مشكله جامده جدا

[charesma]

السلأم عليكم ازيكم يا احلى صيادين
انا عندى مشكله بجد منكده عليا جدا جدا وهى
السوسته بتاعت الديانا 52
انا لسه فاكك البندقيه امبارح والله لقيت السوسته متقسمه 6 اجزاء من جوه
طيب قولولى اعمل ايه علشان المشكله دى جبتلى بجد حاله قلق
لأنى لسه مغير السوسته دى من حوالى 3 اشهر فقط وكانت اصليه ميه الميه الحل ايه بقى معاها؟؟
معلش انا طولت بس علشان دمى محروق.

[galal khalifa]

صباح الفل يا كارزما
لو انت فاكر انا قلت لك ان عيب ال52 انها بتكسر السوستة لان الصلب بتاعها صلب بجد ومن كتر صلابتة بيكسر وعلي فكرة ها تلاقي البندقية بتضرب بس مش بنفس القوة ومعلش ولا يهمك يابطل

[steyr68]

السلام عليكم
محمد انت عارف انى معايا الديانا 52 مشكله انكسار السوسته لم تحدث معى مطلقا ودائما اقوم بتغيير السوسته لمجرد التغيير
وفى سوست استمرت معى لمده اكثر من سنه ولم تنكسر
انا يا محمد مش عايزك تزعل للدرجه دى من المشكله دى لانى لها اسباب لو عرفتها هتتلافى انها تحصل
ممكن اعرض عليك بعض من اسباب انكسار السوسته اولا خام السوسته كل ما كان معدن السوسته صلب تبقى عرضه للانكسار
و بالفعل معدن السوست الاصليه لبنادق الديانا صلب وده فى السوست الاصليه القديمه او المخزونه فى المحلات السوست الجديده مصنوعه من خامات اكثر مرونه ولكنها ليست لينه وهى من خامات معدنيه مستحدثه ومثال هذه الانواع السوست ماركه ox
فهى من خامات تتحمل اكثر وتعطى قوه ارتداد اعلى من الانواع القديمه ونوع الخام المصنوع منه السوست موجود فى موقع الشركه المنتجه
يبقى ممكن اول حاجه ان السوسته اللى انت جايبها ممكن تكون مخزونه ومن الانواع القديمه .
طيب والحل؟
الحل ان ممكن معامله السوسته اللى بتشتريها من مصر بشكل مختلف ازاى يعنى؟
اول حاجه واهم حاجه انك تختار سوسته تكون جيده فى مظهرها العام ودى اول حاجه انها تكون اول حاجه مستقيمه ولا توجد بها
اى التواء لان السوسته لو بها اى انثناء فى اى جزء منها يؤدى الى التحميل بقوه على اجزاء منها دون باقى الاجزاء
فلابد ان توزيع الاحمال يكون بالتساوى على كل الحلقات المرحله الثانيه فى كيفيه اختيار السوسته هى انك ما تنكسفش من انك تطلعها من كيسها فى المحل وتجربها امام البائع لان مره اخدت سوسته من غير ما اجربها لمجرد ان الكيس المحطوطه فيه عليه البراند بتاع الشركه اعتقدت انها الاصليه والنتيجه انها كانت ما تنفعش حتى لبندقيه رمسيس
