|
طريقتى الخاصه لظبط النشنكان والتصويب
السلام عليكم
انا معرفش ايه المواضيع اللى عاوز اكتبها ديه بس بقول اهو اكتب احسن يمكن حد يستفيد بكلمه التصويب وظبط النشنكان انا النشنكان بتاعى رمسيس ثابت يمين وشمال متحرك فوق وتحت ومن ادق النشنكانات وخاصه ان الامامى ثابت هو كمان بس هاكلمكم عن تجربتى مع البندقيه المارفيك بتاعه احمد وبعدين اقولكم حكايه التصويب انا بظبط كالاتى بجيب خشبه رفيعه وبحطها على حاجه بحيث تبقى واقفه بالطول واقف على مسافه 10 متر واشرب عليها لو جت يمين يبقى اكيد لازم احرك النشنكان الخلفى شمال حد يعرف ليه؟؟؟ اعتقد ان فيه صيادين حافظينها وفقط بص اعتبر ان النشنكان الاماى والخلفى معا على خط واحد وان شعاع الرشه على خط اسفلهم عارف فيلم رامبو؟؟ لما كان واقف على السلاح العيار 50 وبيتحرك شمال علشان يضرب اللى ع يمينه ويتحرك يمين علشان يضرب اللى على شماله هكذا النشنكان اعتبر انك عم رامبو والنشنكان الخلفى هو السلاح العملاق ده اتحرك يمين وشمال علشان علشان يبقى النشنكان الخلفى والامامى معا على استقمه فوق خط شعاع الرشه المهم انتو عرفتو كده يمين وشمال واقصى وقت هاتاخده هو بتاع 3 رشات تظبط يمين وشمال وبردو يكون عندك احساس بحركه النشنكان ولو هاتدقق فيه علشان تبقى حاسس بيه وفاهمه تيجى تحط الخشبه بالعرض وبكده احنا هانظبط الفوق والتحت وديه اهم حاجه فى الظبط لاختلاف الاراء على المسافه والضرب والاهداف بس ما علينا هاشبهالكو بالاتى اكنك ماسك عصايه طويله قدامك ومسنوده على حاجه بالعرض فى منتصفها لما تحرك انت العصايه لتحت طرفها الامامى بيطلع لفوق ولما تحركها لفوق طرفها الامامى بينزل لتحت هو كذلك النشنكان الخلفى تخيل المنظر ده واعتبر العصايه ديه هى شعاع بصر النشنكان وتحتيه شعاع بصر الرشه لو الرشه جت فوق يبقى انت وعصايتك باصين تحت الرشايه يبقى تعمل ايه؟؟ تحرك العصايه لتحت علشان تطلع فوق وبكده هاتبقى موازيه لشعاع الرشه وتبدا تظبط واهم شئ وانت ماسك البندقيه بايدك حتى لو انت نفسك عصايه والبندقيه 60 كيلو لازم تكون ماسكها بالكامل مش ساندها طبعا قاعده النشان اخر سن نمله الدبانه تكمل بيه فتحه الشيز وديه كلنا عارفينها وبردو الظبط مش هاياخد منك كتير لان انت بتحس اوى الفوق والتحت بتاعه النشنكان وبكده هاتظبطه بحوالى 5 رشات حلو؟؟ طيب انت ظبط وخرجت تصطاد وبتضرب على هدف اى كانت المسافه ومجتش بص نصيحه منى اضرب بعد الظبط على كذا هدف وكذا حجم على ابعاد مختلفه علشان تفهم نشانك لكن على افتراض انك نسيت ونزلت بص قبل ما تحرك النشنكان حاول مع الهدف اضرب فوقه بمللى واضرب تحتيه بمللى واضرب جنبه بمللى يمين وشمال وشوف هاتلاحظ مثلا ان انت بتنشن ع الصدر وبتيجى فى الرقبه او بتنشن ع الصدر وتيجى فى الجناح ابدا حرك النشنكان 3 تكات فى الاتجاه الصحيح فوق او تحت وجرب تانى هاتلاقى بدات تتظبط بس بشرط يكون الهدف اللى بتضرب عليه فى متوسط المسافات اللى انت متعود تضرب عليها بس نصيحتى انا ليك طالما ظبط النشنكان وجربته كويس وليكن ظبطه على مسافه 15 متر سيبه كما هو ولو هى بتضرب فوق الهدف بمللى اضرب انت تحت الحته المراد ضربها بمللى والعكس صحيح يعنى حاول تتكيف مع النشنكان وما تعصبش نفسك انا شخصيا كنت بضرب موسم كامل