[jamayka]

بدون اى مقدمات هحكى موقف شوفته النهاردة فى مستشفى حسبو فى مدينة نصر
كنت منتظر دكتور و فجأة ناس دخلو و سيدة (محترمة و كبيرة ) فى حالة انهيار و صريخ لأن ابنها الشاب عمره لا يتجاوز العشرين مضروب طلقة فى صدره و التيشيرت اللى كان لبسه كله دم ( يعنى اخترقت جسمه و استقرت )بسبب خلاف مع شاب صديقه يعنى مش بلطجى ولا مسجل خطر و معاهم ظابط و امناء من القسم و دخلو قسم الطوارئ
اتضح انه اتضرب بمسدس صوت محول لضرب البلى و قضية و اثبات حالة و سين و جيم و سلاح فى القضية كمان ناهيكم عن الحالة اللى كان اهل الولد فيها
ارجوكم ارجوكم ارجوكم يا جماعة يا ريت تفهمو ان مسدس الصوت مش لعبة سواء كان محول للبلى او للصوت فقط فى الحالتين المسدس خطر و لا يجوز استخدامه الا فى حالة التعرض لتعدى (بلطجى او حرامى) مش فى خلاف بينك و بين جارك او مع واحد زنق على عربيتك ... ارجو تكون الرسالة وصلت
اللهم بلغت اللهم فاشهد