الصيد فى مصر - تخلص من فضلات الطعام وخدلك أجر وثواب

السلام عليكم الأعضاء المحترمين
هشرحلكم طريقه معرفش حد أثار الموضوع ده فى المنتدى الرائع ولا لأ
أغلبنا بيتخلص من بقايا الأكل عن طريق رميها فى الزباله وكدا مفيش حد بيستفاد منها وبتبهدل الناس اللى بتشيل الزباله وبتعمل ريحه مش كويسه فى شوارعنا وبتضر بيئتنا
بالنسبه لبقايا الطعام إللى من الممكن إن حد غيرنا ممكن ياكلها وتصلح للإستخدام الآدمى يريت الكل يعمل صندوق كرتون او شنطه بلاستيك يحطها أويعلقها تحت بيته ويكتب عليها اكل صالح للاستخدام الآدمى .فأى حد غلبان او محتاج معدى ممكن يستفيد منها

أما بالنسبه لفضلات الأكل الغير صالحه للإنسان فيريت ممكن كل حد يعلق فى حديد البلكونه او فوق التكييفات علب بلاستيك ويحط فيها بواقى العيش بعد طبعا مينقعها فى مايه أو بواقى الرز والمكرونه للعصافير وكمان يحط بجانب علبة الاكل علبة زبادى او ايس كريم فاضيه او طبق مش محتاجه ويحط فيه مايه تشرب منه العصافير

كذلك الأمر تقدر تتخلص من بواقى السمك والفراخ لتستفيد بيها قطط الشارع .تحط علبتين بلاستيك او طبقين فلين تحت بيتك واحده للمايه وواحده للأكل لتستفيد منها القطط فى الشارع

بكدا انت تخلصت من بقايا أكلك بطريق متضرش البيئه ومن ناحيه تانيه أخدت أجر وثواب
وحط فى دماغك إن اللى انت بتعمله ده مش عشان الاجر بس لا دى مخلوقات على الأرض ليها حق عليها زيها زينا خلقها ربنا زيك

آسف على الإطاله ويريت أكون قدرت اشرح لحضراتكم بطريقه مفهومه
تحياتى للجميع
(إرحمو من فى الأرض يرحمكم من فى السماء)