مسلمة ههههههههههههه والملقاف ده جميل اوى لانه عامل وكانه شايل بوصة صيد لانها فعلا بوصة صيد واتحولت ملقاف تفردها وتلمها وعاملها حبل وبعلقها على كتفى واهم حاجة فى الصيد الليلى انت نسيتها هما حاجتين اولا الشوز اللى يتلبس لازم يكون شوز جلد قوى ويكون على الاقل عالى شوية زى البوت عشان الثعابين وغيرها وثانيا وده بقى الاهم انك تروح اى صيدلية وتقوله عايز دهان طارد للناموس والخشرات زى السيون او الاوف بس الاوف الشركة بطلت تزله ولكن اللسيون بالمنتول احلى لانى اول ما بوصل المكان اللى حبدا فيه صيدى الليلى بدهن بيه ايديا ووشى يعنى بالعربى كدا الاماكن الظاهرة من جسمى ولو فى الصيف بدهن لحد الكوع وبنزل اصطاد براحتى ولا ناموس ولا دياولو لان الناموس والحشرات بليل مش حتخليك تعرف تصطاد بصاغ وخاصتا فى الصيف اما فى الشتا فالوضع بيختلف رغم ان الناموس صيف شتا تحس انه مش هامه سقعا وارجو انى اكون وفقت فى تكملة موضوعك لانى ولله الحمد بفضل الصيد الليلى اكتر من النهار وبنزل بليل اكتر

القبطان المصرى 77 12-08-31 06:47 PM

رد: الموضوع الشامل عن صيد اليمام ودجاج الماء ليلا
 
اقتباس:

المشاركة الأصلية كتبت بواسطة صياد قديـــــــــــم (المشاركة 428426)
طول عمرها اسكندرية ولادة والله يا قبطان وموضوعك فوق الممتاز وانا دايما والاكتر بطلع ليلى وكفاية بس الهدوء اللى الواحد بيبقى فيه وبطلع لوحدى والله وفى اماكن زى افلام الرعب بتبقى ماشى وبتبص وراك الا يطلعلك حاجة كدا ولا كدا ولكن طبعا اول ما بروح بدعى ربنا وبقرا بعض الايات للحفظ من كل شر .... اما بقى بالنسبة للكشاف فكرته هايلة جدا وانا عندى كشاف مغناطيس بعلقه فى رقبتى واول ما الاقى هدفى علطول بلزقه فى البندقية وبضرب براحتى او الحاجة التانية بيكون معايا كشافين واحد متحرك بنور بيه وبدور على الفرائس والتانى مربوط فى البندقية وده بولعه وقت النيشان على الهدف بس وطبعا طول مانتا قافل الكشاف اللى مربوط بالبندقية وبتشغله وقت التصويب بيقعد وقت طويل لانه بيتفتح وتنشن وتقفله تانى وتمكل بحث بالكشاف المتحرك اللى فى ايدك واللى معلقه فى رقبتك بحزام وبالنسبة لفراخ الميا فانا عاملها ملقاف صنع ايدى وده عامله انى جايب بوصة فايبر 7 متر وشلت اخر وصلتين فيها من فوق اللى هما الضعاف وجبت سلك متين وعملته على هيئة ملقاف بشبكة عشان الفراخ اغلبها بتبقى فى الميا واستحالة طبعا حتنزل تجيبها والنبى لو قعدت تغيظك وتقولك تعالى انزل امسكنى بلاش تضرب انا مسلمة ههههههههههههه والملقاف ده جميل اوى لانه عامل وكانه شايل بوصة صيد لانها فعلا بوصة صيد واتحولت ملقاف تفردها وتلمها وعاملها حبل وبعلقها على كتفى واهم حاجة فى الصيد الليلى انت نسيتها هما حاجتين اولا الشوز اللى يتلبس لازم يكون شوز جلد قوى ويكون على الاقل عالى شوية زى البوت عشان الثعابين وغيرها وثانيا وده بقى الاهم انك تروح اى صيدلية وتقوله عايز دهان طارد للناموس والخشرات زى السيون او الاوف بس الاوف الشركة بطلت تزله ولكن اللسيون بالمنتول احلى لانى اول ما بوصل المكان اللى حبدا فيه صيدى الليلى بدهن بيه ايديا ووشى يعنى بالعربى كدا الاماكن الظاهرة من جسمى ولو فى الصيف بدهن لحد الكوع وبنزل اصطاد براحتى ولا ناموس ولا دياولو لان الناموس والحشرات بليل مش حتخليك تعرف تصطاد بصاغ وخاصتا فى الصيف اما فى الشتا فالوضع بيختلف رغم ان الناموس صيف شتا تحس انه مش هامه سقعا وارجو انى اكون وفقت فى تكملة موضوعك لانى ولله الحمد بفضل الصيد الليلى اكتر من النهار وبنزل بليل اكتر

