الصيد فى مصر

الصيد فى مصر (http://www.egyhunt.net/index.php)
-   ورشة الاسلحه (http://www.egyhunt.net/forumdisplay.php?f=63)
-   -   افضل طريقة صبغ سلاح في العالم " ادوات منزلية 100%" (http://www.egyhunt.net/showthread.php?t=14698)

Mohamed Talal 11-08-29 01:37 PM

افضل طريقة صبغ سلاح في العالم " ادوات منزلية 100%"
 
2 مرفق
السلام عليكم ورحمة الله
الموضوع ده كبيييير اوي يا صيادين مصر
وجهزوا نفسيكوا عشان هتقروا افضل وانظف طريقة صبغ سلاح في العالم
وهي تعد من اقوى وافضل طبقات الحماية للأسلحة
وتصل درجات لونها من الرصاصي حتى الاسود القاتم


الطريقة المتبعه هي الصبغ بالصدأ او كما يطلق عليها Rust Bluing
قبل البدأ العملية تحتاج الى صبر وعناية وغير مكلفة تماما
لكن لصبغ قطعة السلاح قد تستغرق من يومين حتى عشر ايام " متوقفة على الرطوبة ودرجة الحرارة واللون المطلوب"


المكونات المطلوبة
حامض هيدروكلوريك " فلاش " منظف الحمامات
حامض نيتريك " اختياري "
ورق فويل " رقائق الومنيوم"
قماشه قطن
سلك المونيا ناعم " من عند اي بقال ,, عطار...الخ"
حلة استنلس او المونيا او اي حلة تاخد السلاح
ماء مقطر " او مياه من الفلتر الخمس مراحل او الثلاث مراحل"
صندوق للرطوبة " لتسريع العملية "

شرح المكونات :
1- حامض الهيدروكلوريك : وهو حامض قوي عند ملامسته للحديد وتركه دون معالجته بسرعة يجعل الحديد يصدأ بسرعة في الهواء, ويمكن الحصول عليه اما بصيغة مادة كيميائية نقية او عن طريق اي بقال او سوبر ماركت او حد بتاع منظفات في صورة منتج اسمه " فلاش " وهو متوفر عند جميع السوبرماركتس والبقالين. وهو بتركيز 15 % تقريبا.

2- حامض النيتريك : ايضا حامض قوي جدا وميزته تسريع عملية الصدأ بشدة حيث تيحتوي على العديد من ذرات الاكسجين المطلوبة لأتمام الصدأ HNO3 اي كل جزيء منه يحتوي على 3 ذرات اكسجين, يمكن الحصول عليه بتركيز 50-60% من اي محال ادوات كيميائية او محلات الاسمدة الزراعية. وهو اختياري لتسريع العملية فقط.. ولكني انصح باستخدامه.

3- ورق فويل: طبعا مش هتكلم عنه:rolleyes:
4- قماشة قطن .. او قطعة قطن او اي حاجة قطن ان شاء الله قطن تنظيف الأذن..:D
5و6و7و.... شارحين نفسهم
8- صندوق الرطوبة : ممكن علب بلاستيك من اللي الحجة بتعين فيهم الاكل :o

بسم الله توكلنا على الله

الموضوع ده انا وصلت له بالصدفة البحتة اثناء بعض التجارب الكيميائية " كنت حاطط الفلاش في كاس وحطيت ورق فويل بتاع علبة السجاير في الكاس " بالصدفة مش فكاكة" فلقيته بيتفاعل وبيدوب بعد فترة وحطيت دبابيس صفرا من اللي بيربطوا بيها الكريستال في النجف المهم الكلام ده كلو داب في الفلاش " حامض الهيدروكلوريك".. وبعديها حطيت مسمار صلب لغاية نصه وطلعته ورميته على الكومودينو لقيته تاني يوم نصه مصبوغ اسود لكن مصدي احمر شوية رحت مصنفره خفيف.... المهم اكتشفت بعد كده بالبحث على الشبكة ان في نوع من انواع الصبغ " وهو الافضل " بطريقة مشابهه لكنهم بيأكدو استخدام حامض النيتريك وانا والله ماستخدمت لاحامض نيتريك ولا بتاع.

انا صبغت قطعة سلاح بالطريقة اللي هذكرها الان
ملحوظة : هذه الطريقة لا تصلح الا مع السلاح الحي او بنادق الرش المكونة من الحديد وليس الالتمونيوم

ملحوظة : تم صبغ هذه القطعه مرحلتين فقط في 6 ساعات فقط كل مرحلة 3 ساعات داخل صندوق الرطوبة

قبل الصبغ
http://www.egypthunt.net/attachment....1&d=1314841664


بعد الصبغ والتجميع
http://www.egypthunt.net/attachment....1&d=1314841664


للمرة التانية الموضوع هياخد منك شوية وقت ومجهود خفيف وتكاليف شبه معدومة ونتيجة من افضل النتائج في عالم الصبغ


الخطوات :

1- تفكيك السلاح: تفكيك السلاح كليا حتى البينات " الدبابيس " يعني فكه تماما.

