[Axel]

بسم الله الرحمن الرحيم
السلام عليكم و رحمة الله و بركاته

طبعا العنوان غريب و فيه ناس ممكن تفتكر انها الايجيبشن ستيك اللي زي الالكتريك شوك
لا يا جماعة اللي عملتها ديه ايجبشن ستيك
شبيهة الاميركان ستيك بس ثابته لكن في نفس الطول و
الافضل نقول عليها الايجيبشن شومة هههههههه


و عملتها لسبيين
اولا اسعار الشوم اللي كانت بــ10 جنيه مش لاقية حد يشتريها بقت بــ50 جنيه و اللي عاجبه
ثانيا : الحماية المنزلية و عشان لو بطلجية فكروا يجوا تاني بالرغم ان في نانشكو و ده اغبي من الشومة بس كله بينفع وقت الزنقة
و حتي لو معانا واحد واقف معهوش اي حاجة يدافع بيها عن نفسه اديهاله يدافع عن نفسه ضد اي بلطجي هههههههه
الخوف احسن البلطجي ياخدها من اللي هديهاله ساعتها مش هزعل ع الراجل هزعل ع تعبي اللي راح
ههههههههههه ندالة ندالة

و بدأت الفكرة لما لقيت عندنا ماسورة ستارة حديد قديمة جدا ع وشك انها تترمي طولها متر و بنطلون جينز نزلت عليه مية نار بطاريات مبقاش نافع
قولت ممكن اعمل شومة صغيرة طولها 50 سم زي الاميركان ستيك و تبقي جامدة برده
و الجينز هيمنع انها تتزحلق من ايدي كمان مع حبل فيها زي الشومة الأصلية
و اسمها الايجيبشين ستيك
فخر الصناعة المصرية
فجريت طبعا ع ركن الاصلاحات اللي عامله ههههه

و هسيب الصور بقي هي اللي تحكي مع شرح بسيط

- هنجيب الحاجة اللي محتاجينها رجل جينز , الماسورة , غراء الشعلة , صفيحة منشار , متر , رباط كوتشي قديم او الحبل اللي بيبقي في البنطلونات الرياضة , مسمار , شاكوش
و اخيرا حتة موكت قديمة او جرنال تعمل عليه القصة ديه عشان متبهدلش الدنيا هههههه


- بعد ما نقيس الماسورة 50 سم بالظبط نقطعها بالمنشار


- و بعد شوية قرف تطلع كده


-و نقيس الماسورة ع حتة الجينز عشان نقطع الجينز بس الجينز يكون اطول يعني ع مقاس 50 سم نقطع حتة الجينز يكون طولها 60-70 سم
و بالنسبة العرض يكون اللي يكفي انه يتلف ع الماسورة لفتين تلاتة


- بعد ما قطعنا الجينز نخرم في الماسورة من تحت بالمسمار و الشاكوش يعني ع مسافة 1-2 سم من نهاية الماسورة
و بعدين نجيب الحبل او الرباط و نقطع حتة ع اد مسكتنا و نعقهدا و ندخلها من الخرم
و بعدين
نجيب الغراء و نحط ع الماسورة و ع طرف الجينزل من بداية اللفة
و نلف و نحط غرا و نلف و نحط لحد اخر طرف في الجينز
اهم حاجة ان الحبل ميباقش جوة اللفة يكون باين من تحت الجينز
- و بعدين نجيب المقص و نخرم في الجينز مكان الخرم اللي خرمناه و بعدين نشد الحبل من الخرم و نطلعه
و بعد ما خلصنا اللف اكيد مش هنسيب الاطراف مرمية كده
هندخلها جوة الماسورة زي ما بيلفوا ورقة الجبنة و نلزقها من جوة بالغرا برده


و النتيجة اهي


- طبعا شكل الماسورة منا لناحيتين مش اد كده بعد ما دخلنا الجينزل في الجهتين شكلها بقي عرة
نقطع حتة جينز مدورة صغيرة ع اد الماسورة زي كده



- و بعدين بالغرا برده و نلزقها ع الاطراف هتبقي كده


-و ديه النتيجة النهائية



- و اخيرا لأن الجينز كان ازرق مش اسود و انا عايزها لونها اسود كان عندي علبة رش اسبري اسود جبته و رشيتها بقت سودا و واحدة زرقا و بفكر اخلي الاتنين اسود
بس لسه مصورتهمش شحن بطارية الكاميرا و ابقي اصورها


و اخيرا

الايجيبشن ستيك فخر الصناعة المصرية
قوية كالفولاذ
خفيفة كالريشة
جميلة كملكة جمال
الايجيبشن ستيك بادر باقتنائها

ههههههههههههههههه

طبعا برده الموضوع ليس للربح المادي بل للافادة و المرح

و بالتوفيق ان شاء الله