حصريااا .. مجلة الصيد فى مصر (العدد الثالث)

[lilkapo]

مجلة الصيد بمصر

تنوعت المواضيع وتميزت كثيرا بالفترة السابقة وكان كل عضو بالمنتدى يجتهد ويبزل كل ما اوتى من جهد ليرتقى بمستواة فى انشاء المواضيع التى تميزة عن باقى الاعضاء وفى ظل تلك المنافسة الرائعة يستفاد الجميع وينمى كل عضو هوايتة بالمعلومات الازمة لاستمرارة بها والتقدم بمستواة ايضا وبمرورنا سريعا على بعض المواضيع التى كانت المشاركات بها كثيرة والاراء ايضا وبداية بالمنتدى العام :-

فكرة اصدار مجلة ورقية للصيد

وكان نص الموضوع كالتالى .
اخوانى الأحباء بالمنتدى ..
لدى اليوم فكره أحب أن أعرضها عليكم وهى فكرة إصدار مجلة مصرية ورقية متخصصة فى الصيد ربع سنوية والحقيقة أن لدى خبرة معقولة بالاضافة إلى كتابتى لمقالات سابقا فى مجلات متعددة فى مجالات أخرى لذا أقترح من الساده المهتمين أن نقوم بالعمل جميعا على هذه الفكرة.
وبداية أحب أن أرى مشاركاتكم واقتراحاتكم وذلك من السادة أعضاء المنتدى عامة والسادة طاقم الإدارة خاصة، وذلك لدمج أفكار اصدار مجلة ورقية بمنتدانا الاليكترونى المتميز، لذا برجاء من كل من يجد فى نفسه القدرة على المشاركة سواء بالرأى أو بالشراكة أو فى التنفيذ إما بالتحرير فى قسم معين أو حتى بالأفكار كاختيار اسم المجلة أو اقتراح الاقسام المطلوبة فيها أو هكذا التفضل بالتدوين فى هذا الموضوع وكما تعلمون فإننا فى المنطقة العربية وخاصة فى مصر نفتقد إلى مجلات عربية فى هذا المجال وأن كل الموجود مجلات أجنبية فقط لذا نرجو التواصل فيما بيننا حتى صدور هذه المجلة بإذن الله وسأوافيكم بكل التفاصيل بإذن الله لاحقاً وباستمرار مع دعواتكم بالتوفيق.
أخوكم كرم البلتاجى.
ولقد كانت الاراء مختلفة مبين مؤيد للفكرة ومعارض لها وكان سبب الاعتراض لبعض الاعضاء من وجهة نظرهم التكلفة المرتفعة للمشروع وكثرة الاجراءات اللازمة وايضا كان من الاعضاء من قال واوضح ان الجرائد الالكترونية اسهل واسرع انتشارا وغيهم من الاراء المحترمة والتى ان دلت فتدل على اهتمام الاعضاء بمصلحة اخوهم كرم البلتاجى وتوجيهة الى الافضل والى الان مازال النقاش قائم ومستمر وسنرى ما ستسفر عنة المناقشة قريبا مع متابعتنا لتلك المشاركة.

• وفى محاولة من العضو المحترم(khaledabdelnaby)

لحل مشكلة بعض الاعضاء الى بيحاولو يوجدو طريقة لحماية انفسهم ضد اى اعتداء فلقد قام العضو مشكورا بمحاولة من لحل تلك المشكلة عن طريق مشاركة بعنوان
حل لجميع المتسائلين عن سلاح للدفاع عن النفس

وكان نص المشاركة كالتالى
عندى حل لحيازة سلاح قانونى للحماية وارجو مناقشة الامر من السادة الخبراء وجميع الاعضاء لمعرفة مدى صحة هذا الاقتراح وفى حالة الموافقة عليه نرجو نشره على الاعضاء وارجو من الادارة التثبيت لحين الانتهاء من مناقشة هذا الحل وبحث مدى جدواه