يمين الهدف علشان النشنكان الامامى انت مترحل ومش عارف احركه وده خلانى لما اخرج ببندقيه احمد (المارفيك ) وهى بتضرب تحت الهدف بحوالى 10 سم اقدر اجيب بيها طيور لانى اتعودت انى اتكيف مع البندقيه وافهمها وده مهم جدا للصياد وتوطيد علاقته بالبندقيه وبكده انت هاتعرف تضرب مسافات بعيده جدا تقرب من ال100 متر لانك اتعودت تقدير المسافات وتقدير الاهداف نيجى للتصويب ده بحد ذاته حاجه ممتعه جدا مثلا لو تسمع صياد يقولك( انا ضربت اليمامه حسيت انها نزلت عليها سقط وضربتها وهى اصلا ورا السور) وتلاقى صياد تانى يقولك (الرشايه عملت منحنيات فى الجو وعملت لليمامه كده) وتلاقيه بيحرك ايده من تحت لفوق اكن الرشايه عارفه هدفها وبتتبعه ده حقيقه يا جماعه احيانا يبقى هدف واقف على سور ومش باين غير راسه وبيطلعها كل 3 ثوانى مره وتضرب تيجى فى رقبتها او راسها وتوقعلك وانت مستغرب الضربات ديه بتيجى من انك بتحس بالرشه وهى خارجه وبتحس باتجاهها وما تفتكرش ان الكلام ده جنون بالعكس ده مهاره واحترافيه لبعض الصيادين وزى ما قال اخويا استاذ عصام يكون عندك ثقه فى نفسك كذلك لازم تحس باتجاه الرشايه وتمسك البندقيه بمنتهى الرااحه والهدوء لان الصيد مش فيزيا ولا كيميا الصيد احساس بين صياد وبندقيته والطريده ولو فقد ده مش هايعرف يصطاد حاجه نيجى للمفارقات اللى بتحدث اثناء الرحلات احيانا تلاقى يمامه تيجى تقف قدامك وتضربها وتحط الماسوره فى صدرها وما تجيش عااااااااااااادى جدا جدا جداااااااااااااااااااا واحيانا تضرب اليمامه وهى نازله ع الارض وتقفلها او وهى لسه بتطير وهكذا لازم تصدق كل المفارقات ديه حتى لو ضربت ع الطاير زى اخويا استاذ امير سعد لان انت بتوصل لدرجه التشبع بالصيد وببندقيتك اماكن التصويب المهمه::........ 1- الرأس ........ وديه ضربه احترافيه بتخلى اليمامه تنزل تلف وتفرفر ع الارض وساعات بتنزل مروحه على راى بعض الصيادين وضربات الراس مفيده جدا لو هدف عاوزه يوقعلك عندك وهو داخل مبنى 2- الرقبه......... والضربات ديه غالبا بتسرق الطير ونادرا ما تحدث الا مع المحترفين ونتيجتها ان اليمامه بتطير اكنها مقذوف وتقع فى منحنى وتنزل تفرفر بردو وتنزل دمها كله وبنسميها (ضربه الدبح) 3- الحوصله........ وهى ما بين الرقبه والصدر وفى حاله ضرب اليمامه فى المنطقه ديه بتؤدى لشلل كامل لانها بتخترق للحبل الشوكى وكمان بتوقف التنفس فجأه فبتنزل مقفوله ووووووووش وحتى لو اتسرقت هاتقع لانها مش هاتتنفس وفى الضربات ديه بتسمع صوت انفجار للحوصله 4- الصدر (الجزء العلوى) وديه ضربات السرقه فى البنادق العاليه السرعه وضربات القفل فى بنادق متوسطه السرعه والضربه بتيجى فى القلب وتلاقى دم نازل من الصدر ولو اتسرق بتلاقى دم بردو من الظهر 5- الجزء السفلى منه ......... وده مثله مثل الحوصله بيقفل الطير لانه بيدمر القلب وكمان الامعاء وخاصه لو رشه نمره 2 وممكن تسمع صوت انفجار بردو نتيجه لتحطيم ضلوع الصدر 6- اسفل الصدر(البطن) والضربه ديه غالبا بتسرق ومش بتوقع الطير الا على مسافه واحيانا ياخد الرشه ويطير ويقف ويفضل عايش وهاتقع لو ضاربها عمودى لانها بتخترق البطن وتوصل الصدر وحتى الحبل الشوكى فتسبب الشلل 7- الجناحين.......... وديه ضربات مهمه