[فوزى السيد]

السلام عليكم
اولا احب اعرفكم على الموضوع وهو عبارة عن تحذير من كيفية الاصابة او اصابة احد برشاية لا قدر الله ودة هيكون عن طريق الا خوة الاعضاء ان لو فى اى حد اتعرض للموقف دة يحكية عشان الاخرين يتنبهو للخطاء اللى حدث وبالتلى يتلاشى حدوثة
انا هبداء بنفسى انا حصل معايا 3 حواث من هذا النوع الاولى كانت فى البيت ببندقية رمسيس كنا انا واخويا الكبير بنشن على غطيان كازوزة هو مرة وانا مرة وطبعا اللى كان بيضرب بيسيب البندقية ويروح يحط الغطا وفعلا روحت احط الغطا ولاقيت زى ما يكون حد ادانى بونية فى جنبى بصيت لاقيت الترنج مخروم رفعتة لاقيت نفس الخرم فى الفانلة وفى جنبى الايسر طبعا دوخت وخدونى المستشفى وقالو انها لدعتة بس مدخلتش لان الخرم اللى انا بس اللى شوفتة كان اتسد تانى وعمل زى طبقة حمرة على السطح المهم بعد فترة بدئت تئلمنى وطنشتها لحد ما الالم زاد وبقيت ما اعرفش انام على الجنب اللى هى فى واخيرا وبعد 3 سنين روحت عملت اشاعة ولا قيتها جوة وعملت عملية وطلعتها دى الاولى
التانية كانت فى صباع رجلى الكبير كنت طالع رحلة انا وواحد صحبى ببندقية صينى نمرة 2 وحنا فى وسط الاراضى طلع علينا واحد تقريبا مجنون وراح هاجم على البندقية وهى فى ايدى واخدها طبعا لو دلوقت الكلام دة كنت عميتة لاكن دة كان من حوالى 20 سنة كان عندى 17 سنة المهم البندقية معمرة وخايفين نقرب علية الا يضربنا بيها وربنا بعتلنا واحد من اصحاب الاراضى دة عاقل بقا مش مجنون راح هاجم على الراجل واخد منة البندقة و هو بيديهالى راح ضاغط على الزناد والماسورة فى اتجاة رجلى وارحت راشئة فى صباعى طبعا العضم صدها قلعت الشوز لاقيتها حرفها باين على وش الجلد روحت شا ددها بسن السكينة راحت طالعة بس روحى طلعت معاها وبرضة دوخت بعد ما شوفت الدم بس الحمد لله صحيت بسرعة
التالتة بقا كانت فى رجل واحد معدى وانا بعمر البندقية ويا دوب قفلت العتلة راحت طالعة وجاية فى قصبة رجلة ودى كانت بندقية ليون براند صينى وكان زنادها خفيف جدا وساعات كانت بتضرب من غير ما اضغط علية وكانت مشكلة كبير بس الحمد لله خلصت على خير والراجل بقا صحبى وكل شوية يفكرنى ويوريلى قصبة رجلة
يبقا هنا فى 3 اسباب للخطاء
الاول هو ان اخويا كان موجة البندقية ليا وانا بحط الهدف وصباعة جة على الزناد غصب عنة والزناد برضة كان خفيف جدا
و السبب التانى ان واحد ما يعرفش حاجة عن البنادق مسكها والنتيجة اصابة
السبب التالت انى ما كنتش موجة البندقية لمكان ما فيهوش حد ماشى وانا عارف ان الزناد خفيف وبيضرب لوحدة وطعبا فى الايام دى ما كنش فى خبرة اد كدة هو بس كان حب للصيد وبس وما فيش اى خبرة عن الصيانة والامان والحاجات دى انا حبيت احكى المواقف دى عسى ان تكون موعظة يتعلم منها كل من هو هاوى للصيد لكى يتلاشا حودثها وعلى الاخوة استكمال الموضوع بما حدث لهم والله الموفق