إخوانى الكرام
عدم تحديد مكان الصيد يكون لأسباب أمنية فقط , وهذا ما تعلمناه من الصيادين الأكثر خبرة , وليس لأى سبب آخر , لأن الصيد رزق , وماحدش بياخد رزق حد
يعنى إيه أسباب أمنية ؟
يعنى لو أنا قلت مكان الصيد عالمنتدى , وبالصدفة حصل مشكلة فى نفس المكان , يبقى أنا كدة وضعت نفسى فى دائرة الشبهات , و ممكن أجيب لنفسى مشكلة مالهاش لزمة
طيب ليه ماحدش بيقول عالخاص أو فى التليفون ؟
لنفس السبب , لو أنا ماعرفش الشخص اللى هاقوله على مكان الصيد , ممكن الشخص ده يروح المكان , ونتيجة عدم خبرته فى الصيد واحتياطات الأمان و التعامل مع الناس فى المكان , ممكن يتسبب فى مشكلة تؤدى الى منعنا من الصيد فى المكان مستقبلاً.
علشان كدة لازم مانقولش على أماكن صيد لأى حد إلا إذا كنت أعرفه شخصياً , وأعرف أنه له خبرة جيدة بالصيد وبالإحتياطات المطلوبة , ولو ماعرفهوش , يبقى لازم نطلع مع بعض علشان أعرّفه المنطقة و خبرات الصيد فيها و طريقة التعامل مع الناس حتى أتأكد من عدم حدوث مشاكل فى المستقبل
والدليل على ذلك أن فيه أعضاء هنا طلعوا معانا , وكانت أول طلعة ليهم , و أول مرة نتعرف بيهم , وماحدش بخل عليهم بحاجة
وإسألوا زمايلنا عادل عبده و جامايكا و محمد وفيق
أرجو أن تكونوا تفهمتم وجهة نظرى وهذا فعلاً ما تعلمناه من الصيادين الأكثر خبرة
بارك الله فيكم