اقتباس:
المشاركة الأصلية كتبت بواسطة amin hegazy
بالرغم من اللى حصل معلش اللى هناك دول مش متظاهرين يا جدعان
يعنى ايه يحرقو مجلس الوزراء ومجلس الشعب ين هيبه الدولة والله حرام اللى بيحصل
وكل ده عشان البشوات المعتصمين بيلعبوا كورة انت رايح تعتصم ولا تلعب كورة
اعقتد انه لازم يكون فيه رادع جامد اليومين دول التعامل بشدة ضد البلطجه وتخريب المنشأت
وعلى فكرة انا لا ظابط جيش لاشرطه عشان محدش يقولى فلول وطعمية
ده راي شخصى
|
اقتباس:
المشاركة الأصلية كتبت بواسطة omarmagic
بجد بجد وخدوها منى كلمة البلد دى بتخرب ومش هترجع زى الاول طول مالناس اللى فى الميدان دول موجودين
والجيش كمان بيعامل البنات والشباب معاملات قزرة جدا زى الفيديو بتاع البنت اللى الجيش كشف لمؤاخذة (عذريتها)
طب ده كلام ازاى يعنى وازاى يعنى كل ده بسبب كورة انتا رايح تعتصم ولا تلعب كورة دى تلاكيك ياجماعى علشان كل ده يحصل
وربنا يستر على البلد وتستقر وترجع احسن من الاول قولو امين
|
اخواني الاعزاء فوقوا بقى من الوهم اللي انتو فيه
يعني لو فرضنا إنهم بلطجية وقتلوا حتى كتيبة كاملة
ده يبقي مبرر للي بيحصل
يعني كلنا شفنا الجاسوس اللي اتمسك مفيش عليه خدش و اراهن إن مفيش ولو حد بص له بطريقة تزعلو ... لان في وراه دولة تحترمه وتحميه
ولا هو المصريين بس الي مالهومش سعر
---------------------------------------------------------------------------
ولا حتى شوف لما قتلو المسجون الغلبان من التعذيب لما لقو معه موبايل
وقال إيه لما هشام طلعت مصطفى لقو معه موبايل عملوله محضر إثبات واقعة
ولا هو الغلابة بس الي مالهومش سعر
-----------------------------------------------------------------------------------
ولما بيتقتل عساكرنا عالحدود... وقوات المراقبة الدولية تقرر إن ده يعتبر إعلان حرب وإن إسرائيل نقضت معاهدة السلام وإن من حق مصر الرد
ورفض الاسرائليين حتى يعتذروا
مشوفناش واحد من أشباه الرجال الي بيتشطرو على مواطنين عزل هز طوله
--------------------------------------------------------------------------------------
فوقوا بقى لأن طول ما في ناس بتفكر كده عمر ما هيبقى للبني آدم المصري تمن
واظن إن أي حد سافر برة جرب و عارف المصريين والعرب بيتعاملو ازاي
حكامنا خلونا مالناش تمن
----------------------------------------------------------------------------
وللي بيقول اصبر ...
بقول كان الوعد بتسليم السلطة في سبتمبر ولم ينفذ
يبقى نصدق ليه أي وعد تاني
----------------------------------------------------------------------------
وللي بيقول احمدوا ربنا إن الجيش معملش زي ليبيا أو سوريا أو اليمن
بقول طب جيش القذافي حصلو إيه
وسوريا واليمن في الطريق
----------------------------------------------------------------------------
واللي بيقول إن اللي في التحرير دول مش ثوار سلميين
بقول إن الثورة اللي مش سلمية بيكون معناها زي ليبيا كدة مجزرة
مش معناها اني أموت و اتسحل واقعد ساكت واقول اضرب كمان
-----------------------------------------------------------------------------
وبعدين يا ناس دي حرمه البني ادم أشد من حرمه الكعبة
مش مجرد مبني حكومي مهما كان تاريخه ومحتواه
أو حتى خيبة الدولة
قصدي هيبة الدولة
وعلى فكرة فيه فعلا بلطجية ومندسين بيولعوها ....بس دول تبع شلة طره وكلابهم الي في الداخلية وباقي المؤسسات وبتواطؤ من المجلس العسكري
لان كل دول هما أكبر المستفيدين لما البلد تولع
وهما دول الطرف الثالث وعشان كدة عمرهم مهيمسكوهم
والمجلس ماشي بنظام معنديش قناصة... فتشني فتش.... و الجأ للقضاء.....ويبقي الوضع كما هو عليه... وموت يا حمار
وحتى لو المجلس بريء ... يبقي نايمين على ودانهم ... وده عذر أقبح من ذنب
شوفو قيادات جيش تونس عشان قلبهم على بلادهم مش مصالحهم وصلو فين واحنا لسة فين... يعني أكيد شعبهم هيسامحهم حتى لو كانو فاسدين قبل كدة
هو ده الجيش الي حمى ثورة بلاده بصحيح... مش مجلسنا
---------------------------------------------------------------------------------------------
فوقوا بقى
نظام مبارك مازال يحكم
الثائر الحق يثور ليهدم الفساد ثم يهدأ ليبني الامجاد
طب الفساد لسة متهدمش
ورحم الله الرجل اللي قالهالي من سنين
" مصر بقت شجرة تهييص جدرها مبارك وفروعها في كل شبر فيكي يا بلد "
تم إزالة اللفظ البذيء في الجملة السابقة حفاظا على شعور الاعضاء