جدااااااااااااااااااااااااااااااااااااا لو يمامه عاوزها توقعلك ناحيه اليمين اضربها فى جناحها اليمين ولو ناحيه الشمال (بالنسبه لليمامه) اضربها فى الجناح الشمال لانها لما بتقع جناحها السليم بيرفرف فبيدفع الهواء عكس اتجاه جسم اليمامه وبالتالى بتقل فى الناحيه المقابله اى ناحيه الجناح المصاب ويفضل فى مصل الجناح مبشره 8- الارجل....... وديه ضربه بتؤدى لوقوع الطير حى مع اختيار الزاويه المناسبه ويشترط انك تضرب مفصل الرجل وليس الرجل نفسها لانها هاتقدر تطير 9- اعلى ظهر الميامه........ والضربه ديه بتؤدى الى الشلل التام لليمامه ولو اتسرقت بتفرفر عمودى وتطير وتقع عمودى 10- منتصف الظهر........ وديه بتؤدى لضربه تسمى (المكوى) اى ان اليمامه اكن الرشه قطر وخبطها وخاصه لو ع الارض بتنام مكانها وتفرش جناحاتها طبعا اسفل الظهر هاتطير ريش الديل وشكرا واستنو موضوع يارب يكون مصور عن اماكن الضرب وازاى تضرب الطير من اى زاويه وانهى مكان تضرب فيه يعنى لو واقف لليمامه بصدرها او واقفلها ناحيه جنبها او من ظهرها واسف ع الاطاله وارجو تكون معلوماتى صحيحه وبردو التجربه العمليه احق واولى سلام عليكم |
رد: طريقتى الخاصه لظبط النشنكان والتصويب
ايوه كده ادينى من المواضيع الجامده ديه
انت ضارب ايه على الفطار انهارده ياحوكا فىه بور عالى كده |
رد: طريقتى الخاصه لظبط النشنكان والتصويب
مالك يا حوكا كفا الله الشر.. استنى شوية ع المواضيع الجامدة يه لتتحسد d: ..هه تحياتى ليك و لمواضيعك الجميـــــلة.
|
رد: طريقتى الخاصه لظبط النشنكان والتصويب
بارك الله فيك حبيب قلبي...الله ينور بك وعليك...بصراحة إسلوب سلس وبسيط ومعلومات دقيقة وهامة جدا وقيمة للغاية من صياد محترف متمرس ومتمكن...نفع الله بك وزادك من علمه...وفي إنتظار المزيد من مواضيعك الشيقة ومعلوماتك القيمة...خالص تحياتي...
|
رد: طريقتى الخاصه لظبط النشنكان والتصويب
الله عليك يا باشا ايه الحلاوة دي عجبتني اوي المعلومة بتاعت تضرب الجناح الشمال عشان تقع شمال دي جامدة جدا ما شاء الله عليك و حلوة اوي برضه المسميات بتاعت الصيد دي زي ضربة الدبح و المكوى بجد ما شاء الله عليك موضوع في الجون يعني و الله ابهرتني
|
رد: طريقتى الخاصه لظبط النشنكان والتصويب
بسم الله ماشاء الله
معلومات قيمة نفعنا الله بها و اياك جزاك الله خيرًا |
رد: طريقتى الخاصه لظبط النشنكان والتصويب
اقتباس:
هههههههههههههههههههه ربنا يخليك يا ابو عادل اقتباس:
اقتباس:
شكرا جزيلا لحضرتك وارجو ان يكون الموضوع قد نال رضاكم اقتباس:
اما اسامى الضربات فالفضل كل الفضل لاخويا وحبيبى احمد روك هو اللى معلمنى الاسامى ديه بس انا كنت بضرب الضربات ديه ومش عارف اساميها وبردو اخدت منه خبره فى الضرب الارضى ربنا يحفظه ويبارك فيه اقتباس:
سلام عليكم |
رد: طريقتى الخاصه لظبط النشنكان والتصويب
يا اداره ارججججججوكم ثبتوا الموضوع الجميل ده
|
رد: طريقتى الخاصه لظبط النشنكان والتصويب
لاء بقى كده كتير اووووووووووووووووووووووووى بجد
انت متأكد انه تمر هندى مصرى بس ولا تكون حاجه تانيه وانت مش واخد بالك يا حوكا تسلم ايدك يا فنان |
رد: طريقتى الخاصه لظبط النشنكان والتصويب
معلومات مفيده جدا تدل على خبره طويله فى عالم الصيد.....تحياتى لك.
