بعض مهارات الصيد التى لا تمس الصبد بصله

[hoka]

السلام عليكم
انا انهارده هاقولكم بعض مهارات الصيد المهمه جداااااااااااااااااا لمعظم الصيادين وخاصه اللى بيصطادو فى مناطق سكنيه او بيقابلو ناس كتير
المهاره فى التعامل مع الناس
ديه مهمه جدا وممكن تخليك صاحب ارض وممكن تخليك ملعون فى الارض اللى بتنزلها
يعنى مثلا لو بتصطاد فى منطقه سكنيه وطلعلك واحد قالك الكلام المعتاد(حاسب يبنى لتجيبها فى عينى) (اليمام حرام يبنى) (حاسب الحمام بتاعى) وهكذا
طبعا الكلام مستفذ اوى بس لازم تكون بارد اوى وترد باحلى الردود
ويستحب انك تقول(حاضر شكرا يا افندم ) وتمشى
طب ده فى المناطق السكنيه
لو فى مناطق صحراويه وعرب بقى وكده
حاول تبقى عفوى حبتين وتبين انك ابن بلد ودايما فرق بين نوعيات الناس
يعنى تلاقى واحد ابن بلد ومجدع لازم تكلمه بادب واحترام وتاخد وتدى وتتوهه فى مواضيع تانيه علشان يحبك وينسى انك بتصطاد وبكده هايحب يشوفك كل يوم
ده غير بعض اليمام لاهل المنطقه ديه هايخليهم يحبوك اكتر
نيجى لنوعيات اخرى من الناس بتبقى ضايعه ودماغه مش فيها
دول حاجه من اتنين اما تقولهم طيب وتمشى طوالى
او تمشى بدون كلام
لان دول هم اللى بيعملو المشاكل كلها وما تقولش ايه ده انا هاخاف ولا ايه
لالا مش خوف
مجرد انك تتجنب المشاكل بقدر المستطاع
مثلا كان مره بصطاد ولقيت واحد بيضرب حقن ماكس وانا بصطاد ضربت ولقيت اليمامه وقعت جوه مدرسه
فلسه بمشى لقيته بيندهلى ويا كابتن ويابرنس بصتله قلتله خلاص وقعت لصاحب نصيبها
فضل بقى يهرتل بالكلام وعاوز يكلمنى
كل اللى عملته انى اديته ضهرى ومشيت
وده احسن حل لانك لو اتخانقت معاه او كلمته هاتضيع يومك اولا ثانيا هاتلم ناس وممكن يغلطوك انت لو انت مش معروف فى المنطقه
وكمان لازم تختار مناطق الصيد بعنايه يعنى ما تنزلش فى منطقه بتاعه ناس بتوع مخدرات او مثلا طريق عارف ان فيه قطاع طرق وهكذا علشان ما تضطرش تستخدم بندقيتك غلط وتضرب بيها حد
كل ده تجنب لاى مشاكل علشان يومك يمشى بسلاسه وهدوء
من اجمل ما يمكن ان تفعله اثناء الصيد هو انك تصطحب ولد صغير من اهل المنطقه اثناء رحلتك
منها يساعدك ومنها تعلمه وطبعا يبقى عون ليك فى اى مشكله تواجهها
وطبعا تديله يمامتين ولا حاجه وصدقنى هاتفرح اوى فى اليوم ده
المهارات ديه بتطلب منك تبقى بارد جدا وتحت اى ظرف ما تفكرش تستعمل سلاحك ولو حد كلمك اى كلمه عامله على قد عقله
مثلا مره واحد قالى انت اللى ضربت الحمام بتاعى وانت وانت
قلتله بمنتهى البرود( يا افندم انا بصطاد يمام بس وادى الشنطه شوف فيها حمام لو يخصك خده)
طبعا علشان هو راجل محترم بس عقله صغير فى حته الصيد لكن مع البعض الاخر لازم ترد باسلوب مختلف
بس ارجو على قدر الامكان تتجنب المشاكل والعصبيه
نيجى بقى لنقطه مهمه بيشكو منها الكثير من الصيادين وهى الصيد وسط الناس او فى المدن
بصو يا جماعه انا مره اصطدت فى يوم وكان اكنى ماشى الساعه 2 الظهر
بس بما انى مجنون وبحب الصيد اوى كملت
طبعا نظرات الناس غريبه بس بقيت احسسهم انى عبيط اوى
بمعنى............. كنت الاقى يمامه على شجره استاذن اللى ماشى تحتيها واقوله بعد اذنك هاضربها
واحد تانى فى بيت بستأذنه اضرب يمامه فى البيت اللى قصاده
هكذا
وبحب اوى لما الناس اللى فى البيوت يشوفونى بضرب علشان يعرفو ويفهمو انى مش بضرب وخلاص ويطمنو لوجودى فى المنطقه
وكذلك لو فى عربيه وبتصطاد بره
لازم تدى السلام ويارجاله وكده وبردو تستأذن
الكلام ده كله بيخلى الناس تفهمك وتحبك وفى احيان كتير بيساعدوك حتى لو بتضرب على بلكونه وواحد واقف فيها
......................................
فيه حاجات مهمه اوى اوى اوى بقى
سلاحك
ما تسلمش سلاحك لاى حد تحت اى ظرف حتى لو بيقولك هاجرب
قوله معلش علشان ظابطها او مثلا معلش علشان الحق يوم واليمام وهكذا
ولو تربس اوى وحاسس انه هايعمل ازمه
قوله طيب خلى بالك وحسسه ان السلاح ممكن يضرب لوحده وخوفه منه يعنى
ودايما اقف جنبه واكنك ماسك البندقيه
وما تديلوش غير انه يضرب وبس .......... لا يعمر ولا يمسك رش
مش مسأله تخوين بس حفاظا على سلاحك لان مرات كتير بدي بندقيتى لصديقى حتى ويضرب بيها وهى مكسوره او الزناد يسرقه ويضرب فى اى اتجاه او حتى يستعبط وينشن على حد فى الشارع
لازم تبينلهم انك بتغضب بسرعه من كده وتامن سلاحك لاقصى درجه
بالنسبه لصيدك وحصيلتك
خليها دايما فى ايدك او مربوطه فى وسطك
ولما تقع يمامه متخليش حد يجيبهالك واتصرف اكنك مضايق من التصرف ده لان ده هايدفعه انه يطلب منك يضرب او ياخد يمام وبكده مش هاتخلص فى يومك وهاتتعكنن
فى النهايه انصحكم بالخروج مع صيادين قدامى علشان تقابلو سوا الحاجات ديه وتتعلمو منهم ازاى يتعاملو معاها
ارجو ان الموضوع يكون مفيد لبعضكم بس لانى انا بتعامل مع ناس كتير اثناء الصيد فمعنديش اى مشكله انى اصطاد وسط ناس ولو حتى بتليسكوب وكاتم

سلام عليكم