انا فكرت فى هذا الموضوع واعتقد ان الحل الامثل بندقية رش محترمة ومعاها سكوب والواحد يحطها فوق السطح ولو حصل حاجة لا قدر الله يدافع بيها من بعيد عن نفسه وبيته وصوتها مش هيبان وممكن محدش يعرف مين اللى ضرب عشان العمليات الانتقامية ومفيش داعى لاصابات قاتلة ممكن فى الكتف او القدم كافية

اما عن الحماية الشخصية فمسدس رش برضه محترم كافى للمسافات القريبة ولكن يرجى الحذر فى استعماله من العدد اذا كانوا كثيرين

واخيرا هذا الحل حل امثل للسادة محبى هواية الصيد وهم الاعضاء الحقيقيين فى هذا المنتدى لانه بانتهاء الظروف الحالية سيستخدموا هذه الاسلحة فى ممارسة هوايتنا الجميلة والممتعة

ارجو اخيرا فى حالة الموافقة على هذا الحل توحيد الاجابة للرد على المتسائلين عن حيازة سلاح للدفاع عن النفس
وكالعادة لاقت الفكرة اقبال لما يحملة الاسم من حلم يراود كل عضو من من يتمنو فى ترخيص سلاح نارى او شئ يدافعون بة عن انفسهم وكان من الاعضاء من تقبل الفكرة واقترح ايضا عليها بعض النقاط ومنهم من اعترض او لم يتقبلها ومازال ايضا النقاش دائر بين معارض ومتقبل حتى الان


وبانتقالنا سريعا للموضوعات العامة

نجد فى هدا القسم شئ يجعل كل عضو فى هدا المنتدى فخورنا لانضمامة لتلك النخبة من الاصدقاء فترى انة يفيض بالحب والاخوة والصداقة المتبادلة بين الاعضاء ويسودة جو رائع فى ظل تلك المواضيع المتعددة والمختلفة للاعضاء وهو فعلا بمثابة نادى اجتماعى يلتقى فية اعضاء المنتدى يتبادلون المواضيع والنقاشات والطرائف فى محاولة منهم للهروب من ضغوطات تلك الايام التى تمر بها مصرنا الحبيبة فى تلك الفترة وبمرورنا بهدا القسم يجزبنا موضوع باسم قهوة المنتدى وكان للعضو Timo Jean

وكان محتوى الموضوع كالتالى
بسم الله الرحمن الرحيم

تحية طيبة للجميع

جاتلي فكرة بس مش عارف هاتعجبكوا ولا لأ

نعمل حاجة زي غرفة دردشة حية في المنتدى

هانعمل موضوع تمام!! والموضوع ده هانفترضله اي اسم زي ( قهوة المنتدى )

دلوقتي الموضوع ده يتثبت

بعد كدا اي حد داخل المنتدى يدخل يكتب تعليق صغير ليه بيسجل دخوله وهو خارج برضو نفس الطريقة

طب وليه التعب ده مالناس بتدخل وبتكلم بعضها في المواضيع عااادي ولا انت غاوي مشاوير

هاضرب مثال

انا بدخل المنتدى يومي تمام

احيانا بتصادف ان مفيش غير 5 او 6 مواضيع هما اللي جداد

وانا شاركت فيهم طب وبعدين

لما الموضوع ده يكون موجود هاقدر اعرف مين داخل معايا ومكن ندردش سوى

وده هايتيح اختلاط اكبر بأعضاء المنتدى

يعني مثلا الناس اللي بتحب صيد الأسماك مش دايما بتدخل الأسلحة الهوائية ده هايخلي في تعارف اكتر بين الصيادين

ومثلا لو قضية اتطرحت ممكن نناقشها هنا

وربنا يكرم

ولو عجبكم ممكن نبتدي من هنا......في انتظار تعليقاتكم

طبعا الموضوع مفيد ومهم جدا جدا وهدا رايى الشخصى ومحاولة رائعة من العضو الكريم بالنهوض بالمنتدى ومحاولا استدراج الاعضاء للمشاركات بكثرة واتمنى ان تنال تلك الفكرة احترام وتقدير الجميع ومساعدة العضو فى تنفيز تلك الفكرة

