|
الصيد العام موضوعات الصيد العامه وتعارف الصيادين. |
أدوات الموضوع | إبحث في الموضوع | انواع عرض الموضوع |
11-03-26, 01:58 PM | #1 |
صياد نشيط
تاريخ التسجيل: Mar 2011
المشاركات: 261
معدل تقييم المستوى: 6 |
مغامرات حوكا في ادغال محلات السلاح
أمبارح طقت في دماغي وقلت اتمشي سلانسية واشوف نظام سوق السلاح وصل لفين وحوار ان الاستيراد واقف ده اصله ايه وكمان بالمرة اتعرف علي توع المسدسات اللي موجود في السوق...اصلي عاوز اجيب مسدس رش يكون لقطة او بندقية ملهاش حل (كنت فاكر اني ممكن اتفق مع محل يجبهالي مخصوص).
قلت يا ربي انزل فين..انزل فين..ايوة مفيش غير العتبة..اشوف الكام محل اللي هناك وهما قريبين وحيبان منهم نظام السوق ايه ككل.. اول ما وصلت,,قلت احط الرحال علي محمد منسي..فرحت عنده...ووقفت شوية قدام الفترينة الاول ..اممم..جميل ..كله صوت...بس فيه حته رش متكيسة تحت ومش باين نوعها... علي البركة..وبعدين شديت الباب ودخلت...ابص ملقيش حد خالص!! يا اهل الله يالي هنا...ولا اي حاجة..قلت اطلع بره احسن استني خمسة...بدور وطالع بره...لقيت راجل كشر اوي وعنده لغد مرعب واقف قدامي...تعم يا استاذ...خير! حاسيت اني عاوز اجري...بس مسكت نفسي وقلتلوا بكل الاطة...عاوز اشوف مسدسات الرش اللي عندك من فضلك...سمعت صوت حشرجة ذي ما يكون بالغ فار في زورو وقللي "مفيش مسدسات رش يا استاذ ..صوت بس" انا سمعت صوت الراجل من هنا وغريزة الصياد بقت بتاكل في ايدي..والله لو كان معايا البندقية بتاعتي لكنت نشيت ام الفار اللي في زورو ده...المهم..بصيت في الفترينة اللي قدامة ..كان شكله مش طايقني وكنت خايف يشتمني ولا حاجة..وقلتلة "بس انا شايف مسدس رش برة اهو" الراجل المتوحش ده ابتسم ابتسامة مرعبة وبصلي من فوق لتحت باستهتار (مع اني والله كنت لابس حلو ومستحمي بصابون بريحة ومتسبسب) وقاللي..ده ب 4500 جنية يا استاذ ( مش عارف ايه لزمت استاذ..شكلة كان يبقول في سره يا ابن الشحاتة!)..قلتله طيب عاوز اشوفه بعد اذنك..البسمة البريئة علي وشة تحولت فجاءة لنظرات نارية وقاللي..اطلعهولك لو حتشتري بس...انا مش عاوز اعد افتح واقفل...قلتله...بس ازاي حشتري من غير متفرج...المهم الراجل نفخ نفخة كانت حتطيرني...وراح يفتح الفترينة... وجابلي المسدس...مسكتو في ايدي لقيتو والتر رشة واحدة كسر موديل قديم وشكلة تعبان اوي..قلتله...اممم..ايه ده..ده رشة واحدة!!! قاللي اه..امال انت عاوزة ايه؟؟ وراح شدة من ايدي قلتله خلاص بقي شكراً ....الراجل والله كان علي وشك يموتني...انا قلت..وحيات ابويا لاطلع عينك..قمت اشرئبيت برقبتي لقدام وبصيت علي الفترينة تاني وقلت ..وايه نظام المسدس الصوت اللي كان جنب الرش ده...وكنت ماسك في الفترينة بتاعت العرض اللي قدامي عشان ما اجريش..الراجل وشه احمر اوي وكان وصل لدرجة الانفجار وكان ناوي يشتمني بامي وابويا واللي خلفوني...وفجاءة الباب اتفتح ودخل ناس صعايدة كتير مع بعض واعدوا يتكلموا مع الراجل..انا قلت يا فكيك..ومشيت عشان انجوا بحياتي.. بكرة احكيلكوا علي مغامراتي في بقية المحلات انشاء الله.. __________________________________________________ ___________ الجزء الثاني: نزولاً علي طلب حبايبي الاعضاء- اصلي والله عندي شغل مهم..بس حاضر انتو عندي اهم. كنا فين ..كنا فين..ايوه..خرجت من محل محمد منسي وانا باستشهد ..ايه الناس دي!!!...وقلت في نفسي ولا يهمك يا حكحك..هما الخسارنين..زبون وراح من ايدهم..ارمي ورا ظهرك (زي كده فاروق حسني) وفي حموتها كدة اطلع علي ميشيل عازر ..اتكلنا علي الله كنت ركنت العربية في جراج الاوبرا (غبي..ما كان عندي جراج العتبة افرب لمشيل عازر!) ..المهم مشيت للصبح طبعاً لحد ما وصلت للمحل... ايهه دااااا!!! زحمة موت..ولا يوم الحشر..وناس كتير عمالة تتفرج وتخرج وتدخل والمحل زي الحق اصلاً...استعنت علي الشقي بالله ورفعت كتافي زي بتوع الرجبي ونطيت في الزحمة واعدت ابرم ابرم لحد لما وصلت لراجل قاعد في الوش ..شكلة كبير وطيب..قلتله السؤال المعتاد وانا ميتسم اوي " لو سمحت عاوز مسدس رش"..وفاجاءة سمعت صوت بيزعق جنب ودني ..حنجررررب...وهوب طلقة صوت في المحل..وعشان حظي اني طويل وكان المسدس ورا ودني..فاعدت تصفر... الراجل العجوز الوقور اللي قدامي قال حاجة مسمعتهاش... دوشة غير عادية..فقلت له هه؟؟ قاللي يا استاذ ركز معايا الله يخليك...بقولك الرش اللي هنا بايظ ومعنديش غير حتتين الماني تشوفهم؟ قلتله..بايظ ازاي يعني؟؟ (في اللحظة دي بالذات كان واحد زبون غتت واقف جنبي بيقول حاجة لواحد تاني وعمال يتفتف علي رقبتي (الله يقرفه) ..المهم الراجل قاللي زي الناس...اكتشافنا انهم بايظين..قلتلة..طيب بعد اذنك اشوف الحتيتين الالماني..اداني والتر بي بي كيه...والمسدس كان مشرخ وطالع عين امه زي اللي دايسه قطر .. قلت فرصتك يا حكحك تسال السؤال المتين...طيب ليه يا باشا كده..متجيبوا شحنة جديدة..هو مفيش استيراد ولا ايه...الراجل نظرته اتغيرت وشد المسدس من ايدي ..وقاللي لأ مفيش..كل حاجة واقفة...شوية وقلت في نفسي..قشطة..الراجل متجاوب...ارمي الورقة الاخيرة...طيب يا باشا ان كنت عاوز اوصي علي كام مسدس علي بندقية يجوا مخصوص من بره (انا عاوز مسدسين وبندقية..بس قلت كده عشان اشد انتباهه واشوف ميته)..الراجل قللي...مش بنجيب حاجة بالطلب...قلتله..ازاي بقي؟!! دانا واحد صحبي قاللي عليكوا بالاسم (اي كلام طبعاً بس برمي هلب)...قاللي صحبك مين ده؟ قلتله اي اسم... وهو عارفكوا وبيتعامل معاكوا...المهم الراجل لسبب ما كان مهتم قوي...وقاللي طب تعال معايا...وقام مزعق بصوت رهيب ...انا خارج وجي علطول...رد عليه واحد ...رايح فين يا ميكي ب** امك وسايبنا في الزحمة دي....انا اتخضيت...ميكي مين؟؟ وايه الشتايم دي !!! المهم انا مالي..استعنا علي الشقي بالله ..رفعت كتافي تاني واعدت ابرم وراه لما طلعت بره المحل..ووقفت دقيقة امسح المطر من علي رقبتي...(حاجة قرف) وفضلك ماشي ورا الاخ "ميكي" لحد حته زحمة شوية ورا المحل عند قهوة كده ووقفنا قدام واحد لابس جاكت اسود وبيدخن شيشة..وهنا حسيت بحجم غلطتي ..ايه الجو المقبض ده؟...وحسيت في سري اني لازم انزل ابوس علي راس المعلم الكبير ده واقوله عيل... صبي من صبيانك وغلط يا معلم وانا مش حعمل كده تاني وحياة ابويا...المهم..الحاج ميكي وشوشة بحاجة ومشي ..الراجل خد نفس طويل من الشيشة وقام نافخ في الهوا (احب هنا احييه..الراجل عمل سحابة ولا بتاعت بركان ايسلندة..اي والله) وبصلي بنص عين من وسط الدخان و بعدين قاللي..