والله انت راجل زى العسل بجد
وكل كلامك صح
ويشرفنى جداااااااااااااا ان موضوعى عجبك
وعلى فكره موضوع الملقاف ده انا عامله من زمان عشان باصطاد سمك بالبندقيه وباجيب بيه السمك
وفكرة الكشاف المغماطيس دى حلوه انا هابقى اجربها
بس مشكلتها انها عاوزه كشاف خفيف ورفيع والاضائه بتاعته بيضه
وده صعب تلاقيه فى مصر

صياد قديـــــــــــم 12-08-31 07:06 PM

رد: الموضوع الشامل عن صيد اليمام ودجاج الماء ليلا
 
والله انا الكشاف اللى معايا كبير ومش رفيع ولا حاجة ولما بلزقه فى البندقية بلزقه مكان التلسكوب بس على الجنب ومش فى النص عشان اعرف انا اشوف اهم حاجة يبقى مغناطيس قوى عشان يمسك صح وانت ممكن يبقى كشاف عادى وتجيب مغناطيس قوى وتلزقه فى الكشاف كويس وتطلع بيه ان شاء الله واكيد موضوعك جميل لانى حسيت ان اللى بيتكلم واحد فاهم وقديم فى الصيد ماشاء الله تبارك الله واهو ادينا بقالنا 15 سنة صيد من واحنا عيال ....... انا من العصافرة وبطلع اماكن كدا قريبة من المندرة اراضى زراعية وحاجات من دى

صياد قديـــــــــــم 12-08-31 07:10 PM

رد: الموضوع الشامل عن صيد اليمام ودجاج الماء ليلا
 
الكشاف بقى بتبقى اضائته صفرة فغير اللمبة بتاعته وهاتها بيضة خد معاك الكشاف وروح لاى حد بيبيع كشافات وحاجات من دى وجرب اللمبة اللى تناسبك

القبطان المصرى 77 12-09-01 06:01 PM

رد: الموضوع الشامل عن صيد اليمام ودجاج الماء ليلا
 
اقتباس:

المشاركة الأصلية كتبت بواسطة صياد قديـــــــــــم (المشاركة 428446)
والله انا الكشاف اللى معايا كبير ومش رفيع ولا حاجة ولما بلزقه فى البندقية بلزقه مكان التلسكوب بس على الجنب ومش فى النص عشان اعرف انا اشوف اهم حاجة يبقى مغناطيس قوى عشان يمسك صح وانت ممكن يبقى كشاف عادى وتجيب مغناطيس قوى وتلزقه فى الكشاف كويس وتطلع بيه ان شاء الله واكيد موضوعك جميل لانى حسيت ان اللى بيتكلم واحد فاهم وقديم فى الصيد ماشاء الله تبارك الله واهو ادينا بقالنا 15 سنة صيد من واحنا عيال ....... انا من العصافرة وبطلع اماكن كدا قريبة من المندرة اراضى زراعية وحاجات من دى

هاحاول اجربها كده يابرنس واشوف
وانا باخرج اصطاد فى الكيلو 70 طريق مصر اسطندريه صحراوى
لو انت تعرف اماكن كويسه فى المندره للصيد ممكن نخرج سوا
بدل بهدلة المواصلات اللى انا باشوفها

القبطان المصرى 77 12-09-01 06:02 PM

رد: الموضوع الشامل عن صيد اليمام ودجاج الماء ليلا
 
اقتباس:

المشاركة الأصلية كتبت بواسطة صياد قديـــــــــــم (المشاركة 428452)
الكشاف بقى بتبقى اضائته صفرة فغير اللمبة بتاعته وهاتها بيضة خد معاك الكشاف وروح لاى حد بيبيع كشافات وحاجات من دى وجرب اللمبة اللى تناسبك

