[قناص المنوفيه]

انا بقى هحكى حكايتى مع انى مش عارف هنسى حاجه فيها ولا لا
ما علينا المهم زمان احنا قبل ما نبنى بيت جديد لينا كنا قاعدين فى بيت جدى الله يرحمه
وكنت دايما وانا صغير بشوف عمى شايل بندقيه وبيجى ومعاه عصافير ويمام ومكنتش حتى فاهم
اى حاجه لانى كنت صغير اوى حوالى خمس سنين لحد ما سألته وقعد يفهمنى براحه
وخدنى معاه بتاع طلعتين كده حولين البيت عشان ما يتعبنيش واصطادنا عصافير وبعدين سافرنا
السعوديه تانى انا ووالدى والاسره لاننا كنا نازلين فى اجازه وانقطع موضوع الصيد مع عمى خالص
وبعدين لما نزلنا تانى كان البيت بتاعنا اتبنى وبدأنا نعزل فيه وفى يوم وانا بلعب فى الشارع
لقيت والدتى بتنادى عليا بتقولى تعالا كلم ابوك فى التليفون جريت وكلمته قالى انا جايبلك
هديه ومفاجأه لما اجى من الشغل هورهالك المهم اتحايلت عليه يقولى مرضيش وقالى اصبر
لحد ماجى والمهم لما جه لقيته شايل كرتونه بيج مرسوم عليها بندقيه ومكتوب بندقيه
الهواء رمسيس طرت من الفرحه طبعا وقعدت اتنطط بس يا فرحه ما تمت بابا قالى اوعى تكون
مفكر انك هتصطاد بيها لوحدك ولا حاجه لما ابقى افضى هبقى اخدك واصطاد بيها وانت معايا
وقالى انا هعينها هنا واياك تيجى جنبها لانها ممكون تموت والكلام ده بس على مين
المهم سمعت كلامه لقتره قصيره وطلع معايا كذا طلعه ومضربتش ولا ضربه بس فهمت منه
ازاى انشن ومسكنى البندقيه عشان اعرف بس من غير ما اضرب
وبعد ما حب الاستطلاع ما كان هيموتنى و صبرى كمان نفد بدأت اتسحب من وراهم فى البيت
وبابا فى الشغل واطلع البندقيه واعمرها واضرب على اى حاجه خشب واخيبها بسرعه بعدها
وبعد كده بدأت اضرب عصافير ويمام فى جنينه البيت وارجع البندقيه بسرعه برضه
وفى مره واحده كنت فى اولى اعدادى اتجرأت وقلت هى موته ولا اكتر وطلعت طلعه بره البيت
ومش هتصدقوا جبت بتاع خمس يمامات من على شجر مانجه فى جنينه فى الشارع بتاعنا
وهو ده اللى خلى والدى لما رجع من الشغل فوت الموضوع وانبسط لما لقانى عرفت اصطاد حاجه
وقالى خلاص ابقى اطلع بيها بس حولين البيت ما تبعدش عشان محدش يعمل مشاكل معاك
واوعى تهزر بيها خالص ودايما لما تكون فيها رشايه اكسر الماسوره وأمنها
وفضلت اصطاد بيها واطلع لوحدى وكل يوم اجيب واستمتع اكتر من اللى قابله ولما كان عمى
بينزل اجازه كان بيجى نطلع بيها لان كل بنادقه ستى الله يرحمها باعتها لبتاع الخرده ياريتهم
موجودين دلوقتى كانوا بتاع تلاته رمسيس اصدار قديم أوى وتقال و2 صينى وتل مجرى:mad:
يلا مكنتش تعرف قيمتهم وكنا بنجيب احلى صيد بيها والله
لحد ما اتغبيت وسلفتها لواحد صحبى فى يوم كسر الدبشك من المسمارين اللى قدام
بابا ركبلها افيز و مبقتش عايز اطلع اصطاد بيها عشان شكلها بالافيز ده
راح واخدها معاه الشغل وباعها لواحد صحبه قعدت سنتين بالظبط المهم طبعا بقيت متضايق
انى مبقاش عندى بندقيه فى يوم والدى كان فى مصر كالعاده فى سور الازبكيه بيشترى كتب
نادره وقديمه لان عاشق للقراءه لقيته جاى ومعاه بندقيه جديد وقالى انها بعتله واسبانى
اللى هى الجامو سى اف 20 بصراحه كنت مستغرب شكلها وخفت فى الاول اطلع اصطاد بيها لوحدى
لحد ما عمى بدأ يجى البلد يومين تلاته كل فتره ونطلع نصطاد بيها تصدقوا مكنتش
بتجيب خير زى الرمسيس سبحان الله ووالدى كانت عنيه تعبت فطلع بيها مره ولا حاجه
وقالى انا مش هصطاد بالبندقيه تانى والبركه فيكم بقى وركز صيده فى السمك بس
لانه كان صياد سمك قديم برضه زمان من ايام ما كانوا بيبنوا السد العالى وكان فيه تعابين سمك
فى الترع وهو صغير وبعدين بدأت اطلع انا بالجامو وركنتها فتره كبيره لحد ما دخلت ع المنتدى
ده وبدأت اتشجع وانزل بيها تانى وجبتلها سكوب صغير وبرضه كان عمى انقطع عن الصيد فتره
كبيره اوى ورجعته ليه واشترى ديانا اير كنج ونوريكا جت بس لسه مستنين نطلع بيهم لما يجى
وشكرا لحسن قرأتكم اسف ع الاطاله