|
رد: طريقتى الخاصه لظبط النشنكان والتصويب
اقتباس:
ارجو من الاداره مراجعه المواضيع القديمه وتثبيتها صدقونى احسن واحلى مليووووووووووووووووون مره من كلام سنين وسنييييين ممكن اكتبه اسف يا افندم لو ضايقتك بس ده رايى وشكرا جزيلا لرد حضرتك اقتباس:
ههههههههههههههههههههههه والله نفسى تخرج مع حد من الصيادين اللى بجد صدقنى هاتنسى كلامى وتنسانى وتنسى اسمك حتى الناس ديه مدارس يا ابو عادل مش هواه زيى وزيك ولا زيى انا بس لتزعل منى هههههههههههههههههه سلام عليكم |
رد: طريقتى الخاصه لظبط النشنكان والتصويب
ايوه كده يا حوكا رجعتنا لأيام المواضيع الحلوة تسلم ايدك يا باشا
تحياتى |
رد: طريقتى الخاصه لظبط النشنكان والتصويب
اقتباس:
الا انى بتكلم على شخصك كمان انت انسان كويس وانا كل اللى اقدر اقوله انى فخور انى اتعرفت عليا يا دكتور |
رد: طريقتى الخاصه لظبط النشنكان والتصويب
اقتباس:
اقتباس:
سلام عليكم |
رد: طريقتى الخاصه لظبط النشنكان والتصويب
اقتباس:
بس هاقولك حاجه لما تسال واحد عند بندقيه نادره فى مصر ويقولك كل تفاصيلها وطول ماسورتها بالمللى وحتى عدد حلقات سوستتها الاصليه وكل صاموله فيها يبقى ايه؟؟ بجد بجد انا اللى فخور انى جلست فى يوم او اتكلمت مع ناس زى دول ربنا ما يحرمنا منهم ابدااااااااااااااااااا سلام عليكم |
رد: طريقتى الخاصه لظبط النشنكان والتصويب
اقتباس:
اللهم امين ادعى معايا ياحوكا |
رد: طريقتى الخاصه لظبط النشنكان والتصويب
اخويا الغالى وحبيب قلبى دكتور محمود الله ينور يا جميل على سلسلة المواضيع الرائعه دى اللى بتبين انك صياد محترف مش مجرد هاوى ومشمهم اطلاقاً السن
حبيب قلبى الموضوع دا يستحق تقدير امتياز وتستحق انتا عليه لقب استااااااااااااااااااذ ورئيس قسم بس اسمحلى انى اختلف معاك فى بعض اماكن الضربات الصدر مكان تقفيل فى اليمام اىً كانت البندقيه مكان سرقه فى الحمام (على رأى محمد انور صدر الحمام صدر لاعب كما اجسام ) ضربة الرقبه هى ضربة تقفيل فورى وتسمى بضربة اللويح (لان الطيرهبتنزل تحرك رأسها شمال ويمين بنفس اسلوب ابو اللويح لما بينضرب (ابو اللويح طائر مهاجر يتواجد فى مصر من شهر 8 الى شهر 12 وهو من اصعب واعقد الطيور اللى ممكن تضربها فى حياتك ودا يرجع الى استحالة رؤيته فى بعض الاوقات عمتاً يا حبيب قلبى اهنيك وافتخر فعلاً بوجود صياد ومحترف مثل معاليك بينا انتا مكسب لأى مكان ممكن تكون موجود فيه تقبل مرورى يا دوك |
رد: طريقتى الخاصه لظبط النشنكان والتصويب
والله ياحوكا بحب اقرأ مواضيعك عشان اسلوبك الجميل
جربت تكتب قصص من الادب الساخر صدقني هاتبقي جامدة |
رد: طريقتى الخاصه لظبط النشنكان والتصويب
الله عليك يا باشا ماشاء الله
|
رد: طريقتى الخاصه لظبط النشنكان والتصويب
اقتباس:
كل سنة وانت طيب شكرا |