ماهو المشكله انى دوخت على اللمبات البيضه ( الزيبق ) ومش لاقيها
كل اللى بالاقيه لمبات نورها اصفر وبتقرفنى فى الصيد زى مانت فاهم
ياريت لو تعرف اللمبات البيضه بتتباع عند مين فى اسكندريه تقولى

صياد قديـــــــــــم 12-09-02 05:22 PM

رد: الموضوع الشامل عن صيد اليمام ودجاج الماء ليلا
 
انا كنت جايبها من المندرة عندى من محل خردوات قديم حشوف لو فيه لانى كمان عايز اجيب واحدة لان اللى عندى اتحرقت عشان بقالى مدة مش بطلع صيد وكدا ولو لقيت عنده حجيبلك معايا حتى لو كام واحدة ونشيلهم احتياطى وحبقى اقولك بس سيبلى رقمك عشان لو جبت ابقى اكلمك ان شاء الرحمن

صياد قديـــــــــــم 12-09-02 05:36 PM

رد: الموضوع الشامل عن صيد اليمام ودجاج الماء ليلا
 
انا عندى كام مكان فى المندرة حلوين يعنى حتة كدا بعد المندرة اراضى زراعية وحلاوتها بليل على اليمام وفراخ الميا اراضى زراعية يعنى وبتبقى فاضية مفيهاش بشر لان الفلاحين اخرهم لحد المغرب وبيروحو لان كلها اراضى ومافيش بيوت خالص وانا بطلع مع نفسى الحمد لله رغم انها اماكن مرعبة بليل بس الحمد لله الواحد مش بيخاف غير من اللى خلقه وكمان بأمن نفسى بالدعاء وايات قرأنية بقولها وبتوكل على الله وان شاء الله انا اناوى اطلع خلال يومين بس اظبط حالى وده رقمى 01144588073

القبطان المصرى 77 12-09-02 07:29 PM

رد: الموضوع الشامل عن صيد اليمام ودجاج الماء ليلا
 
اقتباس:

المشاركة الأصلية كتبت بواسطة صياد قديـــــــــــم (المشاركة 429508)
انا عندى كام مكان فى المندرة حلوين يعنى حتة كدا بعد المندرة اراضى زراعية وحلاوتها بليل على اليمام وفراخ الميا اراضى زراعية يعنى وبتبقى فاضية مفيهاش بشر لان الفلاحين اخرهم لحد المغرب وبيروحو لان كلها اراضى ومافيش بيوت خالص وانا بطلع مع نفسى الحمد لله رغم انها اماكن مرعبة بليل بس الحمد لله الواحد مش بيخاف غير من اللى خلقه وكمان بأمن نفسى بالدعاء وايات قرأنية بقولها وبتوكل على الله وان شاء الله انا اناوى اطلع خلال يومين بس اظبط حالى وده رقمى 01144588073

تماااااااااااااااام يابرنس
طيب معندكش فكره جناين الفاكهه اللى فى المندره ايه نظامها
يعنى ينفع نروح نصطاد فيها
اصل انا باعدى عليها بصراحه بيبقى شكلها مليانه يمام
وخصوصا جناين الجوافه
على العموم انا هاسجل رقمك
وان شاء الله اول ماظروف شغلى تسمح هاكلمك ونبقى نحدد ميعاد نخرج سوا

Bebeto 12-09-02 08:57 PM

Re: رد: الموضوع الشامل عن صيد اليمام ودجاج الماء ليلا
 
اقتباس:

المشاركة الأصلية كتبت بواسطة القبطان المصرى22 (المشاركة 429571)
تماااااااااااااااام يابرنس
طيب معندكش فكره جناين الفاكهه اللى فى المندره ايه نظامها
يعنى ينفع نروح نصطاد فيها
اصل انا باعدى عليها بصراحه بيبقى شكلها مليانه يمام
وخصوصا جناين الجوافه
على العموم انا هاسجل رقمك
وان شاء الله اول ماظروف شغلى تسمح هاكلمك ونبقى نحدد ميعاد نخرج سوا

لو في امل و هتروح و علرفت انك رحت من غيري هزعللللللل
ابقي كلمني01119997151 و متنسااااش هههههههههههههه

