[Angel of Death]

السلام عليكم,
عاملين إية يا حضرات. الواحد مننا لما يكون قاعد عالنت بيدور على بندقية حلوة, أو مسدس صوت قوي, أو سكوب بيروح للمواقع الأجنبية عشان يشوف التقييم اللي عملوه الخبراء الأجانب. الناس ديه بتأخذ السلاح و "تفصصة" كدة عشان الناس تقرأ بهدوء و تفهم كويس. المواقع ساعتها تجيبلك صور و الخبير يشرح السلاح مميزاتة و عيوبة و في الأخر يقول وجهة نظرة فيه اللي بيبقى إسمها Review أي مراجعة . طبعا بالنسبة للبعض ده صعب شوية لعدم فهمهم المصطلحات الإنجليزية (أنا مش قصدي حاجة غلط و الله أعلم بنيتي). أنا بقى إقتراحي إن إحنا نعمل قسم في المنتدى يهتم بتقييم قطعة السلاح, أو الأكسسوار. ممكن واحد يقول "طب مين يا عم الحاج اللي هيعمل الشرح ده". هقولك منتدانا العزيز فيه خبرات مميزة مثل الأستاذ محمود شلبي (ملك الصيانة), الأستاذ عادل عبدة (مروض الكرال), و الأستاذ قنصل و الأستاذ هشام سمير, و الأستاذ أبو ضيف, إلخ, إلخ, إلخ.. (محدش يزعل مني لو نسيت أسمه أنا أصلي مش عارف كل الخبراء للأسف مع إن و الله هتشرف بكل شخص خبيرا كان أم لا إني أتعرف على حضرته) . الأساتذة ديه كلها أكيد قضت وقت طويل مع الأسلحة اللي معاها أو بتبيعها و على قدر كافي من الخبرة إنهم يشرحو كل التفاصيل بتاعته سواء بكتابة بما شبه المقالة أو بالفيديوهات. ساعتها ممكن ربنا يبارك للمنتدى و شركات و محلات الصيد في مصر و الشرق الأوسط يبعتولنا قطع أسلحة من عندهم عشان نراجعها للناس و الناس تفهم السلاح كويس قبل ما تشتري. و ديه طريقة معروفة عالميا. و على فكرة الناس اللي بتعمل المراجعة أو الشرح بتتقاضى فلوس بالإضافة إن السلاح بيتبعتلنا مجانا و نرجعهولهم.. ممكن واحد يقولي طب هنجيب سلاح من فين في أول المشوار. هقولك أي حد من الخبراء عنده سلاح يظبط نفسه كده كويس و يكتب ما يشبه "مقالة" و يبعته لمجموعة ثانية من الخبراء عشان لو أحبو يضيفو حاجة أو يصححو حاجة الشخص الأصلي نسيها أو غلط فيها بعد كدة ينزلوها على المنتدى. ممكن تقولي طب لو في أنواع مش موجودة مع الخبراء. هقولك هنشوف لو واحد من الأعضاء عنده السلاح ده. إذا كان عنده هنسأل منه إن إحنا نستعين بيه (طبعا بعد قبول الطرفين و تقديم ضمانات للشخص في حال لا قدر الله حدوث ضرر للسلاح) مع إن طبعا أنا عارف إن الاساتذة اللي عندنا بيحافظو على السلاح زي ولادها بالظبط ههههه مع الوقت إن شاء الله ممكن نجيب إعلانات و فلوس و نبدأ محل أون لاين لبيع الأسلحة في مصر و الشرق الأوسط (طبعا مع موافقة كل الجهات الأمنية و الجمركية المختصة) و نبقى زي PyramidAir كدة. هتقولي طب لو (لا قدر الله) ما جالناش إعلانات. عندي فكرة جهنمية. إحنا نطلع بعثة في كل محافظة في مصر, البعثة ديه تتطلع تلف محلات الأسلحة اللي في جميع أنحاء الجمهورية تعرض على أصحاب المحلات إنهم ينضمو إلى المنظومة. المنظومة بقى عبارة عن إن إحنا هنقل المحلات إن إحنا نعرض بضاعئهم على الموقع بتاعنا و كل زبون هيدور على البضاعة اللي عاوزها و يقارن الأسعار بين المحلات و كل محل مشترك عليه إنه يدفع نسبة (خلينا نقول 7% مثلا) من الثمن المدفوع من البيعة بالإضافة إلى إشتراك سنوي بسيط. و بالفكرة ديه إن شاء الله نكون عملنا أكبر تطور ممكن يشهدها قطاع الأسلحة و الصيد في الشرق الأوسط بحيث إن الجميع الناس في منطقتنا يعانون من إلتهاب الأسعار بسبب جشع المستوردين (مش التجار يجماعة, في فرق ضخم لأن التجار غصب عنه لازم يبقى سعره كده عشان هو لو القطعة بيشتريها ب 1000 جنيه مينفعش يبيعها ب 700 اللي هو سعرها الأصلي عالميا فهيضطر يبيعها ب 1300 عشان يعرف يأكل ولاده هو كمان). هتقولي طب عشان نعمل كل ده هنحتاج موارد بشرية, هقولك مهو ممكن كل واحد في محافظته يجمع زملائه في المحافظة و يلف فيها على المحافظات تطوعا طبعا. و أنا أول واحد بتطوع أهو عشان بجد و الله أعضاء المنتدى ده ساعدوني لدرجة محدش يصدقها. أنا ممكن لو أترجم التقارير اللي الخبراء هيكتبوها لمراجعة السلاح للإنجليزية (بما إني الحمد لله لغتي الإنجليزية زي العربي يالظبط, زي البومب يعني.. هههههه ) و بكده بقينا دخلنا السوق الدولي كمان..
أخيرا أحب أشكر حضراتكم إنكم إستحملتوني في الحوار الطوييييل ده. و و الله الموضوع من فكرتي 120% من الأول للأخر.. هوصيكو على التقييم و التثبيت عشان الإدارة المحترمة اللي عملتلنا المنتدى الحلو ده تشوفها و الله أعلم ممكن تتنفذ..

شكرا لحسن الإستماع,
محمد قطب الدكماوي