وحشتوووووووووني :)

[محمد خلف]

من زماااااااااان ولا دخلت على المنتدى ولا رفعت حاجه على البيدج
و ربنا عالم ان السبب مش اهمال ولا تكبير دماغ
و عارف ان ميبعدنيش عن اخواتي الا الشديد القوي
الللللللمهم
التحقيق الي كنت طلفت علشانه الصور اهو
https://www.facebook.com/32448437770...type=1&theater
اقروه و يا رب يعجبكو
.
.
** الاسلحه المصنعه و المعدله .. اخطارها و علاقتها بارتفاع نسب الجريمه و موقفها امام القضاء ..

نتيجه للحاله الامنيه المترديه و الغياب التام للشرطه عقب ثوره 25 يناير حدث تطور كبير في نوعيه الجرائم الي روعت المجتمع المصري .. فقد انتشرت جرائم القتل و الاختطاف لطلب فديه و قطع الطرق بشكل غير مسبوق .. و مع تطور الجرائم تطورت ايضا ادوات ارتكاب الجرائم .. فبعد ان كان البلطجي يعتمد على المطواه و السكين .. اصبح متاحا له المسدسات و البنادق الاليه و الخرطوش .. و لمن لا يستطيع او لا يريد دفع مبالغ كبيره ثمنا لسلاح ناري مصنوع في مصنع بغرض استخدامه في القتال .. هناك الفرد الخرطوش و الكباسات و المسدسات المعدله .. و هي زهيده الثمن بالنسبه للاسلحه الحقيقيه .. و انتشرت هذه الاسلحه بشكل كبير جدا .. و مع زيادتها تصاعدت حده جرائم العنف و كميتها بمعدلات خطيره .. في هذا الموضوع ناخذ اراء بعض الاشخاص المهتمين بهذه القضيه كقضيه امن قومي كل في مجاله ليكون الراي اقرب ما يكون الى الصحه و الدقه .

