[المستشار]

انا عايز احكى موقف بالنسبه لحضراتكم هيكون موقف كوميدى اما بالنسبه لى فكان اقرب من الماساه والرعب لمده 3 ايام وده لما كنت فى الاعاشه وهى فريق بيلقى ورى خطوط العدو وبيتعامل مع اى حاجه وبياكل اى حاجه يلاقيها وطبعا بياكلها نيه عشان مينفعش يولع نيران حتى لا يكشف وانا قبل العرض بحوالى اسبوعين استلمت التعبان اللى مفروض اكله وطبعا انا مش بطرمه غير فى العرض امام اللواءات وفكره التطريم سهله اوى بخليه يعض فى الستره يعنى يعض فى بدله الجيش وبعد ما يسمك فيها اشده سنانه بتتفك ما علينا المهم انى خدت تعبان ونزلت بيه اجازه قلت العب بيه واخوف الناس وكده عقل عيال بقى وانا كنت لابس سويتر وتر بروف له وجيبه جانبى له سوسته من السويترات اللى بتبقى منفوخه كده ووضعت الثعبان فى الجيب وقفلت السوسته ورحت بيه البيت وخرجت شويه ودخلت شويه وهكذا وبعدين سيبته فى السويتر وتانى يوم خرجت اروح لاصحابى وافرجهم بفتح الجيب ملقتش الثعباااااااااااان طبعا انا جالى هلع انه اكيد هرب فى البيت وهيولد وهيتكاثر وممكن الاقيه على سرير حد من اهلى او غيره من كل التخيلات اللى ممكن تيجى فى مخى وطبعا رجعت البيت جرى وقلبت عليه الشقه حته حته فى كل سم وكل خرم وكنت بقول لوالدتى ان محفظتى ضاعت عشان مش قادر اقول الحقيقه وطبعا ملقتهوش وطبعا اقسم بالله 3 ايام مش بنام واروح كل 5 دقائق اشقر على اخواتى وعلى غرفه والداى لدرجه انى كنت بنام وانا واقف المهم قلت لحد كبير شويه من اهل صحابى قلى لازم تجيب واحد شيخ بيطلقه عليه الرفاعى وهو اول ما يخش الشقه هيجبهولك وادانى عنوانه وطبعا مكنتش عارف هدخله الشقه ازاى وانا كنت شاكك 100 فى 100 انه هرب فى احد كنب الانتريهات ونزل فى التنجيد الداخلى المهم يشاء السميع العليم انى البس نفس السويتر وانا رايح للشيخ المذكور واقسم بالله العظيم ثلاثه ان كل ما قلته صدق كنت راكب ميكروباص وكل شويه الاقى البنت اللى جنى تبص لى بصه غبيه اوى وانا طبعا قاعد فى حالى نزلت من الميكروباص منعا للمشاكل وببص لقيت السويتر مكان الاستيك او الحبل اللى بيتشد منه بيتحرك اتريه كان بيخبط فى البنت وانا مش دريان واتارى الثعبان هرب فى بطانه السويتر والله والله والله هذا ما حدث والحمد انى وجدته وخلص الموضوع على خير وانا اول مره اعترف بهذا الحوار لحد غير الراجل اللى كان ارشدنى للرفاعى ويسعدنى ان اشارككم تجربتى اللى معرفش هى كومديه ولا ماساويه وتقبلوا تحياتى