مشكله غريبه (محتاج رأي محامى)
 

مشكله غريبه بتحصل كل فين وفين محتاج فيها رأيكم ورأى محامى يعرفني موقفى القانوني


من شهر تقريبا قررننا نأجر البيت بتاعنا وناخد شقه ايجار فى وسط البلد كلمنا السمسار وشافلنا شقه وروحنا اتفرجنا عليه وعجبتنا ودفعنا تأمين 3 الاف جنيه والف جنيه ايجاار وكتبنا العقد 4 سنوات وكل حاجه تمام __ بس ما اخدناش مفتاح الشقه عشان كان فيها عفش لانها كانت بتتأجر مفروش لطلبه _ وروحنا كتبنا عقد ايجار للبيت بتاعنا _ وكان ميعاد استلام مفتاح الشقه اول امبارح عشان ننقل حاجتنا فوجئنا بتلفون من صاحبه الشقه بتقولنا انا اسفه ابني راجع كمان شهرين من كندا وعاوز الشقه _ قلنالها احنا أجرنا البيت والمفروض اننا هننقل حاجتنا عشان فى ناس جايه تستلم البيت __ قالت تعالى خد الفلوس انا معنديش شقق للأيجار __ قلتلها احنا ملتزمين بعقد وانا عاوز المفتاح __قالت مفيش مفاتيح __ قلتلها يبقي انا هاجى افتح الشقه وهقعد فيها لانى مش هاخد العفش واقعد بيه فى الشارع وانا كاتب عقد الشقه __ ردت عليا وقالت لى العقد اللى معاك مالوش اى لزمه لان بنتها الدكتوره هيا اللي مضت على العقد والشقه بأسم ابنها اللى فى كندا __ روحت اتكلمت مع بنتها الدكتوره اللى كاتبه العقد معانا بكل احترام عاوز المفتاح عشان ما تحصلش لحضرتك مشكله لانك مضيتي على العقد بصفه المالك __ قالتلى هرد عليك النهارده بليل وبأذن الله تتحل _ تانى يوم يجي تلفون لوالدي من القسم ان فى محضر الدكتوره عملته فراح القسم شاف المحضر لقي الدكتوره عامله محضر اثبات حاله اننا ما استلامناش الشقه وان هيا مضت معانا عقد وحصل خلاف بين الورثه واننا بنطلب منها 5000 جنيه غير فلوسنا علشان نسيب الشقه ودا طبعا محصلش ف دلوقتى ايييه الحل ؟؟؟؟؟؟؟

رد: مشكله غريبه (محتاج رأي محامى)
 

حضرتك الافضل تميل لحل الموضوع ودي والحصول علي فلوسك علي داير مليم والبحث عن سكن إيجار اخر.

في حالة رفض التسوية الودية، تتوجه للقسم التابع له وتحرير محضر نصب تتهم فيه السيدة الموقعة علي العقد معك بالنصب عليك من خلال ايهامك بتحقيق مكسب وهمي وعبر خلال إتخاذ مظهر خادع علي انها مالك العقار وقامت بالتوقيع معك علي عقد إيجار شقة ثم استولت منك علي الاموال ورفضت تسليمك الشقة واصطنعت لنفسها دليل غير حقيقي من خلال تحرير محاضر وهمية ضدك...وحتتهما في محضر تاني بالبلاغ الكاذب والكيدي والتزوير في اوراق رسمية من خلال إختلاق وقائع غير حقيقية...وسيتم إحالة المحضرين للنيابة للتحقيق وهناك قدم مستنداتك والايصال الذي تم به إستلام المبالغ...وخد معاك شهود الواقعة واكيد محامي شاطر.

ابتعد عن فكرة كسر الشقة دي تماما لانها تعد من قبيل اغتصاب الحيازة ومشاكلها كتير...وانت اللي حتروح في داهية في الحالة دي وممكن تقول كان فيه جوه كنوز سليمان اللي اتسرقت..

واخيراً حضرتك حترفع قضية دعوي اخري مدني تعويض إستناداً إلي نص العقد اللي معاك نسخته تطلب فيه الفسخ والتعويض عن الضرر...ده لو رفض الشق المدني في دعواك الجنائية لو النيابة اتقت ربنا واشتغلت..

