تحذير من الرش المارسمان

[mman2005]

بإختصار أنا كنت فى الإسكندرية الأسبوع إلى فات ولسة جاي من شوية وقلت أجيب رش مارسمان من المصنع إلى هناك بناء على نصائح أحد الأخوة الذى أشترى فى السابق وشكر فى رش المارسمان، المهم تفضل الأخ الفاضل بالذهاب معى إلى المصنع يوم الأحد الماضى وكان المصنع مغلق المهم نزلت يوم الإثنين بدون الأخ، هو قالى الرش نمرة إثنين أبتده ينزل منه وحش بس نمرة واحد كويس المهم قلت أروح المصنع لوحدى أشوف لو لاقيت الرشة شكلها حلو ومتساوية هجيب كمية ولو لاقيت شكلها وحش ومش متساوية وفيها عيوب مش هجيب المهم دخلت المصنع وهو ورشة صغيرة مش مصنع وفيه محل صغير قلت السلام عليكم لاقيت واحد كشر فى الخمسينيات من العمر مردش السلام قلت مش مشكلة قلته الرش نمر واحد بكم ونمرة إثنين بكم قالى الرش نمرة واحد ب 3.25 ونمرة إثنين سمعته بيقولى والله أعلم 3.80 وبعدين قلتله لو هشترى كمية بكم قالى نمرة إثنين ب 4 قلتله مش أنت قلت ب 3.80 قالى الكلمة دى مطلعتشى منى قلت ما علينا، ممكن أشوف شكل الرش المهم ورانى الرش نمرة واحد وإثنين وفتحلى علبتين، قالى الرش نمرة واحد مفيش غير 7 علب ونمرة إثنين موجودة كميات، المهم شفت شكل الرش لاقيته شكله حلو ومتساوى وتقريباً مفهوش عيوب المهم قلتله عايز ال 7 علب نمرة واحد وال 10 علب نمرة إثنين وأشترتهم على نمرة واحد ب 3.25 ونمرة إثنين ب 4.

من عادتى أنى بحب أعد الحاجة بعد ما أشتريها وكنت فى الإسكندرية قاعد فاضى فى شقة على الكورنيش قلت أعد الرش، عديت الرش نمرة واحد لاقيت أول علبة فيها 116 رشة فرحت وتقريباً الرش نمرة واحد عدد الرش فيها أزيد من 100 رشة، جيت أعد نمرة إثنين العلبة فيها من 89 رشة إلى 95 رشة أقصى علبة، يعنى مفيش علبة فيها مكملة ال 100 رشة قلت مش مهم الزيادة فى نمرة واحد تعوض النقص فى نمرة إثنين.

المصيبة بقى إلى خلتنى أكتب التحذير أنى لسة واصل بيتى فى القاهرة من ساعة وجريت على بنادقى نمرة واحد ونمرة إثنين قلت أجرب نمرة واحد الأول، وحطيت الرشة فى البندقية رغم أنها متساوية راس الرشة دخلت بالعافية فى الماسورة أجى أضرب الرش على عمارة قصادى ملهاش أثر، أجى أكثر الماسورة ألاقى الماسورة مسدودة يعنى الرشة مخرجتش، أضطريت اضضرب مرة ثانية علشان الرشة تخرج من الماسورة، جربت حوالى 10 رشات نمرة واحد أغلبهم حشر فى الماسورة ومخرجشى، جيت أقارن بين الرشة نمرة واحد المارسمان وشوية رش ألمانى موجود عندى لاقيت فيه فرق السما عن الأرض عن شكل الرشة، المارسمان تقيلة وراسها مفلطحة أكبر من الألمانى وديلها طويل، والأغية بتوع المصنع عاملين زخرفة بارزة على راس الرشة بعكس الألمانى، فراس الرشة بتدخل بصعوبة فى الماسورة، بعكس الرشة الألمانى الى راسها مش بتحتك فى الماسورة من أساسه وديلها بس هو الى بيبقى فارش على فاتحة الماسورة، جيت أقارن بين الرش نمرة إثنين المارسمان ورش مصرى نمرة إثنين مش عارف نوعه كان هدية من صاحب البندقية الى أشترتها منه برده لاقيت نفس الملاحظات، الرشة المارسمان راسها فيها نفس المشكلة بعكس الرشة المصرى الى مش عارف نوعها راسها مش بتحتك فى الماسورة ومفهاش الزخرفة الى موجودة فى المارسمان.

والأمانة علشان أكون حكيت تجربتى بكل صدق نمرة إثنين المارسمان محشرشى ولا مرة رغم أنى بحس أنه بيخرج من الماسورة بالعافية وراسه أكبر وبيدحل بصعوبة.

دى تجربتى مع رش المارسمان وربنا يعوض عليه فى 63 جنيه تمن الرش المصرى الزبالة إلى أسمه المارسمان ودى توبة أنى أفكر أشترى رش مصرى تانى رغم أن فيه منه كان كويس بس فى الأخر الصناعة المصرية يوم كويسة ويوم زبالة، على إيه خلينا فى المضمون الأسبانى والإلمانى والغالى تمنه فيه، وربنا ينتقم من صاحب المصنع ويخرب بيته يا رب.