[Karam]

ناس كتير بتنشن حلو أوي بس مبتعرفش تجمع مجموعات كويسه ساعات بتكون المشكله في الرش أو النشنكان أو السكوب نفسه

و دي بقت مشكله كبيره في الفتره الأخيره لأن فيه شحنه تليسكوبات فاسده غرقت السوق بس الحمد لله فيه حل للتأكد من جوده السكوب

المشكله بتكون أن مع كتر الضرب الشعار بيتحرك من مكانه أو بيتهز

طبعا الحركه دي بتكون بسيطه جدا بس طبعا كلنا عارفين أن أي حركه و لو كانت بسيطه معناها أن شكرا كدا مش هتصيب الهدف حتى لو رقصت بالبندقيه

طيب أيه الحل علشان نتأكد من أن الشعار مش بيتحرك؟؟؟؟؟؟


أولا فك السكوب من على البندقيه و هات مرايه عدله حطها على الترابيزه أو الأرض في مكان فيه أضاءه قويه بس مش مباشره

بعدين حط عدسه السكوب الشيئيه على المرايه و العدسه العينيه لفوق يعني وقف السكوب على عمودي على المرايه و بص من العدسه علشان تشوف الشعار

لو العدسه مظلمه و مش باين منها حاجه حط تلات عملات معدن نفس النوع تحت عدسه السكوب علشان ترفعه شويه و تدخل حبة نور فتقدر تشوف


المهم بص على الشعار و أنعكاسه في المرايه هتلاقي المنظر ده:










الصوره بتبين الشعار و أنعكاسه في المرايه لاحظ أن الأنعكاس مزغلل شويه (مش مهم)

طيب المطلوب من سعتك دلوقتي هو أنك تظبت البكرات لحد لما الشعار و أنعكاسه يتطابقوا
زي كده:










دلوقتي السكوب بتاع سعتك أكيد مش متصفر (مش مهم) ركبه على البندقيه بدون عبث في بكرات السكوب

و أضرب حوالي 40-50 رشه من نوع رش رخيص برده من غير ما تظبط السكوب ولا تحرك البكرات بتاعت السكوب ولا تلمسها

المفروض أن الأهتزاز الناتج عن رده الفعل ما يكونش حرك الشعار من مكانه و ألا لو أتحرك يكون السكوب بايظ

طيب فك السكوب و أرجع حطه على المرايه و بص على الشعار و أنعكاسه تاني

المفروض لو السكوب سليم أن الشعار و أنعكاسه يتطابقوا أو يكون الفرق في التطابق حاجه قليله جدا جدا لاتذكر

لو ما أنطابقوش و كان الفرق كبير حلها بسيط ..................


شيل السكوب من على المرايه و حطه على الترابيزه

رجع المرايه مكانها و أرجع هات السكوب

غطي العدسات و البكرات و شيل السكوب و روح حاطه في أقرب صفيحه زباله و أستعوض ربنا في ال 500 جنيه بتوعك

أتمنى الموضوع يكون مفيد و يكون عجبكوا