صياد قديـــــــــــم 12-09-02 09:30 PM

رد: الموضوع الشامل عن صيد اليمام ودجاج الماء ليلا
 
طب منا الاماكن اللى بقولك عليها دى هيا اراضى جوافة بس طبعا مش اى حد يدخل يصطاد وكدا لاء انا عشان بروح من زمان الناس عرفانى دنا لما كنت بلاقى مافيش طير بصطاد جوافة هههههههههههههههههههههههههههه عموما ربنا يسهل الاحوال ونبقى نطلع طلعة ان شاء الله سوا

القبطان المصرى 77 12-09-02 09:54 PM

رد: Re: رد: الموضوع الشامل عن صيد اليمام ودجاج الماء ليلا
 
اقتباس:

المشاركة الأصلية كتبت بواسطة bebeto (المشاركة 429608)
لو في امل و هتروح و علرفت انك رحت من غيري هزعللللللل
ابقي كلمني01119997151 و متنسااااش هههههههههههههه

ههههههههههههههههههههههههههههه
عيب عليك يابيبو مش انا اللى ابيعك
لكن المشكله ان الراجل اللى عازمنا هو اللى يبيعنا احنا الاتنين
ههههههههههههههههههههه

القبطان المصرى 77 12-09-02 09:55 PM

رد: الموضوع الشامل عن صيد اليمام ودجاج الماء ليلا
 
اقتباس:

المشاركة الأصلية كتبت بواسطة صياد قديـــــــــــم (المشاركة 429627)
طب منا الاماكن اللى بقولك عليها دى هيا اراضى جوافة بس طبعا مش اى حد يدخل يصطاد وكدا لاء انا عشان بروح من زمان الناس عرفانى دنا لما كنت بلاقى مافيش طير بصطاد جوافة هههههههههههههههههههههههههههه عموما ربنا يسهل الاحوال ونبقى نطلع طلعة ان شاء الله سوا

هههههههههههههههههههههههه
خلاص يبقى اتفقنا بقى
طالما انت عارف الناس اللى هناك يبقى مفيش مشاكل

عـمـر 12-09-16 09:42 PM

رد: الموضوع الشامل عن صيد اليمام ودجاج الماء ليلا
 
تسسسسسلم والله كل ما اشوفلك موضوع اقول خلاص مش هتغرف تعمل موضوع احلى من ده هههههههههههههههههه وفي الاخر بتخيب ظني والاقي ابداعاتك لا تنتهي يا قبطااااااااان .... اسمحلي اديلك وسام القناص المبدع ههههههههه ... تقبل تحياتي وتقديري يا فنان.

القبطان المصرى 77 12-09-17 11:42 AM

رد: الموضوع الشامل عن صيد اليمام ودجاج الماء ليلا
 
اقتباس:

المشاركة الأصلية كتبت بواسطة عـمـر (المشاركة 438045)
تسسسسسلم والله كل ما اشوفلك موضوع اقول خلاص مش هتغرف تعمل موضوع احلى من ده هههههههههههههههههه وفي الاخر بتخيب ظني والاقي ابداعاتك لا تنتهي يا قبطااااااااان .... اسمحلي اديلك وسام القناص المبدع ههههههههه ... تقبل تحياتي وتقديري يا فنان.

يانهاااااااااااااااااااااااااااااااار مش فايت
لألألألألألألألألألألألأ
انا مش قد الكلام الحلو ده كله ياعمر باشا والله
هههههههههههههههههههههههه
والله مانا لاقى رد اقوله قصاد كلامك ده كله
بجد بجد اخجلتم تواضعنا
ربنا يبارك فيك ويكرمك يارافع معنويات الغلابه اللى زى
ههههههههههههههههه

tarik el 12-09-28 02:56 AM

رد: الموضوع الشامل عن صيد اليمام ودجاج الماء ليلا
 
مساء الجمال ياقبضان اشتريت انهارده الكرال الكسر الخشب وعايز اعرف ايه انسب تليسكوب لهاومتشكر على اهتمامك بالرد