تعال يا استاذ قرب ..خش عليا ..يا اهلا يا اهلا...طلباتك ايه..قلتله وانا صوتي بيقطع..عاوز كذا وكذا..قاللي ايوه ايوه..بس بالراحة..انت مين اللي بعتك بقي؟ يا نهار اسود!!! ايه الكلام ده يا عم ...شوية شوية وحيقولي طلع الاجندة ...هل اعترف بالحقيقة ولا ايه النظام...قلتله..واحد معرفة واحد صحبي وانا معرفوش ولا اعرف حاجة عنه وهما الاثنين قاللولي عليك وعلي ميشيل عازر...قللي..طب تعلالي كمان يومين مع صحابك ...قلتلة حاضر..(كان هاين عليا اعيط)..وسيبته ومشيت وانا بقول لازم اروح... بس اعمل ايه في دماغي...جاللي نزناز قاللي...كفاية محلات بيئة في العتبة...اطلع علي محلات الزمالك..حيث المعاملة الفيف ستارز...وفعلا..رحت خت العربية وطلعت علي بينو...ودي قصة حكايييية __________________________________________________ ____________________ الجزء الثالث: قلت اخد راحة شوية من الشغل وبالمرة اكملكوا بقية المغامرة...كنا وقفنا عند لما طلعت من عند الاخ بتاع الشيشة بتاع عازرو كنت رايح بينو الزمالك... يا سلااام ..يا عيني علي الزمالك...اول ما نزلت من كوبري 15 مايو حسيت اني استحميت...كفاية المزز اللي مشييين دول..منظر غير العتبة خالص...يا سيددي ي !!! المهم...انا كنت تعبت من كتر المشي طول اليوم والسواقة في الزحمة المريعة (اتقالي كمية "يا حمار" اكتر من اي حمار محترم او مش محترم في مصر)..اول ما دخلت بينو ..لقيته محل واسع..كبير..وصوت مزيكة خفيفة كده طالع من ركن خلاني عاوز اقييلي ساعتين في اي ركن في المكان النظيف ده....وبعدين انا بقي قلت يا واد ادخل منفوخ ومنخيرك فوق ...فوق اوي عشان محدش يتنطط ومصلحتك تقضي (إذا كان بتوع العتبة كان مش طيقين يبصوا في وشي..امال دول حيعملوا فيا ايه؟) .. جوه المحل قدامي كان قاعد علي مكتب واد كدة شايف نفسة وعاملي دوجلس ومسبسب شعرة وكان فيه واحد تاني في المحل بينضف حاجة ...انا طبعاً اول ما دخلت عملت ايهههه.؟؟؟ اكيد حفظتم..رسمت الابتسامة اياها وقلت بصوت كله ثقة "عاوز مسدس رش لو سمحت"...الواد اللي ورا المكتب فط وقف..طبعاً يا باشا ..عندنا احدث انواع مسدسات الرش في العالم..الماني واسباني..ومن كل الانواع..حضرتك تحب ايه؟؟ قلتله..والله فرجني وانا اختار! جابلي مسدس والتر رش وقعد ساعة يشرح في امكانياتة...تخيل حضرتك ان ده اقوي سلاح دلوقتي تدافع بيه عن نفسك ومش محتاج ترخيص...وكمان ايه بياخد 8 رشات..ده غير انه خفيف اوي...وسعرة رخيص اوي بالنسبة للسوق ..2800 بس...انا جواية صرخت صرخة الرعب والفزع ...نعم نعم نعم 2800!!!! و بس!!!...هيا بقت كده خلاص يعني!!!...ده شغل ثري بيبرز وش ....انا مش مختوم يعني...طب والله لطلع عينك...فقلت له...والله ممتاز..بس انا عاوز حاجة اقوي واغلي من كدة!!!! الواد قلي يبقي مفيش غير بندقية رش...نمرة 2..بس حضرتك حدودك كام في الفلوس.. قلتلة...مفيش حدود..اللي حيعجبني حاخدة...قللي يبقي مفيش غير الديانا اير كينح...ب 12 الف وخمسمية...وممكن اعمل لحضرتك خصم خاص تبقي ب 12 الف و ثلثمائة بس (كتر خيره عمل الواجب الصراحة!)....انا دوخت وكنت هعيط للمرة الثالثة النهاردة...ايه الناس دي؟! بس علي مين..ما هو يا انا انقطك يا انت تموتني...انا خلاص..حطيتك في دماغي..قلتلة...لا دي تقيله اوي شفلي غيرها...اعد فرجني يجي علي عشر بنادق وكل واحدة اطلعلة فيها القطط الفطسة...الواد ابتدي يزهق ويهنج مني..هب دخل اتنين شباب المحل واد وبنت بس الشهادة الواد متفرقوش عن البنت...واد خو"اجة" كده...هاو ار يو..وي وانت سويس نيف..هو شاف الناس دي مين هنا وكان حيموت يقلبني ...انا قلتله..امممم..لا انا عاوز اشوف المسدسات تاني لو سمحت..هههههههههههه الواد قللي..بقول لحضرتك ايه...ادي مفاتيح فتارين المحل كله!!!!!...اتفرج زي ما انت عاوز وشوف اللي يعجبك وانا اصلي بصراحة لازم امشي كمان شوية..ولو عجبك حاجة قل لمحمد "اللي هو كان بينضف" وهو حيبعلك...واضح اني دمرت الواد تماما هههههههههه حسيت اني انتصرت وجبتله نقطة...قلت مش ناقص غير الضربة القاضية عشان اجيبة لمس اكتاف...قلتله..انا عاوز مسدسين وبندقية من بره عن طريقكم...قاللي نفس كلام عازر...مش بنجيب من بره بالطلب...قلتله..بس انا صاحبي قاللي انه اتعامل معاكم قبل كده ..هوا اسم حضرتك ايه؟ قاللي ابراهيم..قلتله ايوة..صح..هو قاللي ابراهيم ترحلة وهو حيخدمك... الواد كان ابتدي ايديه تتحرك حركات تشنجية..وانا ساعتها جالي مكالمة تليفون..طلعت بره ..خلصتها ومشيت بصراحة عشان جالي ظرف..ربنا رحمه من ايدي الواد ده..معلش مسيري احط عليه تاني بس افضاله..قال 12 الف قال!!! ايه الناس دي! __________________________________________________ ________________________________ كنت وعدت اني ححكيلكوا علي قصتي مع المعلم صيامكو..واهو الحمد لله جه الوقت اللي حوفي بيه بالوعد.. ابتدت القصة تاني يوم الصبح بعد مشوار بينو....صحيت الصبح وانا حاسس اني متفائل اوي والدنيا حلوة علي غير العادة..شحنة الغلاسة جوايا كانت في اعلي درجاتها بعد تدريب امبارح ههههههههه.. وقلت انشاء الله حلاقي طلبي النهاره....يا قاتل يا مقتول....استعنا علي الشقي بالله... طبعاً انا كنت زهقت من مشوار اني رايح جاي لوحدي طول النهار امبارح ..فاتصلت بزيكس يجي معايا..وزيكس (لمن لا يعرفه) ما شاء الله حاجة كدة حيطة ..ضرفة دولاب متحركة ....وهو صحبي الانتيخ من ايام الجامعة ..بس مسخرة ابن اللزينة! زي العسل...وعلي كل ده احسن واحد بياكل ضرب في أي خناقة...وساعات دماغة بتونون ويطلع منه احلي مواقف تخليك مش عارف تضربة ولا تموت من الضحك..ويااااامة دخلنا في قصص ومشاكل مع صحابنا التانيين بسببه...حتي جوازة جه صدفة غريبة ومضحكة... اذكر من نوادره اننا كنا رايحين نعزي في وفاة ابو واحد صاحبنا... وكنا بنسلم علي الناس وكان هوا قدامي..فلقيتوا بيقول لصاحبنا.. "يا عم كبر دماغك متعملش في نفسك كده" طبعاً انا مقدرتش امسك نفسي انا والناس اللي حوالينا من الضحك..كان منظرنا عره اوي ..... ايه يا ابو زيكس..نظامك ايه النهاره....كنت رايح اجيب مسدس رش..تيجي معايا؟ قاللي ماشي واهو بالمرة لو عجبني حاجة اسحب فلوس من الاي تي ام واشتري انا كمان...ظروف البلد صعبة. مفيش ساعة واتقابلنا تحت بيته وفاهمتوا اننا رايحين الأول علي محل فيه عليه كلام كتير ..والناس بيقولوا علي صحبه ان معاملته صعبة ..فاحنا نقسم عليه عشان نطلع بديل كويس.... وقلتله انا اخري 1500 ولو منفعش الفصال حنمشي عشان الراجل ده بالذات بتاع مشاكل ومش حنخلص... ووصلنا المحل...