رد: فجن جنونى
وعليكم السلام ورحمة الله وبركاته ياباشمهندس اسلام.
أنا هأدخل فى الموضوع على طول.
هناك 3 اسباب رئيسية فى عملية التجميع وعدم التجميع:
1 مشكلة فى البندقية
2 مشكلة فى الرش
3 مشكلة من حضرتك شخصيا فى طريقة استعمال البندقية.
قبل كل شئ أضرب حوالى 10 رشات علشان تسخن ميكانيزم البندقية.
ثم حاول تثبت البندقية فى مكان ماتتحركش منه حتى اثناء التعمير.
أضرب على ورقة بيضاء من بعد 10 متر 5 رشات وتأكد تماما أن البندقية لا تتحرك من مكانها أثناء التعمير.
لو البندقية جمعت ال5 رشات تقريبا فى مكان واحد يبقى أحنا كده تأكدنا ان المشكلة هى رقم 3 يعنى فى طريقة أستعمالك للبندقية.
ولو شكلت وكل رشة فى مكان؟
هنخلى البندقية ثابتة زى ماهية ونحاول نجرب أنواع رش مختلفة وفى كل مرة لا يقل الرش المستخدم عن 5 الى 7 رشات ونشوف النتيجة.
لو فيه نوع من انواع الرش جمع معاك يبقى هوه ده أفضل رش لبندقيتك وده حيأكد أن المشكلة كانت رقم 2 مشكلة نوع الرش المستخدم.
مع العلم هذه البنادق تسمى هوائية وهى بالفعل هوائية جدا فى عملية نوع الرش المستخدم بمعنى أن ممكن بندقيتين نفس النوع والعيار وكل شئ وواحدة تجمع بالرش الاسبانى مثلا وأختها نفس الرش لا يجمع معها ولكنها تجمع أفضل بالرش المصرى او التركى مثلا.
ولو مافيش تجميع رغم ثبات البندقية وتغيير أنواع الرش؟
يبقى هنا دخلنا فى المشكلة رقم 1 وهى مشكلة البندقية نفسها ودى لها عوامل كثيرة مثل الاتى:
1 ودى أكثر مشكلة أنا واجهتها فى تجاربى وأسهل مشكلة للحل وهى جلبة بيت الرش بمعنى أن بيبقى فى تنفيس فى مكان جلبة بيت الرش مما يسبب أختلاف ضغط الهواء الخارج من الكانون عند وصوله لنقطة بيت الرش مما يجعل سرعة الرشة مختلفة فى كل مرة بسبب تنفيس جلبة بيت الرش.
الحل تغيير جلبة بيت الرش والتأكد أنه لا يوجد أى تنفيس.
2 المشكلة الثانية ممكن تكون من جلبة البستم الداخلية ولها نفس التأثير على الرشة لأن كل مرة ضغط الهواء الخارج من داخل الكانون بيكون مختلف وده برده بيأثر على سرعة الرشة كل مرة.
الحل تغيير جلبة البستم.
خالى بالك ممكن يكون عندك مشكلة فى الجلبتين. ولذلك دائما أبدأ بالأسهل والارخص وهى جلبة بيت الرش.
يبقى كده عرفنا أن الخطوة الاولى من هذا الاختبار لمعرفة أذا كان فى مشكلة فى طريقة أستعمال البندقية.
والخطوة الثانية عرفنا لو المشكلة من نوع الرش.
والخطوة الثالثة والاخيرة هتأكد لنا لو المشكلة من البندقية نفسها.
دى الخطوات اللى أنا بأستعمالها من خلال خبرتى المتواضعة لمعرفة أين تكمن المشكلة وممكن بعض الخبراء الموجودين فى المنتدى والاكثر منى خبرة يصححوا أى خطوة او يضيفوا طرق أخرى لمعرفة هذه المشكلة.
أسف للأطالة وأتمنى لحضرتك كل التوفيق.
خالص تحياتى للجميع.
|