طيب نعرفها ازاى ممكن بالحس الشخصى انك ممكن تضغط عليها وتشوف مقدار الصلابه وتانى امر انك ممكن توقفها بوضع راسى
وتسبها تنزل من ايدك على البلاط او السيراميك وتشوف حاجنين وهما ارتداد السوسته لاعلى اد ايه وكمان صوت الرنين لها
كل الامور دى بتبين مدى جوده خام السوسته.
نيجى للبندقيه اول هام ان السوسته لازم تكون راكبه بشكل جيد فى البندقيه وان اول حلقه بالسوسته واخر حلقه لازم تكون مستويه تماما
وده يضمن ان السوسته تنزل بنفس استقامتها اثناء التعمير حتى كلنا بنلاحظ ان السوست اطرافها بتكون مستويه عن طريق كشطها
على الجلخ ده مهم. البندقيه لازم اثناء التعمير تكون سلسه لا توجد اصوات للسوسته اثناء انضغاطها لو فى اصوات اثناء التعمير يبقى اكيد السوسته بيحصلها انثناء بسيط اثناء التعمير وهو المسؤل عن الحدوث الصوت وبالتالى حدوث انكسار لها مستقبلا.
يفضل حاجه واحده وهى
العامل البشرى اى المستخدم لان كتير من الحالات السبب الاستخدام الغلط للسوسته
هدىمثال احنا لما نحب نقطع سيلك معدنى من غير ادوات مجرد باستخدام الايدى بنعمل ايه نمسك السيلك ونفضل نتنى فيه رايح جاى
الى ان نشعر بسخونه مكان الحركه ثم فى النهايه انكسار السيلك
يعنى ايه؟
يعنى المفروض ما افضلش اضرب بيها ورا بعض لانى ده بيؤدى لسخونه اجزاء من السوسته ثم بالتالى ضعف تلك الاجزاء
فانكسارها.
الصح ان الافضل ما اضربش اكتر من ثلاث طلقات ورا بعض مثلا وبعدين اريحها من 3 دقائق على الاقل لاعطاء فرصه للسوسته حتى لا ترتفع
حراره اجزاء منهاوهذا بيتوقف كمان على درجه الحراره والرطوبه بالجو مع تشحيم السوسته او تزيتها وده من العوامل المساعده على الحفاظ
على السوسته الا انها ممكن تكون مدمره فى حاله سوء الاستخدام..
وعلى فكره انا فاكر ان انت كنت قولت ان البندقيه ما جمعتش معاك التعميره بعض المرات ودى ممكن تكون على فكره اول الظواهر
اللى تدل على انكسار السوسته وطبعا ما تفتكرش ان السوسته انكسرت الى الست اجزاء مره واحده السيناريو ان بينكسر الاول حلقه او تنين من الاطراف العلويه او السفليه ثم يتبعها اجزاء اخر اذا لم يتم تغيير السوسته.
فى حاجه كمان ممكن اطلبها منك تعملها علشان تحافظ على البندقيه والسوسته.
وهى الفيدر البلاستيك يستحسن انك تخرطه صوره طبق الاصل من الاستيل ده بيساعد فى الحفاظ على السوسته