اول ما دخلنا كان إنطباعي انه محل صغير والراجل اللي كان فيه كان شكله مش مريح (هو ليه كلهم كده؟) ومعاه واحدة بتساعدة.. طبعاً انا دخلت ورا الاخ زيكس... وهوب ظهرت للراجل فجاءة من وار حائط الصد ده..وابتسمت ابتسامتي الشهرية وقلتلو بكل ثقة "عاوز مسدس رش لو سمحت"...الراجل مردش علي طول...وبالبلدي كده عملنا "سكان" من فوقنا لتحتنا...وطبعاً خد وقت مع الاخ زيكس شوية علي ما وصل لراسه ههههههههه الراجل خلص الـ"سكان" وبرده مردش (إتم اوي يعني!) وقام مدينا ظهرة ومطلع علبه وفاتحها وقاللي ده مسدس الماني محترم..حاجة من الاخر..كان في العلبة والتر سي بي 88...انا كنت شفت المسدس ده قبل كده طبعاً وهو بصراحة حلو مفيش كلام.. المهم زيكس مسك المسدس واعد يبص عليه (اول مرة يمسك مسدس في حياته) وانا اعدت ابص معاه من غير مبين اني مهتم عشان لما نتكلم في الفلوس منتدبحش....وبعدين زيكس ادهوني وسأل الراجل....وده سعره كام....الراجل قاله 3000 جنيه ومعاه انبوبة غاز هدية (عرض ميتسابش !!!) في اللحظة دي كانت الست اللي معا الراجل عمالة تزق برجليها كرتونة ومعدية من ورانا....وانا لما سمعت الراجل قال 3000...قمت بناول المسدس لزيكس (يعني نظام مش مبسوط ومش عوزة بالسعر ده) وكان زيكس بيستعد عشان يبهدل الراجل...وفجاءة الست خبطت رجل زيكس من ورا بالكرتونة ..فبص وراه في نفس اللحظة اللي انا بديله فيها المسدس ...قام المسدس. هوب يا معلم..واقع في الارض..وزيكس فقد توازنة وداس عليه.... فجاءة الزمن توقف...الراجل تحول إلي حاجة كده تقولش كوماندوز وقام في ثواني قفز قفزتين بقي قدامنا ..ومسك المسدس واعد يقول "بوظتوا البضاعة!!" "انا من اول ما شفت وشوكوا حسيت انه يوم اسود النهاردة" (انا حاسيس ان دي قلت ادب بصراحة!) ... وكل ده ليه يعني!! كل اللي حصل ان الباب بتاع انبوبة الغاز اللي في المقبض حته كلبس بلاستيك فيه اتكسرت (هو ناشف اوي الصراحة)..فبقي مش بيحكم في قفلته كويس (بيلق بسيط)...وده اقل واجب بعد ما داس عليه الديناصور اللي معايا.. ...طبعاً الراجل وحياه ابويا وشه تحول (اكتر ما هو اصلاً مرعب) كان عامل زي جودزيلا...وحسيت ان فيه ريالة حتنزل من جنب بقه كمان شوية..انت حتكلنا ولا ايه يا عم!!..انا بقيت بقول جوايا ..يا ساتر استر يا رب..وقلبي كان عمال بيدق زي المدفع..! تخيلوا يحصل ايه ساعتها؟؟؟ الاقي زيكس (ابن اللزينة) بيقولي "ايه يا عم ده..مش تحاسب ..كده كسرت للراجل البضاعة"!!!! انا كان هاين عليا اطبق في زمارة رقبتة...هوا التهريج حبك دلوقتي!! يخرب بيت دماغك..يا غبي أنا قلتلك نقسم علي الراجل مش تقسم عليا انا!!! حافظ مش فاهم طول عمرك..وبعدين الراجل ده مجنون...هوا اصلاً مش مستحمل ...انا تمالكت اعصابي ورديت بكل برود ..دي حاجة بسيطة...معلش حصل خير..شوية امير يخلوه زي الفل. "بلا امير بلا عفاف…انت لازم تدفعلي تمن البضاعة اللي باظت دي"…انا قلت.. يا باشا وحد الله في قلبك…ما بظتشي ولا حاجة..دي حته كلبسة بلاستيك اللي اتكسرت....زيكس قال.."طيب ماشي نشتري منك المسدس"…انا كنت خلاص حموت...نشتري ايه يا بني ادم ...ده بيقولك 3000 جنية!!! زيكس رد عليا..لا السعر ده لما كان سليم…دلوقتي انت ملزم تاخده وتصلحه علي حسابك..الراجل كان عمال يبصلي ويبص لزيكس ويجز علي سنانة.. رديت علي زيكس..خلاص يا سيدي..امري لله..اخدة علي 1500 وابقي اصلحة علي حسابي..مع اني مش عارف اصلحة فين..ممكن نسأل في وسط البلد..اكيد فيه حتة هناك…تفتكر نروح عند مين؟ الراجل قام مزعق…1500 مين يا حبيبي انت وهو!!! وقام منادي يا سعععاااد…يا سسسعععادددد..امت البت اللي شغالة معاه جيه من بره المحل بسرعة (مش عارف كانت طلعت تعمل ايه) البت كانت مسلوعة وبتتحرك بسرعة اوي..اقفلي الباب..البت قفلت الباب بالمفتاح ووقفت قدامه… يعني انتم مش عوزين تدوني فلوس المسدس اللي كسرتوة؟؟؟ انا حسيت اننا دخلين في مرحلة صعب…وزيكس ابتدي يشتم ويقوله انت حتخوفنا وكلام من ده..والراجل كان عامل زي المجنون بس حجم زيكس كان هته أوي…المهم…من غير كلام كتير عشان انا طولت..الراجل خد مننا 100 جنية ثمن قطعة غيار بدل اللي اتكسرت وروحنا. التعديل الأخير تم بواسطة hokaboka ; 11-03-26 الساعة 05:40 PM سبب آخر: دمج مشاركات |
sponsor links |
11-03-26, 02:04 PM | #2 |
مشرف قسم السوق
|
رد: مغامرات حوكا في ادغال محلات السلاح
ههههه و الله انت احسن منى انا لما قالى الواد الخرع الى عند فتح الله مفيش بيع من على الباب معرفتش اطلع عينو زيك بس الحمد لله دبيت معاه خناقه
|
11-03-26, 02:05 PM | #3 |
صياد قديم
|
رد: مغامرات حوكا في ادغال محلات السلاح
ههههههههه ... بصراحة سردك للأحداث منتهي الروعة ... ممكن تكتب سيناريو مسرحيات .. كويس إنه مطلعش حته حلوان و ضربك بيها الصراحة ..
بس إيه حكاية أجيب ( بندقية مش في مصر منين ) .. ؟؟؟.
__________________
Don't say you are alone when I still alive Kemomail@ymail.com |
11-03-26, 02:06 PM | #4 |
صياد جديد
تاريخ التسجيل: Feb 2011
المشاركات: 29
معدل تقييم المستوى: 5 |
رد: مغامرات حوكا في ادغال محلات السلاح
يا باشا وليه بكرة .... خير البر عاجله .....
الحقيقة مش عارف بتوع السلاح دول معملتهم لزباينهم بالشكل ده معاملة غريبة ربنا ... ولا بلاش .... |
11-03-26, 02:14 PM | #5 |
صياد قديم
تاريخ التسجيل: Feb 2011
المشاركات: 1,657
معدل تقييم المستوى: 16 |
رد: مغامرات حوكا في ادغال محلات السلاح
هاهاها ، و الله أسلوب أدبى رائع ، و طريقة سرد الحدوتة لذيذ جدا ، منتظر باقى الدراما
|
11-03-26, 02:23 PM | #6 |
صياد متفاعل
تاريخ التسجيل: Mar 2011
المدينه: القاهرة
المشاركات: 148
معدل تقييم المستوى: 5 |
رد: مغامرات حوكا في ادغال محلات السلاح
جاااااامد جدا و النبي احكى كمان و بص روح لشريف ابو ضيف في شبرا راجل محترم و اسعاره كويسة و عندك الاهلية في العتبة بردو اسعارهم كويسةو ابعد عن صيامكو بيبيع الكرال 3000 جنيه عبيط يعنى...........
|
11-03-26, 02:24 PM | #7 |
صياد جديد
تاريخ التسجيل: Feb 2011
المشاركات: 42
معدل تقييم المستوى: 5 |
رد: مغامرات حوكا في ادغال محلات السلاح
هو فعلا أحمد منسي محل غالي و مش مريح
أسلوب رائع و مشوق في الكتابة ..... برافو |
11-03-26, 02:37 PM | #8 |
صياد نشيط
|
رد: مغامرات حوكا في ادغال محلات السلاح
السلام عليكم
أخى الكريم حوكا. رأيى أن تقلع عن هواية الصيد و تحترف كتابة القصص الكوميدية ههههههههههه. أنا لم أتوقف عن الضحك منذ بداية القراءة وحتى النهاية. نرجو أن تكمل السلسلة.
