منتهى الانانيه والله
بسم الله الرحمن الرحيم
شوفو بقى ياجماعه
انا عاوز اتكلم فى موضوع مهم جدا بالنسبه لنا كصيادين
وهو الانانيه فى اخفاء الاماكن اللى بنصطاد فيها عن باقى زملائنا من الصيادين
ويمكن ده اول موضوع بيتكلم عن الحكايه دى على منتديات الصيد
واولا عشان نبقى متفقين
معنى كلمة الانانيه هنا مش مقصود بيها توجيه لوم لصاحبها او اى اسائه اطلاقا
ولكن مقصود بيها استفسار بسيط
وهو ان ليه كل صياد عارف اماكن حلوه للصيد بيحاول بقدر المستطاع يدارى ويخبى عليها ومايقولش لحد عليها؟
يعنى انا مثلا اعرف كام واحد من الصيادين مستحيل يقولك هو بيصطاد فين
ولما صياد مبتدأ وغلبان يسألو ويقولو هو حضرتك بتصطاد فين ياكبير؟
بيكون جوابه كالتالى
بص ياسيدى
انا باصطاد فى بدر
او
باصطاد فى الشروق
او
باصطاد فى الفيوم
وبس كده بدون تفاصيل
صلاة النبى احسن
طيب المطلوب منو يعنى مثلا يروح يلف مدينة الفيوم كلها عشان يعرف مكان اليمام فين؟
ههههههههههههههههههه
ويسلام بقى لما تقعد مع اتنين صيادين بيخرجو فى مكان واحد مع بعض
ومش عاوزينك تعرف المكان ده
تبص تلاقيهم بيتكلمو بالالغاز وانت قاعد وسطهم
تلاقيه مثلا بيقول لصاحبه
اوعى تقول لحد على ( الخن ) بتاعنا
او
واعمل حسابك يافلان هانطلع رحله يوم الجمعه فى بطن الزير
او
عاوزين نروح المنطقه المبروكه الرحله الجايه
وانت ياعينى عليك قاعد وسطهم دايخ ونفسك تديهم طلقتين فى دماغهم هما الجوز من كتر قهرتك
والموضوع ده فكرنى بحاجه كانت حصلت معايا من كام سنه كده
وهى انى اتعرفت على صياد من كفر الدوار اتقابلنا عند فتح الله بالصدفه
وقعدنا ندردش شويه وسألنى على الاماكن اللى باصطاد فيها
جاوبته بكل برائه على كام مكان بالتفصيل وبحسن نيه
ولما انا سألته حضرتك بتصطاد فين بقى؟
حسيت من ملامح وشو انى ضربته رصاصه مش سألته سؤال
وحسيت انو اتردد فى الاجابه شويه
وبعدين جاوبنى وقال
فى منطقه اسمها (مرغب )قبل العامريه
قلتلو فين بالظبط
وبعد ترددد برده وصفلى المكان بالظبط
وبالفعل بعديها بيومين رحت المكان ده اللى وصفهولى
ورايح بقى وانا كلى شوق وامل انى هاسوى الهوايل
واجيب الديب من ديلو
واتفجأت ان المكان عباره عن منطقه مسكونه ومليانه بيوت ماينفعش الصيد فيها اصلا
ومشفتش يومها ولا حتى عصفوره فى المنطقه دى كلها
ودماغى لسعت يومها من كتر اللف فى الشمس عالفاضى
ساعتها بس فهمت انو كان بيوزعنى وخلاص ابن الــ...... اللذينه
ههههههههههههههههه
وده طبع معظم الصيادين على فكره
هو بينى وبينكو مش عيب ان الواحد يدارى على المنطقه اللى بيصطاد فيها
لكن العيب هو ان حد يتعشم فيك ويسألك وانت توزعو على اى منطقه تانيه معدومه وتدوخ اهله عالفاضى
وفى الاخر يرجع بدون صيد ويقعد يدعى عليك وعلى كل الصيادين وهو بيصلى العصر
وانا عن نفسى اى حد بيسألنى على المكان اللى باصطاد فيه
باقول العنوان بالتفصيل
ولو عاوزنى كمان اوصفلو الطريق فيه كام شجره هاقولو برده
وكده كده انا اصلا باكتب اسم المنطقه اللى اصطادت منها كل طلعة صيد فى الموضوع بتاع الرحله
لأنى مؤمن بأن الرزق ده حاجه من عند ربنا
وسعات انا كمان بكون انانى فى بعض الاوقات ومش باقول على بعض الاماكن المفضله عندى
لكن لو حد سألنى مش هاخبى عليه
وعشان خاطرى ياكبير لو صياد غلبان سألك بعد كده على مكان يروح يصطاد فيه متقطعش نفس اهله
ولو حد سالك على مكان صيد كويس
هايكون قدامك حل من اتنين
ياتقولو عى المكان بالظبط
يامتجاوبوش خالص احسن
وده افضل من انك تلففو مصر كلها عشان يمامه
وياريتو فى الاخر هايجيبها
واخيرا
فيها ايه يعنى لما تقول للواد المبتدئ الغلبان ده على مكان حلو يطلع يصطاد منو
على الاقل هاتبقى كسبت ثواب انك رسمت البسمه على وشه وهو لسه فى بداية الطريق
وارجو ان يكون الموضوع ده مفيد ويعجبكو
مع كامل احترامى لكم جميعا
امضاء
واحد مقروص من الموضوع ده قبل كده
هههههههههههههههههههههههه
__________________
*لـيس كـل مـن حــمـل السلاح كـان صيـادا*
*ولكن كل من كان صياداً كان للأخلاق عنوانا*
|