مطبخ المنتدى

اخترنا فى هدا العدد اكلتان مميزتان
الاولى
اللى عايز ياكل فراخ مشوية على طريقة سبع نجوم يدخل ياكل



الفرخة بعد التنضيف

هتنقعها حوالى ساعة فى تتبيلة من

الخل والزعتر والليمون والفلفل الاسود والملح ودول خلطة السر

وتفضل كل ربع ساعة تقلب فيها


وبعدين تاخد من الخلطة وتغطس داخل الفرخة من الداخل بحيث تتشرب جامد جداااااااا

واطلع على الشواية واديها

وفى نص الشوى حط من الخلطة بالمعلقة على اللحم

وشم بقا دلوقتى الريحة

وشوية كدة تستوى

ويلا بينا ناكل

والاكلة الثانية




الازنيا الايطالي


بسم الله الرحمن الرحيم
المكونات
1:نصف كيلو من اللحم المفروم
2:باكت مكرونه الخاصه بالازنيا وتباع بسهوله في السوبر ماركت
3:باكت جبنه موتزريلا متوفره برضو
4:بصله صغيره
5:زيت زيتون

مكونات الصلصه الايطاليه
1: 3 ثمرات طماطم
2:زعتر
3:ريحان
4: ملح وفلفل اسود

طريقه عمل اللحم
يوضع اناء علي النار ثم الزيت الزيتون ثم البصل ويشوح بسيط جدا ونضع عليه اللحمه المفروه
يعني نخليه لحمه عصاج زي بتاع البشاميل طبعا مع الملح والفلفل

طريقه عمل الصلصه

نضع علي النار اناء به ماء ويترك ليغلي جيدا جدا وتوضع الطماطم لمده 10 ثوان فقط لا غيط اكرر 10 ثوان فقط وترفع من الماء وتقشر جيدا ثم نضعها في الخلاط تضرب تلت تربع ضربه علشان يكون فيها قطع صغييييييييره جدا ثم نضعها علي النار مره اخري ونضيف عليها ربع كوب ميه فقط
ثم نضح الريحان ثم الزعتر والملح والفلفل يشترط زياده كميه الزعتر والريحان لتصل اللي الطعم المطلوب وتقلب ثم تترك لتغلي لحد ما تتقل

تسلق المكرونه بطريقه عاديه جدا

طريقه العمل بسيطه
نجيب صنيه ونضع فيها ماده دهنيه بسيط جدا علشان المكرونه متلزقش بس

نضع طبقه مكرونه ثم الصلصه عليها ثم اللحمه المعصجه ثم الموتزريلا وهكذا طبقات اللي ان نصل اللي اخر طبقه واخر طبقه لازم نختمها بالصلصه ثم اللحمه ثم الموتزريلا



وبالف هنا علي قلبكو ( مجهود شخصي ) ......... طريقه ايطاليه 100%

صور وفيديو الصيد والرحلات

واخترنا لكم فى هدا العدد اكثر الموضوعات مشاركة ومنهم موضوع


(رحلة امبارح حصيلة قليلة وقضية سلاح ابيض والحمد لله)