__________________
" من كان يريد العزة فلله العزة جميعا" |
11-03-26, 02:45 PM | #9 |
المشرف العام
تاريخ التسجيل: Mar 2011
المشاركات: 6,678
معدل تقييم المستوى: 437 |
رد: مغامرات حوكا في ادغال محلات السلاح
مانا قلت قبل كده محدش صدقنى
انى سالت عند احمد المنسى يوم 15 / 2 قالى ان المسدس الصوت الايطالى يبدأ من 3000 جنيه والالمانى يبدأمن 4000 جنيه بس الاخ قدر يحرك الجبل انما انا كان قاعد على الكرسى ( والله يكون فعون الكرسى ) ( لانه بجد دبابه متحركه لحراسه المحل شبه لؤى اللى فى فيلم صعيدى فالجامعه الامريكيه ) بس الظاهر بصه ( يا بن الشحاته دى مقررة عنده ) يمكن عشان رحت بموتوسيكل بس برده الحمد لله مستورة يعنى وشكرا لكل اخوتى
__________________
|
11-03-26, 02:50 PM | #10 |
صياد نشيط
|
رد: مغامرات حوكا في ادغال محلات السلاح
نفس اللي عملو معايا لما روحت اشتري البندقيةالكرال قال مفيش فرجة لو هتشتري اطلعهالك وراح مطلع واحدة كانت معروضة وراة وراح معمر و ضارب علي الفاضي علشان يسمعني صوتها المهم لما لقيته تنك قلت اظبتة سيبتة لغاية ما جابلي الكرتونة بتاعتها والكيس وجهزهالي وروحت قايلة انا عايز واحدة تانية بكرتونتها مش هاخد الي كانت معروضة دي ولولا ابويا كان معايا كن اداني رشيتين في وشي بس والله كنا نضاف برضو ومستحمين يعني ومع ذلك في الظروف النهب اللي فاتت دي انا كنت في العتبة وكنت بروح انا وناس كل شوية نشقر علي المحل بتاعة علشان دة محل اسلحة يارتنا كنا سيبنا ومع الاسف معرفناش نحمي محل ميشيل عازر لان المحل اتسرق في الساعة 5 المغرب والناس كانت بتسهر باليل وتنام بالنهار
اسف جداجداجدا علي الاطالة وتقبل مروري
__________________
و ما رميت اذ رميت ولكن الله رمي |
11-03-26, 02:57 PM | #11 |
صياد متفاعل
تاريخ التسجيل: Jan 2011
المدينه: الاسكندرية
المشاركات: 209
معدل تقييم المستوى: 6 |
رد: مغامرات حوكا في ادغال محلات السلاح
ناس مستفزة - انا روحت عند حنفي السيجلابي بقوله عايز رش ماجنوم نمرة 2 قالي مفيش قولتله طيب عايز جراب للبندقية قالي مفيش قولتله هو انتوا خلاص بقيتوا بتبيعوا صوت بس ؟
قالي ويا ريتنا ملاحقين لمحت كرال تركي فيبر سودا بقوله الكرال دي بكام قالي بـ 2000 جنيه قولتله ايه يا عم ليه كدة قالي اصل البندقة دي صوتها وبيطلع منها مقذوف - قولتله صوتها عالي علي طول ولا علشان لسة جديدة وفيها زيت يعني قالي هو انت ح تشتري قولتله هو انا عبيط اشتري باسعاركم دي وسيبته ومشيت |
11-03-26, 02:58 PM | #12 |
صياد متقدم
تاريخ التسجيل: Jan 2011
المدينه: مدينة نصر / القاهره
المشاركات: 832
معدل تقييم المستوى: 9 |
رد: مغامرات حوكا في ادغال محلات السلاح
ههههههههههههههههههههههههه
أسلوب نثرى رائع فى عرض تلك التجربة المؤلمه . نصيحة لا تكررها تانى .... لان مش كل مرة تسلم الجرة .
__________________
كن على حذر من الكريم إذا أهنته أو من العاقل إذا أحرجته أو من اللئيم إذا أكرمته أو من الفاسق إذا عاشرته أو من الأحمق إذا ماذحته وإنى ذقت الطيبات فلم أجد أطيب من العافية وإنى ذقت المرارات كلها فلم أجد أمر من الحاجة إلى الناس ونقلت الحديد و الصخر فلم أجد أثقل من الدين وأعلم أن الدهر يوم لك و يوم عليك ،فإذا كان لك فلا تبطر وإن كان عليك فاصبروكلهما سيخسر.
حديث سيدنا على بن أبى طالب (رضى الله عنه و أرضاه) . |
11-03-26, 03:05 PM | #13 |
Banned
تاريخ التسجيل: Jan 2011
المشاركات: 62
معدل تقييم المستوى: 0 |
رد: مغامرات حوكا في ادغال محلات السلاح
اية الاسعار الى بسمعها دى؟
|
11-03-26, 03:24 PM | #14 |
صياد متفاعل
تاريخ التسجيل: Mar 2011
المدينه: 6 أكتوبر - بعد البراميل
المشاركات: 139
معدل تقييم المستوى: 0 |
رد: مغامرات حوكا في ادغال محلات السلاح
أنا معاك يا ريس حوكا فى موضوع مسدس الرش ده .. علشان بينى وبينك أنا مادخلتش جيش .. وحاسس إنى محتاج أعرف أنشن .. فا عايز أجيبه وأقعد أنشن طول ما أنا قاعد .. ويمكن فى يوم من الأيام أعرف أطلع رخصة سلاح حى وأتعلم التنشين المظبوط ..
هما زمان كانوا بيقولولنا إنه اللى عنده محل ذهب ولا حتت أرض مطرفة ممكن يستخرج رخصة سلاح .. خلاص احنا كلنا هنا نلم بعض ونجمع لنا شوية فلوس ونشترى حتت أرض مطرفة .. وكل واحد فينا ياخدها يجيب عليها سلاح وبعدين يديها للى بعده .. وهكذا |
11-03-26, 04:20 PM | #15 |
صياد نشيط
تاريخ التسجيل: Mar 2011
المشاركات: 261
معدل تقييم المستوى: 6 |
رد: مغامرات حوكا في ادغال محلات السلاح
يا نهار ابييييض!!! ايه كل الردود دي! انا مش عارف ارد علي مين ولا علي مين...عموما انا مشكر ليكم كلكم والله وانا بصراحة كنت بحكي اللي حصلي فعلا ومش قصدي اركز علي اي جانب ادبي..وكان غرضي الاستفادة من لفتي علي المحلات اليومين اللي فاتوا.
