اصنع حامل ليزر لضبط النيشان والسكوب بـ 35 جنيه

[صياد هاوى]

السلام عليكم .انا اسف دخلت متاخر جدا علشان اشرح لكم تجربتى مع الليزر بعد ما اشتريت سكوب 3*9*50 من الاستاذ هشام سمير بعد دوخه نظرا لمشكله المواعيد معاه .المهم ركبت المنظار وعايز اظبطه تمام مش عارف؟ فكرت اشترى قلم الليزر اللى ببتظط بيه النشان من على النت لكن الاستاذ هشام اخبرنى انه مش موجود دلوقتى وبياخد وقت على ما بيجى من بره . فقررت ان اصنع واحد فكره الحامل نفسه سهله وبسيطه جدا وهيه عباره عن ( سرنجه ) بيتبيت فيها قلم الليزر باللملى وبيدخل شحط تقريبا فى تجويف السرنجه بعد ما بنشيل المكبس بتاعها لكن المشكله فى الليزر نفسه لفيت عليه المكتبات كلها ومحلات لعب الاطفال علشان الاقيه ابدا مش موجود . قالولى بينزل فى مواسم الاعياد مع لعب الاطفال والله يا جماعه كنت هاتجنن معايا السكوب ومش عارف اظبطه وجبت السرنجه ووقفت معايا على قلم الليزر وفعلا انتظرت حتى عيد الاضحى بفارغ الصبر وانا تقريبا كل ما انزل مشوار اسال عليه لغايه ما اصحاب المحلات زهقوا منى ده لو عيل صغير مش هايعمل كده . واخيرا وجدته روحت مشترى نص دسته اي والله نص دسته 12 قلم ليزر اديت العيال ولاد اختى شويه يلعبوا بيهم وطلعت اجرى بشغف واهتمام علشان انفذ الفكره . وفعلا مسكت قلم الليزر ونزعت السداده الخلفيه اللى بتقفل على البطاريات لان فيها جزء بارز كان بيمنعها من دخول السرنجه و روحت ضاغط على جسم الليزر من الخلف باسناني وقفلت على البطاريات وشغلت القلم اشتغل والحمد لله و بعد ما حشرته فى السرنجه كويس وما كنشى فبه بوش خالص ركبت وش السرنجه بالابره بتاعتها فى فوهه الماسوره نره 2 وبدون ابره فى نمره 1 وركبت وباتت تمام وشغلت الليزر على الحائط على بعد 15 متر تقريبا لكن مع الاسف ما ظبطش وبعد المجهود ده كله احبطت احباط شديد وفى الاخر وجدت انه شعاع الليزر اللى خارج من القلم نفسه فيه ميل بسيط جدا لايلاحظ من الاماكن القريبه فرق على بعد 15 متر حوالى 7 سم يعنى كل ما تبعد هاتفتح معاك المسافه اكتر وللاسف العيب ده موجود فى كل الاقلام الصينى اللى خامته مش كويسه . روحت راميهم على جنب وجبت حوالى 3 علب رش وفضلت ورا الاسكوب لغايه ما اتظبط والحمدلله تم اصطياد 15 فرد يمام فى اول طلعه . معلش دوشتكم وبالتوفيق ان شاء الله .