نور المسلم 12-09-28 07:20 AM

رد: الموضوع الشامل عن صيد اليمام ودجاج الماء ليلا
 
الف الف شكر موضوع اكثر من رائع جزاك الله كل خير

shadymageed 12-09-28 08:38 AM

رد: الموضوع الشامل عن صيد اليمام ودجاج الماء ليلا
 
موضوع هايل تسلم ايدك وربنا يبارك فيك

_SAIKO_ 12-09-28 11:48 AM

رد: الموضوع الشامل عن صيد اليمام ودجاج الماء ليلا
 
الحمدلله انك عملت الموضوع قبل يوم السبت هههههههههه كان زمانة ف علم الغيب دلوقتي ههههههههه

القبطان المصرى 77 12-09-28 04:58 PM

رد: الموضوع الشامل عن صيد اليمام ودجاج الماء ليلا
 
اقتباس:

المشاركة الأصلية كتبت بواسطة tarik el (المشاركة 441537)
مساء الجمال ياقبضان اشتريت انهارده الكرال الكسر الخشب وعايز اعرف ايه انسب تليسكوب لهاومتشكر على اهتمامك بالرد

مسائك جميل ياكبير
والف الف مبروك عليك
بالنسبه للتلسكوب
انا شغال بـ 3=7=28 تاسكو
والافضل منه 3=9=40

القبطان المصرى 77 12-09-28 04:59 PM

رد: الموضوع الشامل عن صيد اليمام ودجاج الماء ليلا
 
اقتباس:

المشاركة الأصلية كتبت بواسطة نور المسلم (المشاركة 441581)
الف الف شكر موضوع اكثر من رائع جزاك الله كل خير

متشكر على مرورك يانور
تحياتى

القبطان المصرى 77 12-09-28 04:59 PM

رد: الموضوع الشامل عن صيد اليمام ودجاج الماء ليلا
 
اقتباس:

المشاركة الأصلية كتبت بواسطة shadymageed (المشاركة 441592)
موضوع هايل تسلم ايدك وربنا يبارك فيك

مرورك الافضل اخى العزيز
اتمنى تكون بخير

القبطان المصرى 77 12-09-28 05:00 PM

رد: الموضوع الشامل عن صيد اليمام ودجاج الماء ليلا
 
اقتباس:

المشاركة الأصلية كتبت بواسطة _saiko_ (المشاركة 441643)
الحمدلله انك عملت الموضوع قبل يوم السبت هههههههههه كان زمانة ف علم الغيب دلوقتي ههههههههه

ههههههههههههههههههههه
والله عادى مش هاتفرق يعنى
كنت هانزله تانى
والحمد لله على رجوع المنتدى

tarik el 12-09-28 06:42 PM

رد: الموضوع الشامل عن صيد اليمام ودجاج الماء ليلا
 
مساء الجمال ياقبضان بس هى بندقيه محترمه بس ارتكبت اول جريمه في حياتى انهارد بصتياد يمامه وانا فوق السطح بس وقعت بعيد عنى ومتشكر على ردك بس التلسكوب هيفرق مظبوط

القبطان المصرى 77 12-10-06 01:40 PM

رد: الموضوع الشامل عن صيد اليمام ودجاج الماء ليلا
 
اقتباس:

المشاركة الأصلية كتبت بواسطة tarik el (المشاركة 441757)
مساء الجمال ياقبضان بس هى بندقيه محترمه بس ارتكبت اول جريمه في حياتى انهارد بصتياد يمامه وانا فوق السطح بس وقعت بعيد عنى ومتشكر على ردك بس التلسكوب هيفرق مظبوط

اى خدمه ياكبير
وان شاء الله خير
ربنا يديك هخيرها ويكفيك شرها

salvo 12-10-12 10:08 PM

رد: الموضوع الشامل عن صيد اليمام ودجاج الماء ليلا
 
مفيش كلام غير انى ارفع القبعه للمجهود الرائع

تحياتى ...


القبطان المصرى 77 12-10-14 06:05 PM

رد: الموضوع الشامل عن صيد اليمام ودجاج الماء ليلا
 
اقتباس:

المشاركة الأصلية كتبت بواسطة salvo (المشاركة 444899)
مفيش كلام غير انى ارفع القبعه للمجهود الرائع

تحياتى ...


