طلعة ( روميو وجوليت )

[tarekabasy]

صباح الفل على اجدع صيادين.....
امبارح زى ماكنت مرتب انى لا هطلع نيل ولا شط بحرى.......كنت ناويها يمام..........

المهم صحيت6 ونزلت 6.15 انا واحمد ابنى وهو فى سنة خامسة ايتدائى......ونزلنا على الزراعة اللى جنبنا بصينا على شجرة مالقيناش عليها ولا يمامة هههههههه عدينا على اللى بعدها مالقيناش ولا يمامة هههههههههههه

المهم قعدنا ندرب شوية رماية على تارجتش ببقا طابعها وواخدها معايا ملزوقة على قطعة ابلاكاش........
وعلى 7.30 كان اليمام ابتدى يصحى..........وهو بيبقا بعد زقزقة العصافير بعشر دقايق او ربع ساعة


المهم بدأنا الضرب وكانت اول الضحايا ضربة جميلة ....كانت يمامة واقفة على تكييف فى عمارة فى الدور التالت ومش باين منها غير رقابتها وراسها بينى وبينكم كنت متردد اضربها قولت لا تيجى فى التكييف والا حاجة بس الحمد لله ركزت كويس ونشنت وضربت واوبا نزلت اليمامة والطلقة اصابت رقابتها فى مكان الذبح فنزلت بتطرطش دم لدرجة ان لما احمد ابنى مسكها عشان يحللها غرقت ايدة دم........ بس بصراحة كانت اصابة عجبتنى ........هى ماكانتش من مسافة بعيدة لكن كانت مزنوقة............اوى

المهم لما حسيت اننا قربنا من البيوت لفينا ورجعنا تانى للزراعة وبدأ الضرب تانى وكانت من الضربات المميزة يمامة واقفى على عمود بيت بيتبنى فى الدور الرابع يعنى عمود الخمس وضربتها بزاوية تخليها تقع جنب البيت والحمد لله وقعت مفرفرة ..........

وفضلنا فى حالة اللف والبرم دى لغاية 12.30 ...........تخللها فطار وكوبايتين شاى مع احد مالكى الأراضى الزراعية اللى بنصطاد فيها واللى اتعرفت بية من خلال صيدى وكلمنى عن الوز العراقى وقاللى انة بيجى فى موسم بذور البرسيم.........يعنى كمان 3 او اربع شهور وازاى انة حاول كذا مرة انة يقفش وزة منهم وماعرفش......... وان المسألة عاوزة بندقية خرطوش وانا قولتلة انشاء الله على ما الموسم يجى هكون ركبت اسكوب وهزبطك وز عراقى ههههههههههه........
وعجبتة فكرة التاو تاو جدا جدا وقالى مية مية ولا نولع ولا ندخن ولا اى حاجة...........
وبعدين كملنا مشى وسط الزراعة......ولقيت يمامتين شافونا طاروا قربنا منهم لغاية ما حسيت ان اخرهم كدا وانى لو قربت هيطيروا وكانت المسافة حوالى 30 متر..........وقومت مسمى الله وضارب..........وكانت ضربة موفقة جدا ربنا كرمنى فيها واليمامة ما اتحركتش من مكانها وقعت على وشها وهى كانت واقفة على الأرض ورفعت جناحها الشمال رفعة خفيفة...........

ودى كانت جوليت

ببص لقيت اليمامة التانية ماتحركتش وخاصة ان اليمامة اللى انضربت ما رفرفتش ولا بهدلت الدنيا....احمد ابنى بيجرى يحللها قولتلة اقف استنى اقف الولد فعلا وقف بعد ما كان جرى حوالى 5 متر......

كنت سمعت عن وفاء ذكر اليمام وانه ممكن يطير ويرجع للمكان تانى بس كانت اول مرة اشوفة بعينى وكانت اول ذكرى من نوعها تنطبع فى ذاكرة اينى...........

عمرت وضربت بسرعة الرشة ماجتش فى الدكر...........كان عدل وضعة واتحرك نص متر للجنب وبقا فى مرماى تمام وسميت وضربتة ونزل روميو مقفول بدرجة اقل من جوليت رفرف بسيط وتم زبحة وتحليلة ............

وكانت امتع حاجة حصلت فى اليوم انى شوفت روميو وجوليت انا وابنى احمد.........

ومن التعليقات الطريفة ههههههههه زوجتى بتقولى مش حرام عليك تفرق بينهم قولتلها هو انا فرقت بينهم دانا دفنتهم فى صينية واحدة ههههههههههههههه............


الغريب بقا ان ضرباتى فى الصباح الباكر مابتوقعش يمام هههههههههه لكن الصبح بدرى بوقع عصافير هههههههه حاجة تهلك من الضحك ههههههه اضرب فى اليمام يطير والعصفورة اضربها كأنى منشن فى وسطها ومحدد المكان بأدوات هندسية هههههههه

اغرب ضربة كانت على بعد خمسة متر وماجبتهاش ههههههههههه تخيلوا عشان كنت بضرب بسرعة جدا وخايف تطير...............

الغريب ان نشانى بيتظبط بعد ساعتين او تلاتة صيد وببدأ اضرب مسافات بعيدة وبجيبها.........


واسفرت الطلعة عن خمس عصافير و تسع يمامات.........واتنين انضربوا فى اماكن لم استطع الحصول عليهم............والرش المستخدم مارسمان..... ... والبندقية كرال المانى انجليزى اسبانى ههههههههههههههههههه

الصيد متعة لا توصف بجد ........وبرغم انى اول مرة امسك بندقية فى حياتى من شهر او شهر ونص بالكتير بس بجد اتمتعت كتير...........وبرغم انهم 3 طلعات لكن شوفت فيهم العجايب وكفاية انى شوفت روميو وجوليت




للأ مفيش صور من موقع الأحداث لأنى دايما بخفف من كل شىء وانا طالع اصطاد....البطاقة بس وعشرين جنية وموبايل بيقول الو.......وهدوم صيد طبعا تستحمل الندى والتراب ..........
ودى صورة الحصيلة بعد الوصول للبيت




Uploaded with ImageShack.us

الجميل بقا ان دراعى مابقاش يوجعنى من التعمير........خاصة وانا من الناس اللى بتهدر رش كتييييير جدا ههههههههههه

صحيح بفكر اركب اسكوب علشان بينى وبينكم الضرب من على مسافات هيبقا افضلى عشان اليمام دلوقتى حذر جدا جدا جدا ..........كنت بفكر فى 3*9*32
كمقاس يعنى........لكن ماركة لسة ما قررتش.........يا ريت كل ذو خبرة يقرا الموضوع دة يقولى ترشيحة واقتراحاتة..........علما بان البندقية كرال خشب