اسمع كلامى وخد بالنصيحه ( ومش هاتندم )
.............
السلام عليكم ورحمة اله وبركاته
النهارده هانتكلم عن عدة اشياء مهمه جداااااااااااااا لكل صياد
وهى ارتفاع نسبة الخطئ فى الاصابه فى بعض الطلعات
وهاقولكم على كام خطوه كده تعملوها قبل الخروج للصيد عشان ربنا يكرم ويبقى اليوم تمام
وطبعا من البدايه كلنا متفقين من الاول ان ده فى المقام الاول رزق من عند ربنا
وهو اينعم الرزق ده من عند الله ولا حيلة فيه
ولكن
قال رسول الله صلى الله عليه وسلم
اعقلها وتوكل
المهم
من المعروف لنا جميعا
ان فيه صيادين كتير بيطلعو طلعات صيد ومع الاسف معظمها بيفشل فشل زريع
مع ان بيكون فيهم قناصين كبار لايشق لهم غبار
وبرغم ذالك فيه بعض الطلعات ليهم برده بتفشل
وسعات انا كمان كان بيحصل معايا كده زمان لما كنت باخرج خروج عشوائى
وساعتها بتكون نتيجة الطلعه بعد عناء طويل بالشكل ده
ليييييييييييييييييه ؟
هاقولك انا ليه
الموضوع ده ليه عدة اسباب
اولا
من المعروف ان كلنا بنقوم للصيد من الفجر
وساعتها اقل نسبة تركيز للأنسان بتكون وهو لسه قايم من النوم فى الوقت ده
ويفضل مقفل ومش رايق لغاية مثلا الساعه 9 او 10 على مايفوق وينشط
وخصوصا لو انت قايم جعان نوم ومنمتش كويس
وساعتها حضرتك بتشيل سيفك ( بندقيتك ) على كتفك وتقوم خارج جرى على اليمام
وتقعد طاخ طاخ طاخ وتتفجأ ان معظم الضربات فى الطراوه ( ده لو مكانتش كلها فى الطراوه يعنى)
وطبعا انت مستغرب ساعتها ومش فاهم ايه اللى بيحصل واليمام مش بيقع ليه
والسبب فى ده بيكون كالاتى
بص ياباشا
انت تظبط بندقيتك وتطمن على الناشنكاهات قبل الطلعه بيوم مثلا
وفى اليوم اللى هاتخرج فيه للصيد اول ماتصحى من النوم
اغسل وشك بميه ساقعه
واتوضى وصلى الفجر
ولو قدرت تلعب اى تمرين رياضى لمدة خمس دقايق بس
يكون احسن
انا عارف ان التمرين الخمس دقايق مش هايفيدك فى حاجه بالنسبه للياقه
لأن خمس دقايق مش كفايه
ولكن الخمس دقايق تمرين دول كفيله بانها تنشطك وتنشط جسمك من حالة الخمول تماما
ولااااااااااااااااازم لازم تفطر قبل ماتخرج للصيد باى حاجه حتى ولو قليله
وتتوكل على الله وتدعى ربنا بالدعاء اللى يعجبك
يعنى انا مثلا باقول وانا طالع
اللهم ارزقنا الحلال وبارك لنا فيه
اعوذ بكلمات الله التامات من شر ماخلق
ثلاث مرات
واول ماتوصل للمكان اللى هاتصطاد فيه وقبل ماتبدأ صيد اعمل الاتى
وماتستهونش باللى هاقولو ده عشان هو ده اللى فيه المفيد والله
اولا
ادعك كفوف ايدك جامد اوى فى بعضها
لغاية ماتحس ان كفوف ايدك بقت دافيه وساخنه جدااااااااااا من الداخل
وبعدين حط كل كف على كل عين من عنيك الاتنين
بالجزء اللى متعلم عليه بالازرق ده
كلوة اليد
وخليك ضاغط بكف ايدك على عنيك برفق بدون دعك للعين لمدة 40 ثانيه
وكرر الموضوع ده تلات مرات
والحركه دى هاتنشط الدوره الدمويه لعنيك وتركيزك بدرجه كبيييييييييره اوى
وبعد كده امسك بندقيتك وحاول تنشن على اى هدف قدامك ثابت فى حجم اليمامه مثلا على مسافة 20 متر
واضرب عليه خمس ست رشات
والتجربه دى مش عشان تظبط الناشنكاه عليها
لانك انت ظابط البندقيه اصلا قبلها بيوم زى ماتفقنا
لكن التجربه دى عشان تزود تركيزك شويه فى الضرب
وبعد الخطوات دى توكل على الله وابدأ صيد
وان شاء الله ربنا هايكرمك
وهاتتفاجأ ان النتيجه ممكن تبقى كده
وساعتها هاتقعد على الكمبيوتر بقى وتكتب تفاصيل الرحله بتاعتك وتغيظ فينا براحتك
هههههههههههههههههه
ثانيا
خللى بالك انت ممكن تقعد ساعه تدور على يمام متلاقيش فى البدايه
عادى ماتزهقش اصبر شويه اكيد ربنا هايكرم
والدليل على كلامى ده شوف اخر طلعه ليا
جبت يمامتين من مكان فى ساعه
وجبت 20 يمامه تانين فى اقل من ساعه من مكان تانى
الخطوه الاخيره بقى اللى عايزكو تركزو فيها جامد اوى
مااااااااااينفعش يخرج مجموعة صيادين حوالى 5 او 8 صيادين فى مكان واحد
الا بقى لو هما طالعين رحله يتفسحو فيها مش اكتر
لكن لو طالعين طلعة صيد يبقى دى ليها مقاييس تانيه خالص
المفروض كل قريه او كل منطقة صيد مساحتها مثلا 10 كيلو مربع
مايدخلش فيها اكتر من اربع صيادين فى وقت واحد
وده عشان كل واحد من الاربعه يعرف يطاد براحته
لكن مع الاسف انت الايام دى ممكن تروح اى مكان وتلاقى هناك بال10 صيادين فى نفس المكان
وطبعا اكيد الصيادين الكبار فاهمين الكلام ده
وده لأن كل شىء وليه اصول
وانا عن نفسى سعات كتير باروح مكان والاقى فيه هناك صيادين
وحتى لو اتنين صيادين بس اللى فى المكان بافضل انى اسلم عليهم وبامشى على مكان تانى
واحتراما ليهم بارفض اضرب على اى هدف او طائر فى المنطقه اللى هما فيها
واخيرا
نصيحه لوجه الله
الصيد والقنص مشيا على الاقدام افضل وامتع من الصيد وانت راكب عربيه بملاييييييييين المرات
وانا مجرب الموضوع ده شخصيا
متحاولش تستخدم العربيه كتير الا بقى لو هاتنتقل من مكان لمكان تانى ابعد
وحاجه كمان قبل ما انسى
حاول بقدر الامكان تاخد معلقة عسل نحل كل يوم على الريق
وده طبعا معروف انو مفيد جدا للصحه العامه والنظر
وهايفرق معاك كتيييييييييييير اوى فى النظر وفى التركيز اثناء الصيد والله
ارجو ان ينال الموضوع اعجابكم
وتحياتى للجميع
__________________
*لـيس كـل مـن حــمـل السلاح كـان صيـادا*
*ولكن كل من كان صياداً كان للأخلاق عنوانا*
|