والله انت راجل محترم بجد
واعتز جدا بكلامك
شكرا ليك ياغالى

Mohammad Al Qassam 12-10-15 10:13 PM

رد: الموضوع الشامل عن صيد اليمام ودجاج الماء ليلا
 
موضوع أكثر من رائع و مجهود جبار و معلومات من بروفيسور محترف
تسلم يا قبطان و ربنا يجازيك خير و يغفر ليك و لوالديك و للمسلمين أجمعين

القبطان المصرى 77 12-10-16 09:13 AM

رد: الموضوع الشامل عن صيد اليمام ودجاج الماء ليلا
 
اقتباس:

المشاركة الأصلية كتبت بواسطة mohammad al qassam (المشاركة 445715)
موضوع أكثر من رائع و مجهود جبار و معلومات من بروفيسور محترف
تسلم يا قبطان و ربنا يجازيك خير و يغفر ليك و لوالديك و للمسلمين أجمعين

تسلم يامحمد بك ياحبيب قلبى
صباحكزى العسل

engineero eslam 12-11-13 09:59 PM

رد: الموضوع الشامل عن صيد اليمام ودجاج الماء ليلا
 
تسلم ايدك يا قبطان
روعة بجد
ربنا يجازيك خير ويغفر للوالد ان شاء الله

وعندى استفسار بس :)

بالنسبة لفراخ المياه ,,,انا لقيت مكان فيه كتيررررررررررررررر بس هوا مش نضيف يعنى مصرف بتاع صرف صحى فهل الفراخ دى بتاكل ايه بالظبط من المصرف ولا ايه؟؟

وفراخ المياه دى انا جبتها مرة وعملتها بالطريقة ال حضرتك قولتها بس اما بفتحها انضفها من جوا بتطلع ريحة غريبة جدا وقرفة جدااااا :( ,,, دا طبيعى ولا ايه ؟؟

وجزاك الله خيراااااا :)

القبطان المصرى 77 12-11-14 10:29 AM

رد: الموضوع الشامل عن صيد اليمام ودجاج الماء ليلا
 
اقتباس:

المشاركة الأصلية كتبت بواسطة eng eslam bakr (المشاركة 453685)
تسلم ايدك يا قبطان
روعة بجد
ربنا يجازيك خير ويغفر للوالد ان شاء الله

وعندى استفسار بس :)

بالنسبة لفراخ المياه ,,,انا لقيت مكان فيه كتيررررررررررررررر بس هوا مش نضيف يعنى مصرف بتاع صرف صحى فهل الفراخ دى بتاكل ايه بالظبط من المصرف ولا ايه؟؟

وفراخ المياه دى انا جبتها مرة وعملتها بالطريقة ال حضرتك قولتها بس اما بفتحها انضفها من جوا بتطلع ريحة غريبة جدا وقرفة جدااااا :( ,,, دا طبيعى ولا ايه ؟؟

وجزاك الله خيراااااا :)

السلام عليكم ورحمة الله
لا طبعا بلاش تصطاد فراخ من مصارف صرف عشان طبيعى هاتكون بتاكل من المصرف
شوف اماكن نضيفه اصطاد فيها يكون افضل
وبالنسبه للريحه
هى لو ريحة زفاره فده عادى لان الفراخ دى بتكون زفره شويه
لكن لو ريحه غير الزفاره فده اكيد بسبب المكان اللى هى عايشه فيه وبتاكل منو ( مصرف الصرف )
واتفضل حضرتك دى طريقة طبخ الفراخ البردى كان كاتبها احد الزملاء


1- بطبيعة الحال وبما ان فراخ الغيط من الطيور التي تعيش في الماء يقضل سلخها
2- توضع بعد السلخ في ماء وليمون وخل لمدة ساعة او ساعتين وتشطف بعد ذلك جيدا لأنها بتكون زفره جدا
3- تشوح الفراخ بالبصل والثوم لمدة 20 دقيقة بعد ذلك يوضع مقدار كوبين ماء
4- بعد نصف ساعة من الغلي ترمي الماء وتوضع في ماء جديد وتغلي جيدا

القبطان المصرى 77 13-03-15 06:23 PM

رد: الموضوع الشامل عن صيد اليمام ودجاج الماء ليلا
 
تم اضافة فيديو اثناء الصيد الليلى لتكامل الموضوع
الفيديو به مجموعة ضربات ليلا
http://www.youtube.com/watch?feature...&v=XDNAsY8L5qM