رد: طريقتى الخاصه لظبط النشنكان والتصويب
اقتباس:
والله مبسوط جدا انك رديت وكمان عدلت ليا معلومه وانا مش محتاج اقول انك الخبره والقدم وانى نفسى تعلمنى كل حاجه تعرفها بالنسبه لابو اللويح فوحياتك معرفش الطائر ده ولا عمرى شوفته وياريت لو كام صوره ليه علشان اعرفه يمكن بشوفه ومعرفش اسمه وفعلا اليمامه بتنزل تحرك رقبتها اكنها بتخرج دمها كله بنفسها حاجه غريبه كده اما بالنسبه لضربه الصدر فاعتذر لو غلطت فيها واعذر اخوك اللى معندوش غير رمسيس والحمد لله وانا والله فخور بردك وكلامك الجميل ده ويارب ما تحرمنا من خبراتك ديه ولا المعلومات المفيده شكرا جزيلا اقتباس:
حبيبى يا محمد والله يا باشا انا اكتبلك موضوع كل يوم بس والله والواحد بيخاف يقول معلومه غلط زى اللى هشام عدلهالى ليتحاسب عليها او حتى تكون معلوماتى مش كامله او ناقصه بس ان شاء الله احاول اكتب ولو حتى عن مواضيع مكتوبه قبل كده بالنسبه للادب الساخر فايدى على كتفك وننزل السوق نضرب بلال فضل وعلاء الاسوانى ونتصدر القايمه ياريس هههههههههههههههههههههه شكرا جزيلاااااا اقتباس:
اقتباس:
شكرا جزيلاا سلام عليكم |
رد: طريقتى الخاصه لظبط النشنكان والتصويب
مش عارف اقولك ايه بس بجد موضوع امتياز مفيهوش كلمه ............. مشكور جدا على اهتمامك بمواضيع الصيد وبس فى الفتره اللى فاتت عشان المنتدى يرجع زى زمان
|
رد: طريقتى الخاصه لظبط النشنكان والتصويب
( الصيد احساس بين صياد وبندقيته والطريده ) هبدا من عند الجمله دى انت صياد بجد رقيق المشاعر محب للصيد
تكرم على هذة المعلومات القيمه والجميله مش لاقى كلام اقوله غير انك هتكون معلم صيادين ودى شرف لهم يادكتور |
رد: طريقتى الخاصه لظبط النشنكان والتصويب
تسلم .... معلومات قيمة ومفيده جدا فى الصيد ..... وجزاك الله خير
|
رد: طريقتى الخاصه لظبط النشنكان والتصويب
طب انا عندي سؤال انا مرة ضربت على حمامة كانت واقفة على سور انا ضربت الطلقة من هنا واليمامة ثبتت متحركتش ولا حركت راسها حتى فجئه لقتها بتميل على قدما شوية لحد لما صدرها بقا على السور وقعدت تنرل خيوط دم كتير وقعد ينزل جامد دي جت في في الحوصلة ولا القلب
ملحوظة الحمامة مش بتاعة حد بعد سؤال كل اهل المنطقة وانا كنت بشوف الحمام معشش في شقق مهجورة كتير وبيخرج وبيدخل كانت مرة حصلت معايا قصة بمناسبة الوضوع ده لو عايزين ابقا احكيهالكوا |
رد: طريقتى الخاصه لظبط النشنكان والتصويب
وحصلت معايا ضربت الدبح دي مع يمامة مكلبظة كده وتقيله
|
رد: طريقتى الخاصه لظبط النشنكان والتصويب
والهيد شوت كتير
مساعات اعلى الظهر وكتير اوي بتيجي في الديل |
رد: طريقتى الخاصه لظبط النشنكان والتصويب
اقتباس:
اقتباس:
