موضوع جديد أتمنى يعجبكوا
كل واحد مننا أكيد جرب ينشن على أهداف مختلفه أنا شفت حتى هنا على المنتدى موضوع عن أهداف مطبوعه و كل ده جميل جدا لكن دايما رؤيه مكان الرشه بيكون صعب فيه ورق نشان أسمه Shoot-n-c بمعنى أضرب و شوف و لحسن الحظ مش محتاجين نشتريه ده ممكن يتعمل بكل سهوله الفكره مش فكرتي شوفوا الفيديو ده
أنا جربت أعمله بنفسي و عمل 72 هدف كلفني 12 جنيه
الفكره بسيطه هي أن عندك ورق مقوى بلون زاهي و عليه سالوتيب شفاف (و ضروري يكون شفاف) و عليه دهان غامق (أنا أستعملت دهان أسود مطفي سبراي العلبه ب 8 جنيه) و لما الرشه بطخبط فيه السالوتيب بيتخرم لكن الأهم من أنه يتخرم أنه بيتشد و يتقطع زي لو حاولت تخرم كيس بلاستيك مشدود بصباعك فلما بيتشد الدهان الي عليه بيتقشر و يكشف الورق الزاهي ألي تحته
بس أنا عندي شويه ملاحظات و تعديلات شايف أنها ضروريه
1- الفيديو بيقول أن كذا طبقه دهان = نقط أكبر و أنا أكتشفت أن ده مش صح الحقيقه هي أن لو عندك طبقه سالوتيب سميكه هتدي نقط أوسع الهدف الي ناحيه اليمين عليه طبقتين سالوتيب بدل واحده
2- كل ما كانت الطلقه أبطاء كل ما كانت النقط أكبر و السبب أن الرشه بتجر السالوتيب بدل ما تقطعه
3- الرش الماتش (المفضل للنشان على الورق) بيقطع الورق قطع نظيف يعني مش بتجر السالوتيب و مش بتعمل نقط أنا جربت الماتش و الماجنم و النتيجه واضحه في الصور
4- أقلام الدوكو ممتازه في الرسم على الأهداف ممكن ترسم بيها دواير ببرجل
و علشان كلنا نستفيد ياريت كل واحد يقولنا هو بينشن على أيه (طبعا غير الطيور)