الصيد فى مصر - قواعد ركوب (الميكروباص)

قواعد ركوب (الميكروباص)
1-متركبش ورا السواق عشان هتلبس في لم الاجره.
2-السواق مش هيوطي الكاسيت .. اجل مكالماتك لحد ما تنزل.
3-متوقفش قبل ملف علشان لو المشروع وقفلك الناس اللي وراه مش هتسيبه في حاله عشان قافل عليهم الطريق.
4-الاربعه اللي على الكنبه الواحده لازم يقعدوا بالشكل ده
5-جهز اجرتك من قبل ما تركب.
6-سيجاره السواق دي من المقدسات .. ماينفعش تقوله يطفيها.
7-ابقى قوله على المكان اللي انت نازله قبلها بشارعين على الاقل.
8-وافق السواق في اي موضوع هو بيتكلم فيه عشان متدخلش في حوارات مالهاش لازمه .. السواق دايماً على حق ودايماً بيقول على نفسه مثقف ومتعلم وإن دي المفروض متكونش شغلته.
9-الكرسي اللي جنب السواق ده للمزز بس .. ماتفكرش تركب فيه عشان تبقى ضيف لطيف.
10-ذوق سواق المشروع في اختيار الاغاني و الدباديب اللي في العربيه دي حاجه مبنيه على جرح قديم و مش قادر ينساه و مش موضوع للمناقشه.
11-عينك على جيبك طول الرحله تجنباً للسرقات.
12-ربطات الحجاب العجيبه بتاعه البنات ممكن تضايقك و انت قاعد .. حاول تجنبها بهدوء.
13-لازم يكون معاك كمامه صغيره .. هتشكرني بعدين على الفكره دي.
14-دايماً هتلاقي واحد بيفاصل في الاجره مع السواق .. ده وحش سيبك منه.
15-المكتوب على ضهر المشروع دي حكمه مش حاجه بتضحك.
16-صور الطفل المحطوطة اللي هتلاقيها ده غالباً ابن السواق او ابن اخته.
17-اللي نازل الاول بيركب بره.
18-انت متحرش في نظر اي بنت حتى لو شيخ بعمه .. خليك عينك على جيبك زي ما قولنا عشان في بنات ما بتصدق يلاقوا حد بيبصلهم.
19-في المشروع انت مسير مش مخير.
20-كونك انك تمد ايدك للمشروع اللي جنبك عشان تجيب منه فكة للسواق ده واجبك و انت مش بتخاطر بحياتك ولا حاجه.
21-متفكرش تبتسم .. انت في مشروع و مفيش اي حاجه تدعو للابتسام.
22-متطلعش موبايلك جوه المشروع عشان بيبقى ملكيه عامه و بيبقى على الاقل 4 مركزين في ال News Feed بتاعه فيسبوكك مش انت لوحدك.
23-في بني آدمين كده المشروع بيدوس عليهم و هو ماشي .. مالناش دعوه.
24-الكلاكس بتاع السواق ده مش لتنبيه السواقين اللي حواليه .. ده بيشتم بيه الناس في الشارع والسواقين اللي جنبه.
25-المشروع مش بتاع حارات .. بتاع غرز.
26-كوبايه الشاي الفاضيه جنب السواق دي تقريباً المشروع بينزل بيها .. زي برضه الراجل التخين ابو شنب اللي دايماً تلاقيه جنب الازاز و على رقبته فتافيت مناديل.
27-لو قاعد جنب الباب هتلبس في فتحه و قفله لباقي الركاب اللي داخلين و خارجين.
28-قواعد المرور بالنسبه للسواق دي مجرد ارشادات و تسقط منها صفة الالزاميه.
29-لو لقيت السواق مشغل اغاني اجنبي اعرف انك مخطوف.
30-و اخيراً .. السواق مش بيقف .. المشروع بيفضل ماشي و لما سيادتك تيجي تنزل بيهدي بس .. و انت و لياقتك بقي