عرض مشاركة واحدة
  #1  
غير مقروء 13-06-14, 06:20 PM
الصورة الرمزية coyote160
coyote160 coyote160 غير متواجد حالياً
صياد نشيط
 
تاريخ التسجيل: Apr 2009
المدينه: الغربية
المشاركات: 493
معدل تقييم المستوى: 72
coyote160 من اهم اعضاء المنتدىcoyote160 من اهم اعضاء المنتدىcoyote160 من اهم اعضاء المنتدىcoyote160 من اهم اعضاء المنتدىcoyote160 من اهم اعضاء المنتدىcoyote160 من اهم اعضاء المنتدىcoyote160 من اهم اعضاء المنتدىcoyote160 من اهم اعضاء المنتدىcoyote160 من اهم اعضاء المنتدىcoyote160 من اهم اعضاء المنتدىcoyote160 من اهم اعضاء المنتدى
افتراضي الحل النهائي لكسر الأجزاء (ادخل مش هتندم)

بسم الله الرحمن الرحيم

الحل النهائي لمشكلة الأجزاء المكسورة

يا مساء الفل علي صيادين أحلي منتدي المشكله اللي هنتكلم عنها النهاردة مشكلة موجودة كتير جدا وقابلت كتير مننا وهي إن الاجزاء تتكسر نصين أو من ناحية من النواحي بشكل يقصف عمر المسدس الصوت لعدم وجود قطع غيار لبعض الأنواع وإن وجدت فهي بأسعار مبالغ فيها ممكن توصل لنص سعر المسدس الصوت طب والعمل ؟؟؟؟
الحل النهاردة هيحمل اسم الشريحة والمسامير هههههههههه سبب التسمية دي واحد صديق ليا كنت عملتله الموضوع دا بعد ما فشل اللحام بالانتيمونيا من مسك الجزء المكسور فأول ما شافه قاللي يا دكتور دي عملية شريحة ومسامير المهم المسدس المعروض صوره دلوقتي هو بي 29 تركي كان ماسك علي جزء بسيط من فوق وشرخ من الجانبين وعملتله الموضوع دا وبقي زي الفل وشكله مقبول جدا وبالذات بعد دهان الشرايح والمسامير الطريقة بالتفصيل هكتبها باذن الله بس اما نشوف الموضوع هيعجب الناس ولا فشنك ولو عجبك الموضوع متنساش أخوك بالتقييم و أسيبكم مع الصور ....







أما لو يثبتوا الموضوع ياااااااااااااااه

الخطوات للي يحب ينفذها أو يعلم عاللي هينفذها

نبدأ بسم الله
1- هنجيب الأول قطعه من الصاج سمك 2 ملم ليييييييييه؟ لأن بدنها محمل ويتحمل لو رفيعه زي اللي في البي 29 مبوظش وانتا بتخرمها ومتضعفش لو الباقي بعد الخرم هيبقي قليل .

2 - هنصنفر الصاجة كويس كدا عشان منتعبش واحنا بنعملها نفكها ونقعد نفك ونركب عايزين السن يفضل محمل أحسن عشان مايتكلش أو ما يحلقش بلغة الصنايعيه .

3 - هنعلم العرض اللي محتاجينه قد ايه والطول ونقص حته الصاج المطلوبة بالمقاس .

4 هنحط الجزء المكسور مكانه ونحط عليه الصاجة وونعلم بقلم فلوماستر رفيع أو طباشير وشوكة (الشوكة هي سلك مسنون زي القلم) و نذنبها تجهيزا للتخريم ويستحسن يكونوا علي خط واحد عشان الشكل .

ملحوظة التذنيب دا بيبقي الدكرة (أقلام القلاووظ) المكسورة بنسنها بوزها رفيع عالحجر النار زي القلم وندق عليها بالشاكوش عشان سمسمه البنطة متهربش مننا واحنا بنخرم .
5 - لو فرضنا اننا هتقلوظ مسامير سن 5 في 8 اللي بيقولوا عليها مسامير 8 لأن راسه بالمفتاح البلدي بتبقي 8 هنا لازم تعرف احنا هنعمل ايه أولا هو مسمار 5 ملي في 8 زي ما قلنا ايه معني 5 في 8 يعني المسمار لو قست عرضة بالبوكليز هتبقي 5 ملي والمسمار له سن حلزوني 8 من عشرة من الملي لو طرحنا من ال 5 مل 8 من عشرة يتبقي كاااااام؟
برافو اللي قال 4,2 هو دا مقاس البنطة اللي هنخرم بيها في الألومنيوم بتاعه الاجزاء والصاجة (الشريحة)هتتخرم بالبنطة ال 5 مل لأن مفيهاش قلاووظ طبعا أنا الخطوات الجاية هكلمك في فنيات عشان يطلع شغلك نظيف وما تلاقيش الجزئين بعاد عن بعد أو شكلهم وحش .