* مهندس/ سيد طارق : يجب التميز بين السلاح المعدل و المصنع محليا .. فمثلا المصنع يصنع مسدس صوت فقط لا يؤذي .. المستخدم يقوم بتعديلة ليصبح سلاح ناري يطلق مقذوف .. اما السلاح المصنع محليا فهو تقليد لاسلحة مصنعة و لكن يتم عمله في ورش غير متخصصه كورش الخراطة مثلا .. و حمل هذة الاسلحه ظاهرة منتشرة بكثافة في جميع طبقات المجتمع .. لسهوله الحصول عليها و رخص اسعارها بالنسبه للسلاح السليم المرخص .. بالاضافه لصعوبه استخراج تراخيص لحمل السلاح .. فيلجا اليها البلطجيه و المجرمين لاستخدامها في الاعمال الاجراميه من سرقات و تهديد و قتل .. بعض المواطنين يرون فيها وسيله للحمايه من المجرمين .. حتى لو ستعرضهم للمساءله القانونيه .. دا عندهم بيكون اهون من ان خطر يهدد اهلهم .. في فروق مهمه بين المسدس الحى و مسدس الصوت لان المسدس الحي بيتصنع بهدف اطلاق مقذوف .. فمن ناحيه الخامه بيتصنع من مواد شديده القوه و الصلابه ليتحمل درجات عاليه من الضغط و الحراره .. و بيتم اختباره عشان يضمن سلامه مستخدمه .. و في الاستخدام المسدس المعدل غير دقيق نهائيا لاختلاف مواصفات الماسوره عن ماسوره الاسلحه العاديه .. و معظم مصنعي مسدسات الصوت بيعملو المسدسات ماسورتها ثابته .. غير قابله للانفصال عن جسم المسدس .. و الخزنه بتتعمل اصغر من ناحيه العرض .. لان الطلقه الصوت بتكون اقصر ان الحي .. دا غير ان لازم رخصه عشان تحمل سلاح ناري .. اما مسدس الصوت بيتصنع من مواد ضعيفه لان الهدف من صنعه هو احداث صوت مش اكتر .. و هو مش محتاج تراخيص و ممكن حمله لاي شخص و بيستخدم كتير في الافراح و المناسبات .. خطر جدا ضرب طلقات حيه من مسدس صوت معدل لان المسدس ضعيف و غير مصمم لاحتمال ضغط ولا حراره .. و ممكن ينفجر و يسبب اضرار كبيره .. ممكن مثلا ينفجر و الشظايا تسبب عجز او وفاه المستخدم او احد المحيطين بيه وقت الانفجار .. و الاسلحه المصنعه محليا كمان خطر جدا استخدامها لانها بتتعمل في ورش بمواد ضعيفه غير قادره على احتمال انفجار الطلقه .. او اليه التشغيل نفسها الي ممكن تتسبب في اعطال للسلاح او تفجير الطلقه نفسها .. انتشار الاسلحه دي ليه علاقه وثيقه بزياده الجريمه و العنف لانها رخيصه جدا بالنسبه للسلاح المرخص .. و عدم الوعي تجاه السلاح و استخدامه و التعنت في منح التراخيص بيتسبب في ان الاسلحه دي تنتشر كل يوم اكتر من اليوم الي قبله دا غير ان صعب بالنسبه للحكومه حصر جميع حاملي الاسلحه المعدله .. الحل الوحيد للمشكله دي زياده دور الامن و توعيه الناس تجاه الاسلحه و خطوره الاسلحه المعدله و تسهيل الحصول على سلاح مرخص للناس الي فعلا محتاجاه لحمايه ارواحها و اهلها و ممتلكاتها .. بشرط زياده الوعي عند الناس للتحكم في نفسهم عند حمل السلاح .. فالسلاح مجرد اداه .. استخدامها صح او خطا بيعود لحاملها .
* محاسب/ كريم الكراني / رئيس رابطه الصيد و الرمايه : إنتشار الأسلحة محلية الصنع و المسدسات المعدلة هي ظاهرة خطيرة للغاية علي المجتمع المصري .. و خاصة أن إنتشارها كبير بين البلطجية أو المجرمين لإستخدامها في جرائمهم من ترويع و إرهاب أو سرقه بالإكراه أو مقاومة الشرطة .. و ما يجهله هؤلاء أن لهذه الأسلحة خطورة كبيرة علي حياتهم هم أولا لأنها مصنوعة يدويا بإستخدام خامات رديئة و غير خاضعة للتجربة من قبل مختصين .. و من أهم أسباب إنتشار هذه الأسلحة هو شعور المجرم بأن الحالة الأمنية ضعيفة و من السهل إستخدام هذه الأسلحة في تنفيذ الجريمة .. و من جانب أخر قد نجد الكثير من الناس قد يبحثون عن هذه الأسلحة لشعورهم بضرورة إقتنائها للدفاع عن النفس لإنتشار الإرهاب .. و