الصيد فى مصر - طريقه عمل العجينه بانواعها

الصيد فى مصر (http://www.egyhunt.net/index.php)

- صيد السمك (http://www.egyhunt.net/forumdisplay.php?f=75)

- - طريقه عمل العجينه بانواعها (http://www.egyhunt.net/showthread.php?t=8762)

kareem_serry

11-05-17 01:09 AM

طريقه عمل العجينه بانواعها

وصفات لصنع العجينة

الوصفات دي مجربة في البحر واثباتت نجاحا باهرا في صيد البوري

1- العجينه اللينه
وتستخدم لصيد البوري
وهي كوب من الدقيق
ملعقه من الزيت
ملعقة من السكر
يعجن الخليط بالماء حتي تصبح عجينه متجانسة
ويستدل علي ذلك بانه عند مسكها لا تعلق بالاصابع

2-العجينه المستويه
وتستخدم ايضا لصيد البوري
كوب من الدقيق - ملعقتان من النشا - ملعقة من الزيت ملعقه سكر
تخلط المقادير للحصول علي عجينه سايلة
ترفع علي نار هادئة مع التقليب المستمر حتي تصبح عليظه القوام
ومن المستحسن عند استخدام هذا النوع من العجينه ان يكون معك كمية من الدقيق
لانه من الممكن ان تسيح هذة العجينه عندها تستخدم الدقيق لضبط قوامها

3-عجينه على النار
1- كوباية دقيق 2- نفس الكوباية مياه ولكن أقل بحاجة بسيطة
3- ملعقة ونصف زيت ( ملعقة كبيرة )
طريقة التحضير :
توضع المياه مضاف إليها الزيت على النار حتى تبدأ فى السخونة وليس الغليان ... بمعنى أول ما تلمح المياه هتبدأ تسخن ويظهر على وش المياه فقاقيع هتضيف عليهم الدقيق .
وتقوم بالتقليب المستمر حتى تماسك العجينة ومن الممكن أن تبعد القدر عن النار لحظة لحين تماسكها وترجعها تانى على النار وتتحسسها بإيدك عشان تعرف إنها بقيت تمام .
بعد كدة تسيبها تبرد بدون ما تحفظها فى أى حاجة لحين ما تبرد تماما . لو حصل و حفظتها فى أى حاجة هتعرق ولو عرقت هتعجن وتلاقيها بتلذق فى أصابع إيديك أثناء الصيد .

4-العجينه القطنية
ودي بأى عجينه زى الحديد على السن
وهيه على فكرة انك تستخدم اى نوع من الانواع السابقه بس هتضيفلوا ( قطن )
ايوة قطن ويفضل قطن خشن ممكن تجيبه من عند المنجد او محل البويات بتاع دهان الخشب
ودة بتقطعه حتت صغيرة جداً وتعجنه مع العجينه بس بكميه مش كبيرة
وانسي العجينه فى الميه

Ahmed kouta

11-05-17 06:55 PM

رد: طريقه عمل العجينه بانواعها

الف شكر علي المعلومات الحلوة ديا بس بصراحة انا اول مرة اسمع عن موضوع العجينة بالقطن دي بس لية لا فكرة بردة نجربها ونحكم ان شاء الله

kefafy

11-05-18 09:58 AM

رد: طريقه عمل العجينه بانواعها

الله ينور عليك والعجينة القطن ممكن تتحط فى المشنقة علشان بتثبتها على شريط الرصاص فبتمسك كويس
وكمان فى اللباد بتاع العيش القيزر ( وليس الفينو لان عجينتة مختلفة) اللباد بتاع القيزر اول مبيلمس الميه بتلاقية زى الحديد على السنس او على الرصاص وبنفع فى السيجان و الجمبرور بيبقا ميه ميه مهما تحدف وتلم بتلاقى الطعم ماسك نفسه

adel_7768

11-05-29 12:35 AM

رد: طريقه عمل العجينه بانواعها

تسلم ايدك يا باشا ومنتظرين المزيد

sameer

11-05-31 09:18 AM

رد: طريقه عمل العجينه بانواعها

مشكور يا كريم باشا

بس العجينة دي بتنفع مع البلطي؟ ولو مش بتنفع ايه اللي ينفع؟

kareem_serry

11-05-31 10:19 AM

رد: طريقه عمل العجينه بانواعها

اقتباس:

