أحلى طلعة وأغرب موقف فى حياتى 25/12/2012

[engineero eslam]

السلام عليكم ورحمه الله وبركاته

كل سنة وكل أصدقائى واخواتى ف المنتدى بخير وربنا يجعل العام الجديد عام خير وسعادة عليكم اجمعين

النهارده بقا هحكيلكم على طلعة امبارح احلى وأغرب طلعة لان حصل فيها موقف فظيييييييييييييع وغريب

فى البداية أحب أشكر أخونا هانى ( القبطان المصرى ) لانى شخصيا استفدت منه كتير وخصوصا اخر موضوعين ليه جزاه الله خيرا

الطلعة كانت امبارح قبل العشاء بحاجة بسيطة لان الكهرباء كانت قطعت فقولت استغل الوقت واطلع اصطاد مع اخويا قبل امتحاناته وقبل ما اانا اروح الجيش قريب انا كمان lp]



اخدنا البندقية ( شنغهاى B 2 )



وعلبة رش مارسمان + حوالى 15 رشة نوع مش عارف اسمه كنت اخدتهم من واحد قريبى بس شكله نوع كويس لان العلبة ب 25 جنيه فلازم يبقا كويس طبعا ههههههههه

والكشاف الجامد ( هو اى نعم صينى بس جميل جدا )

والمرة دى اخدناها مشى من غير موتوسيكل لان المكان قريب مش بعيد

اتوكلنا على الله وأول ما طلعنا من البيت الكهربا رجعت تانى ههههههههههههههه

المهم ف الطريق للمكان ال انا كنت شايف فيه يمام من كام يوم قابلت فراخ ميه كتييييييييييييييييييييييييييييييييييييير وطبعا ضيعت عليهم رش كتيييييييييييييير لان الواحد بيضرب وهوا حاطط ف دماغه انه حتى لو اصابها كده كده مش هيعرف يجيبها وبالفعل بتتصاب وبتهرب



المهم وصلنا لشجر التوت حبيبى وواحدة واحد بنتسحب كده لقيت اليمام واقف بيقولى اضررررررربنى ضربت اول رشة جات ف اليمامة وشايفها بعينى جايه ف صدرها وماوقعتش برضو
على ما عمرت وهضرب تانى كان اليمام حس وطار معظمه الا واحدة واقفه مستنيانا المهم طاخ جات فيها بس مش راضية تقع طب طاخ تانى برضو جات فيها ومش بتقع الله وبعدين يا احمد يقولى تعالى نقف تحتها ونضربها المهم وقفنا تحتها بالظبط وبعد طاخ طاخ وقعت ودبحناها علطول ودورنا تانى ع الشجر ده مالقيناش قولنا الحمد لله ونطلع ع الشجر ال قدام يمكن نلاقى
ودار الحوار بينى وبينى احمد اخويا

احمد : يلا نطلع نشوف الشجرة الكبيرة ال قدام دى
انا : ياعم مش هنلاقى عليها حاجة
احمد : يلا بينا بس هى رحلة بقا ولازم نخلص الرش كله

رحنا ع الشجره ال بعدها ولسه بقول لاحمد عرفت ان مافيهاش يمام ببص الاقى يمام كتيييييييييييييير

اول رشة بسم الله ماشاء الله اليمامة نزلت مقفولة

تانى رشة بسم الله ما شاءا لله اليمامة نزلت مقفولة واتهبدت ف الارض كان قالب طوب وقع ولا حاجة هههههههههه

تالت رشة جات جنب اليمامة عمرت وضربت الرابعة جات فيها بس نزلت حيه وهى تجرى واحمد يجرى وراها ههههههههههه لحد مانزلت ف بركة مياه كده واحمد طبعا مش هيعتقها ونزل جابها

طبعا احنا كنا هنعمل فرح وكان فاضل شويه وندور ع اغانى شعبى ونرقص انا واحمد هههههههههههههه


4 رشات = 3 يمامات ماكناش مصدقين طبعا

يلا بينا ع الشجرة ال بعدها يا احمد ( ماهى الشغلانة بقت حلوة بقا هههههههههههه )

وبعد حوار طويل واقناع من احمد اخويا اننا نعدى من أرض مش مزروعة كده للطريق التانى ال كنا بنصطاد فيه قبل كده لان فيه شجر كتير قررت اننا نروح

واما وصلنا نص الارض ال مش مزروعة ولا فيها اى حاجة فجأة أبص كده الأقى اتنين لابسين ابيض واقفين ع بعد 50 متر
أنا : شفت ياعم اهو صاحب الارض هنا اهه وانا قولتلك مش عايزين حد يقولنا كلمة مالهاش لزمة
أحمد : ياعم الارض مش مزروعة صاحب الارض هيكون بيعمل ايه فيها وف العتمة دى ؟!