بالتالي عودة الأمن بقوة للشارع مع تطبيق القانون سيقلل من إنتشار الظاهرة بشكل كبير جدا .. فسيشعر المجرم بصعوبة تنفيذ جريمتة و سيشعر الناس بعدم الرغبة في إقتناء أسلحة غير قانونية طالما عاد الأمن للشارع .. بدأت فكره انشاء رابطه الصيد و الرمايه بهدف نشر هوايه الصيد كما أوصانا الرسول ( ص ) و التعريف بأخلاق الصياد الحميدة و نشرها في المجتمع المصري .. و توجيه طاقات الشباب لشئ مفيد و الترفيه عنهم بتنظيم رحلات صيد للتوعيه باهميه الحفاظ على البيئه و الثروات الحيوانيه و السمكيه لمصر.. و التوعية بشروط الأمن و السلامة في إستخدام الأسلحة .. و توضيح قوانين الأسلحة و الذخائر للأعضاء من الصيادين .. و بيان مدي خطورة إقنتناء أو إستخدام هذه النوعية من الأسلحة غير معروفة المصدر و الغير أمنة .. و نحن كصيادين جميعا نلتزم تماما بالقانون .. و نبذل قصارى جهدنا في التوعية لخطورة إقتناء و أستخدام مثل هذه الأسلحة الغير أمنة إطلاقا .. بل و نقوم أيضا بتوعية التجار بعدم التعامل فيها .
* محامي / احمد مجدي : الحاجات دي انتشرت بشكل كبير بعد الثوره بسبب الغياب الشرطي و انعدام القوه الرادعه للقانون الي كانت بتخلي المجرم يخاف يشيل سلاح .. و سعرها رخيص جدا بالمقارنه بالسلاح العادي .. خصوصا المصنع محليا سعره بيكون ارخص حتى من مسدس الصوت .. والي بيتمسك بحاجه من دي بيتوجهله 3 تهم .. حيازه سلاح بدون ترخيص .. و بيتحاسب بالماده 25 الي بتعاقب حامل الحاجات دي بالحبس ما بين 3 : 5 سنوات و الغرامه .. لان ماسورتها مش مششخنه فبتتعامل معامله السلاح الغير مششخن .. يعني بتتعامل معامله البندقيه الخرطوش الي مش مرخصه .. دا غير تهمه تعديل او تصنيع السلاح الي بتعاقب عليها الماده 28 بالحبس بردو من 3 : 5 و الغرامه .. و تهمه حيازه ذخائر بدون ترخيص و بردو بيتعاقب عليها بالحبس من 5 : 7 سنوات .. دا غير ان الحاجات دي خطر على مستخدميها اكتر من اي حد تاني لانها غير صالحه لاخراج مقذوف اصلا .. الحل لتخفيف انتشار الاسلحه دي التوعيه باخطارها و العقوبات الي بتتطبق على حاملها.. دا غير التواجد الامني الي ليه دور مهم في القبض على البلطجيه الي بيشيلوها و بيصنعوها و يبيعوها .. لان دول لازم يتحاسبو .
* محمد الوهيدي / صاحب محل اسلحه و ادوات صيد : طالما الحكومه مبتسمحش لحد انه يشيل سلاح يبقى مينفعش يبقى اي حد معاه سلاح في البلد غير الشرطه و الجيش .. بس طالما المجرمين معاهم سلاح و بيقدرو انهم يرتكبو جرائم بيه يبقى لازم الحكومه تسمح بان المواطن الشريف كمان يبقى معاه سلاح شرعي مرخص يدافع بيه عن اهله و بيته و عربيته .. و مش لازم شروط الترخيص الي بتخلي المليونير او الي عنده واسطه كبيره بس هما الي يقدرو يجيبو رخصه سلاح .. طالما راجل محترم معندوش مشاكل امنيه او قانونيه او عقليه من حقه يشيل سلاح يقدر يحمي بيه مراته الي ماشيه جمبه من ان بلطجي يخطفها و يغتصبها .. او ينزله من عربيته الي بتقضيله مشاويره حتى لو كانت رخيصه و ياخدها و يمشي لانه معاه سلاح و صاحب الحق لا .. طالما السلاح موجود مع اي حد يبقى الاولى بحمل السلاح المواطن الشريف الي عاوز يشيل سلاح شرعي يحمي بيه بيته و اهله و ممتلكاته .. و حامل السلاح المرخص دا بيكون ممسوك من رقبته لان بيتعمل تحريات عنه و عن اهله قبل ما يطلعله رخصه .. عشان كده مينفعش راجل معاه سلاح مرخص يتخانق بالسلاح دا ولا ينفع يثبت بيه حد ولا ينفع يرتكب بيه جريمه .. لانه بيكون خايف عالترخيص و عالمسدس المرخص الي هو شاريه .. منع استيراد المسدسات و الذخيره بيفتح سوق للمهربين و تجار السوق السودا .. لان الشخص الي عاوز يشتري سلاح