[msgm]

وفيت و كفيت يا أ\steyr68

و عندي إستفسار بسيط.

لما السستة بتنكسر .

هل القميص .""المجرى بتاع البستم"" بيتضرر ؟؟!

[steyr68]

المشاركة الأصلية كتبت بواسطة msgm

وفيت و كفيت يا أ\steyr68

و عندي إستفسار بسيط.

لما السستة بتنكسر .

هل القميص .""البمجرى بتاع البستم"" بيتضرر ؟؟!

اذيك يا محمد
بالطبع لا فى بنادق الديانا من الصعب جدا تضرر تلك الاجزاء من انكسار السوسته
وعن تجربه انا هقولك حاجه شوفتها بنفسى فى عبقريه الاخراج الالمانى لمعدن اسلحه بنادق الديانا
وهى لاهم جزء فى البندقيه والمسؤل عن سرعه ارتداد السوسته وانضغط الهواء واندفاعه بقوه وبالتالى اندفاع الطلقه بسرعه عاليه
وهى السيليندر الخاص لبندقيه الديانا 52 او 54 او معظم بنادق الفيكسيد باريل من الديانا.
العبقريه تكمن فى الخام المصنوع منه السيليندر لانه مصنوع من نوع من الخامات يطلق عليه فى مصر فى اوساط الخراطين
الصلب الزجاجى وهذا من تجربه شخصيه ومن خلال حوار مع احد المتخصصين فى الخراطه ان الجوده الغير مسبوقه
فى اخراج هذا الجزء من الممكن ان تكون وحدها هى الشئ الاكثر اهميه لارتفاع اسعار الديانا.
ان هذا الجزء يوجد به مسمار الانكيه قد حدث انه تضرر راسه بسبب ربطه بشده عندى فى بندقيتى مما ادى انه اصبح من الصعب فكه ولجات
الى قطع التيله التى يربطها المسمار بالسيليندر لاخراج السيليندر من جسم البندقيه لاجراء الصيانه الدوريه
وبعد ان اخرجت السيليندر قكرت ان اقوم بتوسيع مكان المسمار وتركيب اخر اكبر درجه بعد ان قام الخراط باخراج المسمار القديم الا انه
لم يوافقنى على طلبى وقال انه مستحيل حتى قبل ان يجرب
تعجبت من كلامه ولكنه قال لن تدخل اى بنطه فى هذا السيليندر وان مكان المسمار سليم ولا داعى لاجراء عمليه توسيع او عمل قلاووظ جديد
ولكنى اصريت فما كان منه الا ان قال ان اشترى بنط المانيه جديده ليركبها على المثقاب وهتشوف بنفسك
اشتريت البنط اشتريت اثنتان وقام بتركيبها على المثقاب الكهربى وبدا فى التوسيع شاهدت الدخان وفجاه انكسرت الاولى
ثم الثانيه ويعد ان مسكت السيليندر فى يدى والله تخيل لم يخدش حتى شئ عجيب .
وكان تعليل هذا الخراط البسيط هو الاكثر دهشه لانه وضح الفكره من هذا .
هذا الجزء وببساطه حتى يكون ناجح فى عمله فى البندقيه لا بد وان يكون يتوفر فيه بعض العوامل
وهى ااولا املس لدرجه كبيره حتى يسهل الارتداد السريع للبيستم ولا يسبب اى اعاقه له اثناء الحركه مما يؤدى لعمليه فرمله لحظيه له او يؤدى لتقطيع الجلبه وهو بالفعل لو نظرتم داخله املس مثل الزجاج
ثانبا لا بد وان يكون شديد الصلابه حتى لا يتعرض للانثناء وهذا بالتالى يؤثر على عمله لانه يتمتع باستداره شبه مطلقه
وهذا هو اهم عنصر فعال فى تصميمه وهو عدم تعرضه بسبب الضغوط الشديده او الاصطدام من قبل البيستم
لاى تغيير فى شكله او فى استدارته وبالفعل هو لا ينثنى ولكنه ينكسر فقط وهذا يستلزم تعرضه لضغط هائل
غير متاح حتى من اقوى السوست انه وببساطه الاستيل الزجاجى كما قال.

[charesma]

متشكر جدا يا styer
وعلى الأهتمام بالموضوع بس حكايه السوسته دى بجد مشكله لأن انت عارف الغش دلوقتى وصل لحد فين من اصحاب المحلأت والى بيصلحوا كمان
بس برده فى حاجه غريبه ان البندقيه قوتها لسه جامده مش ضعيفه هى طبعا مش زى الأول بس برده قويه جدا وبصطاد بيها من مسافات بس الأقى فين سوسته تكون جديده وفى نفس الوقت اصليه ؟

[msgm]

تسلم على المعلومات يا أ \steyr68

و بالنسبة لأخي كاريزما ..

راجع أ\طلعت بخيت .
عنده معلوات عن أماكن السست الأصلية و أسعارها

[venatic13]

أ \steyr68

تسلم بصراحه كلام وافي وشافي

[galal khalifa]

الاخ العزيز كرزما ممكن تكلم المهندس طلعت هوة عندة سوست اصلي جاية من برة

[ابو الشوق]

\steyr68 شكرا على المعلومات المفيدة جزاك الله خيرا

[galal khalifa]

شكر حار جدا وتصفيق علي جميع من كتب في الموضوع لان الافادة هتكون للجميع

[عاصــم الشبراوينــي]

بسم الله ما شاء الله انا لسا شيف الموضوع بصراحه قريت حسيت اني مينفعش قول غير معلومات جامده جد ا وخير يا كرزما سهله يا عم

[galal khalifa]

الحمد لله ياعاصم الان
جميع الاعضاء اصبحوا اخوة ومتاحبين في الله وما حدش بيبخل علي التاني باي شئ او معلومة وانا اشكرك جزيل الشكر لانكصاحب الفضل في جمع الاناس علي الخير والمحبة

[عاصــم الشبراوينــي]

لا ربنا يخليك اهم حاجه بس ان اي حد عنده معلومه كان يفيد بيها كل الناس وده الهدف الاساسي

[galal khalifa]

يا كارزما اتصل بالمهندس طلعت وريح نفسك علشان موسم القمري قرب

[smsmn8888]

ممتاز 8888888888888