[Angel of Death]

السلام عليكم,
أكيد طبعا كثير مننا قبل ما يشتري بندقية له بعد ما يختار البندقية اللي ناوي عليها يقف أمام خيار أصعب, و نوع و عيار الرش.. عشان طدة أماحبيت أعمل موضوع عن كل أنواع و أحجام و الفرق ما بينهم من حيث الإستخدامات و الطاقة بتاعت كل نوع..

الأعيرة:
بنادق الضغط يتم إنتاجها بأرعة عيارات و هي كالأتي:
1) 4.5 مللي أو 177. بوصة أو ما يسمى في مصر "نمرة واحد"

2) 5.0 مللي أو 20. بوصة (ليس متوافر في مصر)

3) 5.5 مللي أو 22. بوصة أو ما يسمى في مصر "نمرة إثنين"

4) 6.35 مللي أو 25. بوصة أو ما يسمى في مصر "نمرة ثلاثة" لكن وجودة نادر جدااااا لو كان موجود أصلا



الفروق: نمرة واحد دائما يكون أخف و بالتالي أسرع بكثير عن باقي الأعيرة. لكن لأنة سريع يفقد دقتة كثيرا مع البنادق المتوسطة و القوية في قوة القذف. ذلك لأن غالبا تقترب الرشة إلى سرعة الصوت أو تكسر حاجز الصوت Sound Barrier مما يؤدي إلى إنفجار الموجات الصوتية Sonic Boom مما يؤدي إلى تشقلب الرسة مئات المرات في الثانية الواحدة و هذا يخرج الرشة تماما عن مسارها الأولي. يكون الرش نمرة واحد ضعيف في إسنخدامه للصيد في حيث إنه خفيف الوزن جدا و غالبا ما يصيب الطير بدون قتلة لأن الرشة تمر عبر جسد الصيد بدون تدمير أو تمزيق الأنسجة الحيوية. عندما يزيد حجم العيار يزيد الوزن و تقل السرعة و ذلك يزيد التلف في الأعضاء لزيادة الطاقة الحركية في المقذوف.

الطاقة الحركية:
الطاقة عشان تتقاس يا أساتذة ليها معادلة و هي كالأتي:
kinetic energy=½ mv²
خليني بقى أفصصها لحضراتكم.
أولا Kinetic Energy هي الطاقة الحركية. يعني كمية الطاقة بتاعت المقذوف عند قياس السرعة (خلي بالك أوي لأن مع تغير السرعة,تتغير الطاقة بناء عليه)

ثانيا: M أو Mass هو وزن المقذوف. ففي حال نمرة 1 (4.5 مم) فهو: 0.42-0.65 جرام حسب شركة التصنيع. أما بالنسبة لنمرة 2 (5.5 مم) فهو: 0.865-0.138 جرام أيضا حسب الشركة المصنعة.

ثالثا: V² في حيث V هي Velocity أو سرعة المقذوف و v² يعني مربع السرعة أو (السرعة x السرعة)

رابعا: دلوقتي لو طبقت المعادله ديه على الكرال مثلا اللي سرعة نمرة 1 (نأخد متوسط الوزن اللي هو 0.5 جرام أو 0.0005 كيلو جرام) 315 متر في الثانية تلاقي إن طاقة القذوف
kinetic energy= 0.0005*315*315*0.5
kinetic energy= 24.806
(خلي بالك تقسم الوزن على ألف عشان المعادلة ديه للكيلو جرام مش جرام)
دلوقتي يلا نجربها على رشة نمرة 2 (نأخد المتوسط الوزن اللي هو 0.112 جرام أو 0.00112 كيلو جرام ) سرعة الكرال مع نمرة 2 240 متر في الثانية مثلا
kinetic energy=0.5*0.00112*240*240
kinetic energy= 32.256

كدة إحنا عرفنا إن الرشة تمرة 2 أقوى كثير من نمرة 1 ..

