الحمد لله أول عملية صيد
 

بسم الله الرحمن الرحيم
السلام عليكم ورحمة الله وبركاته

---

ياشباب لى استفسار بعد اذنكم

اولاً الحمد لله النهاردة كانت تانى طلعة ليا فى الصيد وأول مرة اصطاد فعلاً مع العلم انى بتدرب من فترة كبيرة


الأول الحصيلة :

تبارك الله

عصفورة + حمامة

--------

العصفور اصطدتها من على شجرة فى الشارع ووقعت مفيش ثوانى يمكن مش كملت 20 ثانية وماتت ياترى حلال اكلها ؟


الحمامة ضربتها على سلك الكهرباء ووقعت ولإنى اول مرة اصطاد روحت وراها وضربتها طلقتين كمان

على ماوصلت البيت كان لسا فيها الروح ,, رحت دابحها زى ماقرأت فى موضوع قبل كدا ياترى دا حلال ؟


فى حاجة بصراحة اهلى كلمونى فيها قالوا لى الحمامة دى شكلها حلو ومؤكد بتاع حد ومتعملش كدا تانى لإن الناس هيدعوا عليك لإن دى مؤكد بتاع حد وانا قلبى شاكك انها فعلاً بتاع حد لاكن والله ماعرف ولاكنت اعرف ساعتها انا لقيت حاجة ادامى على السلك فضربتها ياريت بردو تقولولى رأيكم فى الموضوع دا

آسف على الاطالة

شكراً مقدماً

رد: الحمد لله أول عملية صيد
 

اولا الف مبروك عليك وعلينا انضمامك لاسره الصيادين فى المنتدى ثانيا بالنسبه للدبح انت لما بتضر الهدف لو نزل مقفول يعنى مات على طول حلال اكله انما لو لحقته وهو لسه فيه الروح لازم تدبحه بالنسبه لموضوع الحمام حاول متضربش حمام فى المناطق السكنيه لانه غالبا بتاع ناس انما لو بتضرب فى حته صحرا او طريق سريع يعنى عادى والحمام البرى عاده صغير فى الحجم وربنا يوفقك وتكون الحصيله فى المرات القادمه اكبر وافضل ......... اتمنى اكون افدتك وتقبل مرورى

رد: الحمد لله أول عملية صيد
 

الف مبروك علي الطلعة ولكن نصيحة لا تضرب حمام الا بعد ان تخرج مع شخص خبرة يعلمك كيفية التعرف علي الحمام البري والتفرقة بينه وبين الحمام الاهلي لان طبعا دي مسئولية كبيرة انك تضرب حمام بتاع حد ولو كانت الحمامه اللي ضبتها لونها غير الرمادي (يعني بني او ابيض او بني في ابيض او ازرق في ا بيض)فهمي بنسبة كبيرة حمامة اهلية بتاعة ناس ويستحسن تتحاول تتصدق بثمنها لتبرئة ذمتك.
بالنسبة لتحليل الصيد فيجب ان تسمي قبل ان تضرب(تقول بسم الله الله اكبر) فإذا وقع الصيد ميتا وكنت سميت قبل الضرب فهو حلال ان شاء الله اما اذا وقع حيا فيجب ان تسمي عليه مرة اخري وتذبحة ولا تقوم بضربه برشه اخري الا اذا غلب عليك انك لن تستطيع الامساك به يعني لو مصلا هاقدر يطير تاني او ممكن يجري لمكان يصعب ان تصل اليه فيه في الحالة دي ممكن تضربه رشه تانيه وتسمي برده قبلها .
اذا بقا نسيت تسمي قبل الضرب ووقع الصيد ميتا ففي هذه الحالة لا تأكله فهو ليس حلال
ارجو اكون افدت حضرتك ومرحبا بيك في عالم الصيادين

رد: الحمد لله أول عملية صيد
 

رد: الحمد لله أول عملية صيد
 

الله ينور يا صياد يا صغيير
بس اول نصيحة لازم تعرفها (تجنب صيد الحمام اللى فى المناطق السكنية) لأنة بنسبة 99% بيكون بتاع اهالى
ومنتنساش تسمى وتكبر قبل الضرب وفى اول الطلعة علشان لو نسيت .

وهلاً بيك بنا وكل سنة وانت طيب

رد: الحمد لله أول عملية صيد
 

استاذ امير حبيبي اسمحلي اعقب علي كلامك حيث انه لا يكفي التمسية مره واحده قبل الصيد بل يجب التسمية عند كل رمية وتقبل احترامي ياباشا

رد: الحمد لله أول عملية صيد
 

جزيل الشكر لحضراتكم على اجابتكم لأسئلتى وكمان ترحيبى بيكم

مش عارف اقول لحضراتكم مدى سعادتى النهاردة بس ليا استفسار

اولاً الحمامة لونها رمادى والحقيقة مش عارف هى كدا بتاع ناس ولا لأ لاكن عامةً من المرة الجاية مش هصطاد حمام اطلاقاً داخل البلد دا وعد بينى وبينكم أمام الله

بالنسبة للعصافير ياريت لو حد عنده طريقة لطبخها او عملها يعنى زى الحمام كدا

حاجة أخيرة ومهمة انا ضربت حمامة تانية بس وقع منها كام ريشة كدا وطارت ياريت تقولوا لى على مكان كويس فى الحمام ابقى اضرب فيه بحيث تنزل على الارض ,, والله مانا عارف الحمامة اللى اصطادتها دى الطلقة الاولى جت لها فين انا ضربتها طلقة ولما وقعت ولقتها بتجرى رحت ضاربها التانية فياريت تفيدونى فى الموضوع

جزيل الشكر لكم جميعاً

كنت قرأت فى الموضوع الشامل للمبتدئين انه لو نسيت اسمى مش مشكلة ياريت حضرتك تتأكدلى من الموضوع دا وانا لن اقوم بأكل اى صيدة الا بعد رد حضرتك

جزيل الشكر لحضرتك

رد: الحمد لله أول عملية صيد
 

النسيان في التسمية يجوز في حالة الذبح فهي تسقط سهوا وليس جهلا اما في حالة الصيد فلا يجوز النسيان وذلك لورود النص في الصيد في ا لصيد(في حديث ابي ثعلبة :وماصدت بقوسك وذكرت اسم الله عليه فكل .رواه البخاري ) وارجع العلماء ذلك الي كون الصيد ليس ذبحا في ذاته لذلك فان التسمية تقوية والله تعالي اعلم و يستحسن الاخذ بالاحوط في الامور التي تتعلق بأكل حلالا او حراما

بالنسبة لمكان الاصابة افضل مكان هو في الجزء العلوي من اليمامه وهو الرأس والصدر او الاجنحه لضمان سقوط الصيد

بالنسبة للعصفورة حضرتك ممكن بعد ما تنظفها تتبلها بشوية ملح وفلفل وتشوية علي الناس مباشرة طعمها هايبقي لذيذ انا لو اصطادت كمية عصافير فدي بقا تستاهل تعملها اكلة مخصوص وساعتها هابقي اقولك تطبخهم ازاي

رد: الحمد لله أول عملية صيد
 

ألف شكر ياباشا منتحرمش منك ولا من الخبراء بتوعك دايماً