يوميات مسيحى فى رمضان,,

[حاتم حسنين]

على لسان احد اخواتنا المسيحيين
زمان وانا صغير كنت بستنى شهر رمضان
زى اى حد من اصحابى المسلمين عشان حاجات كتيرة اوي
منها انى اخرج من المدرسة بدرى
وانى اتفرج على بكار
وانى اروح الدرس الاقى الاستاذ صايم ويلغى الدرس ونعد بعدها نفرقع بمب فى الشارع
وانى استنى بالليل برنامج حوار صريح وبدون مونتاج ومواقف ومواقف ومواقف عمرى مانسيتها زي

- انى اصحى بدرى عشان افطر قبل ما اروح المدرسة عشان اصحابى كلهم صايمين

ومينفعش اكل قدامهم" عشان مفيش فرق بينا "

- لما نلعب طول الفسحة واعطش فى الاخر
و اروح اغسل وشى عشان اعرف اشرب من غير ما حد يشوفنى
ومع ان المدرسة كلها بتبقى عارفة انى بشرب محدش زعل منى "عشان مفيش فرق بينا"

- لما نخرج بدرى من المدرسة وحد يسألنى خرجتوا بدرى ليه
اقول ببراءة عشان صايمين مع انى مش مسلم اصلا "عشان مفيش فرق بينا"

- لما اسهر طول الليل عشان اسمع المسحراتى قبل ما انام "عشان مفيش فرق بينا"

- لما بابا يفاجأنى ويجيب لى فانوس ويقولى دا فانوس رمضان "على فكرة الفانوس يبقى بيقول الاذان "وكنت برضه بفرح بيه "عشان مفيش فرق بينا "

- لما نتمرمرط طلوع ونزول السلم عشان جيرانا يبعتوا لنا طبق مليان قطايف
ساعة الفطار مع اننا مش صايمين اصلا وماما ترد عليهم تانى يوم بطبق مليان كنافة
وهكذا طول الشهر"عشان مفيش فرق بينا"

- يعنى لما اكون مسيحى واستنى اسمع اذان المغرب بفارغ الصبر
عشان بيجى بعديه بكار"عشان مفيش فرق بينا"

- يعنى لما ماما تقول لاختى متنزليش لوحدك ساعة الفطار عشان محدش ماشى فى الشارع ودامعناه ان ماما مش بتبقى قلقانة على اختى لمايبقى الشارع مليان حتى لو مليان مسلمين عشان كلنا بنحمى بعض "عشان مفيش فرق بينا"

وعشان المصريين طيبيين وعشان مفيش فرق بنا انا بقول كل سنة واحنا طيبيين ورمضان كريم

ياااااارب نرجع واحد ومفيش حاجه تفرق بنا ♥