ربنا يخليك ويكرمك ومقدرش اكون معلم وسط المعلمين الكبار زى حضرتك وشرف ليا انى اكون شكايرى (اللى بيلم اليمام للى ميعرفش معناها) ليكم بس اخرج فى رحله معاكم شكرا جزيلااااااااااااااااا اقتباس:
شكرا يا افندم اقتباس:
اقتباس:
اقتباس:
بالنسبه للدبح فديه مهاره حضرتك يا افندم لانها من امهر الضربات حتى امهر من ضربات الرأس فيه ضربه انا ضربتها قليل اوى وهى انك تضرب اليمامه من اسفلها ومن ضهرها بس مش ضربه عاديه لانها بتخلى اليمامه تنزل بمنقارها فى الارض وتنزل دم كتير وتحرك راسها لفوق ولتحت وتقريبا ديه بتعمل خط كامل لحد الرقبه من منطقه البطن والله اعلم لانى مش بنضف يمام فمش بشوف جت فين بالظبط سلام عليكم |
رد: طريقتى الخاصه لظبط النشنكان والتصويب
ما شاء الله عليك وعلى معلوماتك وخبراتك .. الموضوع رائع جدا من شخص متوقع منه حاخات زى كده .. .. نفعنا الله بعلمك وإلى المزيد من العطاء ..
|
رد: طريقتى الخاصه لظبط النشنكان والتصويب
انت عارف يا حودة لو اليمامة عرفت بالكلام دة اية الي هتعملة ؟
هتيجي تترجاك وتولك انا اهو اعملي الي انت عاوزة بس اوعي تنفذ فيها الكلام الجااااااااااااااااامد اوي دة ههههههههههههههههههههههههه بس الله ينور عليك يا معلم بجد بجد استاااااااااااااااااااااذ تسلم يا غالي... |
رد: طريقتى الخاصه لظبط النشنكان والتصويب
والله أنا ما في حد حبيبني في المنتدى ده قد حوكه وبدور على مواضيعة ومشاركاته بالملقاط همه دول رجالة إمبابة أنا متربي على فكرة في إمبابة بس دلوقتي ساكن في أكتوبر
|
رد: طريقتى الخاصه لظبط النشنكان والتصويب
اقتباس:
اقتباس:
يا سيدى اليمامه بردو بتعملى اغراءات جامده مش بقدر اقاومها وخاصه منطقه الصدر ببقى هاموت واضربها وياااااااااااه لو جنبى ومش معايا بندقيه ببقى هاين عليا اجرى وراها والله ههههههههههههههههههههه ربنا يخليك وانا تلميذ للاساتذه الكبار ربنا يحفهم لينا ويباركلنا فيهم اقتباس:
وانا والله اقل اخواتى فى المنتدى وهم ما شاء الله مواضيعهم ومشاركاتهم مفيده جداا وخاصه لو فى الصيد واهلا بحضرتك وباهل اكتوبر كلهم فى اى وقت ويشرفنى معرفه حضرتك سلام عليكم |
رد: طريقتى الخاصه لظبط النشنكان والتصويب
هههه انت عارف انا اول يمامة جبتها كانت هيد شوت كانت واقفة هلى الأرض وبصت نحيتي وبيعدين قعدت تنقر في الأرض قمت ضربتها الطلقة والله دخلت من نص راسها اللي فوق ووقفت في اخر رقبتها
|
رد: طريقتى الخاصه لظبط النشنكان والتصويب
........................
|
رد: طريقتى الخاصه لظبط النشنكان والتصويب
تم اخذ رابط الموضوع ووضعة فى موضوع اكاديمة الصيد والرماية بعد اذنك يا حوكا طبعا
http://www.egypthunt.net/showthread.php?t=9427 وتحياتى للجميع |
| الساعة الآن 04:51 PM |
Powered by vBulletin® Copyright ©2000 - 2026, Jelsoft Enterprises Ltd. TranZ By
Almuhajir