[mman2005]

يا باشا كل كلامك ده كويس، بس خلاص أنتهت الأيام دى الى كان الواحد فينا محتاج ترسانة أسلحة، أنا مجهز إثنين مونشاكو حديد بستخدمهم كعصاية حديد ومعايا سلسلة حديد الضربة منها ملهاش حل بالإضافة إلى سلاحى الى كنت بستخدمه فى اللجان الشعبية وهو الشاكوش، أنا عمى ضرب مسجل خطر سرقات حاول يكسر عليه باب شقته وهو فيها بالشاكوش وكومه على الأرض وربطه وراح وداه القسم أصل عمى برده سلاحه الشاكوش، أصل إحنا عيلة مكنشى ليها فى الخناقات أو الأسلحة ولما حصلت الثورة ملقناش غير الشواكيش ننزل بيها أو أى عدة حديد عندنا، بس أنا شايف أن الوضع اصبح أمن أكثر من الأول بكثير.

أيام الثورة كنا بنحرس بيوتنا طول الليل، وبعدين الصبح طلعت الناس بيوتها علشان تنام وأنا نزلت أجيب فطار من محل الفول والطعمية على بعد 200 متر من عمارتى لاقيت الناس بتقفل المحلات وبتجرى لدرجة أن محل الفول الى بشترى منه راح قفل المحل وعرفت اشد منه كيس الفول وقرطاس الطعمية بالعافية، وبعدين سألت فيه أيه عرفت أن عربية نقل فيها بلطجية معاهم بنادق آلى عايزين يدخلوا المنطقة عندنا، المهم طلعت فى الشوارع الجانبية علشان اشوف فيه أيه لاقيت الناس الى طالع بشومة وإلى طالع بسيف والى طالع بحديدة، لدرجة أن فيه شركة فى الدور الثانى شغال فيها شباب كثير لاقيت الشباب دول واقفين فى البلكونات ومحضرين صناديق أزايز البيبسى علشان يحدفوها على أى بلطجى يدخل، وعرفت أن الموضوع جد، جريت على عمارتى طبعاً لاقيت المربع بتاعى مفهوش سريخ إبن يومين كله طلع ينام طلعت الفطار وقفلت باب الشقة كويس وبعدين نزلت بماسورة ميه وقفلت باب العمارة كويس ووقف لوحدى فى المربع بتاعنا محدش معايا، والحمد لله كنت واقف لوحدى ومستعد ابقى قاتل لمقتول ويا روح ما بعدك روح والى حصل أن عربية البلطجية هربت لما لاقت الناس بالقوة والإستعداد ده ومقدروش يدخله عندنا.

حالياً كبير العملية أن الناس كل يومين تقفش حرامى عندنا فى المنطقة ياكل علقة موت وبيسلموه للقسم، وكفاية بس تقول كلمة حرامى عندنا علشان تلاقى 100 واحد طالعين بالشوم والسلاح ويقوموا بالواجب.