المشاركة الأصلية كتبت بواسطة sameer (المشاركة 108605)

مشكور يا كريم باشا

بس العجينة دي بتنفع مع البلطي؟ ولو مش بتنفع ايه اللي ينفع؟

سمير باشا العجينه دي تنفع مع البلطي بس البرغوت ودود الارض هما احسن حاجه مع البلطي عن تجربه.. انما العجينه مجرتهاش مع البلطي ..
انا بصطاد بيها ف البحر علي طول وشغاله تمام مع البوري والبطاطا;)

sameer

11-05-31 10:23 AM

رد: طريقه عمل العجينه بانواعها

اقتباس:

المشاركة الأصلية كتبت بواسطة kareem_serry (المشاركة 108635)

اولا اشكرك على سرعة ردك

ثانيا البرغوت اصله طري و كنا بنصطاد في حتة حلوة ما شاء الله بس كنت ارمي الاقي الفلة بتنزل اروح شادد الاقي السلاحين فاضيين اجرب تاني نفس الكلام وبعدين قلت ارمي قريب مني يمكن اعرف ايه اللي بيحصل لاقيت السمك الصغير اوي الزريعة بينهش في الجمبري ويخلص عليه قبل الكبير ما يلحق ياكل حاجة فانا اتخنقت وبعدين الجمبري مقرف اوي في تطعيمه وبياخد وقت انتا اكيد عارف

فانا كنت عايز طعم يبقا جامد شوية ويستحمل العضعضة من الصغير عشان الكبير يلحق ياكل

ومعلش طولت عليك

kareem_serry

11-05-31 10:42 AM

رد: طريقه عمل العجينه بانواعها

ياباشا ماهو الشر الصغير ده مقرف حتي لو حتطله عجينه ماه هيعضعض فيها وممكن يمسك ف السلاح ويطلع معاك بس دود الارض جامد برده هو مقرف حبتين بس بيستحمل عن البرغوت وممكن تجرب الغله بس مش في كل الاماكن وهي صيدها صعب شويه عشان بتحتاج صبر وطوله بال بس سمكتها بتبقي محترمه ماشاء الله
انت كنت بتصطاد فين؟؟

sameer

11-05-31 10:50 AM

رد: طريقه عمل العجينه بانواعها

في حتة كدة مش باينة عالخريطة ومالهاش مواصلات بس كان معانا عربية هو ناحية سيدي كرير كدة

يعني لو جبت الدود حيستحمل كويس.

sameer

11-05-31 10:51 AM

رد: طريقه عمل العجينه بانواعها

طيب و الغلة دي بتتعمل ازاي؟

يونس	11-05-31 10:56 AM

رد: طريقه عمل العجينه بانواعها

ياعم برغوت ايه و دود الارض اي انا اتقرفت منكم و انا بقالي 12 سنه بصطاد سمك عمري ما اتكلمت معا حد كده

يونس	11-05-31 10:57 AM

رد: طريقه عمل العجينه بانواعها

اه يا كريم باشا انت اتجوزت و لا لسه علي قكره يا جماعه كريم فرحه قرب و هو مش عاوز يعزم حد ينفع يعني

يونس	11-05-31 11:00 AM

رد: طريقه عمل العجينه بانواعها

علي فكره احسن طريقه للغله هي وضعها في بطرمان و غطيها بالميه و غلق البطرمان باحكام و اطرقها لمده ثلاثه ايام

mahmoud11144

11-05-31 11:02 AM

رد: طريقه عمل العجينه بانواعها

اقتباس:

المشاركة الأصلية كتبت بواسطة sameer (المشاركة 108661)

طيب و الغلة دي بتتعمل ازاي؟

الغلة يا ابو سمرة بتجيب شوية غلة بس مش كتير حسب الكمية الي انت عاوزها
بتحتها في شوية مية مثلا انت هتصتاد بكرة تؤم جايب طبق كبير وجايب فية شوية مية وحاطت الغلة فية وتسبها لتاني يوم هتلاقي الغلة كبرت وبكدة تكون سهلة في سن السنارة بس هي بتغيب شوية لما يجي لها سمك
واهم حاجة اوعي تنساني بحتة بوري كدة علي حتة بلطي ولا اقولك هاتلي السمك كلة
ههههههههههههههههههههههههههه...

