رجاء المساعدة

[Mr_mody]

الي الاخوة الاعضاء الافاضل اسف لو حعطلكم بس عايز نصيحتكم في شراء مسدس رش يكون قوي في الدفاع عن النفس و ارجو وضع السعر ايضا و شكرا جزيلا لكم جميعا

[Consul]

يا أخي الحبيب مسدسات الرش ليست للحماية الشخصية أو الدفاع عن النفس...هي للتدريب على الرماية ومن مسافات قريبة...وهي ضعيفة ولا تصلح حتى لصيد العصافير...خالص تحياتي...

[Mr_mody]

شكرا يا استاذي علي الرد بس انا مش عارف اجيب اية علشان الدفاع عن النفس الايام دي حتي المكهرب ممنوع بيعة طب الواحد يدافع عن نفسة ب اية؟

[Ebrahim Al Ansari]

السلام عليكم
أخونا العزيز مستر مودي ده إقتباس لكلام الأستاذ قنصل فى موضوع كان مشابه لموضوعك والموضوع موجود فى المنتدى ممكن ترجعله وتقراه كله وده الرابط بتاعه http://www.egypthunt.net/showthread.php?t=5276
وده كمان موضوع مشابه http://www.egypthunt.net/showthread.php?t=5140

إقرء الموضوعين وإن شاء الله تستفيد من نقاشات كافه الأعضاء فيهم

المشاركة الأصلية كتبت بواسطة Consul

بسم الله الرحمن الرحيم...يا جماعة وحدوا الله وبلاش توتر وشد أعصاب وتحفز...المثل بيقول...إلل يخاف من عفريت فعلا بيطلع له...خلوا إيمانكم بالله كبير وثقوا بأنفسكم وبلاش الرعب إللي معيشين نفسكم فيه ده...والله مافيش حاجة والعملية أمان ولله الحمد بنخرج كل يوم صبح وليل وفي أماكن مختلفة ومتفرقة ولم يحدث أن رأينا إعتداءات أو سمعنا شيئ مؤكد...كله كلام وشائعات ليس لها أي أساس من الصحة...وكل من يروجها أو ينقلها لم يرى بعينه وإنما يذكر...بيقولوا...وسمعنا...مش عارف مين إللي بيقولوا ومين إللي سمعوا...في حالات فردية ودي موجودة من زمان وأماكنها معروفة وليست جديدة ولا تعتبر ظاهرة أو منتشرة...المهم الواحد يتجنب الأماكن النائية والمتطرفة والغير مأهولة وخصوصا بالليل...وإللى عنده مشوار أو مصلحة يقضيها الصبح وفي النور ويبتعد ويتجنب الأماكن المشبوهه أو المعروفة والمشهورة بالمشاكل...لكن ها نوتر نفسنا ونشد أعصابنا ونبقي متحفزين وبالطبع ها نبقي عدوانيين وأي حد يكلمنا نضربه في رقبته أو عينه أو أي مكان حساس...ها نعمل عاهات وتشوهات للناسب وممكن تكون إصابات قاتلة...إستهدوا بالله العملية مبالغ فيها جدا وأبسط من هذا بكثير ولا تستدعي كل هذا الخوف والرعب والقلق والتوتر...الواحد كده بيموت نفسه بإيده...سلمكم الله وحفظكم من كل سوء أو مكروه...خالص تحياتي...

أما عن رأيي الشخصي فأنا مع الأستاذ قنصل فى عدم الهلع وتكبير الموضوع وفى الآخر لو لازم تجيب حاجه تحسسك بالامان كنوع من الأخذ بالأسباب مش أكتر هات.. وربنا يسترها علينا وعليك وعلى الجميع ويتم علينا نعمه الأمن وميحرمناش منها اللهم آمين

[Mr_mody]

شكرا لك يا استاذ ابراهيم ولكن الموضوع مختلف في بعض محافظات مصر انا في اسكندرية و والد صحبي اوقفوة و اخذوا الموبيل و فلوس و كسروا زجاز العربية و غير كدة انا كل يوم بيبقي عندي كلية و معرفش الي راكب معاة دة سواق و لا حرامي انا بس عايز حاجة تشل حركة الي قدامي او تئذية لكم مش تموتة بس مش اكتر

[Ebrahim Al Ansari]