6 - احنا علمنا مكان الاخرام في الشريحة هنخرمها الأول ببنطة اقل من 5 اربعه مثلا وبعدين الخمسة بتاعتنا وتبقي خلصت خالص الأول هنجيب الجزء الصغير اللي قدام ونحط عليه الصاجة في مكانها وركز معايا في دي عشان هتعجبك في بنسه اسمها بنسه كلابه (يعني ايه ) يعني شبه بنسة الكهربا العادية بس فيها مسمار بتعاير مشوارها بيه فممكن تقفل الايد وها لسه بوقها مفتوح وتمسك الحاجة تكلبش فيها زي المنجله دي لما يبقي معاك واحده تبقي انت كدا باشا هتحص الصاجة في مكانها صح تقفل البنسه وتخرم لا هيرحل منك ولا يمين ولا شمال مفيش كلابه امسك بالعادية بس انشف واوعي تفلت منك الغلطه هنا بجون ههههههه هتخرم الاول بالخمسة أل ما يدوب تلمس تخوش لنفسها (يعني تعمي علامه علي مكانها دليل للبنطة اللي بعدها ) تطلع اوعي ايدك تسرح وتفك الكلابة وتخرم نفادي بال4,2 وتطلع وتاخدها عالبنك تربطها علي منجلتك وتقلوظها بقلم القلاووظ اللي بنسميه احنا الدكر بتبدأبالمسلوب وبعدين النص مسلوب وبعدين العدل وتجيب المسمار طبعا هيبقي طويل ونت عايز تعرف تقصة ازاي عالمقاس ؟ هتخلي فيه صاموله وتحط الصاجة عالجزء المكسور وتربطة لما يبقي عالسوا تعاير الصاموله وتفكة الجزء اللي قدام الصاموله هو اد الطول تقيسه بالبوكليز وتحل الصاموله من المسمار وتعلم الطول دا تقص الزياده مع ملاحظة ان الجزء اللي انت مش محتاجة هو اللي يتربط عالمنجلة متربطش من راس المسمار وتبوظ شكلها وطريقة القياس اللي أنا قلتها للمبتدئين انما انا هقيس باليوكليز دغري لكن دا لأنك جديد وممكن تقيس غلط .

7 بعد قص المسمار تلفه عالحجر أو بمبرد لو مش نطيف مكان قطعيه المنشار عشان ميبوظش القلاووظ اللي في الاجزاء وتربطة وتاخد الجزء دا تحطة مكانه بالظبط وتمسك بالكلابه بتاعتنا عالزياد من ورا في الجزي الكبير من الأجزاءبعد عن الخرم أهم حاجة انها تكون مطبعه في مكانها مش بعيده وبعدين تخوش بال 5 وتخرم بالأربعه واتنين من عشرة وتقلوظ وتركب المسمار المقصوص زي اللي فات بالظبط وتقلب عالناحية التانية وهكذا.

ملحوظة مهمه جدا جدا جدا الجزء اللي بتخرمه الكبير اللي فيه المجاري بتاعه الأجزاء دا لازم ولابد وانت بتخرم فيه تحط في الفاصل اللي بتملاه الماسورة حاجة بنفس العرض مثلا حته خشب .
برافوا الأخ للي سألني ليه ؟ الاجابة لان لو محطيتش حاجة تملأ الفراغ دا ممكن تتعوج معاك وانت شغال من التخريم بالشنيور أو المتئآب فتيجي تركبها تتحرك بصعوبة عالمسدس وتقرفك وتبقي جيت تصلحة بهدلته .
ثانيا ايدك متتهزش وانت بتخرم والا هتوسه الخرم وتضعف مكان السن .
واللي ميعرفش يعمل الكلام دا يجيب 60 جنية وييجي نعملهاله وخلاص هههههههههههههه ولا نديكوا سر الصنعه وناكل من بيوتنا إوعوا حد يصدق أنا مبشتغلش في الحاجات دي دا ساعه الفراغ كدا بس أنا راجل مشغولياتي كتير ههههههههه طبعا أنا حطيت الخطوات لأجل عيون المنتدي والأعضاء المحترمة دي يبقي عيب بقي لو ما ثبتولناش الموضوع أبطل أحط مواضيع تاني انتوا احرار يا ادارة حق الناس دي في رقابتك انتي ههههههههههه واللي شجعنا نحط الخطوات الناس المحترمه اللي عبرتنا بالرد ومشكورين جدا (محمد بك خلف - المصري 123 - الجوكر - سكوربيون - ايهاب بوب - هيل 007 )

العدد المذكورة بالترتيب البنسة الكلابة والبوكليز أو (القدمه ذات الورنية لو عايز الاسم العلمي )



__________________
اللهم احفظ لنا مصر
رد مع اقتباس