بيفكر انه بدل ما يقدم على ترخيص و يجيله بعد سنتين و بعدين يشتري مسدس بسعر مبالغ جدا فيه و اكبر من سعره بره بعشرات الاضعاف ممكن يشتري مسدس من السوق السودا ارخص بكتير و فوري .. دا غير ان منح تصاريح الاستيراد لقيادات الشرطه و اعضاء الهيئه القضائيه بيخلق فرص للربح غير المشروع .. لان هما بيستوردو السلاح كتير منهم بيبيعوه و بيكسبو في المسدس الواحد اكتر من 100 الف جنيه .. دا طبعا مش عدل لان المواطن العادي لو معندوش واسطه لو عمل ايه مش هيقدر يجيب تصريح استيراد سلاح .. دا بيخلق بردو طرق ربح مش شرعيه .. لان مش شغلتهم تجاره السلاح .. ليه السلاح ميبقاش سعره طبيعي زي باقي بلاد الدنيا .. ليه منحاولش ناخد خطوه في الطريق الصحيح في التعامل مع السلاح .. صحيح هنا مفيش وعي كافي لحريه حمل السلاح .. بس لازم يتعاد النظر في سياسه الدوله تجاه حمل المواطن للسلاح .. يعني ممكن يعملو التحريات اللازمه عن الي عاوز رخصه و يدوهاله طالما عنده حاجه يحميها .. بيت زوجه عربيه اي حاجه .. من حق المواطن انه يحمي نفسه .. مينفعش يبقى السلاح الي في الشارع في ايد البلطجي بس .. ما الترخيص مش لسلاح حربي .. الترخيص لسلاح شخصي للدفاع بس .. انا كهاوي صيد كنت بقدر قبل الثوره اطلع اصطاد 3 او 4 مرات في الاسبوع قبل الاسعار الفلكيه للذخيره .. دلوقت سعر الخرطوش 10 اضعاف سعره بره .. و دا مش في صالح اي حد .. المصنع الحربي الي محتكر صناعه و استيراد الذخيره هو الي بيحدد الاسعار .. و دا بردو مش صح لان دا بيخلق سوق للمهربين و بيخليهم يكسبو اكتر .. يعني لما بتيجي حاويه ميتدفعش عليها اي جمارك ولا ضرايب .. و تتباع بالسعر الي بيتباع بيه المصري اكيد المهرب الي كسبان .. لانه بيبيع لاي حد من غير ما يسال على تراخيص .. عشان كده دايما تلاقي الخرطوش الي مع البلطجيه و المجرمين خرطوش اجنبي .. لو فعلا عاوزين يقللو الظاهره دي يفتحو السوق و يسمحو بالاستيراد و يرجعو الاسعار لطبيعتها زي باقي دول العالم .. يعني لو الخرطوش ب 2 جنيه .. ايه الي هيخلي المهرب يجيبه من بره ب جنيه و ربع و يتحمل خطوره تهريبه و بيعه بطريقه غير شرعيه .. المهرب نفسه هيلاقي المخاطره مش مساويه للمكسب فهيبطل .. بالتالي هتبقى الذخيره بتتباع بس في المحلات المصرح ليها ببيعها قانوني .. فمفيش بلطجي هيروح يشتريها من محل و هو معهوش رخصه .. بالتالي الذخيره هتقل و بالتدريج السلاح الي معاه مش هيبقى ليه لزمه لانه مش عارف يجيبله ذخيره .. دي سلعه بيستخدمها رماه و صيادين و نوادي صيد لازم يبقى سوقها مفتوح بس مقنن .. انما الي حاصل دلوقت في مصلحه المهربين و بس .. السياسه الي بتتعامل بيها الحكومه مع الموضوع دا مش مظبوطه .. لانها مش هتقدر تسيطر على المجرمين و هيفضلو يوصلو للسلاح و الذخيره بالطريقه الغير مشروعه .. لان الي بيوصلهالهم بيكسب مكاسب تخليه مستعد للمخاطره .. انما لو السياسه دي اتغيرت هتبقى المخاطره مش مجزيه بالنسبه للمهرب .

[_SAIKO_]

نااااااااااااااااااايس و تحية عطرة للاخوة اللي كتبوا ف المقال ده استاذ كريم الكراني و المحامي احمد وجدي و الاستاذ محمد الوهيدي
+111111111111111111111111111111111111111

[محمد خلف]

احمد مجدي هو رومل ادمن الصفحه
و محمد الوهيدي بردو صياد كبير و عضو في الصفحه

[وليد سالم]

منور مكانك يا خلف والف مبروك علي مواضيعك الصحفية وكتاباتك الشيقة والف الف مبروك علي التكريم يا صديقي رفعت راسنا يا خلف يا ولدي

[محمد خلف]

حبييييبي حبيبي يا ليدو

[big man]

تقرير رهييييييييييييييييييييييييييييب

[محمد خلف]

حبيب قلبي يا كيرو

[elmasrey123]

الله ينور ياصاحبى