[أحمد عطاالله إبراهيم]

المشاركة الأصلية كتبت بواسطة aymank2

بص يا ابو مروان اهم حاجه متزهقش لان ده العادى كل بندقيه وليا تظبيطه انا عارف انك صياد كبير بس كلنا بنستفيد من بعض انا هقول ليك انا ظبطت الجيت بتاعتى ازاى واظن ان نشان ال73قريب من الجيت اول حاجه تجيب ورقه وتعمل خط بالطول وخط بالعرض كروس يعنى وتلزق الورقه على حاجه خشب سميك وتمسك البندقيه وتتاكد انك ماسكها مسكه موحده يعنى كل مره نفس الماسكه نفس النظره على الشيز بتاع النشان الخلفى مع الامامى لو ينفع تثبت البندقيه على حاجه عاليه وتحتها كيس رمله يبقى 100% اضرب 10 رشات وتكون متبع الخطوات السابقه واى رشايه ايدك تتهز فيها يبقى متحسبهاش حاجه مهمه استخدم رش يكون مشهود ليه بالكفاءه يعنى النوريكا انا بستخدم معاها الجامو ماتش او الجامو هانتر برده ممكن يكون الرش الى انتا بتستخدمه مش ماشى مع البندقيه الجديده عادى يعنى انا بستخدم مع الكرال الديابلو العلبه الموف شغال كويس بس لاقيته مش ماشى مع الجيت المهم اضرب وشوف لو لاقيت الرش مشكل معاك كل رشايه رايحه فى حته يبقى تشوف السوسته وجلبه البستم وجلبه بيت الرش لازم المشكله تبقى فيهم طيب لو البندقيه مجمعه فى اى حته فى الورقه فوق او تحت يمين او شمال كده يبقى البندقيه سليمه بتضرب فوق وعايزه تضرب تحت يبقى تربط البكره الى فوق مع اتجاه عقارب الساعه العكس بتضرب تحت يبقى تفك يا كبير عكس عقارب الساعه بتضرب شمال يبقى تربط البكره الى فى الجنب مع عقارب الساعه بتضرب يمين يبقى العكس ارجو اكون افادتك ولو حد من القناصين الكبار مشارك وعنده تعليق يبقى برده نتعلم منه انا وانتا .

بجد مش لاقى كلام اقوله .. حضرتك جبت من الاخر ,, تحياتى يا استاذ ايمن