انا لا عمري الفت ولا كتبت قصص ...بس الفت كتب في كجال عملي بس..مع ان سني صغير يعني..دي حاجة كدة من ربنا |
11-03-26, 05:47 PM | #16 |
صياد نشيط
تاريخ التسجيل: Mar 2011
المشاركات: 261
معدل تقييم المستوى: 6 |
رد: مغامرات حوكا في ادغال محلات السلاح
انا عملت دمج لمشاركتي في صفحة واحدة لسهولة الوصول...وبعد كدة حبقي ازود هنا كل كغامرة جديدة
|
11-03-26, 06:03 PM | #17 |
صياد قديم
تاريخ التسجيل: Sep 2010
المدينه: بنى سويف
المشاركات: 1,093
معدل تقييم المستوى: 52 |
رد: مغامرات حوكا في ادغال محلات السلاح
انت ممكن تكتب قصه او روايه لان طريقه سردك للاحداث جميله جدا
__________________
لا تحاول أن تعيد حساب الأمس وما خسرت فيه فالعمر حين تسقط أوراقه لن تعود مرة أخرى ولكن مع كل ربيع جديد سوف تنبت أوراق أخرى فانظر الى تلك الأوراق التي تغطي وجه السماء ودعك مما سقط على الأرض فقد صارت جزءاً منها عندمآ يوِزِع آلله آلأقدآرِ وِلآ يمنحني شيئاً أرِيدهُ .. أدرِك تمآماً أن آلله سيمنحني شيئاً أجمل ممآ أُرِيد .. آللهم لآ تعلق قلبي لمآ ليس لي وِإجعل لي فيمآ أُحب نصيب |
11-03-26, 07:30 PM | #18 |
صياد متفاعل
تاريخ التسجيل: Mar 2010
المدينه: تاريخ الميلاد: 1\3\1987
المشاركات: 214
معدل تقييم المستوى: 7 |
رد: مغامرات حوكا في ادغال محلات السلاح
انت موهوب فى الكتابة
|
11-03-26, 07:59 PM | #19 |
صياد متفاعل
تاريخ التسجيل: Nov 2010
المشاركات: 160
معدل تقييم المستوى: 0 |
رد: مغامرات حوكا في ادغال محلات السلاح
:d:d:d:d:d:d:d انا مش قادر امسك نفسى من الدحك والله انت بجد حاجة مبتتكررش كتير بس اسلوب سرد اكترمن رائع وكان نفسى اشارك معاك فى المغامرة بس انا سبقتك وقمت بالجولة دى
__________________
الألفاظ هي الثياب التي ترتديها أفكارنا |
11-03-26, 08:05 PM | #20 |
صياد قديم
|
رد: مغامرات حوكا في ادغال محلات السلاح
دى حاجه كده ولا روايات الاستاذ فتحى ابراهيم الله يرحمه
وفعلا الراجل اللى عند منسى ده حاجه كده غريبه فعلا وماكانش قرفان منك انت بس لأ ده ده العادى بتاعه مع اى حد ناهيك بئى عن انه ما بيضحكش اصلا كون انه ابتسملك تبئى كانت الحاجه دعيالك ههههههه
__________________
. قـبـــل أن تحـكــم علـى إنــسـان .. . إسـمــع منـهُ ... و لا تســمـع عنــهُ .... رَبِّ اغْفِرْ لِي وَلِوَالِدَيَّ وَلِمَنْ دَخَلَ بَيْتِيَ مُؤْمِنًا
|
11-03-26, 08:14 PM | #21 |
Banned
تاريخ التسجيل: Jan 2011
المشاركات: 292
معدل تقييم المستوى: 0 |
رد: مغامرات حوكا في ادغال محلات السلاح
بسم الله بيقولو ان الكومديانات قليلة انت الزعيم ياحوكة وبجدارة والتالى معمر القزافى والثالث عادل امام والله ماضحكت من قلبى مثلما اضحكتنى لك كل الحب يادكتور
|
11-03-26, 08:16 PM | #22 |
مشرف عام سابق
تاريخ التسجيل: Feb 2011
المدينه: القاهرة
المشاركات: 5,674
معدل تقييم المستوى: 138 |
رد: مغامرات حوكا في ادغال محلات السلاح
مقولتلناش ايه حكايه بينو وبالمره يا ريت تقولنا على عنوانه فين فى الزمالك
|
11-03-26, 08:17 PM | #23 |
صياد متفاعل
تاريخ التسجيل: Feb 2011
المشاركات: 130
معدل تقييم المستوى: 5 |
رد: مغامرات حوكا في ادغال محلات السلاح
مستنين باقى الى حصل
|
11-03-26, 08:47 PM | #24 |
صياد نشيط
|
رد: مغامرات حوكا في ادغال محلات السلاح
هههههههههه والله الواحد مشعارف يقلق اى نستنى
دمك شربات( يمضروب) اخ بعوك فى الكلام ههههههههه متابعين الجديد |
11-03-26, 09:22 PM | #25 |
صياد متفاعل
تاريخ التسجيل: Feb 2011
المدينه: الاسكندرية
المشاركات: 165
معدل تقييم المستوى: 5 |
رد: مغامرات حوكا في ادغال محلات السلاح
والله انت ذي العسل
|
11-03-26, 09:26 PM | #26 |
صياد نشيط
تاريخ التسجيل: Mar 2011
المدينه: الجيزة
المشاركات: 261
معدل تقييم المستوى: 6 |
رد: مغامرات حوكا في ادغال محلات السلاح
و الله انت جامد جدااااااااااااااا
و لزم تكمل السلسله و تعدى على كل المحلات ههههههه انا بهزر بس انت جامد ..... ربنا معاك و تشترىههههههه |
11-03-26, 09:52 PM | #27 |
صياد جديد
تاريخ التسجيل: Nov 2010
المشاركات: 16
معدل تقييم المستوى: 5 |
رد: مغامرات حوكا في ادغال محلات السلاح
سيبكو من الكلام الرغ دة الأهم من كدة الجزء الرابع أمتى؟؟؟
ياريت بسرعة لو سمحت يا أستاذنا |
11-03-26, 11:28 PM | #28 |
صياد متفاعل
تاريخ التسجيل: Apr 2010
المدينه: القاهره
المشاركات: 162
معدل تقييم المستوى: 6 |
رد: مغامرات حوكا في ادغال محلات السلاح
مغامره رائعه ياباشا خاصه انى بعانى من نفس الموقف بتاع محلات بينو و عندى سؤال مهم جداً
ليه دايما 98 % من محلات السلاح بتعاملنا وحش جداً يعنى شويه و ممكن تضربنا بالنار مفيش غير محل واحد عاملنى حلو جداً هو فتح الله فرع اسكندريه و لما قررت اعمل شغل معاه البلد ولعت ياريت حد يجاوب على السؤال و بهنئ حضرتك على المغامره الرائعه و لو حضرتك عاوز تنتقم من الراجل بتاع الشيشه ممكن اساعدك |
11-03-27, 12:24 AM | #29 | |
صياد جديد
تاريخ التسجيل: Jun 2010
المشاركات: 44
معدل تقييم المستوى: 6 |
رد: مغامرات حوكا في ادغال محلات السلاح
اقتباس:
|
|
11-03-27, 01:04 AM | #30 |
صياد متفاعل
تاريخ التسجيل: Mar 2011
المدينه: 6october city
المشاركات: 143
معدل تقييم المستوى: 5 |
رد: مغامرات حوكا في ادغال محلات السلاح
hhhhhhhhhhhhhhhhhhhhhhhhhhhhhhhhhhhhhhhhD
|
11-03-27, 01:12 AM | #31 |
صياد متقدم
تاريخ التسجيل: Feb 2011
المشاركات: 611
معدل تقييم المستوى: 10 |
رد: مغامرات حوكا في ادغال محلات السلاح
هههه ...والله دمك زى العسل يا حوكا ..وأسلوبك حلو.. وشر البلية ما يضحك..هى دى مصر!!!
|
11-03-27, 01:25 AM | #32 |
صياد متقدم
تاريخ التسجيل: Feb 2011
المشاركات: 611
معدل تقييم المستوى: 10 |
رد: مغامرات حوكا في ادغال محلات السلاح
هههههههههههههههه
|
11-03-27, 01:31 AM | #33 |
صياد متقدم
تاريخ التسجيل: Feb 2011
المشاركات: 611
معدل تقييم المستوى: 10 |
رد: مغامرات حوكا في ادغال محلات السلاح
يا راجل دا أنا دخلت عند منسى ..وقابلنى طبعا الأستاذ أبو لهب اياه لقيت الدنيا ضلمت فجاة ..سألته عندكو نوريكا مارفيك جولد ..آم شخط فيا وقاللى معاك رخصة ..قلتله أيه هما عملو رخصة للنوريكا ولا أيه ..واضح أنه مش عارف أى حاجة...هو واقف بودى جارد وخلاص....
|
11-03-27, 01:46 AM | #34 |
تاجر مسجل بالمنتديات
تاريخ التسجيل: Jul 2010
المشاركات: 2,715
معدل تقييم المستوى: 22 |
رد: مغامرات حوكا في ادغال محلات السلاح
يبقي انت اكيد اكيد في مصر.......................
|
11-03-27, 01:48 AM | #35 |
صياد نشيط
تاريخ التسجيل: Mar 2011
المدينه: cairo
المشاركات: 315
معدل تقييم المستوى: 6 |
رد: مغامرات حوكا في ادغال محلات السلاح
نوريكا مارفيك جولد تفتكروا بتتباع عند مين و بكام؟ هههههه
__________________
قل لن يصيبنا الآ ما كتب الله لنا |
11-03-27, 02:10 AM | #36 |
صياد متفاعل
تاريخ التسجيل: Mar 2011
المدينه: دمنهور-اسكندريه
المشاركات: 87
معدل تقييم المستوى: 5 |
رد: مغامرات حوكا في ادغال محلات السلاح
والله انته زى العسل ربنا يباركلك والى الامام دائما
|
11-03-27, 02:34 AM | #37 |
صياد نشيط
تاريخ التسجيل: Mar 2011
المشاركات: 261
معدل تقييم المستوى: 6 |
رد: مغامرات حوكا في ادغال محلات السلاح
يا جماعة انا متشكر اوي والله...بس كل اللي انا حكيه ده بجد وحصل فعلاً..انا نفسي مصدقتوش وعرفت حجم البشاعة غير لما قريت اللي حصلي قدامي كله...عموماً انا لفيت علي محلات تانية وكان ليا قصص معاهم...طب ده دول كلهم كوممم..وقصتي مع الاخ صيامكو ده كوم تاني...بس دي بالذات قصة كوميدية اوي...ححكيلكوا والله بس الاقي وقت اكتب عشان دي قصة مزاااج..