الموضوع حباله طويلة والنيابة جايز تحفظ المحضر (عشان بيكبروا دماغهم) فلازم يكون معاك من الاول محامي شاطر بيجري ورا المحاضر والقضايا..وفي النهاية حتدفع فلوس الايجار للمحامي....

رد: مشكله غريبه (محتاج رأي محامى)
 

ادى الشهادات بلاوى الزمن جتهم القرف ناس معندهاش اخلاق ياعم خد فلوسك وشوف شقة تانية تتوسم فى ناس محترمين تتعامل معاهم واجل تسليم البيت كام يوم ماطارتش الدنيا وتجنب القواضى ما استطعت دة قضايا مدنية يابا يعنى يعنى بتاخد حكم بعد من خمس سنين وانت طالع

رد: مشكله غريبه (محتاج رأي محامى)
 

شكرا لمتابعه حضرتك بس فى مشكله تانيه العقد بتاع الشقه مفيهوش شرط جزائي انما عقد ايجار البيت انكتب فيها شرط جزائي 2000 جنيه عند فسخ العقد فكدا هتبقي خساره لينا ولم تفلح جميع الحلول الوديه __ وممكن اعرف ايه فايده المحضر اللى الدكتوره عملته ؟ مع العلم انها معاها شاهد فى المحضر (سمسار واخد قرشين ) ؟؟

رد: مشكله غريبه (محتاج رأي محامى)
 

فعلا انا من ناحيه تانيه بشوف شقه بس مش سهل ان الواحد يلاقى شقه هيستقر فيها وتعجبه فى الفتره القصيره دي وفى ناس المفروض هتستلم البيت فى اول الشهر يعني كمان يومين

رد: مشكله غريبه (محتاج رأي محامى)
 

حسبي الله ونعم الوكيل

بس يا باشا هوا ينفع الواحد يأجر شقة ويمضي ويدفع من غير ما يشوف عقد ملكيتها ؟؟ دي غلطه من عند حضرتك

وتقبل مرورى

رد: مشكله غريبه (محتاج رأي محامى)
 

طبعاا غلطه __ لكن حضرتك ما تتصورش الدكتوره اللى كانت بتتعامل معانا فى كتابه العقد كانت فى قمه الاحترام ولما سألناها الشقه بأسم مين قالت بأسمي وبدون تخوين صدقنا وبعدها الوش التاني يظهر على طول وتبان على حقيقتها ( فعلا مبقاش فيه اماان ودي غلطه تحسب علينا )

رد: مشكله غريبه (محتاج رأي محامى)
 

الغلط على الناس الواطيه بس يا استاذ موش على حضرتك .. سيبك من ان موقفك القانونى صح او غلط دى اشياء دنيويه .. خلينا فى موقفك الاخلاقى وموقفهم اللى هايدخلهم جهنم باذن الله

رد: مشكله غريبه (محتاج رأي محامى)
 

شكرا على متابعه حضرتك

رد: مشكله غريبه (محتاج رأي محامى)
 

نصيحة اشترى ak - 47 و فرغ الخزنة فيها
بهزر على فكرة و إن شاء الله تتحل

رد: مشكله غريبه (محتاج رأي محامى)
 

شكرا على المشاركه

رد: مشكله غريبه (محتاج رأي محامى)
 

ا/ عصام أنت ربنا بيحبك
تخيل حضرتك بعد ما سكنت وحدث لك هذا اللبط والكذب والإفتراء
أنت الكسبان بأنك لم تسكن عند ناس الضمير عندهم واخد أجازه
من فضلك بسرعه إستأذن من الناس الذين أجرت لهم بأن يصبروا عليك بعض الوقت لترتب أمورك
وإحذر التهور فمن الواضح أنك ليس لك فى أمور ( البلطجه)
وربنا يوفقك

رد: مشكله غريبه (محتاج رأي محامى)
 

شكرا على النصيحه

رد: مشكله غريبه (محتاج رأي محامى)
 

رد: مشكله غريبه (محتاج رأي محامى)
 

شكرا على النصيحه وربنا يسهل وتتحل