امبارح طلعت رحلة فى منطقة ارياف جنب مدينة مطوبس تبع محافظة كفر الشيخ وكان الجو جميل جدا من طرائف الرحلة لاقيت 3يمامات واقفين على عشة بوص وبينى وبينهم ترعة نقيت اصغر واحدة وضربتها لان اكيد لها دكر ومش هيطير ودة اللى حصل واحدة طارت وفضل الدكر ضربتة وقعتة هو كمان وناديت ولد ضغير عشان يلف من على الكوبرى ويجبلى اليمام اثناء ما هو بيلف الفرد التالت جة وقف ضربتة هو كمان بقا فى 3 على الارض لاقيت طير لونة بنى فى بيج اسمة كوك او عرقبوس جة وقف جنهم بعد ما وقعو فى ولد صغير واقف جنى قالى اضرب دة كمان قلتلة لاء دة مش بيتاكل قالى هيسرق اليمام قلتلة لا ما تخفش كل دة وطبعا الولد التانى لسة ما وصلش لليمام بصيت لاقيت فعلا الطير دة راح هاجم على اليمام وسارق واحدة وجرى بيها على الارض روحت ضاربة واحدة قضيت علية فى الاثناء دى الولد وصل ولم اليمام وجاب معاة الطير الحرامى ولسة هيلف عشان يرجع لاقيت كلب هاجم على الولد روحت معمر ولسة هضربة راح الطير الحرامى واقع من الولد وراح الكلب واخدة وقايل يا فكيك ورجع الولد بالسلامة ومعاة اليمام والكلب خد الحرامى وجرى بية الحصيلة النهائية 10 يمام وكروان واحد اما بقا السيىء فى الرحلة انى وانا راجع عند كوبرى القناطر وانا بركب عشان اعدى الكوبرى لاقيت 2امناء شرطة جيين هجم عليا تعالى كلم الباشا روحت للباشا اللى واقف على كمين فى اول الكوبرى ايوا يا باشا قالى اية البندقية دى قلتلة دى بندقية ضغط هوا قالى معاك سلاح ابيض قولتلة معايا سكينة بدبح بياها قالى هاتها وهات بطاقتك اديتة السكينة والبطاقة اقلى انت مشعارف ان السلاح الابيض ممنوع قلتلة امال انا هدبح باية قالى طيب اركب ركبت وروحنا القسم وعملولى محضر حيازة سلاح ابيض واتعرضت على النيابة والنيابة خلت سبيلى بعد ما حكيت لوكيل النابة طبعا انى بستخدمها فى الدبح المهم بقيت سوابق والحمد لله لاكن الجميل فى الموضوع انى تاكدت ان ما فيش قانون يمنع حيازة الاسلحة الهوائية والا ما كنتش خدتها وانا ماشى معلش دوشتكم واسيبكم مع الصور وحسبنا الله ونعم الوكيل

الموضوع الى اثار جدلا بين اعضاء المنتدى وافاد العضو صاحب الموضوع بعض المتمرسين فى القانون والحمد لله اعتقد انهم وجههو الى الطريق السليم للتخلص من تلك المشكلة




ويبدو ايضا ان قناص المنوفية مازال مصر على احتلال اكثر الاشخاص زهابا للصيد فى المنتدى
ولقد شارك عدة مرات وبدا يظهر كصياد وقناص محترف ومن طلعاتة الاخيرة وكانت بعنوان


(طلعه ساعه ونص بعد تركيب الاسكوب وظبطه)



ازيكم يا احلى قناصين اخباركم ايه يارب تكونوا بخير
انهارده كنت متفق انا واللى بيطلع معايا على طول بس ادانى زمبه ومجاش
فضلت واقف فى مكان مستنيه لانى استرخمت اطلع لوحدى وبصراحه الصحبه
هى اللى بتشجعنى اطلع بس كان عندى فضول كبير انى اجرب الاسكوب خصوصا
انى طول عمرى بصطاد اوبن سايد وموضوع الاسكوب ده جديد عليا يعتبر تانى مره اطلع بيه
واول مره مكنش مظبوط المهم فضلت الف فى المكان اللى بنتقابل فيه على عشم انه يجى
المكان ده فيه حوالى ست شجرات وترعه صغيره المهم وانا ماشى لمحت كيشه واقفه تستحمى
فى الميه عمرت البندقيه وخليت الاسكوب على رقم 5 وضربت فرفرت على طول وكانت اخر استحمام
ليها
فى الاول مكنتش عارف اجيبها ازاى فضلت احاول لحد ما يئست منها وزعلت عليها
قضيت الوقت كله فى صيد اليمام ولسه مستنى اخينا برضه يجى ومش عايز اسيب المكان وابعد
بجد الاسكوب كان مظبوط ميه ميه بس على رقم 7 ومع المسافات البعيده اوى مكنش اد كده
المهم ضربت شويه يمام وكل اللى جبتهم نزلوا مقفولين والله الا اللى معرفتش اجيبهم جت فيهم
وطاروا موقعوش لانى ضربت عليهم من مسافه يجى 70 متر برقم 7 فى الاسكوب
ضربت غراب فى صدره نزل مقفول هو كمان وصقر حاولت اضربه فى جناحه عشان اخده عايش
للاسف اتحرك وانا بضرب جت فى صدره برضه و مات رجعت ابص ع الكيشه لقيت الميه
قربتها شويه ناحيه الجسر جبت بوصه وقربتها اكتر ونزلت جبتها وكنت مبسوط جدا انى جبتها

