رد: I Need Gamo R77 Combat
أخى العزيز صياد...
شوف يا سيدى مسدسات الغاز ليها مميزات و ليها عيوب...
أهم مميزاتها ان مفيش مسؤليه جنائية لحملها و انها مش معروفه قوى للبلطجيه زى المسدسات الصوت ، بمعنى ان البلطجيه حافظين شكل و انواع المسدسات الصوت انما الغاز ممكن يخدعهم الى حد ما ، و طبعا انا بالنسبه لى الغاز أفضل من الصوت لأنك فى الأخر لو أضطريت تضرب بيه هتضرب رش فعلا مش صوت و خلاص.
انما برضه العيوب مش هينه ، يعنى مثلا معظم مسدسات الغاز بتتراوح سرعة الطلقه فيها من 360 الى 420 قدم فى الثانيه ، يعنى حوالى 120 الى 140 متر و كمان دقه النشان فيها بتكون تقريبا معدومه لو زاد بعد الهدف عن 10 متر ، يعنى لازم تضرب من قريب جدا عشان الطلقه تبقى مؤثره و لازم تضرب فى مكان رادع و طبعا الجواكت و البنطلونات الجينز بتقلل من فاعلية و قوة الطلقه ، كمان لازم تضرب أكتر من طلقه ورا بعض عشان تردع ، لذلك يفضل ان تشترى مسدس خزنته كبيره و طبعا أكبر خزنه هى بتاعة المسدس skif a 3000 لأنها بتشيل 28 بليه BB .177 ، و خلى بالك ان انابيب الغاز تصلح لضرب حوالى 60 رشه أو بليه و بصراحة اخر 15 أو 20 طلقه بيكونوا أضعف كتيييير من أول 40 طلقه ، و دايما متسبش انابيب الغاز جوه المسدس مضغوطه و مفتوحه لأن دة بيبوظ حاجه اسمها ال O Ring و ده بيتسبب فى حدث تسريب للغاز.
و نصيحه من أخ ليك ، حتى لو معاك مسدس مطلعوش فى خناقه الا كأخر حل و تكون مضطر لكده لأن ممكن اللى قدامك يكون شايل شومه أو مطوه و معاه مسدس بس مش ناوى يطلعه ، بس طبعا أول ماهيشوف مسدس معاك هيطلع اللى معاه على طول و ممكن يحدث مالا يحمد عقباه.
لو عايز بقه حاجه جامده جدا تخليها فى بيتك للحمايه ، في بندقيه جديده شركة Gamo لسه منزلاها اسمها Gamo Dynamax و دى بندقيه نمره 2 و فيها خزنة 10 طلقات و بتشيل طلقات جامو ماجنوم ارو هيد و فيها تلسكوب و على فكره هي مش غاز هى ضغط هوا عادى زى بنادق الرش العاديه و سرعة الطلقه 1200 قدم فى الثانيه يعنى حوالى 400 متر و تمنها بره 400 دولار.
و ان شاء الله ربنا يحفظك انت و كل اخوانا اللى فى المنتدى و يارب الأيام اللى جايه تبقى أحسن لينا كلنا
|