الصيد فى مصر - محل السجلابي في الجيزه

انا مش عايز اقول نصبين بس مش لاقي كلمه تانيه الصراحه
كانت اول معامله ليا معاهم وشكلها هتبقي اخر مره
خير الله ما اجعله خير كنت داخل اكلم الراجل كده علي مشكله في المسدس
ان الابره بتتحشر يعني بس في الاخر طلعت عايزه نضافه بس مش اكتر المهم
اول ما دخلت لقيت واحد اعد كده ومحطوط اودامو مسدس فالترو 92 وشكلو المسدس اديم كده مش جديد يعني فا انا قلت ده بيسأل الراجل علي حاجا فيه اكيد
ثانيتين كده بالظبط وفهمت ان الراجل كان بيشتري علشان شكلو مكنش فاهم حاجا و الي واقف في المحل اعد يفهمو ولسه بيشد الاجزاء راحت الطلقه محشوره بين الخزنه وبيت النار
راح بكل بساطه سايب المسدس ودخل جبلو مسدس تاني من جوه ونفس الكلام شكلو اديم و الكلام شبه ممسوح كده يعني فا علم الزبون كل حاجا و ادالو المسدس يجرب بقي جه الزبون يشد الاجزاء راحت الطلقه محشوره بردو بين الخزنه وبيت النار
فا الزبون بيقولو ايه ده
راح الراجل قلو انت سحبت غلط متسحبش براحه اسحب مره وحده وطلع الرصاصه وادالو يجرب تاني والزبون جرب وضرب وقلو تمام خلاص
فا الراجل المحترم الي واقف خد المسدس من الزبون وحطهولو في جراب وفي الشنطه و معاه علبه طلق
وفجأة بقي الزبون ربنا يعوض عليه بقي طلع 1550 جنيه اداهم للراجل وخد المسدس ومشي وطبعا انا كنت هتجنن
مسدس فالترو 92 التجار المحترمين هنا بيبعوه ب 700 جنيه و 750
والراجل الغلبان خد مسدس اديم باين عليه اوي انو مستعمل او الله اعلم يعني
خدو من غير علبه ولا فرشه ولا وزيت
مجرد مسدس محطوط في جراب ومعاه علبه طلق
يعني لو افتردنا ان المسدس 700 جنيه
و الجراب ب 50 مثلا
و علبه طلق ب 150
يعني كلو حوالي 900 جنيه
والراجل اتنصب عليه في 650 جنيه
انا ندمان اني متكلمتش سعتها والله بس قلت لو قلت حاجا اكيد انا وصاحب المحل هنمسك في بعض
مش هقول غير حسبي الله ونعم وكيل
انا طبعا مكنش ليا نفس اتكلم مع الراجل
اديتو المسدس يشوفو فا وهو في ايدو بقول بكام البارون ده عندك قلي ب 1300 فا بقولو الطباعه ب 1300 قلي اه قلتلو مش كتير قلي لا
قلتلو طب تدي للي في ايدك ده كام قلي اديلو في سنانو
ههههههههههه
انا ضحكت وكنت عايز اولع فيه والله علشان خنقني
بس ده الي حصل معايا في اول معامله ليا معاهم فا لو انتو مكاني هتعملو ايه بقي
وصحيح قبل ما انسي الراجل قلي ده ابره ضرب النار مكسوره وعايزه تتغير فا بقولو انا فكتها وشفتها لقتها سليمه
فا قلي يا عم متحسسنيش انك داخل محل فكهاني انا فاهم شغلي قلتلو طيب يا عم فا دخل جاب ابره تانيه وركبها و بيجرب يضرب راحت محشوره بردو
ههههههههههه
فا قلي لا ده عيب في المسدس سبهولي وتعالي خدو بليل
قلتلو طب ركب السوسته يا حج وخدت الطبنجه ومشيت
واول ما روحت اعدت ارش اسبراي كتير علي الابره كده وانضف فيها لقتها بقت كويسه ومبتتحشرش خلاص
يعني كان ممكن ينصب عليا انا كمان والحمد لله ربنا ستر
وحسبي الله ونعم والوكيل تاني