انا اسف طولت عليكم اصلها كانت رحله ممتعه اوى مع انى ما مشتش كتير زى كل طلعه
بس الاسكوب اضاف للطلعه البهرات المره دى وعوض صحبى اللى مجاش
الحصيله فى النهايه سبع يمامات من ضمنهم واحده زغلوله و كيشه و غراب و صقر ودى الصور

وهناك ايضا طلعة اعتبرها من اجمل واحلى الطلعات لما تحملة من مشاعر حميمة وقصة صداقة واضحة بين الاب وابنة وكانت بعنوان


طلعة اليوم أنا وابني عبد الرحمن


السلام عليكم ورحمة الله وبركاته النهارة طلعت أنا وابني عبد الرحمن بعد ما اتصلت بواحد صاحبي ومردش عليا كان نايم وكان يوم جميل رغم قلة الحصيلة 8 يمامات غير اللي وقع ومعرفناش نجيبه وفيه قطة أخذت يمامة وجريت بيها وكنت بصطاد برش جامو بروماجنوم وأنا متعود على الجامو ماتش بس الحمد لله عبد الرحمن انبسط وكان بيلعب في الجنينة وكان يوم جميل
وأترككم مع الصور ودمتم في أمان الله

مع تمنياتنا جميعا ان تراة كما تحب ان شاء الله ويبارك لك فية ويجعلة زرية صلحة تنفعك وتنفع المسلمين جميعا

بنادق ضغط الهواء ومتعلقاتها

اخترنا هدا العدد موضوع اعتقد انه من اهم الموضوعات التى يهتم بها الكثيرون من اعضاء المنتدى الكرام فكثيرا منا لا يملك ان يشترى بندقية غالية الثمن واتجة الكثيرون لشراء التركية المعقولة (الكرال) ومع وجود اعضاء واشخاص عباقرة ومتخصصين بتلك البندقية ولن اقول اسماء حتى لا تصبح دعاية مجانية بمجلتى ههههههههه
فلقد زادت تلك البندقية شعبية واول تلك الموضوعات كان موضوع بعنوان