2- ازالة الشحوم والزيوت من القطع المراد صبغها بالمذيبات مثل الثنر والاسيتون " وهناك طريقة افضل : فيه اسبراي بيتباع عند بتوع قطع غيار العربيات الاسبراي ده اسمه منظف الكربراتير وهو خلطة من اقوى المذيبات اللي هتشيل الشحوم والزيوت.

3- ازالة الصبغة القديمة :هناك طريقتين لأزالة الصبغة القديمة:
أ- الازالة بالساند بلاستينج :تاخد اجزاء السلاح اللي هتتصبغ " الكوبريوالجسم والزناد والشاكوش والامان... الاجزاء الواضحة من الخارج" وتروح على اي ورشة عندها ساند بلاستينج وتعملهم ساند بلاست حنين وخفيف وتتبع هذه الطريقة لو عايز سلاح مطفي وليس به لمعة.
ب- الازالة بالحامض والسنفرة: تجيب طبق غويت وتحط فيه القطع المرغوب ازالة الصبغة القديمة عنها وتفضي عليهم ازازة خل " ايوه خل من بتاع الاكل وتسيبهم نص ساعه كده ولا ساعة وتطلعهم تدعكهم بسلك المونيا هتلاقي الصبغة راحت ... واللي احلى من الخل واسرع بكتيييييييييييييييييييييييير الفلاش ايوه الفلاش " حامض الهيدروكلوريك بس خد بالك منه لأنه ابن كلب هياكل الصبغة في ثواني وعيبه انه هيغمق الحديد شوية..

المهم انا افضل الخل .. هو ابطئ كتيير وممكن ياخدله ساعتين او 3 ساعات لكنه افضل وحنين على الحديد.

وبعديها تجفف وتسنفر بورق سنفرة 600 فيما فوق حسب درجة اللمعان اللي انت عايزها
لو عايزه شبه مراية انا بستخدم 600 ثم 800 ثم 1200 ثم 2500
اه متعبة بس تستاهل
بعد ازالة الصبغة اغسل السلاح بماء دافيء كويس وبعديها ندخل على الشغل.

ملحوظة : من الخطوة التالية لا تلمس السلاح بجلدك مباشرة حاول تلبس جوانتيات لأن الجلد مهما كان جاف ونظيف بيكون فيه نسبة دهون خفيفة ودي ممكن تبوظ الموضوع كله.

دلوقتي لازم تكون مجهز المحلول بتاعك
100 مللي فلاش " حامض هيدروكلوريك 15 % " + قطعة ورق فويل 4 سم في 4 سم+ دبابيس الكريستال " 3 او اربع دبابيس " ان وجد" وتسيبهم ياكلو في بعض لمدة ساعهة ولا ساعتين
المهم حاول يكون محلولك مجهزوا قبلها بيوم ويا سلام لو عندك اي حتة حديد مصدية تحطها على الخلطة " انا مش بهزر على فكرة" المهم بعد الحاجات ما تدوب في الحامض خففه بنفس المقدار مياه مقطرة او من الفلتر المراحل..
ولو جبت حامض نيتريك تركيز 50 % حط منه 50 مللي للمحلول

4- الصبغ:
سلاحك نضيف 100 % مش عليه اي اثار او بصمات او خرابيش او زيوت ... تمسكه بأيدك الشمال وتكون لابس فيها جوانتي وايدك اليمين فيها حتة القماشة القطن او حتة القطنة
يدوب تخليها تلمس المحلول وتعصرها كويس منه يعني يدوب تكون مندية وتمسح بيها السلام مسحة خفيفة
وتحطه في صندوق الرطوبة او في اي مكان رطب لمده ساعة وبعدين برده بنفس القماشة " هتلاقيها مصفرة شوية:)" تديلو وش تاني يعني يدوب يشم ريحة المحلول " انت فاهمني؟؟
يارب تكون فاهم لأن التندية دي هي سر الصنعه كلها.

وبعد 6 ساعات تجيب سلاحك ولما تشوفوه مش تتصدم... اه مصدي وشكله زفت الزفت
شوفلك حتة سلك رباط او سلك نحاس وعلقه منه وتكون مجهز المياه المقطرة وحاططها على النار في الحلة وتكون بتغليييييي
وتروح مسقط فيها حتة السلاح
بعد خمس او عشر دقايق طلعه كده وشوف ايه الاخبار
ايه رأيك؟؟ فحمة صح
لو لسه مش مفحم سيبو لغاية 20 دقيقة
المهم القطعع الصغيرة مش هتاخد 3 دقايق في المياه
المياه لازم تكون مقطرة ... لو مياه الحنفية السلاح هيبوظ تماما والصدا هيفضل زي ما هو بل هيزيد