السلام عليكم
مستر مودي ربنا يحفظك ويصلح حالك، اللى انت بتقوله ده انا مقتنع بيه لأني زي أى واحد فى مصر حسيت بيه لما الإنفلات الأمني ده حصل، ومع التأني والتفكير بهدوء لاحظت عدة أمور.. أغلبية المشاكل الزائده عن الحد إنتهت بفضل الله.. فى فعلا حالات فردية مازالت بتحصل ودي غالباً ما بتكون بالليل متأخر وفى الأماكن اللى مفيش فيها جيش أو شرطه والحمد لله الاماكن دى نسبتها قليله ومش كتير وطول عمرها كانت قلق اصلا.. زمان كان فى برضه مشاكل وسرقات بس دلوقت الناس مبقتش زي زمان لما تسمع عن سرقه يقولوا مفيش دين ولا اخلاق خلاص.. دلوقت لما يسمعوا عن اى حاجه يقولو مفيش امان ومفيش جيش ومفيش شرطه فالناس يزيد توترها
الخلاصه اللى انا وصلتلها هي الآتي: مينفعش أفضل أحرق فى دمي وأعصابي وانا راجل ضغظي بيعلى واتعفرت كل ما اسمع عن حاجه حتى لو مكنتش متأكد من صحتها.. وفى نفس الوقت مينفعش أبقى بارد.. فالحل إني أهدى شويه بس أفضل يقظ وحذر بالقدر المعقول وبدون مبالغه
هتقوللى حلو قوي حذر ويقظ وبدون مبالغه دول بس إزاى!! أقولك مثلا بلاش حركه فى اوقات متأخره نهائي.. كل المشاوير تبقى بالنهار او فى أول الليل والدنيا لسه زحمه.. وليل نهار مفيش داعي الواحد يمشي بفلوس كتير وكده يعنى حاجات من هذا القبيل ومن الاخر فى داهيه الموبايل والساعه والمهم الصحه
وعاوزك تلاحظ ان زي ما انت خايف الناس كلها خايفه يعنى زى ما انت قلقان من السواق يطلع حرامى متستبعدش ان السواق او احد الركاب أول ما يشوفك بتركب يقول فى سره يا ترى ده حرامى ولا مواطن؟؟؟!!!!! ويسلام بقى لو حد لمح معاك حاجه محطوطه فى جمبك طبعا مش هيفكر دى صوت ولا رش ولا حتى بلي بلاستك هيقول ده طلع من البلطجيه اللى هربانين من ابو زعبل بس ماسك مسطره حرف تى كنوع من التنكر ويروح مسلمك لأقرب ظابط واقف وبهدله بقى يا باشا وده طبعا لو محصلش خناقه وطلع عاقل وقال يسلمك ومعملش فيها عنتر وحاول يقبض عليك بنفسه
من الاخر متحطش نفسك في موضع شبهات.. عاوز مسدس صوت ومعاك فلوس اوك هات لو هيحسسك بأمان بس متمشيش بيه خليه فى البيت .. بتحب المسدسات ومعاك فلوس برضه جميل هات وماله بس برضه متمشيش بيه ولا تروح بيه كليه ولا تركب بيه مواصلات وتعرض نفسك انك تتفهم غلط والناس تفتكرك من الأشرار واحنا ماشاء الله متسرعين جدا هتلاقى الناس بتضرب وبعد ما يخلصوا يقولو هوا عمل ايه؟؟ ها؟ ها؟ هوا عمل ايه بقى؟؟

نصيحه لوجه الله بلاش الخوف ده واعتمد على ربنا وهو الحافظ وخلى بالك لن يصيبك إلا ما كتب الله لك.. لازم تاخد بالاسباب بدون مبالغه.. يعنى لو مصدع خد حباية مسكن مش تاخد العلبه كلها.. يعنى لو خايف امشي بالنهار مش تمشي بطبنجه.. معلش طولت عليك بس من خوفي عليك ومن إحساسي باللى انت فيه .. وربنا يحفظنا جميعاً

[Mr_mody]

حلو الكلام جدا بس انا لو جبت مسدس حكون شيلو و خفية من الانظار و حتي لو حد شك و لا حتي قالي يتسلم للجيش انا الكارنية بتاع الكلية تابع لهيئة سياسية فصعب انة يعمل حاجة و البلطجي بيبقي شكلة باين انة بلطجي بس انا تراجعت عن فكرة مسدس لان ولا الصوت و لا الرش حيقدر يحمي و ربنا يسترها بقي

[ناصر-56]

انته عارف انه المسدس في حد ذاته ممكن يعرضك للخطر اكتر من وضعك الحال ابسط شي لو واحد بلطجي عرف بوجوده معاك وبالاخص لو تاكد انه صوت اكيد مش هيسيبك وهيطمع فيه وبكده انته تبقي اديته تيلفون وفلوس وفوقيهم مسدس ههههههههه وثانيا تخيل انه حصل موقف وبلطجي ثبتك مثلا وطبعا انته اكيد هتطلع مسدسك وهتديله رشايه ولا اتنين اكيد مش هيموتوه طبعا علشان المسدس ضعيف فطبعا انته تخيل علشان الاصابه الي حصلت له بسببك تتوقع في الوقت ده ممكن يعملك اييييييه ؟؟؟؟؟؟؟؟؟؟