الكرال المعدلة قاتلة ورائعة وراضية غرورى جدا



اخوانى الاعضاء بعد التحية للجميع
حصلتلى حاجة بالصدفة بس حبيت اعملها موضوع لأفادة الأعضاء
انا من كام يوم اشتريت بندقية كرال تركى كلنا طبعا عرفنها المهم بمنتهى الصراحة خرجت اجربها مش هتصدقوا حمامة ويمامة مضروبة فى الراس ومش بتموت والرشة لم تخترق الرأس من مسافة لا تتعدى العشر امتار وده لفت نظرى جدا لأنى وضعت الحمامة واليمامة فى كيس على فرض انهم ماتو وبعد ساعة اكتشفت انهم صحيين طبعا تأكدت من ان البندقية ضعيفة لان ريش كتير ومكنتش متخيل بندقية فى اول طلعة تكون ضعيفة وانا اعرف سرعتها 240 متر يعنى هاى باور المهم لما رجعت فكتها كلها بالكامل علشان اشوف اية الموضوع
ماذا وجدت
1- الخامات المعدن سيئة جدا بالكامل
2- بندقية جديدة العلاية الموجودة على دليل السستة البلاستك مكسور
3- السستة نامت ولمت من استعمال يوم واحد
4-اهمال فى التركيب من المصنع (وجدت سوستة صغيرة للأمان فالتة من مكانها ومخربشة فى الحديد )
5-اهمال فى التقفيل والنظافة ( خشانة الخراطة ورايش بالكوم يؤدى الى الخربشة فى القانون وخصوصا ان معدنها طرى )
6-النشان الخلفى يتحرك بسهولة وغير ثابت
وحتى اكون منصف سوف اذكر المميزات
1-الدبشك الفيبر عجبنى خامتة وتصنيعة
2- الوزن الخفيف للبندقية عموما
3-طبعا السعر الرخيص
ملحوظة هامة وجدت البندقية من الداخل كوبى من الجامو شادو فى الميكانيزم مع اختلاف جودة الخامات طبعا (عندما فكيت الكرال والجامو كأن الجامو هى الجديدة والكرال هى المستعملة سنتين )
طيب الى معاة كرال يعمل اية يرميها يعنى طبعا لا يوجد حل
# اول ما تشترى البندقية فكها فورا واعمل الأتى
1-سنفرة جميع الأجزاء الدليل والبستم من الداخل
2- تنظيف البندقية جيدا من الرايش بالهواء ونزع الملتصق بمبرد
3-تغيير السستة فورا بأخرى انا غيرتها بسستة ديانا 54 وده الجديد ان مقاسات السستة كانت نفس سستة الكرال تماما ( طبعا من المعروف ان سستة الجامو بتركب عليها ايضا )
4-وضع بدل علاية الدليل هى حوالى 38 ملى قطعة من ماسورة بولى بروبلين نصف بوصة مع توسيع الثقب الداخلى بثقب 13ملى ليركب فى دليل السستة
5-مراجعة الميكانيزم بالكامل لوضع كل شيىء فى الوضع الصحيح المخصص له
6-تشحيم السوستة والبستم من داخلة وليس من ناحية الجلدة (يوضع قليل جدا من الشحم امام الجلدة لتسهيل دخول الجلدة وحتى لا يحترق مع الضرب لفترة طويلة لكثرتة )
مع تشحيم خفيف لمجموعة الزناد
7-فك النيشان الخلفى بالكامل واعادة التركيب بوضع نقطة من اى نوع لصق غير متين لأعادة الفك فى حالة الضرورة فى مكان بالبندقية بة ثقب للبنز السفلى البلاستيك للنشان لتثبيتة مع وضع وردة صغيرة جدا لمسمار الرباط الوحيد لحماية البلاستيك من الكسر اثناء الرباط
8- بعد ضبط النشان على التصويب يفضل وضع شمع حرارى على جسم الأكس المقلوز للصقة باليو الذى يتم بة ضبط الشمال واليمين حيث يكون ظاهر جيدا لمنع تحرك حرف اليو الخلفى مع مراجعة جميع اجزاء النشان الخلفى بتضيق العلب الصاج على اماكن تثبيتها حتى لا يتحرك الجزء العلوى من النشان
والأن وبعد عمل السابق ستجد النتائج كالتالى
1-نعومة اثناء الحركة والتعمير
2-قوة اكثر من الضعف
3-الدقة لم تتغير وربما اصبحت افضل
4-صوت اعلى
5- طول عمر للأجزاء الداخلية بعد التنعيم والنظافة
وطبعا ضع فى اعتبارك ثمن السستة الجديدة المضاف للتكلفة

سوق المنتدى

ونهايا بسوق المنتدى اخترنا لكم هدا العدد موضوعين اعتقد انهم مميزين وتلك وجهة نظر شخصية
وفعلا فى السوق عروض كثيرة مميزة وانصح كل راغب فى الشراء الاطلاع على سوق منتدى الصيد فى مصر وتلك العروض هى:-


فايروخ 80



________________________________________
فايروخ 80 عيار .177 بالكتالوج وكيس النشكانات دبشك خشب مجزع
ضربت للتجربة
مطلوب 6300 جنية

مدفع بام 21 كسر زيرو



للبيع لظروف خاصة
البام 21
عيار 5.5 مم 0.22
920 قدم/ثانية تقريبا
السرعة 280 متر
بحالة فوق الممتازة كسر زيرو

