رد: حل مشكلة الاسعار – من وجهه نظري
والله العملية بتختلف من شخص لأخر، فيه واحد ممكن يشترى بندقية ب8000 جنيه وبالنسباله عادى، تخيل مثلا بندقية إير كينج وصلت ل 8000 جنيه دلوقتى مع دخولنا موسم الصيد، تخيل لو فيه بندقية واحدة معروضة فى سوق المنتدى للبيع صاحبها هيبعها ب 7000 جنيه وهيبقى متمسك بالسعر ده، طب لو فيه إثنين بيتباعوا فى سوق المنتدى أكيد واحد فيهم هينزل 200 جنيه من ثمنها علشان يعرف يبعها، طب بقى تخيل أن فى 10 حتت مستعملة موجودين فى سوق المنتدى أكيد السعر هينزل أكثر من 1000 جنيه علشان ال 10 يعرفوا يبيعوا وهتوصل البندقية ل 6000 جنيه ويمكن أقل من كده.
تخيل بقى بنظرية حضرتك محدش أشترى، سوق المستعمل هيولع لأن مفيش جديد داخل السوق، البنادق الجديدة ممكن تقل شوية بس مش هتقل كثير لأن التجار مش هيستوردوا كميات كبيرة، بالإضافة إلى أن المستعمل غالى، فإيه إلى هيخلى تاجر يبيع كرال بأقل من 1500 جنيه وسعرها مستعمل وصل ل 1000 جنيه، بالإضافة ان مكسبهم فى البندقية الواحدة كبير، يعنى لما يبيع بندقية ويكسب 1000 جنيه هيمشى حاله، وبعدين بيعتمد على بيع حاجات ثانية مسدسات صوت وحى وذخيرة ورش ومناظير وجرابات وسكاكين وحاجات كثير، والبنادق لما تتخزن مش هتعفن ولا هتسوس.
الخلاصة دخول بنادق جديدة للسوق بيرخص سوق المستعمل وبيزيد تشبع السوق، وكل مستهلك على حسب إمكانياته ليشترى جديد لمستعمل ليصبر لأن فيه وقت فى السنة أسعار البنادق بتنزل، والكرال نزلت سعرها ل 1200 جنيه ودلوقتى وصلت ل 1500 نتيجة لموسم الصيد.
وإلى قادر يشترى والأسعار غالية يشترى، أنا ممكن اشترى غالى وأطلع فى موسم الصيد كم طلعة وربنا يرزقنى بكمية حمام وسمان ويمام تعوض الزيادة فى سعر البندقية بالإضافة لإشباع هواية الصيد والإستمتاع بها، وممكن أشترى رخيص وأركن البندقية ومطلعشى بيها ولا طلعة، يعنى ظروف كل واحد بتختلف.
__________________
قال رسول الله (ص ) : ( عَلَيكُم بالرَّمْي فإنَّهُ مِنْ خَيرِ لَهْوِكُم )
|