kareem_serry

11-05-31 11:04 AM

رد: طريقه عمل العجينه بانواعها

اقتباس:

المشاركة الأصلية كتبت بواسطة sameer (المشاركة 108660)

هو يستحمل بس الحته دي تعبانه انا كنت بشوف ناس كتييييير وقفين ومره روحت اقولت اجرب لقتها كلها زريعه صغيره وخنقه عايز حته كويسه؟؟
لو معاك عربيه روح بحيره البرلس انا جربتها قبل كده وبصراحه شغاله تمام وفيها بلطي كبير الحجم اللي بيتقلي عارفه؟

اقتباس:

المشاركة الأصلية كتبت بواسطة sameer (المشاركة 108661)

طيب و الغلة دي بتتعمل ازاي؟

الغله دي عادي بتجبها من عند العطار وتنقعها في شويه ميه بليل قبل متطلع تصطاد بس بحيث انها مش تبوش عشان متتهراش معاك وفي نفس الوقت تبقي طريه شويه مش ناشفه عشان تعرف تحطها ف السلاح

kareem_serry

11-05-31 11:09 AM

رد: طريقه عمل العجينه بانواعها

اقتباس:

المشاركة الأصلية كتبت بواسطة يونس (المشاركة 108665)

اه يا كريم باشا انت اتجوزت و لا لسه علي قكره يا جماعه كريم فرحه قرب و هو مش عاوز يعزم حد ينفع يعني

هههههههه لا ياباشا لسه ان شاء الله انت اول المعزومين

sameer

11-05-31 11:14 AM

رد: طريقه عمل العجينه بانواعها

اولا الف الف مبروك للاستاذ كريم

ثانيا اشكر الاخ يونس وحودة حبيبي وطبعا صاحب الموضوع الاستاذ كريم وحجرب انشاء الله الغلة والبرلس ههههههههه
و اقولك ايه النظام

بس الحتة اللي باروحها دي جميلة و الله وفيها شغل و احجام وكميات بس الطعم والسمك الصغير كانو معاكسينا

kareem_serry

11-05-31 11:20 AM

رد: طريقه عمل العجينه بانواعها

اقتباس:

المشاركة الأصلية كتبت بواسطة sameer (المشاركة 108680)

شكرا يابوسمره وجرب وقولي عشان انا بقالي فتره مش بصطاد بس انا بحب صيد البحر اكتر
والبرلس جميله بس متشتغلش قيها بالغله لان مش كل الميات تنفع فيها الغله

Ahmed kouta

11-05-31 11:35 AM

رد: طريقه عمل العجينه بانواعها

اقتباس:

المشاركة الأصلية كتبت بواسطة sameer (المشاركة 108661)

طيب و الغلة دي بتتعمل ازاي؟

صباح الخير الاول طبعا انت بتصتطاد من المزرعة الي علي طريق الكافوري الي اخر الطريق بتاعها يا تنزل علي المطار او انك تنزل علي طريق الساحل عند قرية سيدي كرير احسن طعم للمنطقة ديا دود الارض بيمسك علي السن تمام ويستحمل معاك عضعضة السمك الصغير اما بالنسبة للغلة معتقدتش انها تنفع هناك لاني مسمعتش ان في دور غلة هناك خالص بالنسبة للغلة بتشتريها من العلاف وبتنقعها في الميا وتغليها لغاية قرب ما تستوي يعني بتبقي مستوية اكتر من نص سوا بشوية بحيس انها تبقي ماسكة علي السن بس بصراحة انا مليش في صيد الغلة . وعموما طالما انت قربت من كرير اوي كدة ادخل قرية سيدي كرير والبحر اجدع ممكن هناك تلاقي حتت تضرب معاك احسن من البلطي والطعم هناك برغوت ونطاط وممكن سردين والسمك هناك شراغيش وميرا ودنيس

sameer

11-05-31 11:43 AM

رد: طريقه عمل العجينه بانواعها

اقتباس:

المشاركة الأصلية كتبت بواسطة ahmed kouta (المشاركة 108698)

الف الف شكر يا احمد باشا ربنا يكرمك اخلص امتحاناتي بس و اجرب انشاء الله الحتت دي

الساعة الآن 01:22 AM