محمد حامد بلتاجى 13-11-10 09:29 PM

رد: الموضوع الشامل عن صيد اليمام ودجاج الماء ليلا
 
اقل كلمه نقولها باشا ابن باشا

القبطان المصرى 77 13-11-11 07:13 PM

رد: الموضوع الشامل عن صيد اليمام ودجاج الماء ليلا
 
اقتباس:

المشاركة الأصلية كتبت بواسطة محمد حامد بلتاجى (المشاركة 535403)
اقل كلمه نقولها باشا ابن باشا

تسلم يابرنس
مسائك عسل

عماد المهدى 14-11-30 11:16 PM

رد: الموضوع الشامل عن صيد اليمام ودجاج الماء ليلا
 
بسم الله ماشاء الله ولاقوة الا بالله فعلا استاذ بس الموضوع ده عايز قلب جامد والدنيا اليومين دول مش امان وطبعا لازم يكون معاك واحد يونسك ويساعدك فى لم الغنائم ونريد منك المزيد

Ehab elkaneshe 16-04-06 10:51 PM

رد: الموضوع الشامل عن صيد اليمام ودجاج الماء ليلا
 
ربنا يرحم والدك وجميع امواتنا
موضوع رائع...مشكور

khaled azab 16-04-30 08:22 PM

رد: الموضوع الشامل عن صيد اليمام ودجاج الماء ليلا
 
الله ينور ياقبطان احنا كان لازم ننضم للجروب المحترم ده من زمان عشان نتعلم من الناس المحترمه اللى زي حضرتك

ودايما يارب فى تقدم وازدهار

shereef general 16-06-30 06:57 PM

رد: الموضوع الشامل عن صيد اليمام ودجاج الماء ليلا
 
موضوع اكثر من رائع

googleomar 18-11-16 09:55 AM

رد: الموضوع الشامل عن صيد اليمام ودجاج الماء ليلا
 
السلام عليكم
صيد الليل رائع عن تجربة بس فيه ملاحيظ
1- لبس حذاء وليس شبشب اثناء الصيد الليلي عشان الافات زي العقارب والتعابين
2- عدم الجور فى الصيد يعنى تصيد على اد الاكل فقط ممكن اقصى حد 20
3- الصيد فى مكان واحد متعدد بيهجر الطيور منو عشان كده الافضل يكون بين الصيدة والاخرى 20يوم على الاقل فى المكان الواحد
4- حمل السلاح ليلا سواء رش او غيره بيكون مدهول للناس ممكن يعتقدوا انو الصياد حرامى مثلا عشان كده يراعى الصيد الليلي فى مكان الناس عارفه انك بتصيد فيه وعدم الصيد فى الاماكن الجديدة الغير معروفه ليك وللناس اصحاب المنطقة
5- عن تجربة انا لقيت تعبان اثناء الصيد راسه مثل كف الانسان الباالغ من فوق اسود ومن اسفله اصفر كان شكله مرعب بالليل

alamal1 19-04-19 10:43 AM

رد: الموضوع الشامل عن صيد اليمام ودجاج الماء ليلا
 
Jun 30, 2017 - تراهن بورشه بشكل كبير على السيارات الكهربائية. العثور على المقالات الإخبارية تسليط الضوء على أحدث أخبار السيارات وإطلاق سيارة جديدة فقط على alamalsayarat.com.

أحدث السيارات

أخبار الموضة 19-04-19 12:40 PM

رد: الموضوع الشامل عن صيد اليمام ودجاج الماء ليلا
 
فازت الشركة الرائدة في الصناعة السويسرية رادو بجائزة ريد دوت لتصميم المنتجات لعام 2017 لسيراميكها الفريد من نوعه. قراءة الأخبار يسلط الضوء على أفضل ووتش الشركات في العالم
العصرية الأزياء والاكسسوارات

peacekeeper 19-08-10 08:08 AM

رد: الموضوع الشامل عن صيد اليمام ودجاج الماء ليلا
 
موضوع رائع ومتكامل تسلم ايدك


الساعة الآن 08:44 PM

Powered by vBulletin® Copyright ©2000 - 2024, Jelsoft Enterprises Ltd. TranZ By Almuhajir