الصيد فى مصر - رمسيس نمره 1

الصيد فى مصر (http://www.egyhunt.net/index.php)

- الورشة (http://www.egyhunt.net/forumdisplay.php?f=63)

- - رمسيس نمره 1 (http://www.egyhunt.net/showthread.php?t=5127)

soteer

11-02-25 03:09 AM

رمسيس نمره 1

انا بصراحه اعتبر مبتدئ في الموضوع
انا عندي بندقيه رمسيس نمره 1
بقالها حوالي 20 سنه بس لم تستخدم -البندقيه دي كانت جايه وانا في ابتدائي ومضربتش بيها 50 ضربه علي بعض

وكنت عايز اظبطها
لان الجلده اللي حوالين مكان وضع الرش متاكله

ده غير ان انا عرفت ان فيه ناس بتقوي السوسته
وكنت عايز اعرف المدي الطبيعي بتاعها كام متر تقريبا

وانا كنت عايز ادهنها لان في مناطق اللون ضعف فيها شويه
وبصراحه انا شايف الناس هنا محترفه وانا علي قدي فبصراحه اتمني تساعدوني
شكرا ليكم

Consul

11-02-25 03:19 AM

رد: رمسيس نمره 1

مرحبا بك أخي الحبيب...ومبروك علينا إنضمامك لأسرتنا الحبيبة...واضح أنك لن تستطيع أن تعمل لها صيانة وتفكها وتغير لها جلبة...ومن الجائز وأنا أرجح هذا أنها لا تحتاج تغيير سوستة...لها عندي أكثر من 40 سنة ولم أفعل أكثر من نظافة وصيانة وتغيير جلب وشغالة زي الفل...نصيحتي لك ومن الآخر لو أنت في القاهرة تذهب إلى أخونا العزيز الفني الأستاذ شريف 100 شارع شبرا قرب محطة مترو روض الفرج...وهو سيقوم بالصيانة اللازمة...خالص تحياتي...

soteer

11-02-25 03:38 AM

رد: رمسيس نمره 1

اشكرك علي ردك السريع

للاسف انا من الدقهليه ومش هقدر اروح بيها القاهره
وانا مش عايز تعديل عليها انا بس عايز احافظ عليها كويس

يعني الدهان اتقشر في بعض المناطق فكنت عايز ادهنه وسالت قالولي فيه اسبراي

الجلبه مش عارف اجيبها منين لان مفيش حد متخصص هنا وفي ناس قالول ان انا ممكن اعملها بماده الشمع(مسدس الشمع) او ان انا اجيب اي حاجه مطاط وسيحها علي ما تاخد شكلها

وانا بصراحه لسه هجرب الموضوع ده والصيد لان انا نفسي اجربه لكن لم تتاح لي الفرصه
ولو حسيت ان انا مستمتع بيه فهشتري واحده جديده نوع افضل لو امكن

soteer

11-02-28 02:57 AM

رد: رمسيس نمره 1

انا الحمد لله
فكيت البندقيه ونضفتها
وكمان وصيت واحد يجيبلي جلبه داخليه و جلبه اللي في الماسوره
وحاليا هي بتضرب كويس علي بعد 10 متر ودخلت حوالي 1 سم في الخشب

فكنت عايز شويه معلومات بسيطه لو امكن

1- المفروض المدي كام متر تقريبا
2- لو انا ناوي ادهنها ممكن ادهنها بعلب الاسبراي
3-سعر الجلبه الداخليه والخارجيه والسوسته (قطع الغيار يعني ) المفروض الاسعار كام
4- ازاي اطمن ان النشان مظبوط

شكرا ليكم

coyote160

11-02-28 07:32 PM

رد: رمسيس نمره 1

بالنسبة للأسعار الجلبة الداخلية لا تتعدي 5 جنية السوسته لو لونها اسود بتبقي غالية ممكن 30 وفي بيضا وهي ضعيفة بتعمل 10 15 بالكتير واللي علي مكان الرشا بتعمل 50 قرش وممكن تستغني عنها بجلده انبوبة وتقيفها مؤقتا

mahmoud el masry

11-03-01 05:40 PM

رد: رمسيس نمره 1

والله انا عندى بندقة رمسيس حلوة واصيلة وبالرغم من انى امتلكت انواع كتير بس انا بحب البندقية دى اوى فحاول تحافظ عليها

صائد البوم

11-03-01 09:02 PM

رد: رمسيس نمره 1

الرمسيس استعمال بتعمل كام

bibomiko

11-03-15 11:12 PM

رد: رمسيس نمره 1

لو سمحتم أنا عايز أعرف المدى بتاعها ؟؟؟

Consul

11-03-15 11:50 PM

رد: رمسيس نمره 1

اقتباس:

المشاركة الأصلية كتبت بواسطة bibomiko (المشاركة 57144)

لو سمحتم أنا عايز أعرف المدى بتاعها ؟؟؟

بارك الله فيك أخي الحبيب...المدي يتوقف على زاوية ميل الماسورة...فكلما إرتفعت الماسورة لأعلى كان منحنى نزول الرشة طبقا للجاذبية الأرضية أطول وبالتالي يكون المدي أبعد وهكذا...وقد تصل إلى 80 أو 90 متر...أو حتي 100 متر ولكن غير مؤثر ولا يخترق حتى عصفورة...العبرة هنا بسرعة الرشة في الثانية وهي التي توضح وتبين قوة البندقية...والمدي المؤثر...عموما الرمسيس في عيار 4.5 ( نمرة 1 ) سرعتها 128 م/ث وبهذه السرعة أقصي مدي مؤثر للعصافير واليمام 15 متر وقد يصل إلى 20 متر حسب نوع الرش المستعمل وسرعة الريح...وهذا المدي مناسب جدا لهذا النوع من البنادق وبهذه السرعة...وعموما حتى في البنادق الأقوى من الرمسيس ( ليست البنادق الهاي باور ) وفي الظروف العادية وفي أغلب الأحيان يفضل الصيد على مسافات لا تزيد عن 20-30 متر...خالص تحياتي...

Consul

11-03-15 11:59 PM

رد: رمسيس نمره 1

اقتباس:

المشاركة الأصلية كتبت بواسطة صائد البوم (المشاركة 50912)

الرمسيس استعمال بتعمل كام

الله يبارك فيك حبيب قلبي...الرمسيس المستعمل تساوي 250-300 جنيه حسب حالتها...والجديدة بالكرتونة من المحل كانت بـ 550- 600 جنيه ( قبل الأحداث الأخيرة )...وأنا عن نفسي لا أفضل شراء المستعمل عامة...وخاصة المصري والصيني...فرق السعر لا يغري وأفضل شراء الجديد أول إستعمال وبخيره...خالص تحياتي...

kingtot7000

11-03-17 03:00 PM

رد: رمسيس نمره 1

تحياتى للجميع منتدى جميل
الرش القديم كان حلو جداا بس الجديد احلى انا كان عندى الرمسيس بس للاسف
راحت وافكت 100 حته واللى باقى مجرد الجسم هل ينفع اشترى ليها دبشك وسوسته ولا اجيب جديد احسن
شاكر ليكم اهل الخبره

abo youssef

11-03-17 11:00 PM

رد: رمسيس نمره 1

انا اول مره اشترك معاكم فى المنتدى ومعنديش خبره فى مجال البنادق بس عندى بندقيه رمسيس نمره 2 وضايع منها
الجزئين بتوع النشان ومش عارف اجبها منين وانا من دمنهور لو حد عارف مكان قريب يقلى ارجوكم

الساعة الآن 05:09 PM