[طلعت بخيت بسكالس]

المشاركة الأصلية كتبت بواسطة hoka

سلام عليكم
احب الاول اشكر اصحاب الفضل عليا فى المنتدى او بره المنتدى من الناس اللى علمتنى الصيد او حتى ساعدتنى بكلمه تشجيع
وبدعى ربنا يرحم زوج عمتى المتوفى ويدخله فسيح جناته وهو اول من جعلنى امسك بندقيه فى حياتى وجعلنى احب واهوى واعشق هذه الهوايه بكل قطره فى دمى
اما الان
فهناك شخص جديد اريد توجيه شكر خاص ليه
هو الاستاذ والبشمهندس والوالد العزيز طلعت بخيت
اولا هو اهتم جدا بيا وبمشكلتى مع الرمسيس بالرغم من انها بندقيه ضعيفه ولا تسوى شئ فى اسطول الاسلحه اللى اقتناها او حتى ضرب بيها ربنا يحفظه ويحميه يارب
الحاجه الاهم واللى ماثره فيا جدا ومخليانى اتخذه الاب والاخ والصديق العزيز ليا
اسلوبه الرائع فى الكلام وجو الاولفه اللى تحسه بمجرد ما يرفع السماعه ويقول الو ومشاعر الصدق واللهفه على المساعده ومد يد العون اللى لاحظتها فى كلماته معايا
بجد يا جماعه انا عمرى ما كلمت شخص كده ولا عرفت شخص كده وانا كان نفسى اشوفه فى حفل التعارف والحمد لله شوفته بس ما اتكلمتش كتير لكن من اول موقف بينى وبينه وبالرغم من انى مش صديق ليه لقيت التعامل الحلو والجميل والرائع ده
انا كان فيه كلام فى نفسى وعاوز اقوله عن الشخصيه الرائعه اللى تتمثل فى الانسان الجميل الاستاذ طلعت
وده جزء من بحر كلام ما يخلصش عنه بس منعا للتطويل على الاخوه الاعضاء
وانا بوجهله دعاء من هنا وبقوله
ربنا يسعدك ويحفظك ويحميك من كل سوء وربنا يحبب فيك خلقه اكتر واكتر ويحميلك كل عزيز وغالى على قلبك ويارب تشوف ابنك زى ما انت تتمنى ويبقى من ابطال مصر فى الرمايه ويسعدك بيه ويارب يارب يارب من قلبى يشفى والد حضرتك ويبعد عنه المرض ويرزقه الصحه والعافيه
وفى النهايه
ارجو من نفسى انى ما اكونش ظلمت حضرتك فى الكلام واكون اوفيتك جزء بسيييييييط جدا من حقك ومن فضلك عليا
وياريت يا جماعه كل واحد فينا يفتكر افضال الناس عليه ولو حتى ضحكه ويشكر ربنا الاول عليها ثم الناس ويقول الحمد لله انه جعل وسطنا من هم اصحاب قلوب رحيمه وعقول رزينه وهمه عاليه

شرف لي وفخر أن يدعوني أحد أعضاء المنتدي الكرام أخ أكبر أو أب له وخاصة أن كان شاب رائع مثلك يامحمود علي أعتاب أن يكون طبيب وأنا باشكرك جدا يامحمود علي أحساسك الجميل ده ومشاعرك الفياضة بس حقيقي أنا ماعملتش حاجة أستاهل عليها كل ده أنا ماعملتش غير الواجب وده أقل مايجب أنا كان نفسي حقيقي تشرفني أنت وأحمد في بيتي علشان الواجب يكمل بس معلش ملحوقة والجيات كتير .
وأما بخصوص بندقيتك الرمسيس فهي مش غلبانة ولا حاجة دي زي الفل وبكرة يبقي عندك ترسانة خاصة بيك عندما تنهي دراستك وتنطلق في حياتك العملية وتفضل برضه الرمسيس عزيزة علي قلبك وأفتكر ديما الكلمة اللي أنا وكل الصيادين العواجيز بنقولوها ( الصيد صياد مش بندقية )
ومرة تانية باشكرك علي كلامك الجميل اللي أخجلني وعقد لساني ومش مخليني عارف أرد أقول أيه .
لك كل الحب والإعزاز والتحية.