تنبيه ...
 

إزيكوا يا جماعة إيه الأخبار ..

أنا بقالي كتير أوي مدخلتش على المنتدى إفتكرته إتقفل و إتضايقت جدا عشان كنت عاوز أتعرف على الناس هنا و أطلع معاهم رحلة صيد ..

أنا كنت إشتريت gamo hunter 1250 وركبتلها scope 3-9x40 وللأسف كنت حروح في قضية أمن دوله بسبب ال scope ده و البندقية إتصادرت مني رغم إن كان معايا واسطة جامدة في الموضوع ..

الصيد بقى مجرد هوايه وهمية بالنسبه ليا لأني خسرت جامد بسبب الموضوع ده ..

حبيت أسلم على أحلى صيادين إيه أخباركم ؟

رد: تنبيه ...
 

شوف كده الرابط ده
http://www.egypthunt.net/showthread.php?t=1153

رد: تنبيه ...
 

ربنا يعوض عليك يا صاحبي والحمد لله جت سليمه
لكن ممكن تحكيلنا ملابسات الموقف علشان ناخد بالنا
يعني مثلآ وقفوك بلاعربيه ولا كنت ماشي في المدينه ولا كنت في الأرياف
كده يعني

رد: تنبيه ...
 

لا حول ولا قوة لإلا بالله ربنا يعوض عليك, بجد حاجة تزعل :(

رد: تنبيه ...
 

ولا ليهمك فداك 100 بندقية امهم ان الموضوع عداا علي خير بس نحن معترفين ان التلسكوب ممنوع جداا وللاسف احنا عارفين

رد: تنبيه ...
 

انا كنت في مزارع في منطقة إسمها شطا في دمياط قرب منطقة غيط النصارى.. كنت انا وي واحد صاحبي بنصطاد على رجلينا معناش عربية .. شوفت حمام في المنطقة فسمينا و بدئنا نصطاد .. مره واحده لقيت اللي قاعد يشتم و يزعق إنتوا بتضربوا الحمام بتاعي يا ولاد كزا كزا كزا ... مع إن المنطقة انا مش شايف فيها أي أبراج حمام او حتى عشش و الحمام اللي أنا بضرب عليه كان بني غامق و بيتهيئلي ده مش بتاع حد ... احاول أفهم فيه مش عاوز يفهم و قاعد يجر في كلام حسيت إنه طمعان في البندقيه و إتلم معاه كزا واحد تبعه زعقت فيهم و قولتلهم ليكوا حاجة تعالوا خدوها في القسم انا ابن كزا كزا كزا.. و يا ريتني ما قلت كدا .. لقيت واحد كبير جاي و عامل فيها زعيم المنطقة و مصر يجي القسم .. روحت مطلع الموبايل مكلم والدي إلحقني أنا كزا كزا كزا ... الحمد لله عائلتنا معروف إسمها كويس في دمياط و لينا جمايل عند ناس كتير و ده اللي خلاني مطمن من موضوع القسم شوية .. طلعنا على قسم بندر دمياط و هناك إظاهر حبايب الراجل ده كانو كتير ووالدي شغال في دمياط الجديدة و على بال ما جالي لاقيتني لابس قضيه حيازة أسلحة محظورة !!!!!!!!!! و الراجل مصر إنه يحولني لمديرية أمن دمياط و مصر يعرف أنا جبت البندقية و ال scope منين حورتله و قلتله انا شاريه من القاهرة مع البندقية من محل كزا كزا كزا اي لبخ .. على ما وصل والدي و عرفنا نتصرف طبعا البندقية كانت متاخده مني و كنت قلقان إن بكده انا ممكن ألبس قضية لمجرد إني بحب الصيد ! .. فين و فين بعدها بي تلات ساعات تقريبا والدي جالي هو وي واحد معرفة قالي خلاص الموضوع خلص و متقلقش إحنا كزا كزا كزا .. قلتله دول أخدو مني البندقية انا عايزها قبل ما أمشي .. والدي زعق فيا قدام الناس و قالي مش كفاية اللي حصل إنتا كزا كزا كزا ... و حسيت إني عيل و إتحرجت فقفلت على الموضوع و قلت الحمد لله ..

كل ده مش مهم .. نيجي للي عرفته إنه في محضر القسم ..

إنه في تمام كزا كزا كزا تقدم فلان فلاني رقم بطاقه كزا كزا كزا بشكوي ضد فلان الفلاني (أنا) رقم بطاقه كزا كزا كزا .. ملخص المحضر انا كنت بضرب في الناس و كسرتلهم إزاز بيتهم و حسبي الله و نعم الوكيل !! ولا و أكتر من كده قال إيه إن أنا أصلا إعترفت بالحاجات دي و كانوا حيمضوني عليها !!!!!!

الحمد لله على كل شئ .. إن لله و إنا إليه راجعون ..

رد: تنبيه ...
 

يا ريتني شوفته بدري ... شكرا على اللينك


الحمد لله و إن شاء الله تتعوض..

