الصيد الليلى
 

بصراحة ملاقيتش حد خالص فى المنتدى متكلم عن موضوع الصيد بالليل مع أنه بالنسبة ليا أمتع من صيد الصبح أنا لا أنكر إن الصيد الصبح أيضا ممتع ولكن الصيد ليلاً حصيلته أكبر ومش مرهق زى الصبح لأنك بتعمل عملية معاينة الأول وبتسيب اليمام يبيت وبتعرف المكان وبعدين بتيجى لما الدنيا تضلم اوى وتبدأ تصطاد وياريت متكنش ليالى قمرية ويكون المكان اللى انت بتصطاد فيه درسته كويس الأول يعنى عندك مثلا أشجار الجوافة من الأشجار اللى اليمام بيحي يبيت فيها جدا مع أنها أشجار قصيرة واليمام بيبيت فيها بكميات رهيبة ولو معاك كشاف كويس حتشوف كل حاجة بوضوح وحتعرف تفرق بين اليمام وأوراق الشجر وبعدين صيد الليل هدؤ لكنه بيحتاج لأكثر من شخص علشان الونس والصحبة وتشجعه بعض بس حذار من اصدار ضوضاء لأن اليمام بيكون حذر حتى وهو نايم ومتولعش الكشاف كتير عمال على بطال يعنى لمجرد انك تشوف هدف وتحضر بندقيتك وتضرب على فكرة موسم صيد الجوافة دة بيبدأ فى 7 و 8 أما الآن بالنسبة للصيد الليلى فيه أشجار الموالح البرتقال واليوسفى بيبيت عليه بكثافة أيضا واشجارالمواح والجوافة ومثل هذه الأشجار أشجار قصيرة يعنى تقدر تصيد من عليه بسهولة وبكميات وفيرة جدا
مع تحياتى لكل الأخوة الكرام فى المنتدى وياريت ننظم رحلات صيد ليلى قريب حتى عشان يكون كله رجع من الشغل وفى السهر يحلى السمر وشكراً

رد: الصيد الليلى
 

قال سبحانه وتعالي...وجعلنا الليل لباسا وجعلنا النهار معاشا...صدق الله العظيم...وحاذروا من الصيد الجائر...والمتعة الحقيقية ليست بكثرة الصيد بقدر الإستمتاع بالخضرة والطبيعة والمناظر الجميلة الخلابة والهواء النقي والصحبة الجيدة وممارسة الحركة والمشي وكسر ملل الروتين اليومي والرتابة...خالص تحياتي...

رد: الصيد الليلى
 

أصبت القول

رد: الصيد الليلى
 

أستاذي المحترم طبعا حضرتك حر في التمتع في صيد الليل فهذه في الاصل هواية والغرض منها المتعه
ولكن بالنسبة لي لا اشعر بالمتعه في الصيد الا عبر السير في شوراع القري بعد الشروق وكلما بعدت مسافة الصيد كلما كانت المتعه اكبر بالنسبة الي صيد النهار هو المتعه الحقيقية
(وياسلام بقا بعد ما نخلص صيد نقف علي عربية فول وناكل الوجبه التمام وبعديها كوباية الشاي متقوليش بقا)

رد: الصيد الليلى
 

أخى الكبير أ/ جمال
دائما ما تفيض كلماتك بالحكمة و الموعظة.
جزاكم الله خيرا و نفعنا بعلمك و زادك من فضله.

رد: الصيد الليلى
 

يا جماعة انا لم اقصد تماما أنا نلغى صيد الصبح ولكن قصدت أن نستمتع بهذا وذاك ولم أقصد أن نجور فى الصيد طبعا الكلام اللى قاله سيادة القنصل جميل جدا وله منى كل تقدير وشكر سيادته على تعليقه مع تحياتى للجميع

رد: الصيد الليلى
 

صيد الصبح أو اليل كلها متعة اهم شىء انك تعرف تستمتع بما تفعل

رد: الصيد الليلى
 

بارك الله فيك اخونا سيادة القنصل هو ده بالضبط طبعا ده غير روح البحث عن الفريسة والتنشين عليها واصابتها واخيرا اكلها

رد: الصيد الليلى
 

فعلا يا جماعة المتعة فى الصيد فعلا بالنهار فى متعة المطاردة والتتبع والرش اللى بيضيع فى الهوا
وخلى بالكوا اليمام والحمام تقريبا الاساس اللى بتقوم عليه هوايتنا فبلاش صيد جائر اكتر من الازم لو سمحتم
وهوافى فعلا صيد ليلى بس مش فى منطقتنا لان حضراتكم عارفين ان فى حيوانات ليلية
وبصراحة بالنسبة لى اكتر اوقات صيد الوحوش بتبقى بالليل ده طبعا فى صيد الاسماك

رد: الصيد الليلى
 

بصراحه الكلام ده اعتقد انه نظري اكتر من كونه عملي لان شجر البرتقال الي انا مولود فيه اليمام بيدفس فيه وصعب تصطاده ببندقيه ضغط هواء لانها بتكون كثيفه جدا ويصعب وصول الرشايه لحد العش. وكمان تضرب اليمامه صعبه في النهار فما بالك لو في الليل .وايضا الكلام علي شجر الجوافه وخصوصا في شهر 7و8 لان الشجر بيكون كثيف الورق وبه ثمار صغيره (عجر) كمان لما اليمام يحس بالنور او اي خطر مش هيقعد مكانه لا ده هييطير ويخبط في الليل وهيبعد عنك خالص كمان صعب بالنهار تعلم مكان العش بدقه بحيث انك تيجي بالليل وتعرف مكان الشجره بالتحديد وتحفظ الشجر وتعرف مكانها بالضبط في الشجره صعب وتضربها بسهوله كده ... كمان صيد اليل وسط الجناين خطر وكمان هتخبط في الافرع الكثيفه وممكن تتعور وكمان مش هتعرف تظبط عمليه النشان جيدا وحجات كتير مش عايز اطول.. المتعه في النهار كما تفضل الاخوه المحترمين .
واحنا بنصطاد بالليل علي فكره بس بخرطوش وفقط البوم لانه بيجي علي الابراج بتاعتنا وبياكل الحمام .. ياريت تقبل كلامي وميزعلكش وفي الاخر كل شيخ وله طريقه .

رد: الصيد الليلى
 

اختلاف الرأى لا يفسد للود قضية وفى الآخر كلنا صياددين بس على فكرة ان اصطدت ليلا كثير جدا ومفيش معوقات

رد: الصيد الليلى
 

أعتقد أن الهدف من الهواية هو الإستمتاع , بدون أن تؤذى أحد أو تعتدى على حقوق الآخرين , وبعيدا عن الصيد الجائر , وطالما انك بتستمتع بالصيد ليلا يبقى من حقك تمارس الشىء اللى بيمتعك طالما انك تراعى الضوابط المتفق عليها , ولولا اختلاف الأذواق لبارت السلع