أسعار الأسلحة بصراحة بقت حاجة صعبة

[black_arrow]

السلام عليكم اخواني الكرام ..

أنا اخوكم يحيى من سوهاج وطبعا انا لسه بقول يا مسهل يا رب في الصيد حتى لسه مش معايا سلاح وكمان محتار لو هشتري اجيب ايه من كتر اشكال والوان الاسلحة الموجودة لكن ما علينا ان شاء الله ربنا يكرم بحاجة كويسة

لا أقصد من موضوعي هذا الا مشاركة بعض الخواطر مع اخوانا في المنتدى والموضوع مفتوح للنقاش والمشاركة
وجهة نظري في الموضوع ان الاسعار الموجودة حاليا يعني صعبة شوية خصوصا على المبتدئين اللي زي حالاتي وبعبارة اخرى يعني ممكن بعض الناس اللي بتحب الصيد والاسلحة تعزف عن الهواية الجميلة دي ومع ذلك انا بإذن الله ناوي اجيب سلاح لكن طبعا لما يتوفر تمنه معايا

السؤال : هل من الممكن ان اسعار الاسلحة ترجع زي زمان ؟ ( عارف انه صعب )

انا على ما اذكر من ايام الثانوي وانا نفسي في سلاح حتى كنت ابقى مستني حصة الرماية بفارغ الصبر وكنت بستحمل رزالة العساكر والقائد والضابط المساعد ( وربنا يجعل كلامنا خفيف عليهم ) وكنت اروح اقف عند محل ابوضيف عندنا في شارع البحر بالساعة قدام الفاترينة اتفرج وابقى مش عاوز امشي الكلام ده من حوالي 11 سنة تقريبا وكان سعر اغلى بندقية عنده 500 جنيه وكان واضح انها حاجة حلوة قوي وسألته مرة كان الاسباني سعره في حدود 300 .. طبعا ما اعتقدش ان الايام الحلوة دي ترجع تاني

تقبلوا تحياتي واحترامي للجميع