قرار نهائي لا نقاش فيه
 

:(بصوا ياجماعه انا في الاول ماكنتش اعرف المنتدي ده وكان نفسي يكون في منتدي يتكلم عن الصيد في مصر غير المنتديات العربيه التانيه زي مكشات والصياده والمنتديات التانيه في يوم من الايام كنت بكلم العضو ميزو هنتر لاني اعرفه من زمان لقيته بيقولي ادخل علي منتدي الصيد في مصر ده منتدي كله مصريين وهتلاقي فيه كل حاجه عاوز تعرفها فرحت جدا ودخلت بس لقيت انه مافيهوش الخبره الموجود في مكشات لاني عضو قديم في مكشات بس كنت في قمه قمه قمه السعاده ان اللي بكلمهم مصريين زيي وماحتطش في دماغي حكايه انه منتدي صغير ولا حاجه وكنت فرحان جدا جدا ان اللي فيه زيي بيتكلمو زيي مافيش مصطلحات صعبه مش قادر افهمها وكده حاسس كأني في بيتي لاني كنت اما ادخل مكشات مكانش فيه مصريين فيه غيري انا والاستاذ صقار مصر الكبير الاستاذ رامي السيد . من كام يوم ببحث انا و اخويا الكبير واستاذ في الاكاديميه احمد الشيخ هو اتخرج من الاكاديميه وحاليا ظابط تاني علي السفيه العملاقه اوشن ليدي كنا بنبحث في منتدي عن تصنيع البواخر والسفن ناقله البترول بالصدفه لقينا اعلان وكاله سفريات في موريتانيا بتعلن عن وجود رحلات صيد في السنغال فالاستاذ احمد الشيخ اتصل بيهم وقالهم انه عاوز يعمل رحله كلها مصريين اتفق معاهم ان يجبلهم 20 فلاد ويعملو 4 مجموعات المجموعه مكونه من 5 افراد مقابل انه له نسبه اي عموله ف اداني الاعلان وقالي قول لاصحابك كلهم انا قولت للعضو ميدو لانه صاحبي من زمان حتي عملتله تخفيض حوالي 300 دولار لاني اعرفه من زمان وقولتله انا هحطه علي المنتدي قالي ماشي جيت انا حطيته علي المنتدي امبارح وحطيت ايميلي ورقم تليفوني ورقم تليفون الاستاذ احمد الشيخ وحخطيت الموضوع في منتدي مكشات وكتبت انه للمصريين فقط مع ذلك الناس ردت بكل ادب واحترام جيت حوالي الساعه واحده ادخل اشوف الاعضاء هنا رديت قالت ايه اتفاجيئت ان الموضوع اتمسح ايه السر انا مش عارف لحد دلوقت علشان انا كده هطبق كلام والدي كان في يوم قالي لو وجودك في مكان غير مرغوب فيه انسحب منه بسرعه علشان كده انا هنسحب من المنتدي وبرده كلكم اخواتي وحبايبي وانا آسف لكل اللي غلط فيهم
ابنكم واخوكم الصغير عبدالرحمن

رد: قرار نهائي لا نقاش فيه
 

اعتبروا ان دي اخر مشاركه ليا هنا

رد: قرار نهائي لا نقاش فيه
 

اخ عبد الرحمن انتا اخ صغير لينا بس المنتدى له قوانين يجب علينا جميعاً ان نحترمها ونطبقها وبجد مش حتلقى الود والاحترام والاخوه اللى موجوده فى المنتدى هنا فى اى مكان تانى انا مبقلكش كده علشان حاجه انا من اصغر الاعضاء هنا علم وسن وكفاءة وبجد حسيت انى بين خواتى فانتا ممكن قبل الانسحاب الصامت ده تسال كبار الاعضاء زى جلال بك اوالمهندس طلعت او اى حد من استذتنا ممكن الموضوع يكون فيه لبس

رد: قرار نهائي لا نقاش فيه
 

يا عبد الرحمن دى مشكلة مع ادارة المنتدى لادخل لاى عضو فيها . وانا من اول الاعضاء الى بطلب منك عدم الانسحاب و جودك يزيدنا شرف

رد: قرار نهائي لا نقاش فيه
 

لاخ العزيز عبد الرحمن
خلينا نتكلم بموضوعية اولا: الموضوع مش بتاعك الموضوع كان بتاع عضو وانت رديت علية يعني انت مشارك
ثانيا : مافيش سر ولا حاجة انا شخصيا طالبت من ادارة المنتدي ان تشيل الموضوع كلة لان في ناس كلمتني وقالت ان الموضوع مالوش دعوة بالمنتدي وفي ناس قالت انها سادية وناس تالتة قالت الموضوع عادي رابعا : هل انت شايف ان اسلوب الرد بين الاعضاء كان مناسب ياراجل انت بتقول انك بتدخل علي منتديات عربية شفت فيها الكلام دة وبعدبن لما الناس تشوف احنا بتتعامل مع بعض بالاسلوب الي اتكتب بة الموضوع ها تستهين بينا خامسا ودا الاهم لما تزعل وتقول انك مش داخل المنتدي تاني علشان انت زعلت امال لما تشتغل وتحتك بالناس وتتعرض للنقد ها تسيب الشغل وتمشي لا ياعبد الرحمن لازم تكون اعقل من كدا انت ان شاء الله لما تتخرج ها تكون قبطان وارواح الناس امانة في ايدك لما تزعل منهم ها ترميهم البحر انا مستني منك مشاركة فعالة

رد: قرار نهائي لا نقاش فيه
 

السلام عليكم

يا جماعه الموضوع مش موضوع الفار

الموضوع موضوع الرحله اللي حطها الاستاذ عبد الرحمن وجه يشوف الموضوع لقاه ممسوح

ومن غير ما يعرف السبب

وموضوع الفار خلاص خلصنا منه يعني مفيش مشاكل بين الاعضاء ولا حاجه

رد: قرار نهائي لا نقاش فيه
 

مش اول مرة من الادارة

رد: قرار نهائي لا نقاش فيه
 

استاز عبدالرحمن انتا اخ عزيز علينا كلنا ومش حاجة بسيطة زى دى تخليك تنسحب كدة فين روح الصياد ياوحش الموجهة والتحدى مستنين مشاركاتك الفعالة ان شاء اللة

رد: قرار نهائي لا نقاش فيه
 

لو سمحت انا شخصيا عايز اعرف المشاركة الي بيتكلم عليها عبد الرحمن هي موضوع الرحلة ولو هو موضوع الرحلة يبقا في خطأ لان المنتدي دة في قسم خاص بالرحلات ودة معناة ان الادارة بتاعت المنتدي بتقيد الاعضاء الي عايزين يساعدوا الهواة في اشباع هوايتهم ولو سمحت ان مصصم اعرف
لية موضوع الرحلة اتلغي بغض النظر عن عبد الرحمن او احمد او جلال او اي عضو .