ضاربة حوالى 20 رشة لظبط النشان لم تخرج للصيد ولا مرة

بالكرتونة وجميع مشتملاتها

البندقية انا شاريها من اقل من 10 ايام وتم تشيحمها وتزيتها واستبدال مسامير النشان الخلفى باخرى لضمان عدم تحرك النشان الخلفى وثباتة والحمد اللة اصبح ثابت جدا

البندقية مفيهاش خربوش واحد زيرو تماما

السعر 2500 ج

التواصل على الخاص

اتمنى يكون العدد الثالث من مجلة الصيد فى مصر نال ولو جزء بسيط من اعجاب الاعضاء مع وعد الاعضاء باجزاء قادمة من المجلة معدلة ومحسنة ان شاء الله
اةةةةة مستنى التقييم هههههه
اخوكم ابو ابراهيم

[dr_mohasan]

أنا منتظرها من زمان والله , حمدا لله على السلامة , ومشكور على مجهودك الكبير

[lilkapo]

أنا منتظرها من زمان والله , حمدا لله على السلامة , ومشكور على مجهودك الكبير

اشكرك يا دكتور وصدقنى انا عملتها والله بعد رسالتك مباشرة وبجد انا عارف انها مش منثقة بس انا عملتها باستعجال حبتين ويا رب تنال بس اعجاب الناس وان شاء الله اوعدك باعداد قادمة هتكون اقوى واحلى كتير بس الرجالة تشد حيلهم ويعملو مواضيع قوية وانا تحت امرك
واشكر مرورك وسعيد انك اول من رد على الموضوع

[مصطفى ابواسماعيل]

الف شكر على المجهود الكبير ده

[lilkapo]

الف شكر على المجهود الكبير ده

الله يخليك يا صاحبى واتمنى تكون فعلا عجبتك

[قناص المنوفيه]

مجهوووووود رائع وفوق الممتاز وشكرا انك دخلتنى فى العدد
وع الكلمتين الحلوين دول بجد شرف ليا تسلم ايدك ..

[aymank2]

مجهود كبير ربنا يباركلك.

[lilkapo]

مجهوووووود رائع وفوق الممتاز وشكرا انك دخلتنى فى العدد
وع الكلمتين الحلوين دول بجد شوف ليا تسلم ايدك ..

دى اقل حاجة اقدمها لعاشق للهواية زيك
ومستنى جديد طلعاتك

[lilkapo]

مجهود كبير ربنا يباركلك.

الله يبارك لك ويكرمك ويا رب فعلا تكون عجبتك

[mohamed2010habib]

شكرا على مجهودك وليد باشا ,,,,,,,,,,,,,وحشتنا

[lilkapo]

شكرا على مجهودك وليد باشا ,,,,,,,,,,,,,وحشتنا

الله يخليك يا باشا
مشاغل شغل كالعادة هيا الى ماخرانى عنكم
مرورك اسعدنى

[Timo Jean]

مجهووووووووووووووووووود جميل جدا

ويسلموووووووووووو

احلا حاجة اني اول واحد

هههههههههههههههههههههههه

بارك الله فيك وجعله في ميزان حسناتك

واحلى تقييم

[lilkapo]

مجهووووووووووووووووووود جميل جدا

ويسلموووووووووووو

احلا حاجة اني اول واحد

هههههههههههههههههههههههه

بارك الله فيك وجعله في ميزان حسناتك

واحلى تقييم

حبيب قلبى ربنا يكرمك وفعلا انت راجل محترم اعتز بوجودى معة بمنتدى واحد

[fadeel79]

السلام عليكم ، بصراحة نفسى تطبع واقرئها زى المجلات العادية .

مستوى اكتر من ممتاز ، اجمل تقييم منى

[lilkapo]

السلام عليكم ، بصراحة نفسى تطبع واقرئها زى المجلات العادية .

مستوى اكتر من ممتاز ، اجمل تقييم منى

ربنا يكرمك والله يريت بس الموضوع مكلف بطريقة غير عادية بس مين عارف

[hesham d]

فكره جميله ... الى الأمام دائما

موفقين