خامسا:
ديه بقى أهم حتة. قوانين الفيزياء بتقول إن المقذوف الأثقل بيخسر سرعتة أسرع كثيير من المقذوف الأخف. يعني لما الرشة توصل لهدف على بعد 50 متر ممكن تلاقي الرشة نمرة 1 سرعتها210 متر/الثاني و نمرة 2 سرعتها 125 متر/الثانيه. هنا بقى عشان تختار أيهم أفضل ليك يبقى لازم نقرر المدى اللي أنت هتصطاد منه. لأنك لو هتصطاد في مسافة قريبة يبفى تاخد نمرة 2 وش عشان في المسافة القريبة نمرة 2 هتفرتك أبو و كمان أم الصيد. بس لو حضرتك عاوز بقى تعمل قناص و بتاع (زيي كدة بالظبط عامل فيها قناص ) يبقى عليك بنمرة 1. لأن نمرة هتحتفظ بسرعتها أكثر من نمرة 2 بكثيييييير لكن قد تفقد الدقة لخفة الوزن....
برده نوع الرش بيفرق.. عندك الرش المدبب زي الماستر بوينت, و ده قدرته على الإختراق رهيبة بشكل مرعب. و عندك الهولو بوينت و ده مجوف, لكن لما يرشق في صيد بينفجر (مش بنار يعني و كدة, لكن الراس بتفرد على الأخر و حجمه يزيد أضعاف و البطريقة ديه بيدمر أكبر عدد من الأنسجة اللي في الصيد) لكن قدرته الإختراقية ضعيفة..
سيتم مناقسة أنواع الرش العامة في قسم لاحق.

سادسا: كل شخص لي عيار مفضل له و مش بيعرف يعيش من غيره. يعني ممكن واحد يحب الهولوبوينت نمرة إثنين جدا و مش بيستخدم غيرة, و ممكن واحد ثاني يستخدم الماستر بوينت نمرة واحد و مش بيعرف يعيش من غيرة. اللي قصدي أقوله إن في الأخر كله بيرجع لي تفضيلك الشخصي و الطريده اللي هتصطادها لأن كل ما الطريدة تكبر كل ما تحتاج عيار أكبر.

الأنواع:
1) Match Pellets أو Wadcutter: و هو رش مسطح الرأس و يستخدم في مسابقات الرماية حيث أنه عند الإختراق يترك دائرة كاملة الشكل بحيث تسهل المعاينة. لدى هذا النوع من الرش دقة عالية جدا في حدود 10-30 ياردة (8-28 متر) لكن أبعد من هذا تبدأ الرشة بفقدان دقتها لأن الهواء يبدأ بتغيير مسار الرشة لكبر سطحها.


2) Domed Pellets: و هو رش لدية رأس على شكل قبة و يستخدم في جميع الإستخدامات و الصيد خصوصا. لدى هذا الرش دقة عالية جدا جدا حتى على أطول المسافات بسبب رأسة المقببة التي يجعل الرشة في قمة ال‘نسيابية حيث أنها تنزلق عبر الهواء بدون معارضة من الهواء. هذا الرأس أيضا يعطي الرشة قدرة ممتازة للإحتفاظ بسرعتها و مسارها (يعني الرشة مش هتنزل كثير على المسافات الطويلة) مما يجعلها رشة قوية جدا عند الإرتطام بالصيد و تقتلها فورا.


3) Pointed Pellets: هذا النوع من الرش يكون لدية رأس مدببة و يميزة القدرة الخارقة في الإختراق. يكون هذا الرش جيد مع البنادق الضعيفة و متوسطة القوة لكن مع البنادق الأقوى يعطي نتائج سلبية حيث إن مع السرعة العالية يفقد توازنة لشدة إنسيابيتة لأن أية فروقات كمية الهواء و لو كانت ضئيلة جدااا تدفع الرشة إلى إتجاة معين.


4) Hollow Point: هذا الرش يتميز برأس مجوفة دائريا. يعطي هذا التجويف الرش ميزة أنه "ينفجر" في جسد الصيد. بكلمة أنفجر أقصد أنه عندما يخترق أي مادة أكثر كثافة من الهواء يحقن الهواء المحبوس في التجويف إلى الجسد مما يتسبب في إزدياد حجم الرش 3 أو 4 أضعاف الحجم الأصلي بسرعة فائقة مما يشبة الإنفجار. يتسبب هذا الإنفجار في إزدياد كمية الأنسجة التي يتم إتلافها لأن الرشة تكون أكبر بأضعاف حجمها الأصلي و يتلف مساحة أكبر. أيضا لدى هذا الرش دقة عالية جدا بما يساوي Domed Pellets. لكن لإسنخدام هذا النوع يجب أن يتم بإستخدام بنادق متوسطة إلى عالية القوة لكي يتم توفير السرعة الكافية لإنفجار الرشة.







معلش أنا في قمة الأسف على الطول لكن قلت مينفعش مقولش الكلام ده لزملائي في منتدى الصيد في مصر.. الموضوع مجهود شخصي 120%.. أرجو التقييم و التثبيت عشات الكل يستفيد.

ممنوع منعا باتا نقل الموضوع لأي مكان أخر.

تحياتي,
محمد قطب الدكماوي