كل ما افتكر البندقية الديانا ام 12 الف احس اني شحات! |
11-03-27, 06:13 AM | #38 | |
تاجر مسجل بالمنتديات
تاريخ التسجيل: Jul 2010
المشاركات: 2,715
معدل تقييم المستوى: 22 |
رد: مغامرات حوكا في ادغال محلات السلاح
اقتباس:
|
|
11-03-27, 09:46 AM | #39 |
صياد متفاعل
تاريخ التسجيل: Mar 2011
المدينه: القاهرة
المشاركات: 167
معدل تقييم المستوى: 0 |
رد: مغامرات حوكا في ادغال محلات السلاح
10/10 ايه الحلاوه دى فى اسلوب سرد المواقف بتشويق بس برافو عليك دان روحت عند منسى من اسبوع وكان اكنة مش طايقنى وقالى نفس الكلام على مسدس الرش الى فى البترينة بس انا من غلاستة واسلوبه التنك ماقدرتش اخش المحل وسالت من برة ومشيت
|
11-03-27, 10:21 AM | #40 |
صياد نشيط
تاريخ التسجيل: Jul 2010
المدينه: القاهرة
المشاركات: 452
معدل تقييم المستوى: 8 |
رد: مغامرات حوكا في ادغال محلات السلاح
طريقتك في سرد الاحداث هايلة
تجار الاسلحة في مصر عايزين يضربو بالنار ...
__________________
بسم الله الرحمن الرحيم ( انما اَمُرهُ اِذَا ارادَ شيئاً اَن يقولَ لهُ كُنْ فيكون ^ فسُبْحان الذي بيده ملكوتُ كلِّ شيءٍ واليهِ تُرجعون ) صدق الله العظيم |
11-03-27, 11:56 AM | #41 |
صياد نشيط
تاريخ التسجيل: Mar 2011
المشاركات: 261
معدل تقييم المستوى: 6 |
رد: مغامرات حوكا في ادغال محلات السلاح
|
11-03-27, 11:57 AM | #42 |
صياد نشيط
تاريخ التسجيل: Mar 2011
المشاركات: 261
معدل تقييم المستوى: 6 |
رد: مغامرات حوكا في ادغال محلات السلاح
ابو لهب فعلاً....
|
11-03-27, 11:58 AM | #43 |
صياد جديد
تاريخ التسجيل: Mar 2011
المشاركات: 6
معدل تقييم المستوى: 0 |
رد: مغامرات حوكا في ادغال محلات السلاح
اسلوبك جميل جدا مشاء الله, منتظر الجزء الثالث
|
11-03-27, 11:59 AM | #44 |
صياد نشيط
تاريخ التسجيل: Mar 2011
المشاركات: 261
معدل تقييم المستوى: 6 |
رد: مغامرات حوكا في ادغال محلات السلاح
والله دي شهادة اعتز بيها...منسي ده لو في اي دولة محترمة كان زمانة قفل من زمان!!! محدش ممكن يقبل الناس دي بمعاملتها دي غيرنا احنا المصريين..
|
11-03-27, 01:42 PM | #45 |
الادارة العليا
تاريخ التسجيل: Feb 2010
المدينه: مصر ام الدنيا
المشاركات: 3,848
معدل تقييم المستوى: 568 |
رد: مغامرات حوكا في ادغال محلات السلاح
والله انت زى السكر ودمك عسل
__________________
سبحان الله و بحمدة سبحان الله العظيم
|
11-03-27, 03:38 PM | #46 |
صياد نشيط
تاريخ التسجيل: Mar 2011
المشاركات: 261
معدل تقييم المستوى: 6 |
رد: مغامرات حوكا في ادغال محلات السلاح
|
11-03-27, 03:55 PM | #47 |
صياد نشيط
تاريخ التسجيل: Feb 2011
المدينه: Fesal Street -Giza
المشاركات: 265
معدل تقييم المستوى: 6 |
رد: مغامرات حوكا في ادغال محلات السلاح
ههههههههه جامده اوى دى
|
11-03-27, 04:03 PM | #48 |
صياد متفاعل
تاريخ التسجيل: Mar 2011
المشاركات: 62
معدل تقييم المستوى: 5 |
رد: مغامرات حوكا في ادغال محلات السلاح
اسلوبك في الكتابة كوميدي جدا ورائع وشيق ... فكرتني بمحمود السعدني
|
11-03-27, 04:12 PM | #49 |
صياد متقدم
تاريخ التسجيل: Feb 2011
المشاركات: 611
معدل تقييم المستوى: 10 |
رد: مغامرات حوكا في ادغال محلات السلاح
السبب ان تجار السلاح عددهم قليل جدا بالنسبة لبلد كبيرة زى مصر فابيتأمروا ويتحكموا -وكمان نوعية البياعين الواقفين فى المحلات نوعية تعبانة وب 3 مليم..
|
11-03-27, 05:55 PM | #50 |
صياد متفاعل
تاريخ التسجيل: Mar 2011
المدينه: القاهرة
المشاركات: 166
معدل تقييم المستوى: 5 |
رد: مغامرات حوكا في ادغال محلات السلاح
اسلوبك في الكتابة راااااااااائع, بجد تحياتى, خلتنى أضحك من قلبى
|
11-03-27, 06:11 PM | #51 |
صياد جديد
تاريخ التسجيل: Mar 2011
المشاركات: 7
معدل تقييم المستوى: 0 |
رد: مغامرات حوكا في ادغال محلات السلاح
بقالى كتير مابتسمتش انت جميل ربنا يديم عليك نعمة خفة الدم وروقان البال
|
11-03-27, 06:56 PM | #52 |
صياد نشيط
تاريخ التسجيل: Feb 2011
المدينه: القاهرة
المشاركات: 287
معدل تقييم المستوى: 6 |
رد: مغامرات حوكا في ادغال محلات السلاح
جامد جدا يا حوكة واسمحلى اقول حوكة من غير القاب لانى برفع التكليف مع الناس اللى بحبهم بجد وانت حقيقى دخلت قلبى بخفة دمك الرهيبة دى ومستنى الجزء الجديد بتاع صيامكو هههههه
|
11-03-27, 07:08 PM | #53 |
صياد متفاعل
|
رد: مغامرات حوكا في ادغال محلات السلاح
مشاء الله عليك ممتاز في سرد الاحداث مشاء الله
__________________
ولدتك أمك ياابن آدم باكياًَُ والناس حولك يضحكون سـرورا فاعمل لنفسك كي تكون إذا بكوا في يوم موتك ضاحكا مسرورا!! |
11-03-27, 07:08 PM | #54 |
صياد متفاعل
|
رد: مغامرات حوكا في ادغال محلات السلاح
١٠/١٠
.................................................. .....