أنا : اااايه ؟!!!!!


أنا : طيب لف وارجع بالراحة ههههههههههههههههههههههههههههههههههههههههههههه

انا قولت احنا نرجع لان ف كل الحالات لو ده صاحب الارض ممكن يقولنا كلمة تزعلنا والامور تتصاعد ولا حاجة مالوش لزمه
وفعلا رجعنا واتمشينا قدام شويه وبعدين واحنا راجعين لقينا اتنين لابسين ابيض مقابلينا ههههههههههه
راجل شايل فأس : سلام عليكم ,, اتفضلووووو يا جمااااعة
احنا : وعليكم السلام ربنا يخليك ياعم الحاج ,,متشكرين

( طلع الراجل هوا وعياله لابسين ابيض وجايين يرعبونا احنا ههههههههههه )

المهم رجعنا الارض بتاعته وعدينا منها وقلبنا جامد بقا المرادى ههههههههههه

ووصلنا للطريق بتاعنا ولقينا يمام قليل وكانت نسبة الترييش كبيرة

لحد ماوصلنا للشجر ال احنا كنا بنصطاد عنده اصلا قبل كده

اول شجرة توت بسم الله ماشاء الله كانت متغطية باليمام ضربنا من عليها 2 وجبناهم دا غير الترييش الكتير


وبعدين رحنا لاخر شجرة ع الطريق وهنا بقا كانت المفاجأة

الشجرة برضو كان عليها يمام كتير وضربنا 2 ووقعوا اكيد بس علقوا ع الشجرة وماشفناهمش خالص
دا غير واحد او اتنين اتسرقوا

نيجى للمفاجأة والحاجة الغريبة ال حصلت معايا ( انا عارف انكم زهقتو من كتر الرغى ده )

كان فاضل يمامة واحدة ع الشجرة بس واقفة ف مكان صعب جدا قعدنا نضرب عليها كتير وهى مش راضية تطير والمهم ف الاخر ضربت حوالى 3 رشات جم فيها بس مش راضية تقع مش عارف ليه

يمامة بسبع ارواح

ومع الرشة الرابعة ال قررت انى اقف تحتها مباشرة واضربها فعلا اليمامة وقعت من الفرع ال واقفة عليه وفجأأأأأأأأأأأة الاقى حاجة كبييييييييييييييرة وبيضاااااااااااااااء وقعت من السما فوق راسى على الشجرة لدرجة انى ف لحظة شكيت ان طلقة من ال ضربتهم جات ف طيارة مثلا وقعتها ههههههههههههههههههههههههههه ومع مشاعر الاستغراب الشديد واخذ وضعية القرفصاء الى حد ما ببص فوقى لقيت



بوووومة حجمها كبيييير جدا مندفعة بطريقة غريبة فوقى جاية تسرق اليمامة ال انا اصطدتها لدرجة ان من قوة اندفاعها كانت بتكسر فروع من الشجرة التوت والصوت كان اقوى مع كمية الفروع والورق الناشف
وقفت لحظات مندهش جدا ومستغرب جدا والصمت خيم علينا دقيقة انا واخويا وبقينا نبص لبعض

دى بومة !
أحمد : هى البومة مستنية كل ده اما نضرب اليمامة نوقعها وبعدين تيجى تاخدها !


بس ف لحظة ما رفعت راسى ابص ع البومة كانت طارت بس لاحظت ان مافيش حاجة ف رجليها فقولت يمكن اخدت اليمامة فى منقارها مثلا ؟!

وبعدين قولت لنفسى : هوا ربنا كرمك النهارده وكنت متوقع انك تطلع ماتجيبش حاجة وجبت 6 يمامات وربنا جعلك سبب عشان يرزق البومة دى

وبعدين لقيت نفسى بتقولى : هوانتا يوم ماتعدى الرقم 6 ال ملازمك تقوم تطلعلك بومة من حيث لا تدرى تسرق منك اليمامة يا خايب ! هههههههههههههههههههههههه

وبعدين قعدت انور بالكشاف شويه اشوف ايه ال حصل لليمامة مالقتهاش بس ف الاخر لقيت يمامة متصابة وواقفة بعيد عن المكان ال البومة هجمت عليه فضربتها رشة واتنين لدرجة انى والله كنت شايف الدم بينقط منها وهى واقفة بغزارة وهى ولا هنا وف الاخر وقعت

وتخطينا العدد 6 وبقا 7 بفضل الله وروحنا مبسوطين الحمد لله من الطلعة والمشى والرزق والموقف الغريب ده

ودى صور الحصيلة بقا












معلش بقا طولت عليكم بس ده عشان انا خلاص ربنا كتبلى انى اروح الجيش فيا عالم بقا الطلعة الجاية هتكون امتا
السلام عليكم