[momo44]

السلام على احلى ناس فى مصر
طبعا كل الناس عارفة موضوع الشراء من على النت
من على الموقعين دول
www.aliexpress.com
www.dhgate.com

انا انهاردة بعرض عليكم تجربة شرائى من على الموقعين حتى العرض على الامن العام

انا قلت اجرب اشترى من على النت واشوف ايه اللى هيحصل هيحصل ايه يعنى اخرها كام سنة سجن مش مهم
طبعا اولى الخطوات كانت عمل فيزا نت
طلعت على بنك مصر وعملت فيزا برسوم اصدار 20 جنيه+5 جنيه دمغة
واستلمتها بعد اسبوع
وبعدين حطيت فيها فلوس على اد اللى هشتريه وكان اختيارى على سكينة(للتجربة) + قاعدة سكوب حتة واحدة مع امكانية تركيب فلاش لايت وليزر

الملحوظة الاولى :
انت بتحط فلوس فى الفيزا ومتقدرش تستخدمها فى وقتها عشان بتاخد حوالى 24 الى 48 ساعة من وقت الايداع عشان الفلوس تنزل فى الفيزا

المهم استنيت لحد ما الفلوس نزلت
واشتريت السكينة جيربر من على aliexpress
واشتريت القاعدة من dhgat

الملحوظة الثانية:
السكينة وصلت بعد 10 ايام من تاريخ الشراء
القاعدة بقالها حوالى 16 يوم ولسة موصلتش
يعنى موقع aliexpress اسرع فى الشحن من dhgate
وممكن يكون الفرق بين البائعين وليس الموقع
الله اعلم
بس ده اللى حصل معايا

لما السكينة وصلت جالى اخطار على البيت
صورته

توجهت الى مبنى البريد بميدان رمسيس
وطلعت الدور الرابع (الطرود)
وقلت للموظف انا عايز استلم طرد
وسلمته الاخطار
قالى فى ايه
قلتله انا جايلى طردين واحد فيه ميدالية سكينة والتانى قاعدة كشاف
المهم طلع الورق وقالى ده فى مطواة
قلتلة مطواة ايه بس دى كلها على بعضها 5 سم يعنى قانونى
قالى لا دى مطلوب تتعرض على الامن العام
ها هتعمل ايه
كان مستنى انى اقوله خلاص اتنازل
قلتله وماله
نعرضه على الامن العام
قالى دقيقة واحدة اعملك الجواب
استنيت وعملى الجواب وخلانى امضى على انى استلمته
ودى صورته


طلعت على الامن العام فى العباسية ودخلت مبنى الامن العام وطلعت الدور الثالث قسم التراخيص
و فى موظف خد منى الجواب ودخل بيه على مكتب وبعدين قالى اتفضل معايا
قلت اعدام
دخلت مكتب عميد واتكلمت معاه وكان الحوار كالاتى

السكينة دى مينفعش تدخل عشان مدرجة فى جدول السلاح
قلتله بس دى 5 سم بس
قالى ولوحتى 2 سم مش قانونى
طب مفيش اى حل
قالى تتشحن وترجع تانى لان دى عشان تستلمها لازم طلب للوزير قلتله ماشى
قالى برده فى الاخر مش هتستلمها وهيترفض الطلب عشان دى سلااااااااااااح (محسسنى انى مستورد صاروخ تو ولا ار بى جى)
المهم
قلتله هل ممكن اتنازل عنها لمحل سلاح (على حسب كلام احد الاعضاء من قبل)
قالى لأ
انت تقدم طلب عشان نشحنهالك تانى
قلتله شكرااا البريد لوحده هيعمل كده مش محتاجة طلب

وبعدين قلتله ممكن اسألك سؤال تانى (وده كان اهم بالنسبالى)
قالى اتفضل
قلتله بالنسبة للتليسكوبات
انا عارف ان ممنوع التليسكوبات اللى بتركب على الاسلحة النارية
ايه بقى نظام التليسكوبات اللى بتركب على بنادق ضغط الهواء
قالى ممنوعة
:mad::mad::mad:
ثلتله ليه بقى
قالى عشان ممكن تركب على الاسلحة النارية
قلتله استحالة
دى تتفتت
قالى احنا مجربينها
هتركب وتضرب طلقة وبعدين تبوظ
و القناص مش محتاج غير طلقة واحدة (بصراحة اقتنعت بس لو كان كلامه صحيح بالنسبة لتجربتهم)

شكرااااااا
كل سنة وانت طيب
سلااااااااااام

ورجعت على بيتنا عشان الصيام

هى دى تجربتى من البدية وعمل الفيزا
حتى الوصول الى الامن العام

الخلاصة متشتريش اى سكوب او سكينة من على النت

اللى عنده اى استفسار انا تحت امركو