__________________
ولدتك أمك ياابن آدم باكياًَُ والناس حولك يضحكون سـرورا فاعمل لنفسك كي تكون إذا بكوا في يوم موتك ضاحكا مسرورا!! |
11-03-27, 07:22 PM | #55 |
صياد جديد
تاريخ التسجيل: Mar 2011
المدينه: الهرم
المشاركات: 48
معدل تقييم المستوى: 5 |
رد: مغامرات حوكا في ادغال محلات السلاح
بصراحة يا حوكة بيه احيك على الاسلوب الجميل دا ف السرد
فكرتنى بقصص ميكى ومش عارف يا جماعة هو مسدس الصوت دا ماله بقى ليه قيمة كبيرة فى مصر انا قولت ان الهوجة فى اليومين اللى فاتو بس والحياه بعد كدة تهدى بس واضح ان مفيش حاجة بتهدى ولا ايه رايكم ؟؟؟؟؟ والسبب مش معروف هل العيب فينا ولا فى حد من مصلحته ان السوق يولع اكتر! |
11-03-27, 08:07 PM | #56 |
صياد متفاعل
تاريخ التسجيل: Mar 2011
المشاركات: 97
معدل تقييم المستوى: 5 |
رد: مغامرات حوكا في ادغال محلات السلاح
استاذ حوكة يارب تكون استفدت بس انا اعرف الناس بتوع ميشيل عازر معرفة كويسة وبتعامل معاهم من زمان والصراحة هما ناس كويسين وفى راجل كبير هناك اسمه عاطف ولو احتجت حاجة من عندهم قولى وكدا كدا ابن الخواجة جاى من بره وطلب شحنة من بره جاية بعد اسبوع
__________________
Mohamed Youniss |
11-03-27, 08:20 PM | #57 |
صياد متفاعل
تاريخ التسجيل: Mar 2011
المدينه: أرض الله المحروسة - الأسكندرية
المشاركات: 178
معدل تقييم المستوى: 5 |
رد: مغامرات حوكا في ادغال محلات السلاح
هههههههه مشكلة
عايزين باقي الحلقات قصدي المغامرات |
11-03-27, 08:54 PM | #58 |
Guest
المشاركات: n/a
|
رد: مغامرات حوكا في ادغال محلات السلاح
ههههههههههههههههههههههههههههههههههههههههههه
جامده جدا بس ياريت لو كان فى فيديو |
11-03-27, 09:32 PM | #59 |
صياد متقدم
تاريخ التسجيل: Feb 2011
المدينه: في المسكن
المشاركات: 830
معدل تقييم المستوى: 24 |
رد: مغامرات حوكا في ادغال محلات السلاح
موضوع بيلمس الحقيقة المرة باسلوب روائي ساخر...........الله ينور يا ا/حوكا
|
11-03-27, 10:50 PM | #60 |
صياد نشيط
تاريخ التسجيل: Mar 2011
المشاركات: 261
معدل تقييم المستوى: 6 |
رد: مغامرات حوكا في ادغال محلات السلاح
|
11-03-27, 10:52 PM | #61 |
صياد نشيط
تاريخ التسجيل: Mar 2011
المشاركات: 261
معدل تقييم المستوى: 6 |
رد: مغامرات حوكا في ادغال محلات السلاح
انا اتشرف بيك والله يا خلودة ..صيامكو ده مصيبة..قصته مشكلة..بس الاقي وقت اكتبها..
|
11-03-27, 10:54 PM | #62 |
صياد نشيط
تاريخ التسجيل: Mar 2011
المشاركات: 261
معدل تقييم المستوى: 6 |
رد: مغامرات حوكا في ادغال محلات السلاح
|
11-03-27, 10:56 PM | #63 |
صياد نشيط
تاريخ التسجيل: Mar 2011
المشاركات: 261
معدل تقييم المستوى: 6 |
رد: مغامرات حوكا في ادغال محلات السلاح
|
11-03-27, 10:58 PM | #64 | |
صياد نشيط
تاريخ التسجيل: Mar 2011
المشاركات: 261
معدل تقييم المستوى: 6 |
رد: مغامرات حوكا في ادغال محلات السلاح
اقتباس:
يا ريت موضوع ميكي ده ميكنش تريقة مع اني كنت من قراء ميكي زمان..ايام الواحد لما كان رايق..والهوجة لسه مولعة...زباين ومحلات |
|
11-03-27, 11:01 PM | #65 |
صياد نشيط
تاريخ التسجيل: Mar 2011
المشاركات: 261
معدل تقييم المستوى: 6 |
رد: مغامرات حوكا في ادغال محلات السلاح
علي فكرة هما ناس كويسين ..بس الموقف حكم يعني...يعني محدش عملي حاجة ولا غلط معايا..المهم ..انا شاكر عرضك لكن المشكلة ان محدش حيرضي يجبلي اللي انا عوزة ..دانا بقالي شهر في المنتدي عمال احاول جوه وبره..
|
11-03-27, 11:02 PM | #66 |
صياد نشيط
تاريخ التسجيل: Mar 2011
المشاركات: 261
معدل تقييم المستوى: 6 |
رد: مغامرات حوكا في ادغال محلات السلاح
|
11-03-27, 11:04 PM | #67 |
صياد نشيط
تاريخ التسجيل: Mar 2011
المشاركات: 261
معدل تقييم المستوى: 6 |
رد: مغامرات حوكا في ادغال محلات السلاح
|
11-03-27, 11:05 PM | #68 |
صياد نشيط
تاريخ التسجيل: Mar 2011
المشاركات: 261
معدل تقييم المستوى: 6 |
رد: مغامرات حوكا في ادغال محلات السلاح
|
11-03-28, 12:10 AM | #69 |
صياد متقدم
تاريخ التسجيل: Jan 2011
المدينه: مدينة نصر / القاهره
المشاركات: 832
معدل تقييم المستوى: 9 |
رد: مغامرات حوكا في ادغال محلات السلاح
تصدق يا حكحك ....أنت مينفعش معاك إلا بتوع العتبة مش الزمالك
هههههههههههههههههههههههههههههههههههههههههههههههههه
__________________
كن على حذر من الكريم إذا أهنته أو من العاقل إذا أحرجته أو من اللئيم إذا أكرمته أو من الفاسق إذا عاشرته أو من الأحمق إذا ماذحته وإنى ذقت الطيبات فلم أجد أطيب من العافية وإنى ذقت المرارات كلها فلم أجد أمر من الحاجة إلى الناس ونقلت الحديد و الصخر فلم أجد أثقل من الدين وأعلم أن الدهر يوم لك و يوم عليك ،فإذا كان لك فلا تبطر وإن كان عليك فاصبروكلهما سيخسر.
حديث سيدنا على بن أبى طالب (رضى الله عنه و أرضاه) . |
11-03-28, 05:29 AM | #70 |
صياد نشيط
تاريخ التسجيل: Mar 2011
المشاركات: 261
معدل تقييم المستوى: 6 |
رد: مغامرات حوكا في ادغال محلات السلاح
|
11-03-28, 12:34 PM | #71 |
صياد نشيط
تاريخ التسجيل: Mar 2011
المشاركات: 261
معدل تقييم المستوى: 6 |
رد: مغامرات حوكا في ادغال محلات السلاح
|
11-03-28, 01:37 PM | #72 |
صياد جديد
تاريخ التسجيل: Feb 2011
المدينه: القاهرة - مصر
المشاركات: 31
معدل تقييم المستوى: 5 |
رد: مغامرات حوكا في ادغال محلات السلاح
اسلوب جميل جدا
|
11-03-28, 03:13 PM | #73 |
صياد جديد
تاريخ التسجيل: Feb 2011
المشاركات: 24
معدل تقييم المستوى: 5 |
رد: مغامرات حوكا في ادغال محلات السلاح
مستنى الجزء بتاع صيامكو
|
11-03-28, 03:36 PM | #74 |
صياد قديم
|
رد: مغامرات حوكا في ادغال محلات السلاح
أه و الله ... صيامكو ده بقي اللي هيشلك يا عم حوكا ... ههههههههههه
__________________
Don't say you are alone when I still alive Kemomail@ymail.com |
11-03-28, 07:48 PM | #75 |
صياد نشيط
تاريخ التسجيل: Mar 2011
المشاركات: 261
معدل تقييم المستوى: 6 |
رد: مغامرات حوكا في ادغال محلات السلاح
مش عارف اتوف..قصدي مش عارف اكتب..الظاهر حد فيكم حسدني!
|
11-03-28, 10:24 PM | #76 |
صياد متفاعل
تاريخ التسجيل: Mar 2011
المدينه: Alex
المشاركات: 72
معدل تقييم المستوى: 5 |
رد: مغامرات حوكا في ادغال محلات السلاح
ههههههههههههههههههههه و النعمة أنت برنس كبييير .... ما شاء الله عليك موهوب بجد
أنا مبطلتش ضحك بجد انت مش ممكن ) مستنيين الباقى و إنجز |
11-03-28, 10:56 PM | #77 |
صياد متقدم
تاريخ التسجيل: Feb 2011
المشاركات: 611
معدل تقييم المستوى: 10 |
رد: مغامرات حوكا في ادغال محلات السلاح
صيامكو دا بلطجى لازم تا خد معاك كم واحد من عالقهوة عشان تروحله وتتكلم معاه...
|
11-03-28, 11:53 PM | #78 |
صياد متقدم
تاريخ التسجيل: Feb 2011
المشاركات: 611
معدل تقييم المستوى: 10 |
رد: مغامرات حوكا في ادغال محلات السلاح
الناس كانت محتاجة لحاجة تشعرها بالأمان بعد الأيام العصيبة العشناها ..وطبعا فى عدم وجود سلاح حى مع المواطنين الشرفاء ..فكان البديل هو السلاح الصوت..يعطى احساس نفسى فقط بالأمان ..وهو دا سبب تهافت الناس على مسدسات الصوت .
|
11-03-29, 12:23 AM | #79 |
صياد متقدم
تاريخ التسجيل: Jan 2011
المدينه: مدينة نصر / القاهره
المشاركات: 832
معدل تقييم المستوى: 9 |
رد: مغامرات حوكا في ادغال محلات السلاح
__________________
كن على حذر من الكريم إذا أهنته أو من العاقل إذا أحرجته أو من اللئيم إذا أكرمته أو من الفاسق إذا عاشرته أو من الأحمق إذا ماذحته وإنى ذقت الطيبات فلم أجد أطيب من العافية وإنى ذقت المرارات كلها فلم أجد أمر من الحاجة إلى الناس ونقلت الحديد و الصخر فلم أجد أثقل من الدين وأعلم أن الدهر يوم لك و يوم عليك ،فإذا كان لك فلا تبطر وإن كان عليك فاصبروكلهما سيخسر.