أنا مش فاهم ليه .. هو إحنا كدا لازم يموتوا الهوايه دي عشان يرتاحوا ..

رد: تنبيه ...
 

على فكره ياباشا البندقيه اللى خدها ظابط فى القسم ربنا ينتقم منهم اللى بيستحل فلوس الناس

رد: تنبيه ...
 

حمد الله على السلامة رجوعك للمنتدى
وهارد لك فى المنظار

رد: تنبيه ...
 

ما هو لو والدي كان إتصرفلي ساعتها كانت ممكن ترجع .. لكن اللي حصل حصل الحمد لله على كل شئ .. الموضوع بقاله فوق ال 3 شهور..

الواحد لحد دلوقتي حابب الموضوع وانا بحب السكوبات جدا بس النصيب بقى ..

رد: تنبيه ...
 

شكرا ليك يا أستاذ ابو الشوق

رد: تنبيه ...
 

ولا يهمك يا بطل الحمد للة انها جت علي كدا لان السكوب ممنوع استخدامة نهائيا

رد: تنبيه ...
 

معلش . هو النصيب برضه
والحمدلله إن الموضوع ماكبرش مع الناس
كان ممكن يبقى أوحش من كده

ولا يهمك وإن شاء الله تجيب أحسن منهم

رد: تنبيه ...
 

معلهش وربنا يعوض عليك
وشكراا جزيلا على التنبيه والنصيحه

رد: تنبيه ...
 

متشكر جدا يا جماعة كلامكم بيخليني أحب أرجع للهوايه دي أكتر عشان أتعرف عليكم..

رد: تنبيه ...
 

يعنى يا جماع هى البنادق ممنوعه برضو ولا ايه ولا التلسكوب الى ممنوع انتم قلقتونى كده والله

رد: تنبيه ...
 

التلسكوب هو الي ممنوع بس

رد: تنبيه ...
 

بجد ربنا يعوض عليك يمكن ربنا اختارلك كده لأنه كان يريد لك خير منها واوعي تزعل ده قدر ربنا كتبهولك ويمكن ده كان شي بسيط انه ضيعلك بندقيتك قساد شر كبير اتشال من عليك ويبدو انك انسان محترم جدا لأن في كلامك ذكرت (الحمد لله )كتير وده شئ جميل وان شأء الله تكون اول خروجة صيد معايا ببندقيتك الجديده ((تفاااااائل))
(رسولك صلي الله عليه وسلم كان يحب التفائل)

رد: تنبيه ...
 

الحمد لله الذى لايحمد على مكروه سواه
( وعسى ان تكرهوا شئ" وهو خيراا لكم )

رد: تنبيه ...
 

والله بجد يعنى الواحد مش عارف يقول ايه امام روح الاخوه العظيمه دى ما شاء الله الله يدوم الخير بين الاخوه
والله يعوض عليك اخى فى بندقيتك وسكوبك بس البندقيه الى جايه مش عايزين فى سكوباااات بقا

رد: تنبيه ...
 

يا جماعه أرجوكم فهمونى هو مش احنا اتكلمنا فى الموضوع ده قبل كدا و ادى نص القانون
"... ولا يجوز بأى حال الترخيص فى الأ سلحة المبينة فى القسم الثانى من الجدول رقم 3 وكاتمات أو مخفضات الصوت والتلسكوبات التى تركب على الاسلحة النارية"

و اللى انا اقصده: التلسكوبات التى تركب على الاسلحة النارية معنى كدا ان التلسكوبات التى تركب على الاسلحه الغير ناريه زى بنادق ضغط الهواء مش ممنوعه و ان الحادثتين اللى حصلوا مع الاخوه الافاضل قبل كدا واضح جداً ان واحده فيهم تلفيق تهمه زى ما هو قال والتانيه كانوا اكيد مش فاهمين او تحدى اعمى زى مهو باين من وصف القصه وارجوكم لو فى حد محامى مثلاً او يعرف يجبلنا خبر يقين فى الموضوع ده ميترددش عشان انا اصلاً بنزل اصطاد بديانا 54 بمنظار 3-9*40 و فى المعادى و المقطم و حتت وسط المدينه يعنى و فيها حراسه اصلاً شديده فى بعض الأحيان فلو كدا يعنى ابقى فاهم ان اللى بعمله ده اصلا ممنوع :)
و شكراً لسعه صدركم و على العموم انا هنزل الكلام ده فى موضوع جديد بردو عشان كل الناس تقراه ان شاء الله :)

رد: تنبيه ...
 

يا جدعان انا بصطاد بتليسكوب و محدش بيؤل حاجة ليه ؟؟؟؟؟؟؟؟؟؟؟؟؟
وانا عندي 16 سنه

رد: تنبيه ...
 

رد: تنبيه ...
 

رد: تنبيه ...
 

السلام: يااخي كلامك يسد النفس ...كنا نتصور مصر افضل الدول العربيه بالحريه!!!!
احنا بالعراق ماعندنا هيك حتى بالسابق التلسكوب يباع علني مع البنادق الهوائيه
الله المعين