[sghr220]

المشاركة الأصلية كتبت بواسطة Ahmedlr

الحمد لله ربنا رزقني الفريدة من نوعها .. نوريكا جيت

بعد الرشاية رقم 50 تقريبا اقدر اقيمها تقييم مبدئي

• البندقية تعطي انطباع اكتر من ممتاز
• نوعية الخشب في الدبشك ممتازة و ملمسه رائع و يوخذ عليه عدم وجود مشقبية او تخريشة في أخره لأحكام القبضة الأمامية
• النشينكان الخلفي - النشينكان الأمامي - الزناد - الأمان يجمع بينهم البنية البلاستيكية منعدمة الحديد تقريبا و ده مبيعجبش ناس كتير من ناحية الاعتمادية و طول العمر.. و انا منهم
• الزناد جميل و ملمسة و الية عمله ممتازة و اكتر من يقدرو هذه الخاصية هم من انبرت أصابعهم بفعل بنادق مثل الرمسيس و المعادي و البنادق ذات الازندة الحادة
• المدي المؤثر للجيت جباار - خصوصا اني عامل ميدان رماية مصغر فوق سطح المبني بتاعي و كان فيه اهداف انا حاططها لتعجيز البنادق اللي بجربها سواء من حيث الكثافة او البعد او الأحجام و نجحت الجيت بامتياز في اختراق الاهداف الكثيفة و الوصول للأهداف البعيدة لكن لم تكن دقيقة بما يكفي بالنسبة للأهداف الصغيرة
• رد فعل الجيت اعلي من المتوسط و لا أظن ان التليسكوب حيستقر فوقها بسهولة

ليا عدة أسئلة ارجو من الأخوة المتمرسين المساعدة بها
المحل أعطاني رش من نوع مصري (غالبا الرماية) طبعا فيه رايش و حالته حالة لكن الظريف اني اما بعمر البندقية و بحطه بيرسي كله جوا بيت الرشاية بسهولة و سرعة .
اما رجعت البيت كان عندي علبة رش من نوع تشيكي اسمه ديابلو انا اعرف انه نضيف و نادر كان جابهولي ظابط قبل كدة. كل رشاية شبه التانية و ناشف جداً بس اما كنت بعمر البندقية بيه كان بيبات جوا بيت الرشاية بالعافية و الحشر و خصوصا انه مفلطح من قدام بس المهم اني اما بضرب كان بيطلع عادي و يصيب الاهداف البعيدة . و ساعات بحس ان رد فعل البندقية بيزيد لما بحطه
أسئلتي هي:

• هل حد جرب نوع الرش ده قبل*كدة ؟خصوصا الناس اللي عنهم نوريكا ؟
• هل حد قابلته مشاكل معاه ؟
• هل صح اني اكمل بيه و لا ابطله و احول علي نوع تاني؟
• هل رد الفعل له علاقة بموضوع حشر الرشاية ده ولا دي تهيئات. ؟

السلام عليكم و رحمة الله و بركاته
أولا ألف مبروك يا أستاذ أحمد على البندقية و ربنا يبارك فيها و فيك.
ثانيا عاوز اقولك تقييمك ممتاز ممتاز ممتاز من حيث الأسلوب و التوازن و المعلومة و ان كنت انا مش من مشجعي النوريكا فكلامك الصراحة يخلي الواحد يعيد نظر من حلاوته (عارف ال review دي كان ناقصها ايه...شوية صور و تبقى عشرة على عشرة).
أما بالنسبة للرش الديابلو فأنا جربته لكن مش مع الجيت و عموما الرشة الأثقل في الوزن تحتفظ بالطاقة لفترة أطول و بالتالي المسار أو ال trajectory بتاع الرشة بيكون مستقيم لمسافة اكبر (أو لوقت أطول) بس اهم حاجة يكون آخر الرشة مع آخر الماسورة بالضبط عند غلق الماسورة.
أما بالنسبة لرد الفعل فطبعا فيه علاقة لكنه ليس العامل الوحيد و اقصد ان البندقية جديدة و تحتاج شوية وقت لغاية ما تضبط معاك.
آسف على الاطالة و الف مبروووووووووووووووووووووك