حديث سيدنا على بن أبى طالب (رضى الله عنه و أرضاه) . |
11-03-29, 07:28 AM | #80 |
صياد متفاعل
تاريخ التسجيل: Mar 2011
المدينه: أرض الله المحروسة - الأسكندرية
المشاركات: 178
معدل تقييم المستوى: 5 |
رد: مغامرات حوكا في ادغال محلات السلاح
|
11-03-29, 07:40 AM | #81 |
صياد متفاعل
تاريخ التسجيل: Feb 2011
المشاركات: 228
معدل تقييم المستوى: 6 |
رد: مغامرات حوكا في ادغال محلات السلاح
كلمة واحدة بس حا اقولها لك بعد كل اللى انت عملته ده
" كوماندو ادغال تجار القاهرة " |
11-03-29, 11:57 AM | #82 |
صياد نشيط
تاريخ التسجيل: Mar 2011
المشاركات: 261
معدل تقييم المستوى: 6 |
رد: مغامرات حوكا في ادغال محلات السلاح
|
11-03-29, 03:29 PM | #83 |
صياد نشيط
تاريخ التسجيل: Mar 2011
المشاركات: 261
معدل تقييم المستوى: 6 |
رد: مغامرات حوكا في ادغال محلات السلاح
المغامرات دلوقتي كاملة..
|
11-03-29, 07:03 PM | #84 |
صياد نشيط
تاريخ التسجيل: Mar 2011
المشاركات: 261
معدل تقييم المستوى: 6 |
رد: مغامرات حوكا في ادغال محلات السلاح
انا كملت القصص بتاعت مغامراتي كلها هنا لسهولة الرجوع برضة
|
11-03-30, 07:30 AM | #85 | |
صياد متفاعل
تاريخ التسجيل: Mar 2011
المدينه: أرض الله المحروسة - الأسكندرية
المشاركات: 178
معدل تقييم المستوى: 5 |
رد: مغامرات حوكا في ادغال محلات السلاح
اقتباس:
|
|
11-03-30, 02:47 PM | #86 |
صياد نشيط
تاريخ التسجيل: Mar 2011
المشاركات: 261
معدل تقييم المستوى: 6 |
رد: مغامرات حوكا في ادغال محلات السلاح
|
11-04-03, 05:46 PM | #87 |
صياد متفاعل
تاريخ التسجيل: Apr 2011
المشاركات: 122
معدل تقييم المستوى: 5 |
رد: مغامرات حوكا في ادغال محلات السلاح
بجد المغامره وطريقه سردها روعه,
انا بردو كنت بحلم بمسدس Diana lp8 وسئلت عليه عند الهندسه للاسلحه في مصر الجديده والمعامله كانت كويسه وفي احمد منسي وكانت المعامله ناشفه وفي الاخر هخلي واحد صاحبي يجبهولي من لندن . وعرفت من مرسله شركه Diana ان التصدير لمصر موقوف من 5 سنين. معلش طولت عليك |
11-05-07, 10:14 PM | #88 |
صياد متقدم
تاريخ التسجيل: Apr 2011
المدينه: port said , egypt
المشاركات: 693
معدل تقييم المستوى: 8 |
رد: مغامرات حوكا في ادغال محلات السلاح
اسلوب رائع فعلا في سرد الحوار وفعلا حاجة غريبة ان محلات الاسلحة بتعاملنا كده ليه بردو في بورسعيد دخلت اشتري علبة رش فلقيت راجل وست جوه المحل فبقول لو سمحت لقيتها بصيتلي بصة احتقار ومرتديتش وبقول لو سمحت تاني قالتلي هوا انت مش شايفني بتكلم ولا ايه استني لما اخلص بنت التيييييت يلا اهم ايام بنتداولها بين الناس
__________________
اذا رايت نملة في الطريق فلا تدسها و ابتغ بذلك وجه الله عسى ان يرحمك كما رحمتها اذا اعترضتك قطة صغيرة في وسط الطريق فاحملها الي الجانب الاخر و ابتغ بذلك وجه الله عسى ان يقيك الله ميتة السوء اذا هممت بالقاء بقايا الطعام في حاوية القمامة فاجعل نيتك ان تكل منها الدواب و ابتغ بذلك وجه الله عسى ان يرزقك الله من حيث لا تحتسب اذا اشتدت حرارة الصيف فاجعل اناء به ماء في شباك غرفتك لتشرب و تتبرد فيهالطيور و ابتغ بذلك وجه الله عسى ان يسقيك الله يوم العطش الاكبر |
11-05-07, 10:48 PM | #89 |
صياد متفاعل
تاريخ التسجيل: Mar 2011
المدينه: القاهرة
المشاركات: 221
معدل تقييم المستوى: 26 |
رد: مغامرات حوكا في ادغال محلات السلاح
ايه التوبك الفاجر ده بجد اسلوبك روووووووووووعة انا حسيت ان انا اللى عايش الاحداث ههههههههههههههههههههههههههههههههههههههههههههههههه
|
11-05-12, 05:11 PM | #90 |
صياد نشيط
تاريخ التسجيل: Mar 2011
المشاركات: 261
معدل تقييم المستوى: 6 |
رد: مغامرات حوكا في ادغال محلات السلاح
تجديددددددد
|
11-06-11, 01:35 PM | #91 |
صياد نشيط
تاريخ التسجيل: May 2011
المدينه: القاهرة
المشاركات: 292
معدل تقييم المستوى: 7 |
رد: مغامرات حوكا في ادغال محلات السلاح
اسلوبك جاااااامد جداً يا حوكا وفكرتني بواحد اعرفه في كتاباتك... والواحد مش عارف الناس دي عايزة إيه... واضح إنهم مش عايزين يبيعوا دول عايزين ينصبوا بس... يعني هو مشروع نصب لابس محل سلاح... وربنا يكرم البلد دي بناس محترمة في كل المجالات بدل القرف اللي الواحد بيشوفه ويسمع عنه ده
|
11-08-07, 01:10 PM | #92 |
صياد نشيط
تاريخ التسجيل: Mar 2011
المشاركات: 261
معدل تقييم المستوى: 6 |
رد: مغامرات حوكا في ادغال محلات السلاح
تجديددددددد
|
11-08-08, 08:41 AM | #93 |
صياد متفاعل
تاريخ التسجيل: Mar 2011
المدينه: أرض الله المحروسة - الأسكندرية
المشاركات: 178
معدل تقييم المستوى: 5 |
رد: مغامرات حوكا في ادغال محلات السلاح
|
11-08-11, 01:24 AM | #94 |
صياد متفاعل
تاريخ التسجيل: May 2011
المشاركات: 219
معدل تقييم المستوى: 6 |
رد: مغامرات حوكا في ادغال محلات السلاح
ههههههههه
الجمد لله ان انت طلعت سليم بدون خسائر وبعد كدة خلي بالك |
sponsor links |
|
|
المواضيع المتشابهه | ||||
الموضوع | كاتب الموضوع | المنتدى | مشاركات | آخر مشاركة |
حالة محلات السلاح في الاسكندريه اليوم | hemi afifi | محدثات الصوت | 13 | 11-06-05 05:19 AM |
حملة لمقاطعة محلات السلاح !!!! | smsmn8888 | الصيد العام | 21 | 11-04-03 11:11 PM |
محلات أبو ضيف فرع شبرا ؟؟؟؟؟؟ | BASiC | بنادق ضغط الهواء ومتعلقاتها | 11 | 11-03-14 02:14 PM |
مين من تجار و محلات السلاح بيبع بنادق مستعملة كويسة؟؟ | waleedrahmy | سوق المنتدى | 10 | 11-03-12 09:07 AM |
عنوان محلات السلاح | غريب عن الدنيا | محلات الاسلحه وادوات الصيد | 1 | 11-02-11 05:50 AM |