[كابتن محمود دياب]

ده موضوع من مواضيعى كنت كاتبه فى مسابقة للقصص الفكاهية
يارب يعجبكم

يوم فى حياة كل واحد فينا يوم فى حياتك يوم فى حياتى يوم فى حياتكم تعالو كده نجرب نشوف الدنيا عامله ايه ونسرق يوم من حياتنا وفى فسحة نقضيه
صحيت الصبح من النوم الشمس جميلة والهواء حلو والجو يساعد على الخروج لبست واتشيكت كده وخرجت من البيت ركبت العربية ونزلت مصر حبيت اغير جو كده وصلت الموقف ونزلت اتمشى فى شوارع لاانا عارفها ولا حتى دخلتها قبل كده الناس عادتها غريبة وافعالها اغرب وبابص جنبى لقيت بنت زى القمر سبحان من صور جمالها وبابص لقيت صرصار ماشى وراها البنطلون نازل لنص وسطه وشعره كله معقد وياه على فاترينة السلاسل الى فى رقبته وماشى وراها يعكسها ويقولها كلام سوقى مايتقلشى وتقوم الشهامة وخدانى وطبعا علشان البنت جميلة واروح اقوله مش عيب عليك كده ايه الى بتعمله ده لقيت صوت ناعم جاى من ورايا بيقولى وانت مالك صاعقة نزلت عليها وانا باسمع كلامها وهى بتقول ماتسيبه هو عاملك حاجة سيبته وقفايا بيامر عيش وعلى راى عم صلاح جاهين اعجب ماتعجب كل شىء له عجب المهم كملت طريقى وانا بحاول انسى نفسى الى حصل وبابص على الفاترين الكبيرة وانا ماشى وباشوف اسعار غريبة ايه ده بنطلون 300 جنيه قميص 200 جنيه الله يرحمك ياجدى كان زمان زمان يعنى ايام الجنيه الكبير ده الى كانو يطلقون عليه الجنيه الجبس لانه كان صعب انه يتصرف كان جدى ينزل بالجنيه يشترى بدلة لبابا وفستان لماما وبدلتين ليه وهدوم المدارس لينا وجلبيه لتيته وفستان لعمتو ويرجع ومعاه 60 قرش باقى ياه على ايام زمان عمرها ماترجع تانى ايه ده لمحت عربية فول وانا واقع من الجوع تمام قوى روحت وقفت فى الطابور واخدت دورى اخدت الطبق بتاعى وقعدت لقيت فى صوت جنبى التفت اشوفه ورجعت تانى بابص مالقتشى طبق الفول اتمسح بابص جنبى لقيت غوريلا قمت من سوكات جبت طبق تانى وحطيته قدامى بالتفت اجيب رغيف عيش مالقيتهوش قمت باصيت للى جنبى كده وقلتله حضرتك ماشفتش طبق الفول الى ... ويارتنى ماسالت بلاعة اتفتحت فى وشى وحلفلى بايمنات الدنيا وحلفانات غريبة كده والمصيبة وشه كله متلحوس فول قمت بعد مافطرت الفطار الى مافطرتهوش وانا باتمشى لقيت دش ميه ساقع نازل عليا بابص فوق لقيت واحدة واقفة فوق وبتقولى لامؤاخذه ياخويا دى مايه نضيفه مية حموم حمادة تقولشى مية زمزم وقفت فى الشمس شوية على ما نشفت ولقيت الجو قرب يليل روحت الموقف وركبت اتوبس كان زحمة لكن ماكنشى فيه غيره قدامى قعدت واقف طول السكة ولقيت بنت من الى بيقولو عليه موزة صاروخ جت لزقت جنبى وقالتلى سورى يالهوى عالرقة مش معقول فرحت قوى وطول السكة هى لازقة فيا نزلت من الاوتوبيس وانا مش عايز انزل خالص نزلت فى الموقف بتاع العربيات الى بتودينى بلدى روحت اشترى شوية لب وباحط ايدى فى جيبى مالقتش المحفظة اهههههههههه افتكرت الاوتوبيس قعدت استغفر ربنا واقول يارب سامحنى ده جزائى اتصلت باخويا جه خدنى وروحت بلدنا وطلعت بيتنا ومن بعدها حلفت توبة ماخرج من بيتى تانى على الاقل لوحدى
يارب يكون عجبكم الموضوع