المهم طلع السلاح ونشفه كويس
وهات سلك المونيا ناعم واكحت السلاح عشان تشيل طبقة الفحم
ملحوظة : الدنيا كلها هتتلحوث وايديك هتسود
عادي عادي
ربنا يسترها ومراتك متطردكش من البيت:D

المهم بعد ما تكحته بسلك المونيا ناعم هتلاقي السلاح لونه بقى مصبوغ بس فاتح

تكرر الخطوة اللي فاتت
اللي هي اييييييييييييييييييه؟؟
تجي القماشة القطن
اه اللي بقى لونا برتقالي
ويدوب تخليها تلمس المحلول وتعصرها كويس اوي " تكون مندية وتدي السلاح مسحة كمان وتودية صندوق الترطيب او اي مكان رطب
خد بالك المسحة تكون في اتجاه واحد والمكان متعديش عليه مرتين والا هتلاقي الصبغة بدأت تطلع معاك
ولااااااااااااااازم الجوانتي

على العموم جرب في قطع صغيرة الاول
وهكذا تكرر الخطوتين الاخرانين بتوع تندية السلاح بالمحلول وتركه ثم سلقه في ماء مقطر وكل مرة تغير المياه من الحلة وبعدها تدعكه على الناشف بسلك المونيا.
مع كل مرحلة اللون هيغمق اكتر
وكل ما تسيبه يصدي اكتر فرصتك في اللون تكبر

الموضوع ده هياخد معاك من 3 الى 6 مراحل
حتى تصل الى اللون الفحمي الاسود القاااااااااااااتم
وبعد الفينيش الاخير طبعا تديها زيت
وجمع سلاحك
وبجد مبروك عليك احلى صبغة لأي سلاح

ارجو الافادة للجميع
هذه الطريقة كانت حكرا لأفضل منتجات الاسلحة
وهي الطريقة الوحيدة التي يمكن صبغ بنادق الخرطوش بها Holland &holland وغيرها
والان هي بين ايديكم
استخدموها فيما ينفعكم ولا يضر غيركم
السلام عليكم

محمد حسام 11-08-29 01:42 PM

رد: افضل طريقة صبغ سلاح في العالم " ادوات منزلية 100%"
 
مجهود عظيم ياريت لو فيه صور لو سمحت

أحمد عطاالله إبراهيم 11-08-29 01:46 PM

رد: افضل طريقة صبغ سلاح في العالم " ادوات منزلية 100%"
 
ايه الجمال ده ايه الحلاوة دى .. انا مش قادر اوصف الجمال ده كله ..

بجد مش لاقى كلام اقوله .. ربنا يبارك لحضرتك يا رب ويجعله فى ميزان حسناتك .. وكل سنة وحضرتك والاسرة الكريمة بخير يا رب ..

تقبل مرورى

sameer 11-08-29 02:40 PM

رد: افضل طريقة صبغ سلاح في العالم " ادوات منزلية 100%"
 
الله ينور عليك يا معلم تسلم ايدك

bravehro1 11-08-29 03:43 PM

رد: افضل طريقة صبغ سلاح في العالم " ادوات منزلية 100%"
 
شكر الله لك مجهودك ونصائحك

يسرى 11-08-29 04:14 PM

رد: افضل طريقة صبغ سلاح في العالم " ادوات منزلية 100%"
 
السلام عليكم وكل عام وانتم بخير الحقيقه مجهود جبار ومشكور عليه بس تم جميلك وصور الموضوع خطوه خطوه هايكون احسن بكتير ولى عتاب عليك وايضا مجموعه من الاعضاء بسبب موضوع الرسم على الدبشك ومش هانسامحك الا اذا شرحت طريقه الرسم دى وبالصور كمان مدام معندكش وقت للشغل معانا تحياتى ومنتظر الرد منك د يسرى رزق

YOSSEF EL MASRY 11-08-29 07:10 PM

رد: افضل طريقة صبغ سلاح في العالم " ادوات منزلية 100%"
 
اللة ينور ياباشا

egyptusman 11-08-29 11:28 PM

رد: افضل طريقة صبغ سلاح في العالم " ادوات منزلية 100%"
 
تسلم افكارك ودماغك وايدك اللى عملت كده وكتبت لنا الشرح .. كل عام وانت بخير :)

عادل عبده 11-08-29 11:41 PM

رد: افضل طريقة صبغ سلاح في العالم " ادوات منزلية 100%"
 
بجد مش هقدر اقولك الا تسلم ايدك يا فناااااااااااااااااااااااااااااااااااااااااااااااا اااان

doos99 11-08-30 03:05 PM

رد: افضل طريقة صبغ سلاح في العالم " ادوات منزلية 100%"
 
موضوع رائع بس متعب شويه بس يا رب النتيجه تطله حلوه


الساعة الآن 07:30 AM

Powered by vBulletin® Copyright ©2000 - 2019, Jelsoft Enterprises Ltd. TranZ By Almuhajir