الصيد فى مصر - يمام بالبطاطس من صيد يوم الجمعة 13-8-2010

الصيد فى مصر (http://www.egyhunt.net/index.php)

- صور وفيديو الصيد ورحلاته (http://www.egyhunt.net/forumdisplay.php?f=47)

- - يمام بالبطاطس من صيد يوم الجمعة 13-8-2010 (http://www.egyhunt.net/showthread.php?t=2930)

يمام بالبطاطس من صيد يوم الجمعة 13-8-2010

يوم الجمعه لما محمود خلا بيا ههههههههههههههه وراحت عليه نومة قلت والله منا ساكت رحت طلعت يوم الجمعه الساعة 2 ونص الضهر بعد الصلاة وكانت الحصيلة 5 يمامات من ضمنهم وحدة ملقتهاش ... المهم رحت نزلت عند ألماظة وعند اقرب فرارجي قلتلو نضفلي اليمام ده .... المهم النهرده طلعتو وقلت للمدام تعملهولي على الفطار ..... بس اوعا وشك والله كنت هاكل صوبعي وراه واليكم المقادير ومن ثم الصور....
1- عدد 4 يمامات
2- عدد اتنين بصلة مبشروين لزوم التتبيلة
3- عدد واحد بطاطساية مقطعة حلقات لا تخينة ولا رفيعة
4- عدد 2 حبات طماطم مضروبين في الخلاط لزوم الدهان على اليمام
5- 3 ملاعق صغيرة فلفل أسود
6- عدد 3 ليمونات لزوم العصر على التتبيلة واليمام
7- ملعقة ونص ملح لزوم التتبيلة
8- ملعقتين خل ابيض

الخطوات : يوضع البصل المشور وعليه الفلفل الأسود وعليه الملح وعليه الخل ويقلبو في الصينية اللي هتحطوا فيها اليمام بشكل جيد .. ومن ثم تقطع البطاطساية الى حلقات وتوضع في الصينية وتقلب مع التتبيلة .. يوضع ايمام وتقلب عيه التتبيلة ويبقا كلو عايم في كلو ويا سلام لو اتحشت اليمامة من دول بالتتبيلة اللي معمولة ...

يدهن اليمام بالطماطم المضروبة في الخلاط وكزا كل الصينية يعني بالعربي ادلقو عصير الطماطم اللي انضرب في الخلاط
يوضع اليمام على النار على اي عين ويفضل العين المتوسطة في البوتاجاز لمدة 20 دقيقة
علشان ينزل ميته ويشربها تاني ملاحظة مهمة : انا لم اضع زيت خالص او سمن اعتمدت على انو هينزل ميتو ويشربها تاني ..

بعد ما تلاحظو ان المية بتاعتو قربت تنشف حطو كوباية ميه يدوبك يبقا الميه قبل حافة الصينية بي 3 سم يعني يكون اليمام مش متغطي كلو ..

المهم نسيب اليمام يغلي تاني في ميتو وبعدين بعد ما ياخد غلوتين في المية نقوم مغطيينو ونوطي عليه وكل شويه نشوف لو ميتو قلت نزود ميه شويه المهم بعد كده اول لما تستوي اليمامات الحلوات ... نروح نحطهم في الفرن علشان يخدو وش تشويحة ويحمرو وبعد كده بالهنا والشفا وجنبيهم شويت رز بالشعرية وكوباية قمر الدين ..........
دي اول صورة قبل دهن عصير الطماطم عليها
http://www2.0zz0.com/2010/08/15/22/496463924.jpg

ودي الصورة التانية اللي بشاور فيها بصباعي على مكان اختراق الرشة لليمامة هههههه
http://www2.0zz0.com/2010/08/15/22/340855753.jpg

ودي آخر صورة لصنية البطاطس باليمام بس محطتش الصورة الاخيرة لني بصراحة نسيت اصورها وهيا مستوية لأني انتو عارفين الجوع كافر ومع اول كلمة الله اكبر للمؤذن الواحد كان واكلو يمامتين
http://up.arab-x.com/Aug10/hyE11552.jpg